Ki Labib i dir lo lavortman?

Sa ki Labib i dir

Labib pa servi sa mo “lavortman” ki vedir retir volonterman en fetis (pti baba) dan vant son manman. Me plizyer verse dan Labib i montre nou pwennvi Bondye lo lavi imen, enkli lavi en pti baba ki pa ankor ne.

Lavi i en kado sorti kot Bondye. (Zenez 9:6; Psonm 36:9) I vwar tou lavi konman presye, enkli lavi en pti baba dan vant son manman. Alor si en dimoun i volonterman touy en zanfan dan vant son manman, i konmsi i’n komet en mert.

Lalwa ki Bondye ti donn bann Izraelit ti dir: “Si dan en bagar parmi bann zonm en fanm ansent i ganny afekte, e son baba i ne avan son term san gran dimal, sa zonm ki ti tap li ava pey domaz ki mari sa fanm i demande, e ki ziz ava aprouve. Me si maler i arive, ou ava enpoz en lavi pour en lavi.”​—Egzod 21:22, 23.a

• Kan ki lavi en imen i konmanse?

• Eski Bondye pou pardonn en dimoun ki’n fer lavortman?

• Eski i mal pour fer lavortman si lavi en manman oubyen son pti baba i an danze?

Kan ki lavi en imen i konmanse?

Pour Bondye, lavi en imen i konmans ler sa zanfan i ganny konsevwar. Dan son Parol, Labib, Bondye i toultan dekri en zanfan ki pa ankor ne konman en endividi. Annou vwar detrwa legzanp ki montre ki pour Bondye lavi en pti baba dan vant son manman i parey avek lavi en dimoun ki’n ne.

• Lerwa David ti ganny enspire pour dir sa avek Bondye: “Mon pa ti ankor annan en laform, ou ti’n deza war mwan.” (Psonm 139:16) Bondye ti konsider David konman en dimoun menm si i pa ti ankor ne.

• Deplis, Bondye ti konnen ki i ti annan en plan spesyal pour profet Zeremi avan Zeremi ti ne. Bondye ti dir avek li: “Avan menm ki mon ti form ou dan vant ou manman, mon ti konn ou. Avan ki ou ti sorti dan son vant, mon’n konsakre ou. Mon’n met ou apar e swazir ou konman profet pour bann nasyon.”​—Zeremi 1:5.

• Lik ki ti en ekriven Labib e osi en dokter, ti servi menm mo Grek pour dekrir en baba ki pa ankor ne ek en nouvo ne.​—Lik 1:41; 2:12, 16.

Eski Bondye pou pardonn en dimoun ki’n fer en lavortman?

Bann ki’n deza fer en lavortman i kapab ganny pardonnen avek Bondye. Si aprezan zot aksepte pwennvi Bondye lo lavi, zot pa bezwen les sa remor konsyans afekte zot en kantite. Zeova i “ranpli avek konpasyon e i bon . . . Parey Les i lwen avek Was, i met nou pese lwen avek nou.”b (Psonm 103:8-12) Zeova pou pardonn tou sa ki senserman repantir avek zot pese ki zot in fer dan lepase, sa i enkli lavortman.​—Psonm 86:5.

Eski i mal pour fer lavortman si lavi sa manman oubyen son baba i an danze?

Ler nou pran kont sa ki Labib i dir lo lavi en zanfan ki pa ankor ne, i pa pou zistifye pour en dimoun fer en lavortman akoz lasante sa manman oubyen zanfan i kapab an danze.

Me ki i arive kot dan en ka rar ler en manman pe donn nesans son baba e la en ka irzan i devlope e zot bezwen swazir ant lavi sa manman ouswa lavi sa baba? Dan sa ka, bann ki enplike pou bezwen fer zot prop desizyon lekel ki zot pou sey sove.