Ou kapab reziste bann move dezir

1. Ki nou tou nou bezwen lalit avek?

ESKI ou’n deza vreman anvi fer en keksoz ki Zeova pa kontan? Si wi, pa bezwen dekouraze. Labib i dir: “Napa tantasyon ki zot in gannyen ki lezot pa’n gannyen.” (1 Kor. 10:13) Sa i vedir ki nenport move dezir ki ou pe lalit avek, i annan lezot ki pe lalit avek zot osi. Ou pa tousel e avek led Zeova, ou kapab ranport laviktwar dan sa lalit.

2. Ki kalite move dezir serten Kretyen ek etidyan Labib i lalit avek? (Vwar portre.)

² Labib i dir: “En dimoun i ganny teste ler i ganny atire e anbete par son prop dezir.” (Zak 1:14) Sa verse i montre ki diferan dimoun i kapab ganny tante avek diferan keksoz. Par egzanp, i kapab arive ki serten Kretyen i ganny tante pour fer en keksoz imoral avek en dimoun lot sèks. Tandis ki lezot i ganny tante pour fer en keksoz imoral avek en dimoun menm sèks. Bann ki’n aret get pornografi i kapab anvi rekonmans get pornografi. Ouswa bann ki’n aret servi drog oubyen bwar tro bokou lalkol, i kapab anvi rekonmans ankor. Sa i detrwa dezir ki serten Kretyen ek etidyan Labib i lalit avek. I tre probab in annan en moman dan nou lavi kot nou tou nou’n santi parey zapot Pol ti santi ler i ti ekri: “Ler mon anvi fer sa ki byen, sa tandans pour fer sa ki mal i dan mwan.”—Rom. 7:21.

3. Ki en dimoun i kapab konmans krwar si i ankor pe lalit avek menm move dezir?

³ Si ou vwar ou ankor pe lalit avek menm move dezir, petet ou kapab krwar ki ou napa sa lafors pour fer sa ki byen e ki ou pa pou kapab reziste sa move dezir. Ou osi kapab krwar ki i napa okenn lespwar pour ou e ki Zeova in fini kondann ou parski ou annan sa move dezir. Me ou kapab asire ki sa ki ou pe krwar pa vre. Dan sa lartik, nou pou vwar rezon akoz sa pa vre. Nou pou fer sa par reponn de kestyon: (1) Akoz ou kapab santi ki ou napa lafors e ki napa okenn lespwar pour ou? (2) Ki mannyer ou kapab reziste bann move dezir?

KI MANNYER “SA ENN MOVE” I OULE NOU SANTI?

4. (a) Akoz Satan i anvi nou krwar nou pa kapab reziste bann move dezir? (b) Akoz nou kapab asire ki nou kapab reziste bann move dezir?

⁴ Satan i anvi nou santi ki nou pa pou kapab reziste move dezir. Zezi ti montre klerman ki Satan pou esey tant nou ler i ti ansenny son bann disip pour priye: “Pa les nou tonm dan tantasyon, me sov nou kont sa enn move.” (Mat. 6:13) Satan i dir ki bann imen pa pou obeir Zeova ler zot ganny bann move dezir. (Zob 2:4, 5) Akoz Satan i krwar sa? Parski li menm i ti ganny tante par son prop dezir e i pa ti oule reste fidel avek Zeova. Aprezan i krwar ki nou parey li e ki nou pou fasilman abandonn Zeova ler nou ganny tante. I ti menm krwar ki Garson Bondye ki parfe ti pou ganny tante pour fer sa ki mal. (Mat. 4:8, 9) Me mazin sa: Eski nou vreman pa kapab reziste bann move dezir? Non! O kontrer, nou dakor avek sa ki zapot Pol ti ekri: “Parski dan tou sirkonstans, mon annan lafors gras a sa enn ki donn mwan son pwisans.”—Fili. 4:13.

5. Ki mannyer nou konnen ki Zeova i asire ki nou kapab reziste bann move dezir?

⁵ Zeova pa parey Satan. I asire ki nou kapab reziste bann move dezir. Ki mannyer nou konn sa? Parski Zeova ti predir ki en gran lafoul dimoun pou reste fidel avek li e zot pou pas atraver gran ladetres. Reflesir lo ki sa i vedir. Zeova ki pa kapab koz manti, i dir ki en gran kantite dimoun, pa zis detrwa, pou antre dan nouvo lemonn. Zeova pou konsider zot konman prop parski zot in “lav zot rob e fer zot rob vin blan dan disan Pti Mouton.” (Rev. 7:9, 13, 14) Sa i montre ki Zeova i konnen ki nou kapab reziste bann move dezir.

6-7. Akoz Satan i anvi ki ler nou ganny tante, nou santi ki nou napa lespwar?

⁶ Satan i anvi ki nou pa zis santi ki nou napa lafors me i osi anvi ki nou santi ki nou napa lespwar, konmsi Zeova pou kondann nou zis akoz nou annan bann move dezir. Me zis mazin sa: Satan i sa enn ki napa lespwar. I pa pou zanmen viv pour touzour e i pou ganny detrir. (Zen. 3:15; Rev. 20:10) San dout, Satan i anvi ki nou santi parey li. Sirtou akoz nou annan sa lespwar pour ganny sa benediksyon ki i pa pou gannyen. Me nou annan lespwar! Anfet Labib i asir nou ki Zeova pa anvi kondann nou me i anvi ed nou. I “pa oule ki personn i ganny detrir, me i oule ki zot tou zot arive repantir.”—2 Pyer 3:9.

⁷ Alor, si nou krwar ki nou pa kapab reziste bann move dezir oubyen ki nou napa lespwar, nou pe mazin parey Satan i anvi nou mazinen. Ler nou konpran sa, sa pou ed nou pour pli determinen pour reziste li.—1 Pyer 5:8, 9.

KI MANNYER NOU KAPAB SANTI LEFET KI NOU ENPARFE?

8. Ki sa mo pese pe refer avek? (Psonm 51:5) (Vwar “Ki sa i vedir?”)

⁸ I annan en lot keksoz ki kapab fer nou santi ki nou pa kapab lalit avek bann move dezir e fer nou santi ki nou napa lespwar. Kwa sa lot keksoz? Sa i pese ki nou tou nou’n erite avek nou premye paran.a—Zob 14:4; lir Psonm 51:5.

9-10. (a) Ki mannyer Adan ek Ev ti santi apre ki zot ti’n fer pese? (Vwar portre.) (b) Ki mannyer nou santi lefet ki nou’n ne avek pese?

⁹ Reflesir lo ki mannyer Adan ek Ev ti santi apre ki zot ti’n fer pese. Apre ki zot ti’n dezobeir Zeova, zot ti kasyet e zot ti esey kouver zot lekor. Liv Insight on the Scriptures, i dir konsernan sa ki zot ti fer: “Pese ti fer zot santi zot koupab, enkyet, per e onte.” I ti konmsi Adan ek Ev ti’n ganny take dan en lakaz ki annan zis sa kat lasanm, setadir koupab, lenkyetid, lafreyer ek laont. Zot ti kapab al dan sa bann lasanm me zot pa ti kapab kit sa lakaz. Adan ek Ev pa ti pou zanmen kapab annan en lanmitye pros avek Zeova ankor e nenport kwa ki zot ti fer, zot ti pou toultan santi zot koupab, enkyet, per e onte akoz zot in fer pese.

¹⁰ Byensir, nou sityasyon pa parey pour Adan ek Ev. Sa ranson pa aplik pour sa premye koup me i permet nou pese ganny pardonnen e i ed nou pour annan en konsyans kler. (1 Kor. 6:11) Kantmenm sa, nou’n erit pese ek lenperfeksyon. Alor nou pa sirprann ki ler nou fer pese, nou santi nou koupab, enkyet, per e onte. Anfet, Labib i dir ki pese i annan en gran lenfliyans lo imen. Sa i leka pour tou dimoun “menm si zot pese pa ti parey pese Adan.” (Rom. 5:14) Menm si nou’n ne avek pese, nou pa bezwen santi ki nou pa pou zanmen kapab fer sa ki byen e ki nou napa lespwar. Nou kapab rezet sa bann santiman negatif. Ki mannyer?

11. Ki mannyer nou devret reazir ler nou santi ki nou pa kapab reziste bann move dezir e akoz? (Romen 6:12)

¹¹ Ler nou santi ki nou napa lafors pour lalit avek nou bann move dezir, dan en sans i konmsi sa pese dan nou ki pe fer nou krwar sa e nou pa devret ekout li. Akoz? Parski Labib i dir ki nou pa oblize les pese kontinyen “dominen parey en lerwa” lo nou. (Lir Romen 6:12, not.) Sa i vedir ki nou kapab swazir pour pa azir dapre nou move dezir. (Gal. 5:16) Zeova i asire ki nou kapab reziste tantasyon, si non i pa ti pou demann nou pour fer sa. (Det. 30:11-14; Rom. 6:6; 1 Tesa. 4:3) I kler alor ki nou kapab reziste nou bann move dezir.

12. Ki mannyer nou devret reazir ler nou santi ki nou napa lespwar e akoz?

¹² Ler nou santi ki nou napa lespwar, konmsi Zeova in fini kondann nou zis akoz nou annan bann move dezir, dan en sans i konmsi sa pese dan nou ki pe fer nou krwar sa e nou pa devret ekout li. Akoz? Parski Labib i dir ki Zeova i konpran ki nou’n ne avek pese. (Ps. 103:13, 14) I “konn tou keksoz” lo nou, enkli lefe ki lenperfeksyon i annan lo nou bann tandans. (1 Zan 3:19, 20) Tan ki nou pa azir dapre nou bann tandans e satisfer sa bann move dezir, Zeova pou konsider nou konman prop. Akoz nou kapab krwar sa?

13-14. Eski lefet ki nou annan bann move dezir i vedir ki nou pa kapab ganny laprouvasyon Zeova? Eksplike.

¹³ Labib i montre ki i annan en diferans ant fer sa ki mal e annan sa dezir pour fer sa ki mal. Nou pa toultan kapab anpes nou ganny bann move dezir me nou kapab kontrol nou lekor e pa azir dapre sa bann dezir. Annou vwar en legzanp. Dan premye syek, serten Kretyen dan kongregasyon Korent ti pratik omoseksyalite avan ki zot ti vin Kretyen. Pol ti ekri: “Sanmenm ki serten parmi zot ti ete.” Eski sa i vedir ki apre ki zot ti’n vin Kretyen, zot pa ti zanmen ganny sa dezir pour pratik bann aksyon omoseksyel? Non! Parski souvandfwa bann dezir koumsa i byen anrasinen e i kapab vreman difisil pour aret annan zot. Me bann Kretyen ki ti annan kontrol lo zot lekor e ki pa ti azir dapre zot bann dezir ti ganny laprouvasyon Zeova. Pour Zeova, zot ti’n “ganny lave e zot prop.” (1 Kor. 6:9-11) Sa i leka pour ou osi.

¹⁴ Nenport move dezir ki ou pe lalit avek, ou kapab reziste sa bann dezir. Menm si ou pa kapab elimin sa bann dezir, ou kapab annan kontrol lo ou lekor e pa ‘azir dapre sa ki ou lekor enparfe i anvi e dapre ou prop panse.’ (Efe. 2:3) Ki mannyer nou kapab annan kontrol e arive reziste bann move dezir?

KWA KI POU ED OU REZISTE BANN MOVE DEZIR?

15. Si nou anvi reziste bann move dezir, akoz nou bezwen onnet avek nou lekor?

¹⁵ Pour ou kapab reziste bann move dezir, ou bezwen onnet avek ou lekor e konn ou bann febles. Veye ki ou pa anbet ou lekor avek “bann fo rezonnman.” (Zak 1:22) Par egzanp, en dimoun ki annan en problenm lalkol i kapab fer son lekor krwar ki son problenm pa sitan grav parski dapre li, lezot i bwar plis ki li. Oubyen en dimoun ki get pornografi i kapab esey blanm lezot e dir: ‘Mon pa ti pou anvi get pornografi si mon madanm ti demontre plis lafeksyon anver mwan.’ Si ou konmans mazin koumsa, i pou pli fasil pour ou azir dapre ou bann dezir. Alor, pa esey zistifye ou bann move aksyon menm dan ou lespri. Pran responsabilite pour ou bann aksyon.—Gal. 6:7.

16. Ki mannyer ou kapab pli determinen pour fer sa ki byen?

¹⁶ Apard ki onnet avek ou lekor konsernan ou bann febles, ou pou bezwen pli determinen pour pa azir dapre ou bann dezir. (1 Kor. 9:26, 27; 1 Tesa. 4:4; 1 Pyer 1:15, 16) Reflesir lo kwa ki tant ou pour fer sa ki mal e kan ki ou ganny tante. Petet i kapab annan en serten kalite keksoz oubyen en moman spesifik dan lazournen kot ou ganny tante. Par egzanp, eski ou vwar li pli difisil pour reziste tantasyon ler ou fatige oubyen ler i tar dan lannwit? Prepar ou lekor davans e deside ki ou pou fer ler sa sityasyon i arive. Sa pli bon letan pour fer sa i avan ki ou ganny tante.—Prov. 22:3.

17. Ki nou kapab aprann avek legzanp Zozef? (Zenez 39:7-9) (Vwar portre.)

¹⁷ Reflesir lo lafason ki Zozef ti reazir ler madanm Potifar ti esey sedwir li. Zozef ti dir li non deswit. (Lir Zenez 39:7-9.) Ki sa i montre nou? Zozef ti konn egzakteman ki mannyer i santi konsernan pran madanm en lot zonm, avan menm ki madanm Potifar ti esey sedwir li. Dan menm fason, ou kapab ranforsi ou determinasyon pour fer sa ki byen avan en sityasyon i arive. Koumsa ler ou ganny tante, i pou pli fasil pour ou fer sa ki byen parski ou’n fini deside ki ou pou fer.

“KONTINYEN TESTE” OU LEKOR

18. Ki ou kapab fer pour lalit avek bann move dezir? (2 Korentyen 13:5)

¹⁸ Pour ou kapab lalit avek bann move dezir, ou pou bezwen “kontinyen teste” ou lekor. (Lir 2 Korentyen 13:5.) Tanzantan revwar ou fason panse ek aksyon e fer bann sanzman neseser. Par egzanp, menm ler ou reisi lalit avek en tantasyon, ou kapab demann ou lekor: ‘Ki kantite letan in pran pour mwan dir non?’ Si ou realize ki ou’n tarde pour dir non, pa bezwen ankoler avek ou lekor. O kontrer, reflesir lo ki ou kapab fer pour amelyore. Demann ou lekor bann kestyon koumsa: ‘Ler mon ganny bann panse imoral, eski mon kapab tir zot dan mon lespri pli vitman? Eski bann keksoz ki mon gete, lir oubyen ekoute i fer li pli difisil pour mwan reziste tantasyon? Eski ler mon vwar bann portre imoral, mon vir laba deswit? Eski mon konpran akoz bann standar Zeova i toultan sa ki pli bon pour mwan menm ler mon bezwen fer zefor pour annan kontrol lo mon lekor?’—Ps. 101:3.

19. Ki mannyer bann pti desizyon ki pa saz i kapab fer li pli difisil pour nou lalit avek bann move dezir?

¹⁹ Ler ou pe teste ou lekor, fer sir ki ou pa rod leskiz pour bann move konportman. Labib i dir: “Leker i pli tret ki tou lezot keksoz e i vreman move.” (Zer. 17:9) Zezi ti dir ki “bann move rezonnman” i sorti dan leker. (Mat. 15:19) Pran par egzanp, en dimoun ki’n aret get pornografi. Apre en serten letan, sa dimoun i kapab krwar ki i pa danzere pour li get bann portre ki eksit dezir seksyel parski lo sa bann portre napa bann dimoun touni. Oubyen i kapab krwar ki i napa nanryen mal pour imazin li pe fer bann keksoz mal tan ki i pa fer sa bann keksoz. Si en dimoun i krwar sa i konmsi i pe “plàn davans pour satisfer [son] bann move dezir.” (Rom. 13:14) Ki mannyer ou kapab evite fer sa? Fer atansyon e evite fer bann pti desizyon ki pa saz parski sa i kapab fer ou fer bann gro desizyon ki pa saz parey fer en keksoz mal.b Rezet okenn move panse oubyen “move rezonnman” ki kapab fer ou rod leskiz pour bann move konportman.

20. Ki pou arive avek bann move dezir dan lavenir e kwa ki kapab ed nou la konmela?

²⁰ Parey nou’n aprann, avek led Zeova, nou annan sa lafors pour reziste tantasyon. Osi, vi ki Zeova i pran pitye pour nou, nou annan sa lespwar pour viv pour touzour dan nouvo lemonn. Nou pou vreman kontan pour servi Zeova san bezwen lalit avek bann move dezir. Ziska ki sa letan i arive, nou kapab asire ki nou kapab reziste bann move dezir e nou annan lespwar! Avek benediksyon Zeova, nou pou kapab reziste bann move dezir.