Akoz Temwen Zeova pa selebre lanniverser nesans?
Temwen Zeova pa selebre lanniverser nesans akoz nou krwar ki i en lafet ki pa fer plezir Bondye. Menm si Labib pa dir direkteman ki nou pa devret selebre lanniverser nesans, i ed nou pour rezonn lo serten laspe enportan sa levennman e i ed nou konpran ki mannyer Bondye i vwar li. Annou vwar kat sa bann laspe e serten prensip Labib.
Selebrasyon lanniverser nesans i annan en lorizin payen. Dapre sa liv Funk & Wagnalls Standard Dictionary of Folklore, Mythology, and Legend, sa bann lafet ti sorti dan sa krwayans ki zour lanniverser nesans en dimoun, “bann move lespri ek lenfliyans i ganny loportinite pour atak bann ki pe selebre sa zour” e ki “prezans bann zanmi ek zot bann bon swe lanniverser i ede pour protez sa dimoun ki pe selebre son lanniverser.” Liv The Lore of Birthdays i dir ki dan letan lontan, rikord lanniverser nesans ti “tre enportan pour kalkil en oroskop” baze lo “lasyans astrolozi.” Sa liv i azoute ki “dapre krwayans siperstisye, bann labouzi ki ganny servi pour lanniverser nesans, i annan en pouvwar spesyal pour fer bann swe lanniverser vin vre.”
Me Labib i kondann bann pratik parey mazik, devinen, grigri oubyen lezot keksoz parey. (Deterononm 18:14; Galat 5:19-21) Anfet, en rezon akoz Bondye ti kondann ansyen lavil Babilonn i akoz son bann zabitan ti pratik astrolozi ki en form devinen. (Izai 47:11-15) Temwen Zeova pa pas letan pour rode kote sak koutim i sorti me ler Labib i donn nou bann lendikasyon kler, nou pa fer konmsi nou pa vwar.
Bann Kretyen dan premye syek pa ti fet lanniverser nesans. The World Book Encyclopedia i dir ki “zot ti konsider selebrasyon lanniverser nesans konman en koutim payen.” Labib i dir ki bann zapot ek lezot ki ti ganny ansennyen direkteman par Zezi in kit en legzanp pour tou Kretyen swiv.—2 Tesalonisyen 3:6.
Sa sel keksoz ki bann Kretyen i bezwen obzerve napa nanryen pour fer avek nesans Zezi me plito i annan pour fer avek son lanmor. (Lik 22:17-20) Sa pa devret sirprann nou akoz Labib i dir “pli vomye zour lanmor ki zour nesans.” (Eklezyast 7:1, NWT) Ver lafen son lavi lo later, Zezi ti’n fer en bon repitasyon devan Bondye ki fer ki zour son lanmor ti vin pli enportan ki zour son nesans.—Ebre 1:4.
Labib pa koz lo okenn serviter Bondye ki ti selebre son lanniverser nesans. Sa i pa en keksoz ki’n ganny oubliye mete dan Labib akoz Labib i osi koz lo de dimoun ki pa ti servi Bondye me ki ti selebre zot lanniverser nesans. Me tou le de levennman i ganny prezante dan en fason negatif.—Zenez 40:20-22; Mark 6:21-29.
Eski zanfan bann Temwen i santi zot malere lefet ki zot pa selebre lanniverser nesans?
Parey tou bon paran, bann Temwen i eksprim lanmour pour zot zanfan pandan lannen antye par donn zot kado e fer bann pti rankont ki gou. Zot sey swiv legzanp parfe Bondye ki donn volonterman bann bon keksoz son bann zanfan. (Matye 7:11) Parey sa bann komanter i montre, zanfan bann Temwen pa santi zot malere:
“I pli gou ler ou ganny en kado ki ou pa ti pe ekspekte.”—Tammy, 12 an.
“Menm si mon pa ganny kado zour mon lanniverser, mon paran i aste kado pour mwan pour lezot lokazyon. Mon kontan li koumsa akoz mon ganny sirpriz.”—Gregory, 11 an.
“Ou krwar en parti i zis dis minit, detrwa cupcake ek en sanson? Vin kot mwan e ou a vwar kisisa en vre parti!”—Eric, 6 an.