En Let sorti kot Konsey Direkter

Frer ek Ser:

“KI BONDYE nou Papa, e nou Senyer Zezi-Kri i donn zot lagras ek lape.” (1 Kor. 1:3) Nou vreman anvi vwar sa letan kot tou sa ki respire pou donn Zeova laglwar ki i merite! (Ps. 150:6) Anmezir ki nou esper sa gran zour, nou kontinyen proklanm sa bon nouvel lo Rwayonm Bondye e fer disip.

Ozordi predikasyon i travay prensipal Zeova lo later. (Mark 13:10) Vi ki nou konnen Zeova i enterese avek sa travay, nou priy li pour ed nou akonpli sa travay. Nou realize ki sak dimoun i annan sa loportinite pour benefisye avek sa ranson. (Rev. 14:6, 7, 14, 15) I vre ki nou rankontre difikilte, me nou vreman apresye ki nou resevwar ‘pisans sorti dan lesyel’ pour akonpli sa travay!—Lik 24:49.

I en plezir pour revwar lannen servis ki’n pase e reflesir lo sa ki Zeova in akonpli atraver son bann serviter fidel. Par lafors ki zot in gannyen atraver lespri sen, pep Bondye in demontre lanmour parey Kris, par sirmont laenn partou atraver lemonn. Sa lanmour ti evidan dan nou bann lasanble. Depi Zen ziska Desanm 2003, bann delege sorti dan plis ki san pei ti asiste 32 lasanble enternasyonal ki ti ganny fer dan sis kontinan. Bann misyonner, serviter enternasyonal, ek Betelit ki servi dan lezot pei ti ganny entervyou dan bann lasanble distrik e enternasyonal.

Dan sa bann lasanble, nou ti ganny de piblikasyon. Sa i ‘Voyez le bon pays’ ek Écoute le grand Enseignant. Deplis, ti annan lanons ki en nouvo versyon liv letid Lekol Servis Pionye pou ganny entrodwir ver lafen lannen servis 2004. Avek letan, bann ki pe fer pionye depi lontan, e ki’n deza asiste lekol, pou asiste bann kour ansanm avek bann nouvo pionye.

Sipor Bondye ek zenerozite imen in fer posib ki bokou plis Lasal Rwayonm in ganny konstri, sirtou dan bann pei ki napa bokou resours. Vi ki i annan plis bezwen pour nouritir spirityel atraver lemonn, bann biro brans pe ganny agrandi dan bokou pei. Brosir Rezouir Lavi lo Later pour Touzour! i aprezan disponib dan 299 langaz, avek 139 milyon kopi ki ganny enprimen; Konnesans Ki Anmenn ver Lavi Eternel in depas 93 milyon kopi dan 161 langaz; e plis ki 200 milyon kopi brosir Sa ki Bondye i ekspekte nou fer in ganny enprimen dan 267 langaz.

Nou akey sa 258,845 dimoun ki ti senboliz zot dedikasyon par batenm pandan lannen servis ki’n pase! Menm si ou sipor pour Rwayonm Bondye in fer ou vin en target laenn Satan, ou sipor in osi fer ou ganny benediksyon Zeova pandan ki ou tay sa lakours ki’n ganny mete devan ou. (Ebr. 12:1, 2; Rev. 12:17) Wi, asire ki “i pa pou posib ki sa Enn ki pe protez ou ganny sonmey.”—Ps. 121:3.

Teks pour lannen 2004, ‘Kontinyen veye . . . Met zot pare,’ i byen apropriye. (Mat. 24:42, 44) Parol Bondye i dekrir bann Kretyen konman bann rezidan tanporer dan sa sistenm ki pe al fini. (1 Pyer 2:11; 4:7) Alor, nou bezwen kontinyen konsantre lo bann keksoz spirityel, gard nou lavi senp, e byen egzamin nou leker. “Sa gro dragon” i anvi devor nou, i oule fer nou form parti avek son sistenm.—Rev. 12:9.

Lir Labib sak zour i tre neseser pour ed nou reste vizilan. I kapab ed nou pour ki nou “wi, i wi” pour akonpli nou dedikasyon e pour “tenir byen ferm ziska lafen sa konfyans ki nou’n gannyen depi okonmansman.” (Zak 5:12, nou ki’n met an italik; Ebr. 3:14) Lir Labib sak zour i kapab ed nou rapel ki kantite lwen lemonn i ete avek bann standar Bondye ki pa sanze. (Mal. 3:6; 2 Tim. 3:1, 13) Konnesans lo Labib i kapab ed nou pour evit “bann fab byen aranze” e pour reste fidel avek Zeova.—2 Pyer 1:16; 3:11.

Paran, eski ou pe ed ou zanfan pour etablir bann lobzektif spirityel e pour ‘kontinyen veye,’ anmezir ki ou elve zot dan ledikasyon ek lenstriksyon Zeova? (Efe. 6:4) Eski ou pe form zot pour vwar zot lavenir parey Zezi, sa dimoun pli saz, ki ti viv lo later? Zezi ti pou kapab vin sa pli gran sarpantye, envanter, ouswa dokter ki’n egziste, me plito i ti pran servis aplentan. Fotespere ki son legzanp i pous ou pour ed ou zanfan met lentere Rwayonm Bondye premye dan zot lavi.

Lesklav fidel, ki ganny reprezante par Konsey Direkter, i annan profon rekonesans anver sa “gran lafoul” ki’n ed nou akonpli nou responsabilite, pour ki ‘sa Bonn Nouvel Rwayonm i ganny anonse partou dan lemonn.’ (Rev. 7:9; Mat. 24:14, 45) Zeova i asir zot ki i rapel ‘travay ki zot in fer, lanmour ki zot in montre pour li par servis ki zot in rann e pe kontinyen rann bann sen.’ (Ebr. 6:10) Anmezir ki ou lir bann leksperyans eksitan e vwar rezilta ou bann zefor dan Annuaire, konnen ki ou’n zwe en par tre enportan pour donn sa temwannyaz atraver lemonn.

Fotespere ki ou get lavenir avek kouraz pandan ki ou kontinyen “fikse lo rekonpans dan lavenir.” Pa les okenn imen ouswa demon fer ou perdi ou rekonpans. (Ebr. 11:26; Kol. 2:18) Wi, met ou konfyans dan Zeova, e asire ki i pou ed tou bann ki kontan li pour ganny lavi dan son sans konplet.—Zan 6:48-54.

Asire ki nou kontan pour servi ansanm avek zot pour donn Zeova laglwar.

Zot bann frer,

Konsey Direkter Temwen Zeova