Pa tarde pour ed bann ki annan “sa bon kondisyon leker”

1. Ki mannyer dimoun i reazir anver sa bon nouvel? (Akt 13:47, 48; 16:14, 15)

EN KANTITE dimoun dan premye syek ti aksepte laverite dek ki zot ti tann sa mesaz. (Lir Akt 13:47, 48; 16:14, 15.) Pareyman ozordi, serten i zwaye ler zot tann sa bon nouvel pour premye fwa. Menm bann ki o konmansman pa demontre lentere dan sa mesaz Rwayonm, i kapab aksepte sa mesaz pli tar. Alor, ki nou devret fer ler nou zwenn bann ki annan “sa bon kondisyon leker”?

2. Dan ki fason sa travay predikasyon i parey sa travay ki en zardinyen i fer?

² Annou vwar en legzanp. Nou kapab konpar sa travay predikasyon avek sa travay ki en zardinyen i fer. Si fri lo en plant in mir, i tre probab ki sa zardinyen pou kas sa fri menm si i pe kas later oubyen i pe plante dan en lot landrwa dan son zarden. Dan menm fason, ler nou zwenn en dimoun ki pare pour aksepte nou mesaz, nou pou ed li vin en disip Kris deswit. Me antretan annou kontinyen ed bann ki bezwen plis letan pour zot vwar ki sa ki zot pe aprann i annan valer. (Zan 4:35, 36) Ler nou annan disernman, sa pou ed nou swazir sa pli bon fason pour koz avek sa bann dimoun. Aprezan, annou vwar ki nou kapab fer dan sa premye konversasyon pour ed bann dimoun ki pare pour ekoute. Nou pou osi vwar ki mannyer nou kapab ed zot kontinyen fer progre.

LER DIMOUN I PARE POUR EKOUTE

3. Ki nou devret fer ler nou zwenn en dimoun dan predikasyon ki enterese? (1 Korentyen 9:26)

³ Dan predikasyon ler nou zwenn dimoun ki enterese, nou anvi ed zot pour konmans mars lo sa semen ki anmenn ver lavi deswit. Dan bann ka koumsa, depi dan premye konversasyon, nou devret ofer zot en letid Labib e envit zot pour vin renyon.—Lir 1 Korentyen 9:26.

4. Donn legzanp en dimoun ki ti pare pour etidye Labib deswit.

⁴ Ofer sa dimoun en letid Labib. Serten ki nou koz avek i pare pour etidye Labib deswit. Par egzanp, en zour Zedi en zenn madanm ki reste Kanada ti vin kot prezantwar e i ti pran en kopi brosir Viv ere pour touzour! Sa ser kot prezantwar ti eksplik sa madanm ki ler i pran sa brosir, i osi kapab ganny en letid Labib pour nanryen. Sa zenn madanm ti enterese e i ti donn sa ser son kontak. Pli tar sa madanm ti teks sa ser e demann li kan ki zot kapab fer letid Labib. Ler sa ser ti dir ki i ti kapab vini sa wikenn, sa madanm ti demann li: “Eski ou kapab vini demen? Mon lib.” Zot ti fer letid son Vandredi. Sa madanm ti asiste son premye renyon sa menm wikenn e i ti kontinyen fer progre vitman.

5. Ki mannyer nou kapab montre ki nou annan disernman ler nou ofer dimoun bann letid Labib? (Vwar portre.)

⁵ Nou pa ekspekte ki tou dimoun ki ekout nou mesaz pou anvi etidye Labib deswit parey sa madanm. Serten i kapab bezwen plis letan. Pour konmans sa konversasyon, i kapab ki nou pou bezwen koz lo en topik ki enteres sa dimoun. Si nou kontinyen annan en pwennvi pozitif e nou kontinyen demontre lentere dan sa dimoun, petet i pa pou pran bokou letan pour konmans en letid. Me ki nou kapab dir ler nou pe ofer en dimoun en letid Labib? Serten frer ek ser ki’n reisi ofer lezot letid Labib ti ganny demande sa kestyon. Annou vwar zot bann sizesyon.

6. Ki nou kapab dir pour ed en dimoun vwar ki etidye Labib i bon pour li?

⁶ Bann proklanmater ek pionye ki ti ganny demande bann sizesyon pour konmans letid Labib ti eksplike ki dan serten landrwa i pli byen pour pa servi bann term parey “etidye,” “letid Labib” oubyen “ansenny ou” ler ou pe koz lo sa letid. Zot dir ki i pli bon pour servi bann lekspresyon parey “konversasyon,” “koz lo Labib” e “aprann konn Labib.” Ou kapab ed sa dimoun pour anvi kontinyen sa konversasyon par dir: “Eski ou ti konnen ki Labib i donn larepons bann kestyon enportan dan lavi?” oubyen “Labib pa zis en liv relizye me i ed nou dan bann fason pratik.” Ou kapab osi dir: “I pa pran bokou letan. Zis 10 a 15 minit i ase pour ou aprann en keksoz ki kapab ed ou.” Ou pa bezwen neseserman servi bann mo parey “randevou” oubyen “tou le semenn” parski sa i kapab fer sa dimoun santi ki i oblize kontinyen zwenn ou.

7. Kan ki serten in realize ki zot in trouv laverite? (1 Korentyen 14:23-25)

⁷ Envit sa dimoun pour asiste renyon. I paret ki dan letan zapot Pol serten ti realize ki zot in trouv laverite apre ki zot ti asiste renyon pour premye fwa. (Lir 1 Korentyen 14:23-25.) Souvan sanmenm sa ki arive dan nou letan. Laplipar bann nouvo i fer progre vitman apre ki zot in konmans asiste renyon. Alor kan ki ou devret envit zot? Dan leson 10 dan liv Viv ere pour touzour!, sa etidyan i ganny envite pour vin renyon. Me ou pa bezwen espere ziska sa leson pour ou envit li renyon. Depi ou premye konversasyon, ou kapab envit sa dimoun pour vin renyon wikenn, petet par koz lo tit diskour piblik oubyen lo en pwen ki pou ganny diskite dan letid Latour Veyer.

8. Ki nou kapab dir en dimoun ler nou pe envit li pour vin renyon? (Izai 54:13)

⁸ Ler nou envit en dimoun pour vin renyon, eksplik li ki nou renyon i diferan avek pour lezot larelizyon. Ler en etidyan Labib ti asiste son premye letid Latour Veyer i ti demann son ansenyan: “Eski sa dimoun ki pe kondwir Latour Veyer i konn non tou dimoun?” Sa ser ti eksplike ki nou tou nou fer zefor pour konn non bann dimoun dan nou kongregasyon, zis parey nou konn non bann dimoun dan nou fanmir. Sa etidyan ti vwar ki sa ti vreman diferan avek lafason ki keksoz i ete dan son legliz. Osi, sa rezon akoz nou zwenn ansanm i nouvo pour en kantite dimoun. (Lir Izai 54:13.) Nou zwenn ansanm pour ador Zeova, pour aprann avek li e pour ankouraz kanmarad. (Ebr. 2:12; 10:24, 25) Sa i fer ki nou bann renyon i ganny fer dan en fason annord, kot nou kapab aprann keksoz e i napa okenn rityel. (1 Kor. 14:40) Nou Lasal Rwayonm i byen eklere e sa i fer li fasil pour nou aprann. Nou pa promot okenn parti politik parski nou pa pran kote dan bann zafer politik. Nou pa fer bann gran deba oubyen dispit konsernan bann problenm oubyen konsernan nou lopinyon personnel. Petet avan ki sa etidyan i vin renyon, ou kapab montre li sa video Kwa ki pase dan Lasal Rwayonm? Koumsa i pou konnen ki i pou ekspekte.

9-10. Ler nou envit en dimoun pour asiste renyon, ki nou kapab fer pour asir li ki nou pa pou met presyon lo li pour dir oubyen fer en keksoz? (Vwar portre.)

⁹ Serten i ezite pour vin renyon parski zot per ki nou pou demann zot pour sanz zot larelizyon. Asir sa dimoun ki nou kontan akeyir bann viziter e ki nou pa met presyon lo personn pour dir oubyen fer okenn keksoz. Bann fanmir i kapab vini enkli bann ki annan bann zanfan ki ankor ptipti. Pandan nou renyon, paran ek zanfan i asiz ansanm e zot aprann ansanm e pa separeman. Sa i fer ki bann paran i konnen ki zot zanfan pe fer e ki zot pe ganny ansennyen. (Det. 31:12) Nou pa pas okenn laket. O kontrer nou swiv sa lord ki Zezi in donnen ki dir: “Zot in resevwar pour nanryen, donn pour nanryen.” (Mat. 10:8) Ou kapab osi dir sa dimoun ki i pa bezwen met bann lenz ser pour li vin renyon. Bondye i get leker e pa laparans en dimoun.—1 Sam. 16:7.

¹⁰ Si sa dimoun i vin renyon, fer sa ki ou kapab pour fer li santi li alez. Entrodwir li avek bann ansyen ek bann lezot proklanmater. Si i santi li alez, i tre probab ki i pou anvi retournen. Pandan renyon, si i napa en Labib, partaz sa ki pour ou avek li e ed li pour konpran sa diskour oubyen letid ki pe ganny fer.

LER OU KONMANS EN LETID LABIB

11. Ki mannyer ou kapab montre ki ou respekte ler ek progranm sa dimoun?

¹¹ Ki keksoz ou devret gard antet ler nou pe fer letid Labib avek en dimoun? Respekte ler e progranm sa dimoun. Par egzanp, si ou’n fer laranzman pour fer letid en serten ler, ariv aler menm si dimoun dan ou teritwar pa normalman arive aler. Osi, petet i ti pou pli bon pour gard sa premye letid Labib kourt. Serten proklanmater eksperyanse i dir ki i pli bon fini boner menm si sa dimoun i anvi tann plis. Osi pa koz tro bokou. Me les sa dimoun dir ki i pe santi e panse.—Prov. 10:19.

12. Kwa ki devret nou lobzektif depi o konmansman en letid Labib?

¹² Depi o konmansman, ou lobzektif i devret pour ed sa dimoun aprann konn Zeova ek Zezi e pour kontan zot. Ou fer sa par toultan montre zot sa ki Labib i dir e pa atir latansyon lo ou menm e lo sa ki ou konnen lo Labib. (Akt 10:25, 26) Ler i ti ansenny dimoun, i ti baz son bann lansennyman lo Zezi, sa enn ki Zeova in anvoye pour ed nou aprann konn e kontan li. (1 Kor. 2:1, 2) Pol ti montre lenportans pour ed bann nouvo disip pour devlop bann zoli kalite ki kapab ganny konpare avek lor, larzan ek pyer presye. (1 Kor. 3:11-15) Sa bann kalite i enkli lafwa, lasazes, disernman ek en gran respe pour Zeova. (Ps. 19:9, 10; Prov. 3:13-15; 1 Pyer 1:7) Swiv fason ansennyen Pol par ed ou etidyan pour devlop en lafwa for e pour annan en bon lanmitye avek zot Papa ki dan lesyel ki kontan zot.—2 Kor. 1:24.

13. Ler ou pe fer letid avek en dimoun, ki mannyer ou kapab demontre pasyans e montre ki ou konpran li? (2 Korentyen 10:4, 5) (Vwar portre.)

¹³ Swiv fason ansennyen Zezi par demontre pasyans e konpran sa etidyan. Evite demann bann kestyon ki fer sa dimoun enkonfortab. Si i annan en keksoz ki i vwar difisil pour konpran, pa bezwen kontinyen koz lo sa pwen. O kontrer, ou kapab kontinyen letid e pli tar retourn lo sa pwen. Olye sey fors li pour aksepte en lansennyman ki i vwar li difisil, donn li letan pour reflesir lo la e pour sanz son fason panse. (Zan 16:12; Kol. 2:6, 7) Labib i konpar bann fo lansennyman ki nou pe esey detrir avek en lavil fortifye. (Lir 2 Korentyen 10:4, 5; vwar not letid “overturning strongly entrenched things” dan nwtsty-E.) Avan ki ou zis detrir son lavil fortifye, ed li pour fer Zeova vin son landrwa kasyet.—Ps. 91:9.

LER BANN NOUVO I ASISTE RENYON

14. Ki mannyer nou devret tret bann nouvo dimoun ki asiste renyon?

¹⁴ Zeova i ekspekte ki nou tret tou nouvo dimoun ki vin renyon parey, san fer lapreferans, nenport landrwa zot sorti, nenport kiltir oubyen nenport kantite larzan zot annan. (Zak 2:1-4, 9) Alor ki mannyer nou kapab demontre lanmour anver bann nouvo ki asiste renyon?

15-16. Ki mannyer nou kapab ed bann nouvo pour santi zot alez ler zot vin renyon?

¹⁵ Serten dimoun i vin nou renyon akoz zot anvi konnen ki i pase oubyen akoz en dimoun ki reste en lot landrwa in ankouraz zot pour vin renyon. Alor nou pa devret ezite pour apros zot e koz avek zot. Akeyir zot me pa fer zot santi zot enkonfortab. Envit zot pour asiz o bor ou. Les zot swiv ansanm avek ou dan ou Labib e dan sa piblikasyon ki pe ganny etidye ouswa donn zot prop kopi. Osi, pran konsiderasyon lafason ki zot kapab pe santi. En zonm ki ti vin renyon ti dir sa frer ki ti akeyir li ki i ti kanmi akoz lafason ki i ti’n sanze. Sa frer ti fer li santi li alez e i ti eksplik li ki Temwen Zeova ti parey tou lezot dimoun. Avek letan, sa msye ti fer progre e i ti batize. Me i pa ti zanmen oubliy sa ki sa frer ti dir li. Par kont ler nou pe demontre lentere personnel dan bann nouvo avan oubyen apre renyon, nou bezwen fer atansyon ki nou pa demann zot bann kestyon ki anbaras zot oubyen ki tro personnel.—1 Pyer 4:15.

¹⁶ Nou osi kapab fer bann nouvo santi zot alez par demontre respe dan nou konversasyon, komanter e ler nou annan bann size dan renyon ki annan pour fer avek bann dimoun ki pa Temwen Zeova e lo zot krwayans. Evite servi bann lekspresyon ki pou ofans zot oubyen ki pou fer zot pa anvi retournen. (Tit 2:8; 3:2) Par egzanp, nou pa pou zanmen kritik krwayans bann ki napa menm krwayans avek nou. (2 Kor. 6:3) Bann frer ki fer diskour piblik i bezwen sirtou fer atansyon konsernan sa. Zot osi pran kont bann dimoun dan lodyans ki pa Temwen Zeova par eksplik bann mo oubyen term ki sa bann dimoun pa pou konpran.

17. Ki nou lobzektif ler nou zwenn bann dimoun ki annan “sa bon kondisyon leker”?

¹⁷ Anmezir letan i pase, sa travay predikasyon i vin deplizanpli pli irzan e nou kontinyen trouv bann dimoun ki annan “sa bon kondisyon leker pour ganny lavi eternel.” (Akt 13:48) Ler nou trouv sa bann dimoun, nou pa devret ezite pour ofer zot en letid Labib oubyen pour envit zot pour vin renyon. Ler nou fer sa, nou ed zot pour konmans mars lo “sa semen ki anmenn ver lavi.”—Mat. 7:14.