Sa pli bon fason pour reazir anver lenzistis

1-2. Ki mannyer en kantite dimoun i reazir anver lenzistis e ki sa i kapab fer nou demande?

NOU pe viv dan en lemonn ki annan bokou lenzistis. Dimoun pa ganny trete byen pour plizyer rezon petet akoz zot pov, zot sèks, laparans oubyen ras. Zot soufer akoz i annan bann problenm dan lanvironnman ki ganny koze par bann biznesmenn voras ek bann gouvernman koronpi. Sa bann problenm koumsa ek lezot ankor i kapab afekte nou oubyen en dimoun ki nou konnen.

² Alor, nou pa sirprann ki en kantite dimoun i ankoler ler zot vwar sa bann lenzistis. Nou tou nou anvi santi nou sen e sof e ganny trete byen. Serten dimoun i esey rezourd sa bann problenm. Zot siny bann petisyon, fer bann protestasyon e siport bann dirizan politik ki promet pour rezourd sa bann lenzistis. Konman bann Kretyen, nou ganny ansennyen pour “pa form parti lemonn” me pour esper Rwayonm Bondye tir tou lenzistis. (Zan 17:16) Kantmenm sa, nou kapab santi nou sagren e parfwa ankoler ler nou vwar lezot pe ganny trete dan en fason enzis. Petet nou kapab demande: ‘Ki mannyer mon devret reazir? Eski i annan keksoz mon kapab fer la konmela konsernan lenzistis?’ Pour nou kapab reponn sa bann kestyon, premyerman annou vwar ki mannyer Zeova ek Zezi i santi konsernan lenzistis.

ZEOVA EK ZEZI I AY LENZISTIS

3. Akoz i normal pour nou ankoler ler i annan lenzistis? (Izai 5:7)

³ Labib i eksplike akoz i normal ki nou pa kontan lenzistis. I eksplike ki Zeova in kree nou dan son resanblans e ki i “kontan ladrwatir ek lazistis.” (Ps. 33:5; Zen. 1:26) Zeova pa zanmen azir dan en fason enzis e i pa anvi ki lezot i azir koumsa. (Det. 32:3, 4; Mik. 6:8; Zek. 7:9) Par egzanp, dan letan profet Izai, Zeova ti tann “tapaz bann dimoun ki ti pe soufer.” Sa ti akoz en kantite Izraelit pa ti pe tret kanmarad byen. (Lir Izai 5:7.) Zeova ti pran aksyon e i ti pini bann ki ti kontinyen dezobeir son Lalwa e ki ti pe tret lezot dan en fason enzis.—Iza. 5:5, 13.

4. Ki mannyer Zezi i santi ler en dimoun i ganny trete dan en fason enzis? (Vwar portre.)

⁴ Parey Zeova, Zezi i kontan lazistis e i ay lenzistis. En fwa ler Zezi ti lo later, i ti vwar en zonm ki son lanmen ti paralize. Zezi ti pran lapenn pour sa zonm e i ti geri li me bann sef relizye ti ankoler. Zot ti pli enterese avek si Zezi ti obeir lalwa Saba e zot pa ti enterese ki sa zonm ti’n aret soufer. Ki mannyer Zezi ti santi anver zot reaksyon? I ti “byen mekontan e tris akoz zot leker dir.”—Mark 3:1-6.

5. Ki nou bezwen gard antet ler nou ankoler akoz lenzistis?

⁵ Zeova ek Zezi i ankoler ler zot vwar lenzistis. Alor i pa mal pour nou santi koumsa nou osi. (Efe. 4:26 ek not letid “Be wrathful” dan nwtsty-E) Me nou bezwen gard antet ki menm si nou annan rezon ankoler, nou pa kapab tir lenzistis. Anfet, si nou reste ankoler pour en kantite letan oubyen nou pa kontrol nou lakoler, sa i kapab fer nou ditor emosyonnelman e fizikman. (Ps. 37:1, 8; Zak 1:20) Alor ki nou devret fer ler nou oubyen lezot pa ganny trete byen? Nou kapab aprann en kantite keksoz avek legzanp Zezi.

LAFASON KI ZEZI TI REAZIR ANVER LENZISTIS

6. Ki lenzistis bokou dimoun ti pas atraver ler Zezi ti lo later? (Vwar portre.)

⁶ Ler Zezi ti lo later, i ti vwar en kantite lenzistis. I ti vwar lafason ki bann sef relizye ti fer lavi bann dimoun ordiner difisil. (Mat. 23:2-4) I ti konnen ki lotorite Romen pa ti tret bann dimoun byen e en kantite Zwif ti oule ki bann Romen i donn zot, zot laliberte. Serten Zwif ki ti bann fanatik, ti fer bann group pour lager avek bann Romen. Me Zezi pa ti konmans en group oubyen siport en group pour sanz gouvernman. O kontrer, ler i ti tande ki dimoun ti anvi fer li vin lerwa, i ti kit zot e i ti ale.—Zan 6:15.

7-8. Akoz ler Zezi ti lo later, i pa ti esey tir tou lenzistis? (Zan 18:36)

⁷ Ler Zezi ti lo later, i pa ti mel dan politik pour tir lenzistis. Akoz i pa ti fer sa? I ti konnen ki bann imen napa sa drwa oubyen abilite pour diriz zot lekor. (Ps. 146:3; Zer. 10:23) Zot osi pa kapab tir sours lenzistis. Sa lemonn pe ganny dirize par Satan, en kreatir envizib ki en mertriye e ki servi son lotorite pour enfliyans dimoun pour fer bann keksoz enzis. (Zan 8:44; Efe. 2:2) Vi ki nou enparfe, sa i fer li enposib pour menm en dimoun ki annan bon lentansyon fer sa ki byen toultan.—Ekle. 7:20.

⁸ Zezi ti konnen ki zis Rwayonm Bondye ki pou kapab tir sours lenzistis. I pour sa rezon ki i ti servi son letan ek lenerzi pour “prese e anons bon nouvel lo Rwayonm Bondye.” (Lik 8:1) I ti asir “bann ki lafen e swaf ladrwatir,” ki en zour, i pou nepli annan koripsyon ek lenzistis. (Mat. 5:6 ek not letid dan nwtsty-E; Lik 18:7, 8) Me pa bann gouvernman imen ki pou fer sa. Zis Rwayonm Bondye dan lesyel ki “pa form parti sa lemonn” ki pou anmenn sa bann sanzman.—Lir Zan 18:36.

SWIV LEGZANP ZEZI LER NOU FER FAS AVEK LENZISTIS

9. Kwa ki fer ou asire ki zis Rwayonm Bondye ki pou kapab tir tou lenzistis?

⁹ Ozordi, i annan bokou plis lenzistis ki ler Zezi ti lo later. Nou pe viv dan “bann dernyen zour” e Satan ek bann dimoun ki anba son lenfliyans i ankor sours lenzistis. (2 Tim. 3:1-5, 13; Rev. 12:12) Parey Zezi, nou konnen ki zis Rwayonm Bondye ki pou detrir sours lenzistis. Vi ki nou siport Rwayonm Bondye, nou refize partisip dan bann lamars, protestasyon ek lezot keksoz ki ganny fer pour aret lenzistis. Annou vwar leksperyans en ser ki apel Stacy.a Avan ki Stacy ti aprann laverite, i ti abitye partisip dan bann lamars ki ti ganny fer pour aret lenzistis. Me apre en serten letan, i ti konmans annan dout konsernan sa ki i ti pe fer. I dir: “Ler mon ti dan sa bann lamars, mon ti mazinen si mon ti pe siport sa bon kote. La ki mon siport Rwayonm Bondye, mon konnen ki mon lo sa bon kote. Mon konnen ki Zeova pou lager pour tou dimoun ki’n fer fas avek lenzistis pli byen ki mwan mon ti pou kapab.”—Ps. 72:1, 4.

10. Dapre Matye 5:43-48, akoz nou pa esey sanz bann lalwa ek bann gouvernman? (Vwar portre.)

¹⁰ En kantite dimoun ozordi i zwenn bann group pour esey fer sanzman dan gouvernman e en kantite parmi zot, i vin sitan ankoler ki zot dezobeir lalwa e fer ditor lezot. Me sa pa annakor avek legzanp ki Zezi in kite e avek sa ki i’n ansennyen. (Efe. 4:31) En frer ki apel Jeffrey i dir: “Mon konnen ki en lamars ki paret anpe, i kapab vin vyolan en sel kou e dimoun i kapab konmans vole.” Me Zezi i ansenny nou pour tret tou dimoun avek lanmour, menm bann ki pa annan menm lopinyon avek nou oubyen ki persekit nou. (Lir Matye 5:43-48.) Konman Kretyen, nou fer nou mye pour pa fer okenn keksoz ki pa annakor avek sa legzanp ki Zezi in kite pour nou.

11. Kwa ki kapab fer li difisil pour nou pa siport bann group ki anvi sanz lalwa ek gouvernman?

¹¹ Menm si nou konnen ki Rwayonm Bondye pou tir lenzistis pour touzour, nou kapab vwar li difisil pour swiv legzanp Zezi ler nou pa ganny trete byen. Annou vwar leksperyans en ser ki apel Janiya, ki pa ti ganny trete byen akoz son kouler lapo. Janiya i dir: “Mon ti vreman ankoler. Mon ti osi sagren e anvi revanze. Apre mon ti mazin pour zwenn en group ki ti fer bann protestasyon pour lalit kont rasizm ek diskriminasyon. Mon ti santi ki sa ti sa pli bon fason pour mwan eksprim mon lakoler.” Me pli tar, Janiya ti realize ki i ti bezwen sanz son fason panse. I dir: “Mon ti pe les lezot enfliyans mon fason panse e enfliyans mwan pour met konfyans dan imen olye dan Zeova. Alor mon ti deside pour aret frekant bann dimoun ki dan sa bann group.” Menm si nou annan rezon pour ankoler ler nou eksperyans oubyen vwar lenzistis, nou fer atansyon pour pa les nou lakoler fer nou pran kote dan bann zafer politik oubyen problenm sosyal.—Zan 15:19.

12. Akoz i saz pour swazir byen sa ki nou lir, gete oubyen ekoute?

¹² Kwa ki kapab ed nou kontrol nou lakoler ler nou eksperyans oubyen vwar lenzistis? En kantite dimoun in vwar ki ler zot byen swazir sa ki zot lir, ekoute e gete, sa in ed zot. Serten zistwar lo rezo sosyal i ganny rakonte dan en fason pour sok dimoun e pour konplent konsernan gouvernman. Souvandfwa, bann zournalis i fer bann reportaz dapre zot prop lopinyon e pa dapre sa ki’n vreman arive. Menm si sa lenformasyon i vre, eski si nou kontinyen mazin lo la, sa pou ed nou? Si nou pas tro bokou letan pe ekout oubyen lir bann lenformasyon koumsa, sa i kapab fer nou fristre oubyen dekouraze. (Prov. 24:10) Pli pir ankor, nou kapab konmans oubliye ki zis Rwayonm Bondye ki pou tir tou lenzistis.

13. Ki mannyer ler nou annan sa bon labitid pour lir Labib toulezour, sa i kapab ed nou fer fas avek lenzistis?

¹³ Si nou annan sa bon labitid pour lir Labib toulezour e nou medit lo sa ki nou lir, sa i kapab ed nou pour fer fas avek lenzistis. En ser ki apel Alia ti vreman sagren ler i ti vwar ki dimoun dan son kominote ti pe ganny trete dan en move fason. I paret ki bann dimoun ki ti pe fer sa bann keksoz pa ti pe ganny pini. I dir: “Mon ti bezwen pran letan e demann mon lekor: ‘Eski mon vreman krwar ki Zeova pou rezourd tou sa bann problenm?’ I pandan sa bann menm letan ki mon ti lir Zob 34:22-29. Sa bann verse ti fer mwan rapel ki Zeova i vwar tou keksoz. Zis li ki kapab demontre vre lazistis e zis li ki kapab rezourd problenm tou dimoun.” Anmezir nou esper Rwayonm Bondye anmenn vre lazistis, nou bezwen kontinyen fer fas avek lenzistis. Ki mannyer?

KI NOU KAPAB FER LA KONMELA KONSERNAN LENZISTIS?

14. Ki nou kapab fer pour ki nou pa kontribye dan bann lenzistis ki i annan dan sa lemonn? (Kolosyen 3:10, 11)

¹⁴ Nou pa kapab anpes lezot fer bann keksoz enzis. Me nou kapab kontrol sa ki nou, nou fer. Parey nou’n vwar, nou swiv legzanp Zezi par demontre lanmour. Sa lanmour i kapab motiv nou pour tret lezot avek respe, menm bann ki fer bann keksoz enzis. (Mat. 7:12; Rom. 12:17) Zeova i kontan ler nou tret tou dimoun avek labonte e dan en fason zis.—Lir Kolosyen 3:10, 11.

15. Ler nou ansenny bann laverite ki dan Labib, ki lefe sa i annan lo bann dimoun?

¹⁵ Sa pli bon fason ki nou kapab reazir anver lenzistis, i par ansenny lezot bann laverite ki dan Labib. Akoz nou dir sa? Parski “konnesans lo Zeova” i kapab transform en dimoun ki agresiv e vyolan e fer li vin en dimoun ki kontan lape. (Iza. 11:6, 7, 9) Avan ki en msye ki ti apel Jemal ti aprann laverite, i ti zwenn avek en group rebel ki lager pour sanz gouvernman dan son pei parski i ti krwar ki gouvernman pa ti pe tret dimoun byen. I dir: “Ou pa kapab fer dimoun sanze par servi lafors. Pa lafors ki ti fer mwan sanze me bann laverite ki mon ti pe aprann dan Labib ki ti ed mwan sanze.” Sa ki Jemal ti aprann ti motiv li pour aret lager. Ler nou ansenny plis dimoun laverite ki dan Labib, sa pou fer ki plis dimoun pou ganny transformen par sa bann laverite e i pou annan mwens dimoun ki pou fer bann keksoz enzis.

16. Akoz ou anvi koz avek lezot konsernan sa ki Rwayonm Bondye pou fer?

¹⁶ Parey Zezi, nou vreman anvi dir dimoun ki zis Rwayonm Bondye ki kapab tir lenzistis pour touzour. Sa lespwar i kapab ankouraz bann ki pa’n ganny trete byen. (Zer. 29:11) Stacy, ki’n ganny mansyonnen pli boner, i dir: “Ler mon’n aprann laverite, sa in ed mwan pour reste kalm ler mon’n vwar e eksperyans lenzistis. Zeova i servi sa mesaz ki dan Labib pour rekonfort nou.” Pour ou kapab partaz sa mesaz rekonfortan konsernan sa ki pou arive avek lenzistis, ou bezwen prepar byen. Si ou pran letan pour konn sa bann lansennyman ki nou’n vwar dan sa lartik pli byen, sa pou fer ou pli asire ki zot vre e ou pou pli byen kapab koz lo sa topik avek takt ler ou kot lekol oubyen dan travay.b

17. Ki mannyer Zeova i ed nou pour fer fas avek lenzistis la konmela?

¹⁷ Nou konnen ki tan ki Satan i “sef sa lemonn,” nou pou fer fas avek lenzistis. Me nou annan lespwar e Zeova in promet pou ed nou anmezir nou espere ziska ki Satan i ganny “zet deor.” (Zan 12:31) Dan Labib, Zeova i dir nou akoz i annan en kantite lenzistis e i osi dir nou lafason ki i santi ler i vwar nou pe soufer akoz lenzistis. (Ps. 34:17-19) Atraver son Garson, Zeova i ansenny nou ki mannyer nou devret reazir anver lenzistis e ki byento son Rwayonm pou tir lenzistis pour touzour. (2 Pyer 3:13) Antretan annou kontinyen anons sa bon nouvel Rwayonm avek devouman e kontinyen esper sa letan kot later pou ranpli avek “lazistis ek ladrwatir.”—Iza. 9:7.