Kisisa lespri sen?
Sa ki Labib i dir
Lespri sen i lafors Bondye an aksyon. (Mika 3:8; Lik 1:35) Bondye i servi son lespri sen par diriz son lenerzi oubyen lafors ver sa landrwa kot i anvi fer son lavolonte.—Psonm 104:30; 139:7.
Dan Labib, sa mo “lespri” i sorti dan mo Ebre ru’ach oubyen en mo Grek pneu’ma. Lapliparditan, sa bann mo i refer avek lafors aktif Bondye oubyen lespri sen. (Zenez 1:2) Par kont, sa bann mo i osi annan lezot sinifikasyon dan Labib:
Souf lavi.—Abakouk 2:19; Revelasyon 13:15.
Divan.—Zenez 8:1; Zan 3:8.
Sa lafors dan en dimoun oubyen zannimo ki fer li bouze.—Zob 34:14, 15.
Leta lespri oubyen latitid en dimoun.—Nonm 14:24.
En personnaz envizib parey Bondye ek bann lanz.—1 Lerwa 22:21; Zan 4:24.
Tou sa bann definisyon i annan en keksoz an komen: Zot pe refer avek en keksoz ki envizib, me ki son aksyon i vizib andotmo ki en imen i kapab vwar son lefe. Pareyman, lespri sen Bondye i “parey divan, i envizib e pwisan.”—An Expository Dictionary of New Testament Words, by W. E. Vine.
Labib i osi konpar lespri sen Bondye avek son “ledwa” oubyen “lanmen” Bondye. (Psonm 8:3, NWT; 19:1; Lik 11:20; konpar Matye 12:28.) Zis parey en artizan i servi son lanmen ek ledwa pour travay, Bondye i servi son lespri pour fer serten keksoz parey:
Liniver.—Psonm 33:6, NWT; Izai 66:1, 2.
Labib.—2 Pyer 1:20, 21.
Mirak ki son bann serviter fidel ti fer lontan ek predikasyon ki zot fer avek bokou devouman.—Lik 4:18; Akt 1:8; 1 Korentyen 12:4-11.
Sa bann zoli kalite ki bann serviter Bondye i demontre.—Galat 5:22, 23.
Lespri sen Bondye pa en personnaz
Lefet ki Labib i konpar lespri sen Bondye avek son “lanmen,” “ledwa” oubyen “souf lavi,” sa i montre ki i pa en personnaz. (Egzod 15:8, 10, NWT) En artizan pa kapab fer nanryen san servi son lespri ek lekor. Pareyman lespri sen oubyen lafors Bondye i azir dapre lafason ki Bondye i diriz li. (Lik 11:13) Labib i osi konpar lespri sen Bondye avek delo oubyen i asosye li avek bann kalite parey lafwa ek konnesans. Tousala i montre ki lespri sen pa kapab en personnaz.—Izai 44:3; Akt 6:5; 2 Korentyen 6:6.
Labib i mansyonn non Bondye, setadir Zeova e osi non son Garson, Zezi Kri. Me i pa mansyonn okenn par ki lespri sen Bondye i annan en non. (Izai 42:8, NWT; Lik 1:31) Letan Etyenn ti vwar en vizyon dan lesyel zis avan i ti ganny touye akoz i ti en Kretyen, i ti vwar selman de personnaz, pa trwa. Labib i dir: “Me Etyenn, ranpli avek lespri sen, ti get dan lesyel e i ti vwar laglwar Bondye e Zezi lo kote drwat Bondye.” (Akt 7:55) Lespri sen oubyen lafors Bondye ti permet Etyenn vwar sa vizyon.
Fo konsep lo lespri sen
Fo: Lespri sen i en personnaz e i form parti Trinite parey 1 Zan 5:7, 8 dan Labib versyon King James i mansyonnen.
Vre: Dan 1 Zan 5:7, 8 dan Labib versyon King James i dir “dan lesyel, Papa, Laparol, ek Lespri Sen: sa trwa zot enn e i annan trwa ki rann temwannyaz lo later.” Par kont, apre ki bann eksper in fer resers zot in vwar ki pa zapot Zan ki ti ekri sa bann parol, ki vedir i pa sipoze dan Labib. Profeser Bruce M. Metzger ti ekri: “Sa bann parol pa korek e zot napa okenn plas dan Nouvo Testaman.”—A Textual Commentary on the Greek New Testament.
Fo: Labib i koz lo lespri sen konmsi i en personnaz, alor i vre, lespri sen i en personnaz.
Vre: Parfwa Labib i koz lo lespri sen konmsi i en personnaz, me sa pa prouve ki lespri sen i vreman en personnaz. Labib i fer menm parey avek lasazes, lanmor ek pese. (Proverb 1:20; Romen 5:17, 21) Par egzanp, i dir lasazes i fer “aksyon” e pese i ganny dekrir konman “groker” e ki i kapab “anbet” e “touy” dimoun.—Matye 11:19; Lik 7:35; Romen 7:8, 11.
Pareyman, ler zapot Zan ti pe ekri sa ki Zezi ti dir, i ti dekri lespri sen konman en personnaz ki ti pou ofer “led,” donn levidans, gid bann dimoun, koze, ekoute, deklare, glorifye e resevwar. Dan langaz orizinal, ler i ti refer avek lespri sen, i ti servi en pronon maskilen. (Zan 16:7-15) Zan ti fer sa akoz sa mo Grek pour “led” (par.ra’kle.tos) i en mo maskilen, alor i ti bezwen servi en pronon maskilen dapre lareg granmer langaz Grek. Ler i ti refer avek sa mo pneu’ma, ki en mo ki pa ni maskilen oubyen feminen, i ti servi en pronon an Grek ki ganny servi pour bann keksoz pa bann dimoun.—Zan 14:16, 17.
Fo: Batenm i ganny fer o non lespri sen, sa i prouve ki i en personnaz.
Vre: Parfwa Labib i servi sa mo “o non” konman en lot mo pour “avek pouvwar” oubyen “avek lotorite.” (Deterononm 18:5, NWT, 19-22; Ester 8:10) I parey avek sa lekspresyon “o non lalwa” ki pa vedir ki lalwa i en personnaz, me plito en lotorite. En dimoun ki batiz “o non” lespri sen i rekonnet pouvwar ek rol ki lespri sen i annan dan lakonplisman plan Bondye.—Matye 28:19.
Fo: Bann zapot ek disip Zezi ti krwar ki lespri sen ti en personnaz.
Vre: Labib pa dir sa, ni menm listwar bann Kretyen. Encyclopædia Britannica i dir: ‘Sa definisyon konmkwa Sent-Espri i en personnaz setadir en bondye ti ganny aksepte dan Council of Constantinople, lannen 381.’ Sa ti plis ki 250 an apre ki sa dernyen zapot ti mor.