Demontre lapresyasyon pour zenerozite Zeova

ZEOVA i en Bondye zenere. (Zak 1:17) Nou kapab vwar son zenerozite dan tou sa ki i’n kree. I’n ranpli liniver avek zetwal e i’n kouver later avek bann zoli plant.—Psonm 65:12, 13; 147:7, 8; 148:3, 4.

Ekriven Psonm 104 ti ekri en kantik pour loue Zeova pour remersye li pour tou sa ki i’n kree. Ler ou lir sa psonm, eski ou santi ou rekonesan parey sa psalmis? I ti dir: “Mon pou sant pour Zeova tou dilon mon lavi, mon pou sant bann louanz pour mon Bondye tan ki mon vivan.” (Psonm 104:33) Eski ou anvi fer parey?

PLI GRAN LEGZANP ZENEROZITE

Zeova i anvi ki nou imit son zenerozite. I osi donn nou bann bon rezon pour nou zenere. I ti enspir zapot Pol pour ekri: “Pour bann ki posed larises dan sa monn mon rekomann zot ki zot pa annan lorgey, dir zot pa met zot lesperans dan sa bann larises enserten, me met lesperans dan Bondye ki donn nou tou keksoz an labondans pour nou zouir. Demann zot pour fer sa ki byen, e ki zot larises i konsist an bonn aksyon. Zot devre montre zot zenere e touzour pare pour partaz avek lezot. Alor zot ava anmas en bon e solid trezor pour lavenir, e koumsa zot ava ganny vre lavi.”—1 Timote 6:17-19.

Dan dezyenm let Pol pour bann Korentyen, i ti eksplike avek ki lentansyon nou devret donn lezot. I ti dir: “Fodre ki sakenn i donn dapre sa ki i’n deside, non pa avek regre ou par lobligasyon, parski Bondye i kontan sa ki donn avek lazwa.” (2 Korentyen 9:7) Nou pe ed lekel ler nou zenere? Pol ti dir ki nou ed lezot ler nou donn zot sa ki zot bezwen, me nou osi ed nou prop lekor parski Zeova pou beni nou.—2 Korentyen 9:11-14.

Apre sa, Pol ti refer avek pli gran laprev zenerozite Bondye ler i ti dir: “Annou rann gras Bondye pour son gran don” oubyen kado. (2 Korentyen 9:15) “Gran don” Zeova i enkli tou bann bon keksoz ki i donn nou atraver Zezi Kri. Napa okenn mo ki kapab dekrir valer sa don.

Ki mannyer nou kapab montre ki nou rekonesan pour tou sa ki Zeova ek Zezi in fer e pou fer pour nou? En fason se ler nou zenere kan nou donn nou letan, lenerzi e bann keksoz materyel pour ador Zeova e ed lezot pour aprann konn li. Nou kapab fer sa ki swa nou annan bokou oubyen ptigin.—1 Kronik 22:14; 29:3-5; Lik 21:1-4.

Ki mannyer serten i kontribye anver sa travay mondyal

Parey bann Kretyen dan premye syek, bokou ozordi i met larzan dekote pour travay mondyal e met li dan bwat kontribisyon dan zot kongregasyon. (1 Korentyen 16:2) Sak mwan, bann kongregasyon i anvoy sa bann kontribisyon kot biro brans Temwen Zeova ki okip sa pei. I osi posib pour ou anvoy bann donasyon direkteman kot en lasosyasyon ki Temwen Zeova i servi dan ou pei. Pour konn son ladres, silvouple pran kontak avek biro brans ki okip ou pei. Lo www.jw.org, ou kapab trouv ladres biro brans. I annan diferan kalite donasyon:

DONASYON

Donasyon larzan, bizou ouswa lezot keksoz personnel ki annan valer. Anvoy en let ki endike ki sa larzan ouswa keksoz i en donasyon.

BANN DONASYON KONDISYONNEL

Donn larzan avek en kondisyon ki si ou bezwen, ou kapab repran.
Anvoy en let ki endike ki sa donasyon i kondisyonnel.

LEZOT FASON KI OU KAPAB FER DONASYON

Pli ba i annan en lalis bann fason ki nou kapab fer donasyon pour siport sa travay predikasyon dan lemonn antye. Avan fer donasyon, kontakte biro brans ki okip ou pei pour konnen ki donasyon ki ganny aksepte dan ou pei. Vi ki rekomandasyon ek lalwa pour taks i varye, demann en dimoun ki konn en pe lo lalwa avan fer okenn donasyon.

Lasirans: En donasyon kot ou spesifye en lasosyasyon ki Temwen Zeova i servi konman benefisyer sa lasirans lavi ouswa pansyon.

Kont labank: Nou kapab fer laranzman pour ki ler nou mor, sa larzan ki lo nou kont labank, depozit ouswa okenn lezot reveni i ganny donnen avek en lasosyasyon ki Temwen Zeova i servi dapre regilasyon labank dan sa pei.

Stocks ek Bonds: Bann stocks ek bonds (lenvestisman) i kapab ganny donnen avek en lasosyasyon ki Temwen Zeova i servi, swa direkteman ouswa ekri en lagreman pour dir ki sa bann lenvestisman i kapab ganny transfer ler i mor.

Propriyete: Later oubyen lakaz ki kapab ganny revann i kapab ganny donnen avek en lasosyasyon ki Temwen Zeova i servi swa direkteman, ouswa donn sa propriyete me i annan drwa viv ladan ziska son lanmor.

Gratwite: Bann gratwite, larzan sekirite sosyal oubyen pansyon i kapab ganny donnen tou le-z-an diran zot lavi avek en lasosyasyon ki Temwen Zeova i servi dapre laranzman sa donater ouswa dimoun ki sa donater in swazir. Sa donater i kapab resevwar en rediksyon taks sak lannen dapre lakantite ki i pe donnen.

Testaman ouswa Trusts: Par fer en testaman legal, en propriyete ouswa larzan i kapab ganny donnen avek en lasosyasyon ki Temwen Zeova i servi ouswa sa lasosyasyon i kapab benefisye avek bann reveni en trust. Sa laranzman i kapab donn serten lavantaz lo kote taks.

Pour plis lenformasyon lo ki mannyer pour fer donasyon pour sa travay ki pe ganny fer dan lemonn antye vwar sa brosir “Charitable Planning to Benefit Kingdom Service Worldwide” an Angle. Sa brosir i montre diferan fason ki en dimoun i kapab fer en donasyon. Lenformasyon dan sa brosir i kapab pa totalman aplikab pour ou sityasyon akoz taks ouswa lezot lalwa dan ou pei. Alor, apre ki ou’n lir sa brosir, ou devret diskit avek ou avoka ouswa en zofisye taks. An servan sa metod pour fer donasyon, bokou in kapab ede siport nou travay ki pe ganny fer dan lemonn antye e pa pey sa kantite taks. Si i disponib dan ou pei, ou kapab demann en kopi avek sekreter kongregasyon.

Pour plis lenformasyon ou kapab kontakte biro brans ki okip ou pei.