‘Al parmi tou zabitan bann nasyon e fer zot vin mon bann disip’
“Al parmi zabitan bann nasyon, e fer zot vin mon bann disip. Batiz zot. Ansenny zot pour obei tou sa ki mon’n komann zot.”—MATYE 28:19, 20.
1, 2. Ki bann kestyon ki ganny souleve akoz sa ki Zezi ti dir dan Matye 24:14?
ZEZI ti predir ki dan bann dernyen zour, sa bon nouvel Rwayonm pou ganny anonse avek tou dimoun. (Matye 24:14) Konman Temwen Zeova, nou ganny rekonnet partou dan lemonn pour nou predikasyon. Serten dimoun i apresye sa mesaz ki nou anonse, tandis ki lezot i pa enterese. Menm serten ki pa kontan nou mesaz i respekte sa ki nou pe fer. Nou dir ki nou ki pe fer sa travay ki Zezi ti predir. Eski nou annan drwa pour dir sa? Ki mannyer nou asire ki sa travay predikasyon ki nou pe fer, i sanmenm sa travay ki Zezi ti predir?
2 En kantite larelizyon i dir ki zot pe anons mesaz Zezi. Me zot predikasyon i zis bann sermon kot legliz, lo televizyon, lo Enternet oubyen zot senpleman dir ki mannyer zot in konn Zezi. Serten i krwar ki ed bann dimoun ki dan bezwen, fer bann travay lasarite konman bann dokter, ners ek bann ansenyan, i zot fason prese. Eski sa ki zot pe fer i sa metod travay ki Zezi ti koz lo la?
3. Dapre Matye 28:19, 20 ki sa kat keksoz bann disip Zezi i devret fer?
3 Eski Zezi ti anvi ki son bann disip i esper dimoun vin kot zot? Non! Apre son rezireksyon, Zezi ti dir plizyer santenn son bann disip: “Al parmi zabitan bann nasyon, e fer zot vin mon bann disip. Batiz zot. Ansenny zot pour obei tou sa ki mon’n komann zot.” (Matye 28:18, 20) Alor, konman bann disip Zezi nou bezwen fer kat keksoz. Nou bezwen fer disip, batiz zot e ansenny zot. Me premyerman, nou bezwen al kot bann dimoun. En spesyalis Labib i eksplike: “Sa mo ‘al’ i devwar sak krwayan, swa atraver semen ouswa atraver losean.”—Matye 10:7; Lik 10:3.
4. Ki bann ki “lapes zonm” i bezwen fer?
4 Ki Zezi ti ekspekte son bann disip fer? Eski i ti anvi ki zot pres tousel, oubyen i ti anvi ki zot organiz zot konman en group? Vi ki i ti pou enposib pour en dimoun pres avek ‘tou zabitan bann nasyon,’ son bann disip ti pou bezwen organize konman en group. Sanmenm ki Zezi ti pe dir ler i ti envit son bann disip pour “lapes zonm.” (Lir Matye 4:18-22.) Zezi pa ti pe refer avek zis en peser ki pe lapes avek son prop laliny ek labwet e ki pe esper pwason morde. Plito, Zezi ti pe koz lo lapes avek lasenn. Lapes avek lasenn i en travay dir, i demann bon lorganizasyon e en kantite dimoun i travay ansanm.—Lik 5:1-11.
5. Ki kat kestyon ki bezwen ganny reponn e akoz?
5 Pour konnen lekel ki pe anons sa bon nouvel ozordi, nou bezwen reponn sa kat kestyon swivan:
Ki sa mesaz bann disip Zezi i devret anonse?
Kwa ki devret motiv zot?
Ki bann metod zot devret servi?
Ki lanpler sa travay i devret ete e ziska kan i devret kontinyen?
Larepons sa bann kestyon pou ed nou idantifye lekel ki pe fer sa travay sov lavi e pou fer nou pli determinen pour kontinyen anons sa mesaz.—1 Timote 4:16.
KI MESAZ KI DEVRET GANNY ANONSE?
6. Akoz ou kapab annan sa konfidans ki Temwen Zeova pe anons sa mesaz ki devret ganny anonse?
6 Lir Lik 4:43. Zezi ti anons “Bon Nouvel Rwayonm” e i anvi ki son bann disip i fer parey. Lekel sa group dimoun ki pe anons sa mesaz avek tou dimoun? Zis Temwen Zeova! Menm bann ki pa kontan nou i admet sa. Par egzanp, gete ki en pret misyonner ki’n viv dan plizyer pei ti dir en Temwen Zeova. Dan sak pei ki i’n vizite, i ti’n demann Temwen Zeova ki mesaz zot pe anonse. Sa pret ti dir, “Zot tou zot ti sitan bet ki zot ti donn menm larepons: ‘Sa bon nouvel konsernan Rwayonm.’” Sa ki sa pret ti dir i prouve ki nou pa bet me nou ini konman bann vre Kretyen. (1 Korentyen 1:10) Rwayonm Bondye i mesaz prensipal Latour Veyer pe anons Rwayonm Zeova. Sa magazin i disponib dan 254 langaz e an mwayenn, 59,000,000 kopi i ganny enprimen sak mwan ki fer ki i sa magazin ki pli ganny distribye dan lemonn antye!
Temwen Zeova i sa sel group dimoun ki pe anons sa bon nouvel lo Rwayonm Bondye
7. Ki mannyer nou konnen ki bann sef relizye ki pretann ki zot Kretyen pa pe anons sa mesaz ki devret ganny anonse?
7 Bann sef relizye ki pretann ki zot Kretyen pa pe anons Rwayonm Bondye. Par kont, ler zot koz lo Rwayonm Bondye zot dir ki i zis en santiman dan leker en dimoun. (Lik 17:21) Zot pa ansenny bann dimoun ki sa Rwayonm i en gouvernman ki dan lesyel e ki Zezi pe dirize dan sa Rwayonm. O kontrer, zot koz lo Zezi zour Nwel oubyen Pak. Zot pa dir ki Rwayonm pou rezourd tou problenm limanite e ki byento i pou elimin tou move keksoz lo later. (Revelasyon 19:11-21) I kler ki bann sef relizye ki pretann ki zot Kretyen pa konnen ki Zezi pou fer konman Lerwa sa Rwayonm Bondye. Alor, vi ki zot pa konpran mesaz Zezi, zot pa konpran akoz zot devret anons sa mesaz.
KWA KI DEVRET MOTIV NOU POUR FER SA TRAVAY?
8. Kwa ki pa devret motiv en dimoun pour anons sa bon nouvel?
8 Bann disip Zezi pa devret anons sa bon nouvel pour fer larzan oubyen pour konstri bann batiman enpresyonan. Zezi ti dir: “Zot in resevwar gratwitman alor donn osi gratwitman.” (Matye 10:8) Alor, travay pour anons sa bon nouvel pa en biznes. (2 Korentyen 2:17) Bann disip Zezi pa devret demann en lapey pour sa travay ki zot fer. (Lir Akt 20:33-35.) Menm si lenstriksyon Zezi i kler, laplipar legliz i konsantre lo zis anmas larzan pour mentenir zot legliz, pour pey zot dirizan ek lezot travayer. Pour sa rezon, bokou sef relizye ki pretann ki zot Kretyen in vin vreman ris.—Revelasyon 17:4, 5.
Anons sa bon nouvel i pa en biznes
9. Ki mannyer Temwen Zeova in montre ki zot pe fer sa travay avek sa bon motivasyon?
9 Eski Temwen Zeova i pas laket kot zot Lasal Rwayonm oubyen dan zot bann lasanble? Non! Zot travay i ganny siporte par bann donasyon volonter. (2 Korentyen 9:7) Zis lannen pase tousel, Temwen Zeova in pas preski de bilyon erdtan dan sa travay pour anons sa bon nouvel e zot in kondwir plis ki nef milyon letid Labib sak mwan. Zot pa ganny peye pour zot travay, me zot kontan pour servi zot prop larzan pour fer sa travay. En serser ti dir sa konsernan travay Temwen Zeova: “Zot bi prensipal i pour prese e ansennyen.” I ti osi dir ki bann Temwen Zeova i napa bann sef relizye pour peye. Alor, si nou pa ganny peye, kwa ki motiv nou? Nou volonterman fer sa travay akoz nou kontan Zeova e nou kontan bann dimoun. Sa kalite latitid i akonpli sa profesi ki dan Psonm 110:3. (Lir.)
KI BANN METOD KI DEVRET GANNY SERVI?
Nou pres dan nenport ki landrwa kot nou zwenn dimoun (Vwar paragraf 10)
10. Ki bann metod ki Zezi ek son bann disip ti servi pour anons sa bon nouvel?
10 Ki bann metod ki Zezi ek son bann disip ti servi pour anons sa bon nouvel? Zot ti al partou kot i ti annan dimoun. Par egzanp, zot ti pres dan semen e kot bazar. Zot ti osi al vwar dimoun kot zot lakour. (Matye 10:11; Lik 8:1; Akt 5:42; 20:20, NW) Anons sa bon nouvel portanport ti en fason organize pour zwenn tou kalite dimoun.
11, 12. Ki diferans i annan ant bann dimoun dan larelizyon Kretyen ek pep Zeova an sa ki konsern anons sa bon nouvel?
11 Eski bann dimoun dan bann larelizyon Kretyen i anons sa bon nouvel parey Zezi ti fer? Normalman, en sef relizye ki ganny peye i fer en sermon avek bann manm son legliz. Sa bann dirizan pa fer bann nouvo disip, zot zis esey gard lakantite manm ki zot deza annan. Par ler, zot in esey ankouraz zot bann manm pour al prese. Par egzanp, lannen 2001, Lepap Zan Pol 2 ti dir dan en let ki bann manm son legliz i devret anons Levanzil e ki zot devret annan sa menm devouman ki Zapot Pol ti annan, ki ti dir: “Maler pour mwan si mon pa anons Levanzil!” Apre, lepap ti dir ki i pa zis detrwa dimoun kalifye ki devret anons Levanzil, me tou manm legliz. Me selman, pa bokou zot ki ti fer sa.
12 Ki nou pou dir lo Temwen Zeova? Zis zot ki pe anonse ki Zezi pe dirize konman Lerwa depi 1914. Zot obei Zezi e fer sa travay pour anons sa bon nouvel vin en priyorite dan zot lavi. (Mark 13:10) Sa liv Pillars of Faith—American Congregations and Their Partners ti dir ki sa travay pour anons sa bon nouvel i enportan pour Temwen Zeova. I ti osi dir ki ler zot zwenn dimoun ki lafen, tousel e malad zot esey ed sa bann dimoun, me zot pa zanmen oubliye ki zot bi prensipal i pour anonse ki lafen sa lemonn i pros e pour ansenny bann dimoun ki zot devret fer pour ganny sove. Temwen Zeova i kontinyen anons sa menm mesaz e servi menm metod ki Zezi ek son bann disip ti servi.
KI LANPLER SA TRAVAY I DEVRET ETE E ZISKA KAN I DEVRET KONTINYEN?
13. Ki lanpler sa travay pour anons sa bon nouvel i devret ete?
13 Zezi ti dir ki son bann disip ti pou anons e ansenny sa bon nouvel “partou dan lemonn.” Zot ti ganny sa komannman pour fer disip parmi ‘tou zabitan bann nasyon.’ (Matye 24:14; 28:19, 20) Sa i montre ki sa bon nouvel i pou bezwen ganny anonse dan lemonn antye.
14, 15. Kwa ki prouve ki Temwen Zeova in akonplir profesi Zezi lo lanpler sa travay pour anons sa bon nouvel? (Vwar portre lo paz 9.)
14 Zis Temwen Zeova ki’n akonpli profesi Zezi, konmkwa ki sa bon nouvel ti pou ganny anonse dan lemonn antye. Akoz nou dir sa? Dan Leta-z-ini, i annan apepre 600,000 sef relizye me i annan 1,200,000 Temwen Zeova ki pe anons sa bon nouvel dan sa pei. Dan lemonn antye i annan apepre 400,000 pret Katolik konpare avek sa plis ki 8 milyon Temwen Zeova ki pe anons sa bon nouvel dan 240 pei. Alor i kler ki Temwen Zeova ki pe anons sa bon nouvel dan lemonn antye e sa i pe anmenn loner ek louanz pour Zeova!—Psonm 34:1; 51:15.
15 Konman Temwen Zeova, nou bi i pour anons sa bon nouvel avek otan dimoun posib avan ki lafen i arive. Pour fer sa travay, nou’n tradwi e pibliy plizyer milyon liv, magazin, trak ek bann lenvitasyon pour Memoryal ek lasanble, dan plis ki 700 langaz. Tousala i ganny ofer avek tou dimoun gratwitman. Zis lannen pase, 4.5 bilyon piblikasyon ki baze lo Labib ti ganny pibliye. Nou’n osi pibliy plis ki 200 milyon kopi Labib New World Translation of the Holy Scriptures dan plis ki 130 langaz. Lo nou sit Enternet, i annan lenformasyon dan plis ki 750 langaz. Zis Temwen Zeova ki pe fer sa travay merveye.
16. Ki mannyer nou konnen Temwen Zeova ki annan lespri sen Bondye?
16 Pour konbyen letan sa travay pou kontinyen ganny fer? Zezi ti dir ki sa bon nouvel ti pou ganny anonse ziska ki lafen i arive. Gras a lespri sen Zeova tou Temwen Zeova in kapab kontinyen anons sa bon nouvel pandan sa bann dernyen zour. (Akt 1:8; 1 Pyer 4:14) Serten dimoun relizye i dir: “Nou annan lespri sen.” Me eski zot kapab fer sa travay ki Temwen Zeova pe fer dan sa bann dernyen zour? Serten in esey prese parey nou, me zot pa’n reisi fer li. Lezot i pare pour prese me zis pour en ptigin letan. Lezot ankor, i kapab pres portanport me zot pa pres lo bon nouvel Rwayonm. Alor, zot pa kapab pe fer sa travay ki Zezi ti konmanse.
LEKEL KI PE VREMAN ANONS SA BON NOUVEL OZORDI?
17, 18. (a) Akoz nou asire ki zis Temwen Zeova ki pe anons sa bon nouvel lo Rwayonm ozordi? (b) Kwa ki fer li posib pour nou kontinyen fer sa travay?
17 Alor, lekel ki pe anons sa bon nouvel lo Rwayonm ozordi? Zis Temwen Zeova! Ki mannyer nou konn sa? Parski nou pe anons sa mesaz ki devret ganny anonse, sa bon nouvel lo Rwayonm. Nou pe rod dimoun partou lo later, alor nou pe servi sa bann bon metod. Nou annan sa bon motivasyon pour fer sa travay akoz nou kontan Zeova ek bann dimoun. Nou travay predikasyon pe ganny fer lo en pli gran lanpler parski nou pe fer li avek tou pep dan lemonn e dan diferan langaz. An plis ki sa, nou pou kontinyen anons sa bon nouvel lo Rwayonm ziska lafen i arive!
18 Pa i vreman merveye pour vwar sa bon travay ki pep Zeova pe fer pour pres sa bon nouvel dan sa bann dernyen zour! Me ki mannyer nou kapab fer tou sa travay? Zapot Pol i eksplike: “Bondye i travay dan zot. I donn zot lavolonte e i rann zot kapab pour akonpli tou, dapre son prop plan.” (Filipyen 2:13) Ki Zeova i kontinyen donn nou sa lafors neseser pour ki nou fer nou mye pour kontinyen anons sa bon nouvel!—2 Timote 4:5.