Eski ou ti konnen?
Eski ou pou krwar ki dan letan lontan en dimoun ti pou plant move zerb dan plantasyon en lot dimoun?
Sa kopi date 1468 sa dokiman (Digest) ki Lanperer Justinian ti ekri i enn parmi plizyer dokiman ki donn detay lo bann zafer legal dan letan lontan
DAPRE Matye 13:24-26, Zezi ti dir: “Rwayonm lesyel i parey en zonm ki ti’n senm bann bon lagrenn dan son plantasyon. Letan tou dimoun ti pe dormi, en lennmi ti vini e senm move zerb dan milye son plantasyon dible. Apre i ti ale. Kan bann plant ti pouse e zepi ti formen, bann move zerb ti osi aparet.” Serten ekriven pa krwar ki sa legzanp i baze lo en keksoz ki ti’n vreman arive, me dapre bann vye dokiman legal Romen, en keksoz parey ti’n kapab arive.
En diksyoner Labib i dir ki dan lalwa Romen, i ti en krim pour plant move zerb dan plantasyon en lot dimoun pour revanze. Lefet ki en lalwa ti bezwen ganny entrodwir, sa i montre ki sa ti’n vreman arive. Alastair Kerr ki en spesyalis lalwa i eksplike ki dan lannen 533 apre Kris, Lanperer Romen Justinian ti pibliy en dokiman (Digest) kot i ti fer en rezimen bann lalwa Romen. Dan sa dokiman, i ti fer referans avek bann eksper lo lalwa ki ti’n fer zot komanter apartir lannen 100 ziska lannen 250 apre Kris. Dan sa dokiman (Digest), enn parmi sa bann eksper ki ganny site ki apel Ulpian ti refer avek en sityasyon ki ti arive dan dezyenm syek. Bann move zerb ti’n ganny plante dan plantasyon en lot dimoun e sa ti afekte tou son bann plant. Sa dokiman i osi diskit lo drwa legal ki en fermye ti annan pour ki sa enn koupab i pey li en sonm larzan konman konpansasyon.
Sa bann keksoz koumsa ti arive dan ansyen Lanpir Romen. Alor, i posib ki sa legzanp ki Zezi ti koz lo la in kapab vreman arive.