Lafason ki Zeova i ed nou andire

1. Akoz nou bezwen landirans e lekel ki kapab ed nou? (1 Pyer 5:10)

DAN sa bann dernyen zour ki vreman difisil, pep Zeova i bezwen annan landirans. Serten pe soufer akoz bann maladi kronik. Lezot pe soufer parski en dimoun ki zot kontan in mor. I annan lezot ki pe fer fas avek lopozisyon ki swa par zot fanmir oubyen par bann zofisye gouvernman. (Mat. 10:18, 36, 37) Ou kapab asire ki nenport problenm ki ou pe fer fas avek, Zeova i kapab ed ou andire.—Lir 1 Pyer 5:10.

2. Kwa ki fer nou kapab andire?

² Landirans i sa abilite pour persevere e pour kontinyen annan lespwar menm si nou pe fer fas avek problenm, persekisyon oubyen tantasyon. Lo nou menm, nou napa sa lafors pour andire. Konman bann Kretyen nou ganny lafors sorti kot Zeova, sa enn ki donn nou “lafors . . . ki pli pwisan ki nou prop lafors.” (2 Kor. 4:7) Dan sa lartik, nou pou vwar kat provizyon ki Zeova in donnen pour ed nou andire. Nou pou osi vwar ki nou bezwen fer pour ganny bann byenfe avek sak sa bann provizyon.

LAPRIYER

3. Akoz nou kapab dir ki lapriyer i en mirak?

³ Zeova in donn nou en keksoz merveye ki kapab ed nou andire. I’n fer li posib pour nou koz avek li menm si nou fer pese. (Ebr. 4:16) Reflesir lo sa: Nou kapab koz avek Zeova dan lapriyer, nenport ler e lo nenport keksoz. I kapab tann nou nenport langaz ki nou koze e nenport landrwa kot nou ete, menm si nou dan en landrwa nou tousel oubyen nou dan prizon. (Zon. 2:1, 2; Akt 16:25, 26) Si nou sitan enkyet ki nou pa kapab trouv bann mo pour eksprim nou santiman, Zeova i konpran ki nou anvi dir li. (Rom. 8:26, 27) Lapriyer i vreman en mirak!

4. Akoz nou kapab dir ki ler nou demann Zeova pour ed nou andire sa i an armoni avek son lavolonte?

⁴ Dan son Parol, Zeova i asir nou ki “nenport kwa ki nou demann li ki an armoni avek son lavolonte, i pou ekout nou.” (1 Zan 5:14) Eski nou kapab demann Zeova pour ed nou andire? Wi! Parski sa i an armoni avek son lavolonte. Akoz nou kapab dir sa? Ler nou andire, Zeova i kapab reponn Satan, sa enn ki pe provok li. (Prov. 27:11) Osi, Labib i dir ki Zeova i anvi “servi son lafors pour ed bann ki pe servi li avek tou zot leker.” (2 Kron. 16:9) Alor nou kapab asire ki Zeova i annan sa lafors e i anvi ed nou andire.—Iza. 30:18; 41:10; Lik 11:13.

5. Ki mannyer lapriyer i kapab donn nou lape lespri? (Izai 26:3)

⁵ Labib i dir ki ler nou senserman priy Zeova konsernan nou bann problenm, “lape Bondye ki depas tou sa ki nou kapab konpran i protez [nou] leker ek lespri.” (Fili. 4:7) Reflesir lo ki sa i vedir. Bann dimoun ki pa servi Zeova i fer fas avek problenm zot osi e petet zot fer diferan keksoz pour zot kapab ganny lape lespri. Par egzanp, serten i fer en kalite meditasyon kot zot devid zot lespri e pa mazin nanryen, me sa kalite meditasyon i danzere pour zot spirityelman. (Konpar Matye 12:43-45.) Apre tou, sa lape ki Zeova i donn nou ler nou priye i bokou pli siperyer ki okenn lape ki en dimoun ti pou gannyen si i fer sa kalite meditasyon. Ler nou priy Zeova, nou montre ki nou konpletman depan lo li e li i “kontinyen fer [nou] anpe.” (Lir Izai 26:3.) En fason ki i fer sa, i par ed nou pour rapel bann laverite ki nou’n aprann dan son Parol ki rekonfort nou. Sa bann laverite i fer nou annan lape lespri ek leker parski i fer nou rapel ki Zeova i kontan nou e i anvi ki nou reisi.—Ps. 62:1, 2.

6. Ki ou kapab enkli dan ou lapriyer? (Vwar portre.)

⁶ Sa ki ou kapab fer. Ler ou pe fer fas avek en problenm “zet ou fardo lo Zeova” e demann li pour donn ou lape lespri. (Ps. 55:22) Demann li pour donn ou sa lasazes ki ou bezwen pour ou kapab fer fas avek ou problenm. (Prov. 2:10, 11) Pa oubliye pour remersye li dan ou lapriyer. (Fili. 4:6) Port latansyon pour ou kapab vwar lafason ki Zeova pe ed ou andire e remersye li pour son led. Pa les ou problenm anpes ou vwar lafason ki Zeova in deza beni ou.—Ps. 16:5, 6.

PAROL BONDYE

7. Ki mannyer ler nou etidye Labib, sa i kapab ed nou andire?

⁷ Zeova in donn nou son Parol pour ed nou andire. Dan Labib, i annan en kantite verse ki asir nou ki Zeova pou ed nou. Annou vwar zis en legzanp. Matye 6:8 i dir: “Zot Papa i konn sa ki zot bezwen menm avan ki zot demann li.” Zezi ki ti dir sa bann parol e i konn Zeova pli byen ki okenn lezot dimoun. Alor nou kapab asire ki ler nou pe soufer, Zeova i konnen ki nou bezwen e i pou ed nou. Dan Labib i annan lezot verse en pe parey ki kapab donn nou sa lafors ki nou bezwen pour andire.—Ps. 94:19.

8. (a) Ki en prensip Labib ki kapab ed nou andire? (b) Kwa ki kapab ed nou mazin bann prensip Labib ler nou bezwen?

⁸ Bann prensip Labib i kapab ed nou andire. Sa bann prensip i kapab donn nou sa lasazes ki nou bezwen pour fer bann bon desizyon. (Prov. 2:6, 7) Par egzanp, Labib i dir ki nou devret aret enkyet konsernan sa ki pou arive dan lavenir e ki o kontrer nou devret depan lo Zeova sak zour. (Mat. 6:34) Si nou annan labitid lir Labib toulezour e medit lo sa ki nou lir, i pou pli fasil pour nou mazin bann prensip ki nou bezwen ler nou bezwen zot.

9. Ki mannyer bann resi dan Labib i fer nou pli asire ki Zeova pou ed nou?

⁹ Dan Labib, i annan bann resi konsernan bann dimoun ki ti annan konfyans dan Zeova e ki Zeova ti ed zot. (Ebr. 11:32-34; Zak 5:17) Ler nou reflesir lo bann resi koumsa, sa i fer nou pli asire ki Zeova i “nou landrwa kasyet ek nou lafors. I fasilman ed nou ler nou dan problenm.” (Ps. 46:1) Ler nou reflesir lo lafason ki bann serviter Zeova dan lepase ti kontinyen reste fidel avek Zeova menm si zot ti fer fas avek problenm, sa i motiv nou pour swiv zot legzanp e pour andire nou osi.—Zak 5:10, 11.

10. Ki ou kapab fer pour pli byen benefisye avek Parol Bondye?

¹⁰ Sa ki ou kapab fer. Lir Labib toulezour e fer en lalis bann verse ki ou konnen pou ed ou. En kantite frer ek ser in vwar ki ler zot lir teks pour lazournen depi bomaten, sa i ed zot pour konmans lazournen avek en panse ankourazan sorti dan Labib. En ser ki apel Mariea ti vwar ki sa i vre ler dokter ti dir ki tou le de son paran ti ganny kanser. Kwa ki ti ed li andire? Pandan ki i ti pe pran swen avek zot dan zot bann dernyen mwan, i dir: “Tou le bomaten mon ti lir sa verse dan sa brosir Egzamin Labib sak zour e mon ti medit lo la. Sa labitid ti ed mwan pour ranpli mon lespri avek en panse spirityel ki ti ed mwan pour konsantre lo en keksoz ki pli enportan ki mwan ek bann problenm ki mon ti pe pas ladan.”—Ps. 61:2.

BANN FRER EK SER DAN KONGREGASYON

11. Ler nou pe pas dan problenm, akoz i ankourazan pour konnen ki nou pa tousel?

¹¹ Zeova in donn nou bann frer ek ser partou dan lemonn pour ed nou andire. Ler nou konnen ki “tou [nou] bann frer dan lemonn pe pas atraver menm soufrans,” sa i rekonfort nou parski nou konnen ki nou pa tousel. (1 Pyer 5:9) Nou kapab asire ki nenport sityasyon ki nou pe fer fas avek, lezot in fer fas avek en keksoz en pe parey e zot in andire. Sa i vedir ki nou osi nou kapab andire!—Akt 14:22.

12. Ki mannyer nou bann frer ek ser i kapab ed nou e ki nou kapab fer pour zot? (2 Korentyen 1:3, 4)

¹² Anmezir ki nou andire, bann frer ek ser i kapab ankouraz nou. Zapot Pol ti eksperyans sa. Dan son bann let, i ti mansyonn non bann ki ti ed li ler i ti en prizonnyen dan en lakaz e i ti remersye zot. Sa bann Kretyen ti rekonfort Pol, ankouraz li e donn li bann led ki i ti bezwen. (Fili. 2:25, 29, 30; Kol. 4:10, 11) Ozordi nou kapab eksperyans en keksoz en pe parey. Ler nou bezwen led pour andire, nou bann frer ek ser i la pour nou e ler zot bezwen sipor, nou osi nou la pour zot.—Lir 2 Korentyen 1:3, 4.

13. Kwa ki ti ed en ser ki apel Maya pour andire?

¹³ Bann frer ek ser ti vreman ankouraz en ser ki apel Maya ki reste Larisi. An 2020, lapolis Larisi ti fouy dan lakaz Maya e pli tar i ti ganny anmennen ankour parski i ti’n koz lo son krwayans avek lezot. Maya i dir: “Pandan sa letan mon ti fatige, enkyet e sagren me mon bann frer ek ser ti telefonn mwan e ekri mwan bann mesaz ek let e sa ti asir mwan ki zot ti kontan mwan. Mon ti toultan konnen ki bann frer ek ser ti kontan mwan e nou ti parey en fanmir. Me depi 2020 mon vreman konvenki ki sa i vre.”

14. Ki mannyer nou kapab ganny led bann frer ek ser ler nou pe pas dan problenm? (Vwar portre.)

¹⁴ Sa ki ou kapab fer. Ler ou pe fer fas avek en problenm, reste pros avek ou bann frer ek ser. Pa ezite pour demann bann ansyen led. Zot kapab vin parey “en landrwa kasyet ler i annan divan, [ek] en landrwa kasyet ler i annan gro lapli.” (Iza. 32:2) Gard antet ki bann frer ek ser osi pe pas dan problenm. Ler ou fer en bon keksoz pour en dimoun ki dan bezwen, sa pou ed ou annan en bon pwennvi lo ou problenm e pou ed ou andire.—Akt 20:35.

NOU LESPWAR

15. Ki mannyer sa lespwar ki Zezi ti annan ti ed li e ki mannyer sa lespwar ki nou annan i ed nou? (Ebre 12:2)

¹⁵ Zeova in donn nou en lespwar ki nou asire pou vin vre e sa i ed nou pour andire. (Rom. 15:13) Rapel ki sa lespwar ki Zezi ti annan ti ed li andire sa zour pli difisil dan son lavi lo later. (Lir Ebre 12:2.) Zezi ti konnen ki son fidelite ti pou montre ki tou bann mansonz ki Satan ti’n dir lo Zeova pa vre e ki Zeova i merite ganny loner. I ti anvi retourn kot son Papa dan lesyel e avek letan dirize konman Lerwa dan Rwayonm Bondye ansanm avek son bann frer. Dan menm fason, sa lespwar ki nou annan pour viv pour touzour dan nouvo lemonn i ed nou pour andire ler nou fer fas avek problenm dan sa lemonn Satan.

16. Ki mannyer lespwar ti ed en ser andire e ki ou aprann avek sa ki i ti dir?

¹⁶ Remarke ki mannyer sa lespwar pour viv dan nouvo lemonn ti ed en ser ki reste Larisi ki apel Alla. Msye Alla ti ganny arete e i ti ganny met dan prizon pandan ki i ti pe esper son ka pas ankour. Ler sa ti arive, Alla ti dir: “Ler mon priy Zeova konsernan sa lespwar ki i’n donn nou e ler mon medit lo lavenir, sa i anpes mwan vin tro dekouraze. Mon konnen ki apre sa bann problenm i pou annan bann bon keksoz. Zeova pou ranport laviktwar e i pou rekonpans nou.”

17. Ki mannyer nou kapab montre ki nou rekonesan pour sa lespwar ki Zeova in donn nou? (Vwar portre.)

¹⁷ Sa ki ou kapab fer. Pran letan pour reflesir lo sa zoli lavenir ki Zeova in promet ou. Imazin ou lekor dan nouvo lemonn e imazin bann benediksyon ki nou pou gannyen. Bann problenm ki nou fer fas avek la konmela i “tanporer e leze” konpare avek lafason ki lavi pou ete ler nou pou viv pour touzour dan Paradi. (2 Kor. 4:17) Osi fer tou sa ki ou kapab pour koz avek lezot konsernan ou lespwar. Reflesir lo ki mannyer lavi i difisil pour bann dimoun ki pa servi Zeova. Zot annan en kantite problenm e zot pa konn bann keksoz merveye ki Zeova in promet pour lavenir. Menm si ou zis dir zot detrwa pti keksoz, sa i kapab fer zot anvi konn plis konsernan Rwayonm Zeova e bann keksoz ki i’n promet.

18. Akoz nou kapab annan konfyans dan bann promes Zeova?

¹⁸ Zob ti fer fas avek en kantite problenm e i ti reste fidel avek Zeova. Apre tousala i ti dir Zeova: “Aprezan, mon konpran ki ou kapab fer tou keksoz e napa nanryen ki enposib pour ou fer.” (Zob 42:2) Parey Zob ti aprann, i napa nanryen ki kapab anpes Zeova fer sa ki in promet. Sa laverite i kapab donn nou lafors pour andire. Pour ed nou konpran sa, imazin en madanm ki malad e ki dekouraze parski plizyer dokter pa’n kapab geri li. Me ler i trouv en bon dokter ki eksperyanse, sa dokter i dir li ki i gannyen e ki mannyer i pou tret son maladi. Sa madanm i santi li soulaze menm si i pou pran en pe letan pour li kapab ganny geri. Aprezan i vwar li pli fasil pour andire parski i annan lespwar ki i pou ganny geri. Dan menm fason, nou kapab kontinyen andire parski nou asire ki promes Bondye konsernan Paradi pou vin vre.

19. Ki nou bezwen pour nou kapab andire?

¹⁹ Parey nou’n vwar, Zeova in donn nou lapriyer, son Parol, nou bann frer ek ser ek nou lespwar, pour ed nou andire ler nou pas dan problenm. Si nou fer nou mye pour servi sa bann keksoz, Zeova pou ed nou dan nenport problenm ki nou pas ladan. Nou pou kapab kontinyen andire ziska sa letan kot lemonn Satan ek tou soufrans pou nepli egziste.—Fili. 4:13.