Ou kapab asire ki Zeova in pardonn ou

1-2. Ki mannyer nou santi ler Zeova i pardonn nou pese? (Vwar portre.)

LERWA David ti’n fer bann fot grav dan son lavi e i ti konnen ki mannyer en dimoun i santi ler i regrete pour son bann fot. (Ps. 40:12; 51:3; lentrodiksyon) Me i ti repantir senserman e Zeova ti pardonn li. (2 Sam. 12:13) Sa i fer ki i ti konpran sa soulazman ki en dimoun i santi ler Zeova i pardonn li.—Ps. 32:1.

² Parey David, nou osi nou kapab santi nou soulaze ler Zeova i pran pitye pour nou e pardonn nou. I rekonfortan pour konnen ki menm si nou fer bann pese grav, Zeova i pare pour pardonn nou si nou senserman repantir, konfes nou pese e fer nou mye pour pa repet menm fot. (Prov. 28:13; Akt 26:20; 1 Zan 1:9) I osi rekonfortan pour konnen ki Zeova i pardonn nou konpletman ki i konmsi nou pa’n zanmen fer sa pese.—Ezek. 33:16.

3-4. Ki mannyer en ser ti santi apre ki i ti’n batize e ki nou pou vwar dan sa lartik?

³ Serten i vwar li difisil pour aksepte ki Zeova in pardonn zot. Annou vwar leksperyans Jennifer. Jennifer ti grandi dan laverite me ler i ti en adolesan, i ti konmans fer bann move keksoz e i ti kasyet sa ki i ti pe fer. Plizyer lannen apre, i ti retourn kot Zeova e avek letan i ti kalifye pour batize. I dir: “Dan lepase mon ti souvan komet imoralite seksyel, bwar en kantite, mon ti annan en move lakoler e mon ti kontan bann keksoz materyel. Mon ti konnen ki apre ki mon ti’n sipliy Bondye pour pardonn mwan e mon ti’n repantir, sakrifis Kris ti pou fer mwan prop. Me mon pa ti kapab konvenk mon leker ki Zeova ti’n pardonn mwan.”

⁴ Eski parfwa ou vwar li difisil pour konvenk ou leker ki Zeova in pardonn ou pour bann fot ki ou’n fer dan lepase? Mazin leksperyans David. I ti asire ki Zeova ti’n pran pitye pour li. Zeova i anvi nou santi parey. Dan sa lartik, nou pou vwar akoz nou bezwen aksepte ki Zeova in pardonn nou e kwa ki pou ed nou fer sa.

AKOZ NOU BEZWEN AKSEPTE KI ZEOVA IN PARDONN NOU?

5. Ki Satan i anvi nou krwar? Donn en legzanp.

⁵ Ler nou aksepte ki Zeova in pardonn nou, nou pa pou tonm dan enn bann latrap Satan. Gard antet ki Satan pou fer tou sa ki i kapab pour fer nou aret servi Zeova. Pour fer sa, Satan i kapab fer nou krwar ki nou bann pese i sitan grav ki Zeova pa pou zanmen pardonn nou. Annou vwar sa ki ti arive avek en zonm dan kongregasyon Korent ki ti ganny tire dan kongregasyon akoz i ti’n komet imoralite seksyel. (1 Kor. 5:1, 5, 13) Pli tar ler i ti repantir, Satan ti anvi ki bann frer ek ser pa akeyir li dan kongregasyon e ki zot refize pardonn li. Menm si sa zonm ti’n repantir, Satan ti osi anvi ki sa zonm i santi ki Zeova pa pou zanmen pardonn li. I ti anvi ki sa zonm i “sitan tris e dekouraz net” ki i aret servi Zeova. Satan pa’n sanze. I ankor annan menm lobzektif oubyen taktik. Me nou, “nou konn byen son bann taktik.”—2 Kor. 2:5-11.

6. Kwa ki kapab ed nou pour aret santi nou koupab?

⁶ Ler nou aksepte ki Zeova in pardonn nou, nou aret santi nou koupab. Ler nou fer pese, nou santi nou koupab. (Ps. 51:17) Sa i en bon keksoz. Nou konsyans i kapab motiv nou pour fer bann sanzman e aranz keksoz. (2 Kor. 7:10, 11) Me si nou kontinyen santi nou koupab menm apre ki nou’n repantir, sa i kapab fer nou sitan dekouraze ki nou aret servi Zeova. Ler nou aksepte ki Zeova in pardonn nou, nou aret santi nou koupab. Apre sa nou kapab servi Zeova parey i anvi nou servi li, setadir avek lazwa e avek en konsyans kler. (Kol. 1:10, 11; 2 Tim. 1:3) Me ki mannyer nou kapab konvenk nou leker ki Zeova in vreman pardonn nou?

KWA KI KAPAB ED NOU POUR AKSEPTE KI ZEOVA IN PARDONN NOU?

7-8. Ki mannyer Zeova ti dekrir son lekor e ki nou kapab asire? (Egzod 34:6, 7)

⁷ Reflesir lo lafason ki Zeova in dekrir son lekor. Par egzanp, remark sa ki Zeova ti dir Moiz lo Montanny Sinai.a (Lir Egzod 34:6, 7.) Menm si Zeova i annan en kantite zoli kalite, i ti swazir pour dir Moiz ki i “en Bondye ki annan pitye ek konpasyon.” Eski ou krwar ki en Bondye koumsa pou refize pardonn enn son serviter ki’n vreman repantir? I pa pou zanmen fer sa! Si i ti fer sa, i ti pou konmsi Zeova i kriyel. Me Zeova pa koumsa.

⁸ Nou kapab asire ki ler Zeova i dir ki i pran pitye, i pe koz laverite. I pa zanmen koz manti. (Ps. 31:5) Alor nou kapab krwar sa ki i dir. Si ou vwar li difisil pour ou aret santi ou koupab pour bann fot ki ou’n fer dan lepase, demann ou lekor: ‘Eski mon krwar ki Zeova i vreman annan pitye ek konpasyon e ki i pa pou zanmen refize pardonn okenn dimoun ki’n vreman repantir? Si mon krwar sa, eski pa mon devret osi aksepte ki i’n pardonn mwan?’

9. Ki Psonm 32:5 i dir konsernan lafason ki Zeova i pardonn nou pese?

⁹ Medit lo sa ki Zeova ti enspir bann ekriven Labib pour ekri konsernan lafason ki i pardonnen. Par egzanp, reflesir lo sa ki David ti ekri konsernan lafason ki Zeova i pardonn nou. (Lir Psonm 32:5.) David ti dir: “Ou ti pardonn mon bann fot ek pese.” Sa mo Ebre ki’n ganny tradwir “pardonn” i vedir “lev anler” oubyen “anmennen.” Ler Zeova ti pardonn David, i ti konmsi Zeova ti’n lev pese David e anmenn sa pese lwen avek David. Sa ti fer David santi li soulaze ki i ti konmsi en fardo ti’n ganny tire lo li e i ti nepli santi li koupab. (Ps. 32:2-4) Nou osi nou kapab santi nou soulaze. Ler nou repantir senserman, nou pa bezwen kontinyen santi nou koupab parski Zeova in lev nou pese e anmenn zot lwen avek nou, setadir i’n pardonn nou konpletman.

10-11. Ki sa lekspresyon “pare pour pardonnen” i ansenny nou konsernan Zeova? (Psonm 86:5)

¹⁰ Lir Psonm 86:5. Dan sa verse, David i dir ki Zeova i “pare pour pardonnen.” Konsernan sa lekspresyon, en liv referans i dir sa konsernan Zeova: “[I] kontan ‘pardonnen,’ sa i ‘dan li.’” Akoz Zeova i koumsa? Sa lot bout dan sa verse i dir: “Ou demontre en kantite lanmour fidel pour bann ki priy ou.” Parey nou’n aprann dan sa lartik avan, Zeova i promet pour demontre lanmour fidel anver bann ki kontan li e i pa pou zanmen abandonn zot. Alor si zot fer pese e repantir Zeova i kontinyen demontre lanmour fidel anver zot e i “pare pour pardonnen.” (Iza. 55:7, not.) Si ou vwar li difisil pour aksepte ki Bondye in vreman pardonn ou, petet ou kapab demann ou lekor: ‘Eski mon krwar ki Zeova i kontan pardonnen, ki i pare pour pardonn tou bann ki demann li pour pran pitye pour zot? Si wi, pa mon devret aksepte ki i’n pardonn mwan ler mon’n demann li pour pran pitye pour mwan?’

¹¹ Ler nou konnen ki Zeova i konpran ki nou enparfe, sa i kapab rekonfort nou. (Ps. 139:1, 2) David ti montre sa dan en lot Psonm ki i ti ekri e sa i kapab osi ed nou pour aksepte ki Zeova in pardonn nou.

KI ZEOVA PA OUBLIYE?

12-13. Dapre Psonm 103:14, ki Zeova pa oubliye e ki sa i motiv li pour fer?

¹² Lir Psonm 103:14. David i dir ki Zeova “pa oubliye ki nou’n ganny fer avek lapousyer.” Atraver sa bann parol, David i donn en rezon akoz Zeova i pare pour pardonn son bann serviter ki’n repantir. Sa i akoz i konsyan ki nou enparfe. Pour konpran sa pli byen, annou egzamin sa ki David ti dir.

¹³ David i dir ki Zeova i “konn byen ki mannyer nou’n ganny formen.” Zeova ti kree Adan “avek lapousyer sorti dan later.” Alor, i konn byen ki bann imen parfe ti pou annan bann limit, par egzanp, zot ti pou bezwen manze, dormi e respire. (Zen. 2:7) Me ler Adan ek Ev ti fer pese, sa lekspresyon sorti dan lapousyer ti osi vedir en lot keksoz. Konman zot desandans, nou’n erit pese ki fer nou annan sa tandans pour fer bann move keksoz. Zeova pa zis konnen ki nou enparfe me David i dir ki Zeova ‘pa oubliy’ sa. Sa mo Ebre ki’n ganny servi dan sa verse i kapab vedir: fer en bon aksyon. Alor, nou kapab dir ki dan sa verse, David ti pe dir ki Zeova i konpran ki parfwa nou pou fer fot e ler sa i arive, Zeova i reazir par pran pitye e pardonn nou ler nou repantir senserman.—Ps. 78:38, 39.

14. (a) Ki lezot keksoz David i dir konsernan lafason ki Zeova i pardonn nou? (Psonm 103:12) (b) Ki mannyer legzanp David i montre lafason ki Zeova i pardonn nou konpletman? (Vwar bwat “Lafason ki Zeova i pardonn e oubliy nou pese.”)

¹⁴ Kwa ankor ki nou aprann konsernan lafason ki Zeova i pardonn nou? (Lir Psonm 103:12.) David i dir ki ler Zeova i pardonnen, I met nou pese “lwen avek nou parey soley leve [les] i lwen avek soley kouse [was].” Sa landrwa kot soley i leve ek sa landrwa kot soley i kouse, i vreman lwen avek kanmarad e zot pa zanmen zwenn. Ki sa i ansenny nou konsernan lafason ki Zeova i pardonn nou pese? En liv resers i dir sa konsernan sa verse: “Si pese i ganny mete sitan lwen avek nou, nou kapab asire ki i pou napa okenn loder, latras ek souvenir ki pou reste.” Zis mazin sa: En loder i kapab fer nou mazin en keksoz ki’n arive dan lepase. Me ler Zeova i pardonnen, i konmsi i napa ni menm en latras sa loder ki pou fer li rapel sa pese e fer li anvi pini nou.—Ezek. 18:21, 22; Akt 3:19.

15. Ki nou kapab fer si nou kontinyen santi nou koupab pour bann fot ki nou’n fer dan lepase?

¹⁵ Ki mannyer sa ki David ti dir dan Psonm 103 i ed nou aksepte ki Zeova i pardonn nou? Si nou ankor santi nou koupab pour bann pese ki nou’n fer dan lepase, nou kapab demann nou lekor: ‘Eski mon pe oubliy sa ki Zeova pa oubliye, setadir mon pe oubliye ki i konsyan ki mon enparfe e i pou pardonn mwan akoz mon’n repantir? Eski mon pe osi rapel sa ki Zeova i swazir pour oubliye, setadir mon pe rapel bann pese ki i’n fini pardonnen e ki i pa pou servi sa bann pese pour pini mwan?’ Zeova pa kontinyen mazin bann pese ki nou’n fer dan lepase e nou osi nou pa devret fer sa. (Ps. 130:3) Ler nou aksepte ki Zeova in pardonn nou, nou pou kapab pardonn nou lekor e kontinyen servi Zeova avek lazwa.

16. Ki i kapab arive si nou kontinyen santi nou koupab pour bann fot ki nou’n fer dan lepase? Donn en legzanp. (Vwar portre.)

¹⁶ Annou vwar en legzanp. Ler nou kontinyen santi nou koupab pour bann fot ki nou’n fer dan lepase, sa i parey en drayver ki pe dray en loto me ki pe kontinyen get dan son rearview mirror setadir sa laglas ki permet li vwar sa ki par deryer li. I byen pour get dan sa laglas tanzantan parski sa pou ed li reazir ler i annan danze par deryer li. Me pour li kapab dray an sekirite, i bezwen kontinyen get semen devan li. Dan menm fason, i byen ki parfwa nou mazin bann fot ki nou’n fer dan lepase parski sa i kapab ed nou pour evite repet menm fot. Me si nou kontinyen mazin bann fot ki nou’n fer dan lepase, nou pou kontinyen santi nou koupab e sa pou anpes nou fer tou sa ki nou kapab dan servis Zeova la konmela. Alor, annou kontinyen konsantre lo sa semen ki devan nou. Nou lo sa semen ki anmenn ver lavi dan sa nouvo lemonn ki Bondye in promet, laba nou “pa pou rapel” bann move souvenir.—Iza. 65:17; Prov. 4:25.

KONTINYEN KONVENK OU LEKER

17. Akoz nou bezwen kontinyen konvenk nou leker ki Zeova i kontan nou e ki i toultan pare pour pardonn nou?

¹⁷ Nou bezwen kontinyen konvenk nou leker ki Zeova i kontan nou e ki i toultan pare pour pardonn nou. (1 Zan 3:19) Akoz? Parski Satan pou kontinyen esey fer nou krwar ki Zeova pa kontan nou e ki i pa pou zanmen pardonn nou. Nenport mansonz ki Satan i servi, son lobzektif i reste parey. I anvi fer nou aret servi Zeova. Nou kapab ekspekte ki Satan pou fer plis zefor pour fer nou aret servi Zeova parski i konnen i reste li zis en ptigin letan. (Rev. 12:12) Nou pa devret les li fer nou aret servi Zeova.

18. Ki ou kapab fer pour konvenk ou leker ki Zeova i kontan ou e ki i toultan pare pour pardonn ou?

¹⁸ Pour ou pli asire ki Zeova i kontan ou, ou kapab aplik bann sizesyon ki nou’n vwar dan sa lartik avan. Pour ou konvenk ou leker ki Zeova in pardonn ou, reflesir lo lafason ki Zeova i dekrir son lekor. Medit lo sa ki bann ekriven Labib in dir konsernan lafason ki Zeova i pardonn nou. Pa oubliye ki Zeova i konsyan ki ou enparfe e i pou pran pitye pour ou. Osi, rapel ki ler Zeova i pardonnen, i pardonn nou konpletman. Sa pou fer ou ere parski ou pou asire ki Zeova i pran pitye pour ou e parey David, ou pou kapab dir: “Mersi Zeova pour ‘pardonn mon bann fot ek pese’!”—Ps. 32:5.