De nouvo manm lo Konsey Direkter

LE 5 Oktob 2024, i ti annan en lanons spesyal ki ti ganny fer dan renyon anyel. Frer Jody Jedele ek Frer Jacob Rumph ti’n ganny apwente konman manm lo Konsey Direkter Temwen Zeova. Tou le de frer in servi Zeova fidelman pour en kantite lannen.

Frer Jedele ti ne Missouri, Leta-z-ini Lanmerik e i’n grandi dan laverite. Son fanmir ti reste dan en teritwar kot i ti napa bokou Temwen Zeova. Alor i ti zwenn en kantite frer ek ser sorti dan diferan rezyon dan sa pei ki ti vin dan zot teritwar pour ede anons sa bon nouvel. Sa lanmour ki zot ti demontre e sa linite ki i ti annan parmi zot ti annan en gran lefe lo li. I ti batize le 15 Oktob 1983, ler i ti ankor en adolesan. I ti vreman kontan predikasyon e an Septanm 1989, apre ki i ti’n fini lekol segonder, i ti konmans fer pionye ordiner.

Ler Frer Jedele ti ankor zenn, son paran ti anmenn li ek son ser vizit Betel. Sa bann vizit ti motiv Frer Jedele ek son ser pour annan sa lobzektif pour al servi Betel e sanmenm sa ki zot ti fer pli tar. Frer Jedele ti ariv Betel Wallkill an Septanm 1990. O konmansman, i ti servi dan Departman netwayaz e pli tar dan Servis medikal.

Pandan sa menm letan, bann kongregasyon ki ti koz langaz Espanyol pa tro lwen ti pe agrandi e zot ti bezwen plis frer. Alor Frer Jedele ti al dan enn sa bann kongregasyon e konmans aprann langaz Espanyol. Pa bokou letan apre, i ti zwenn en ser ki ti apel Damaris ki ti en pionye dan sa menm rezyon. Pli tar zot ti marye e Damaris ti vin servi dan Betel ansanm avek li.

An 2005, zot ti kit Betel pour zot pran swen avek zot paran, ki ti bann serviter fidel Zeova. Pandan sa letan, zot ti servi konman bann pionye ordiner. Frer Jedele ti en formater pour Lekol Pionye e i ti servi lo Komite lyezon lopital e lo Komite konstriksyon rezyonal (Regional Building Committee).

An 2013, Frer ek Ser Jedele ti ganny envite pour retourn Betel pour ede dan proze konstriksyon Warwick. Depi sa letan, zot in osi servi Patterson ek Wallkill. Frer Jedele in servi dan departman Local Design/Construction e dan Servis lenformasyon lopital (Hospital Information Services). An Mars 2023, i ti ganny apwente konman en asistan lo Komite Servis pour Konsey Direkter. Ler Frer Jedele i mazin lo bann servis ki i’n annan, i dir: “Ler ou ganny en nouvo servis, parfwa ou kapab per. Me la i sa moman kot ou bezwen rapel pour depan lo Zeova parski i sa enn ki kapab fer ou vin sa ki i bezwen.”

Frer Rumph ti ne Kaliforni, Leta-z-ini Lanmerik. Ler Frer Rumph ti ankor en zanfan, son manman ti inaktif me i ti fer zefor pour ansenny li bann laverite ki dan Labib. Osi, tou le lannen, Frer Rumph ti vizit son granmanman, ki ti en Temwen Zeova fidel. I ti ed Frer Rumph pour anvi konn plis konsernan laverite e ler Frer Rumph ti annan 13 an, i ti demande pour etidye Labib. I ti batize le 27 Septanm 1992, ler i ti ankor en adolesan. Son manman ti rekonmans prese e asiste renyon e son papa ek son bann frer ek ser ti konmans fer progre e pli tar zot ti batize.

Ler Frer Rumph ti ankor zenn, i ti vwar ki bann pionye ti zwaye. Alor apre ki i ti fini lekol segonder, i ti konmans fer pionye an Septanm 1995. An 2000, i ti al reste Ekwador pour li al servi kot i ti annan bezwen pour plis proklanmater. Laba, i ti zwenn en ser ki ti apel Inga ki ti en pionye e ki ti sorti Kanada. Pli tar zot de Frer Rumph, zot ti marye. Apre ki zot ti’n marye, zot ti al reste dan en lavil Ekwador, kot i ti annan en pti group proklanmater. Ozordi i annan en kongregasyon laba ki pe byen progrese.

Pli tar, Frer ek Ser Rumph ti ganny apwente konman pionye spesyal e apre Frer Rumph ti servi konman sirveyan rezyonal. An 2011, zot ti ganny envite pour asiste 132zyenm laklas Lekol Gilead. Apre sa, zot ti servi dan diferan pei e dan diferan form servis par egzanp dan Betel, servis misyonner e konman sirveyan rezyonal. Frer Rumph ti osi annan sa privilez pour vin en formater dan Lekol pour bann predikater Rwayonm.

Frer ek Ser Rumph ti retourn Leta-z-ini akoz pandemi COVID-19. Zot ti ganny envite dan Betel Wallkill kot Frer Rumph ti ganny formasyon dan Departman servis. Pli tar, zot ti ganny demande pour retourn Biro brans Ekwador kot Frer Rumph ti servi lo Komite biro brans. An 2023, zot ti al Warwick. An Zanvye 2024, Frer Rumph ti ganny apwente konman en asistan lo Komite servis pour Konsey Direkter. Ler Frer Rumph i mazin bann landrwa kot in servi, i dir: “I pa zanmen sa landrwa ki fer en servis spesyal me i bann dimoun ki ou travay avek.”

Nou apresye sa bon travay ki sa de frer pe fer e nou “kontinyen montre lapresyasyon pour bann zonm koumsa.”—Fili. 2:29.