Ou kapab asire ki Zeova i kontan ou

1. Akoz ou ti dedye ou lavi avek Zeova? (Vwar portre.)

ESKI ou ankor rapel ler ou ti dedye ou lavi avek Zeova? Ou ti fer sa desizyon parski ou ti aprann konn li e ou ti kontan li. Ou ti promet ki servi li ti pou vin sa keksoz pli enportan dan ou lavi e ki ou ti pou kontinyen kontan li avek tou ou leker, nanm, lespri ek lafors. (Mark 12:30) Depi sa zour, ou lanmour pour li in vin pli for. Me ki ou pou reponn si en dimoun i demann ou: “Eski ou asire ou kontan Zeova?” San ezite, ou pou dir: “Mon kontan li plis ki okenn lezot dimoun oubyen okenn keksoz.”

2-3. Ki Zeova i anvi nou asire e ki nou pou vwar dan sa lartik? (Zeremi 31:3)

² Ki ou ti pou reponn si en dimoun ti demann ou: “Eski ou asire ki Zeova i kontan ou?” Eski ou pou ezite pour reponn? Petet parski ou krwar ki ou pa merit lanmour Zeova. En ser ki ti annan en move lanfans ti dir: “Mon konnen ki mon kontan Zeova. Mon napa okenn dout konsernan sa. Me souvandfwa, mon doute si Zeova i kontan mwan.” Me ki mannyer Zeova i vreman santi anver ou?

³ Zeova i anvi ki ou asire ki i kontan ou. (Lir Zeremi 31:3.) An realite, Zeova ki ti atir ou ver li. Ler ou ti dedye ou lavi avek li e ou ti batize, ou ti ganny en keksoz vreman presye setadir son lanmour fidel. Sa i vedir ki i kontan ou en kantite e i pa pou zanmen kit ou. Vi ki Zeova i annan lanmour fidel pour son bann serviter enkli ou, sa i fer li konsider zot konman son “propriyete ki annan valer.” (Mal. 3:17, not.) Zeova i anvi ki ou asire ki i kontan ou zis parey Pol ti asire ki i kontan li. Pol ti sitan asire ki Zeova i kontan li, ki i ti ekri: “Mon konvenki ki ni lanmor, ni lavi, ni lanz, ni gouvernman, ni keksoz la konmela, ni keksoz a lavenir, ni pouvwar, ni oter, ni fonder, ni okenn lezot kreasyon pa pou kapab anpes Bondye kontan nou.” (Rom. 8:38, 39) Dan sa lartik, nou pou vwar akoz i enportan pour nou asire ki Zeova i kontan nou e kwa ki kapab ed nou fer sa.

AKOZ I ENPORTAN KI NOU ASIRE KI ZEOVA I KONTAN NOU?

4. Ki mannyer nou kapab reziste enn bann riz Satan?

⁴ Ler nou asire ki Zeova i kontan nou, nou pou kapab reziste enn bann “riz” Satan. (Efe. 6:11) Satan pou fer tou sa ki i kapab pour anpes nou servi Zeova. Enn bann riz ki Satan i servi i sa mansonz ki Zeova pa kontan nou. Pa zanmen oubliye ki Satan i kontan profit lo bann loportinite e souvandfwa i atak nou ler nou vilnerab, petet ler nou dekouraze akoz fot ki nou’n fer dan lepase, bann problenm ki nou pe pas ladan oubyen ler nou enkyet konsernan lavenir. (Prov. 24:10) Satan i parey en lyon ki kontan atak bann zannimo ki fay e ki pa kapab defann zot lekor. Alor i profit lo bann moman kot nou dekouraze pour li esey fer nou aret servi Zeova. Me si nou asire ki Zeova i kontan nou, nou pou pli byen kapab “reziste” Satan ek son bann latak.—1 Pyer 5:8, 9; Zak 4:7.

5. Akoz nou bezwen santi ki Zeova i kontan e apresye nou?

⁵ Ler nou asire ki Zeova i kontan nou, nou vin pli pros avek li. Akoz nou kapab dir sa? Zeova in kree nou avek sa bezwen pour nou demontre lanmour anver lezot e sa bezwen pour lezot demontre lanmour anver nou osi. Ler en dimoun i kontan nou, sa i fer nou kontan sa dimoun osi. Alor pli nou santi ki Zeova i kontan e apresye nou, pli nou pou kontan li. (1 Zan 4:19) Anmezir nou kontan li plis, li osi i pou kontan nou plis. Labib i dir nou: “Vin pros avek Bondye e i pou vin pros avek zot.” (Zak 4:8) Ki nou kapab fer pour nou pli asire ki Zeova i kontan nou?

KWA KI POU ED NOU ASIRE KI ZEOVA I KONTAN NOU?

6. Ki nou kapab priy lo la si nou pa asire ki Zeova i kontan nou?

⁶ Kontinyen priy Zeova pour ed ou konpran akoz i kontan ou. (Lik 18:1; Rom. 12:12) Petet ou pou bezwen priy Zeova plizyer fwa par zour e demann li pour ed ou vwar ou lekor parey li i vwar ou. I kapab ki ou sitan annan en move pwennvi lo lekor, ki ou vwar li difisil pour krwar ki Zeova i kontan ou. Me rapel ki Zeova i pli gran ki ou leker. (1 Zan 3:19, 20) I konn ou pli byen ki ou konn ou lekor e i vwar bann bon kalite ki ou annan ki petet ou, ou pa vwar. (1 Sam. 16:7; 2 Kron. 6:30) Pa ezite pour ‘devid ou leker’ avek li pour demann li pour ed ou asire ki i kontan ou. (Ps. 62:8) Apre ki ou’n priye, i enportan pour ou fer sa bann keksoz swivan.

7-8. Ki mannyer bann Psonm i ed nou pour asire ki Zeova i kontan nou?

⁷ Krwar sa ki Zeova i dir. Zeova ti enspir bann zonm ki ti ekri Labib pour ekri konsernan li. Alor nou kapab annan konfyans ki sa ki zot in dir lo Zeova, i vre. Reflesir lo sa zoli fason ki psalmis David ti dekrir Zeova. I ti dir: “Zeova i pros avek bann ki annan en leker brize, i sov bann ki dekouraze.” (Ps. 34:18) Ler ou sagren, ou kapab santi ki napa personn ki konpran ou oubyen ki kapab ed ou. Me Zeova i promet ki dan bann moman koumsa, i pros avek ou parski i vwar ki ou bezwen li plis ki oparavan. Dan en lot psonm, David ti ekri: “Met mon larm dan ou boutey lapo.” (Ps. 56:8) Zeova i vwar ler ou sagren e pe soufer. I vreman enterese avek ou ek sa ki ou pe pas ladan. Zis parey sak gout delo dan en boutey lapo i presye pour en dimoun ki pe vwayaze dan en dezer, ou bann larm i presye pour Zeova e i rapel sak fwa ki ou soufer e plere. Dan Psonm 139:3, nou lir: “[Zeova] ou konn tou sa ki mon fer.” Zeova i vwar tou sa ki ou fer me i konsantre lo bann bon keksoz ki ou fer. (Ebr. 6:10) Akoz? Parski i apresye tou sa ki ou fer pour esey fer li plezir.a

⁸ Atraver bann verse rekonfortan ki dan son Parol, i konmsi Zeova pe dir: “Mon oule ou konnen ki kantite mon kontan ou e apresye ou.” Parey nou ti aprann pli boner, Satan i oule ou krwar ki Zeova pa kontan ou. Alor, si parfwa ou pa asire ki Zeova i kontan ou, demann ou lekor: ‘Lekel ki mon pou krwar, “papa mansonz” oubyen “Bondye laverite”?’—Zan 8:44; Ps. 31:5.

9. Ki Zeova i asir bann ki kontan li? (Egzod 20:5, 6)

⁹ Reflesir lo lafason ki Zeova i santi anver bann ki kontan li. Mazin lo sa ki Zeova ti dir Moiz ek bann Izraelit. (Lir Egzod 20:5, 6.) Zeova ti promet ki i pou kontinyen demontre lanmour fidel anver bann ki kontan li. Sa bann parol i asir nou ki nou Bondye i fidel e i pa pou zanmen refize kontan en dimoun ki kontan li. (Nee. 1:5) Alor si parfwa ou santi ki Zeova pa kontan ou, demann ou lekor: ‘Eski mwan mon kontan Zeova?’ Apre mazin sa: Si ou kontan Zeova e ou pe fer ou mye pour fer li plezir, Zeova i asir ou ki i kontan ou en kantite. (Dan. 9:4; 1 Kor. 8:3) Andotmo, si ou asire ki ou kontan Zeova, akoz ou annan dout konsernan si i kontan ou? Ou kapab asire ki i toultan fidel e i pou toultan kontan ou.

10-11. Ki mannyer Zeova i anvi ou vwar sa ranson? (Galat 2:20)

¹⁰ Medit lo sa ranson. Sakrifis Zezi Kri i sa pli gran kado ki Zeova in donn bann imen. (Zan 3:16) Me eski Zeova in donn son Garson pour ou osi? Wi! Annou vwar leksperyans zapot Pol. Rapel ki i ti’n fer bann pese grav avan ki i ti vin en Kretyen e i ti bezwen kontinyen lalit avek son bann febles. (Rom. 7:24, 25; 1 Tim. 1:12-14) Kantmenm sa, i ti vwar sa ranson konman en kado ki Zeova ti’n donn li personnelman. (Lir Galat 2:20.) Rapel ki Zeova ti enspir Pol pour ekri sa bann parol. Tou sa ki dan Labib in ganny ekrir pour ansenny nou. (Rom. 15:4) Sa ki Pol ti dir i montre lafason ki Zeova i anvi ou vwar sa ranson, setadir konman en kado ki i’n donn ou personnelman. Ler ou vwar sa ranson dan sa fason, sa pou fer ou pli asire ki Zeova i kontan ou.

¹¹ Nou remersye Zeova parski i’n anvoy Zezi lo later pour mor pour nou. Me Zezi ti osi vin lo later pour dir dimoun laverite konsernan Bondye. (Zan 18:37) Sa laverite ki Zezi ti ansennyen, i enkli lafason ki Zeova i santi anver son bann zanfan.

ZEZI I KAPAB ED NOU POUR ASIRE KI ZEOVA I KONTAN NOU

12. Akoz nou kapab krwar sa ki Zezi ti dir lo Zeova?

¹² Ler Zezi ti lo later, i ti kontan koz avek bann dimoun konsernan bann kalite ki Zeova i annan. (Lik 10:22) Nou kapab krwar sa ki Zezi ti dir lo Zeova. Apre tou, avan ki Zezi ti vin lo later, i ti ansanm avek son Papa dan lesyel pour plizyer bilyon lannen. (Kol. 1:15) Zezi i konnen ki kantite son Papa i kontan li. I’n osi vwar lafason ki son Papa in demontre lanmour anver Son bann lanz fidel e anver son bann garson ek fiy ki fidel lo later. Ki mannyer Zezi i ed lezot pour asire ki Bondye i kontan zot?

13. Ki mannyer Zezi i anvi nou vwar Zeova?

¹³ Zezi ti anvi nou vwar Zeova parey li i vwar. Dan bann Levanzil, Zezi ti refer avek Zeova konman “Papa” plis ki 160 fwa. Ler i ti koz avek son bann disip, i ti dir ki Zeova i “zot Papa” oubyen “zot Papa dan lesyel.” (Mat. 5:16; 6:26) En not letid pour Matye 5:16 dan Labib letid an Angle i dir: “Avan Zezi ti vin lo later, bann serviter Zeova ti servi plizyer tit pour dekrir e koz avek Zeova. Zot ti servi bann tit parey ‘Tou Pwisan,’ ‘Sa Enn Tre O’ ek ‘Gran Kreater.’ Me Zezi ti souvan apel Zeova, nou ‘Papa,’ en term ki bokou dimoun ti servi. Sa term i montre ki Zeova i anvi ki son bann serviter i santi zot pros avek li zis parey en zanfan i santi li pros avek son papa ki kontan li.” I kler ki Zezi ti pe ansenny nou ki Zeova i kontan nou zis parey en bon Papa i kontan son bann zanfan ki presye. Aprezan, annou vwar de moman kot Zezi ti servi sa term “Papa.”

14. Ki mannyer Zezi ti montre ki sakenn parmi nou i presye pour nou Papa ki dan lesyel? (Matye 10:29-31) (Vwar portre.)

¹⁴ Annou vwar en premye legzanp kot Zezi ti servi sa term “Papa” dan Matye 10:29-31. (Lir.) Bann sren i bann pti zwazo ki pa pou zanmen kontan oubyen ador Zeova. Kantmenm sa, nou Papa i apresye sa bann sren e i konnen kan enn i tonm ater. Si Zeova i apresye en pti zwazo sa kantite, nou kapab asire ki i apresye son bann serviter fidel plis ankor parski nou kontan li e nou ador li. Dan Labib letid an Angle, i annan en not letid dan verse 30 ki relye avek sa bann parol “i menm konnen konbyen bren seve i annan lo zot latet.” Sa not i dir: “Lefet ki Zeova i konn en pti detay personnel koumsa, sa i fer nou asire ki Zeova i vreman enterese avek sakenn parmi nou.” I kler ki Zezi i anvi nou asire ki sakenn parmi nou i presye pour nou Papa ki dan lesyel.

15. Ki sa ki Zezi ti dir dan Zan 6:44 i dir ou konsernan ou Papa ki dan lesyel?

¹⁵ Remark en dezyenm legzanp kot Zezi ti servi sa term “Papa.” (Lir Zan 6:44.) Ou Papa ki dan lesyel in atir ou ver laverite. Akoz i’n fer sa? Parski i’n vwar ki ou annan sa bon kondisyon leker. (Akt 13:48) En not letid pour Zan 6:44 i dir ki i kapab ki Zezi ti pe refer avek sa ki Zeova ti dir dan Zeremi 31:3 ki nou verse tenm pour sa lartik. Sa verse i dir: “Mon’n atir ou kot mwan avek mon lanmour fidel [oubyen, Mon’n kontinyen demontre lanmour fidel anver ou].” (Zer. 31:3, not.; Ose. 11:4) Reflesir lo sa ki sa i vedir. Ou Papa ki dan lesyel ki kontan ou i toultan vwar bann bon kalite ki ou annan, menm si ou, ou pa vwar.

16. (a) Ki Zezi ti pe ansenny nou e akoz nou devret krwar li? (b) Ki ou kapab fer pour pli asire ki Zeova i sa Papa ki ou bezwen? (Vwar bwat “Sa Papa ki nou tou nou bezwen.”)

¹⁶ Par dekrir Zeova konman nou Papa, dan en sans, Zezi ti pe dir nou: “Zeova pa zis mon Papa me i ou Papa osi. Mon asir ou ki i kontan ou e i vreman enterese avek ou.” Alor si parfwa ou pa asire si Zeova i kontan ou, demann ou lekor: ‘Pa mon devret krwar sa ki Garson Bondye in dir parski i konn nou Papa pli byen e i toultan koz laverite?’—1 Pyer 2:22.

KONTINYEN ASIRE KI ZEOVA I KONTAN OU

17. Akoz nou bezwen kontinyen asire ki Zeova i kontan nou?

¹⁷ Nou bezwen fer tou sa ki nou kapab pour kontinyen asire ki Zeova i kontan nou. Parey nou’n vwar pli boner, nou lennmi Satan pe fer tou sa ki i kapab pour fer nou aret servi Zeova. Vi ki Satan i anvi afebli nou, i pou kontinyen esey fer nou krwar ki Zeova pa kontan nou. Nou pa devret les Satan ranport laviktwar.—Zob 27:5.

18. Ki ou kapab fer pour kontinyen asire ki Zeova i kontan ou?

¹⁸ Dan sa lartik, ou’n aprann sa ki ou kapab fer pour pli asire ki Zeova i kontan ou. Ou kapab kontinyen priy li e demann li pour ed ou vwar ou lekor parey li i vwar ou. Medit lo lafason ki bann ekriven Labib i dekrir sa lanmour ki Zeova i annan pour bann ki kontan li. Rapel ki Zeova pou toultan kontan bann dimoun ki kontan li. Medit lo akoz ou kapab konsider sa ranson konman en kado ki Zeova in donn ou personnelman. Annan konfyans ki Zeova i ou Papa zis parey Zezi ti dir. Koumsa si en dimoun i demann ou: “Eski ou asire ki Zeova i kontan ou?” Ou pou asire e ou pou reponn: “Wi, i kontan mwan e toulezour mon fer mon mye pour montre li ki mon kontan li.”