I napa nanryen ki kapab fer en dimoun drwat aret servi Zeova

1-2. Ki en ekriven ti dir e ki nou pou vwar dan sa lartik?

OZORDI plizyer milyon dimoun i dir ki zot krwar dan Zezi me zot pa aksepte son lansennyman. (2 Tim. 4:3, 4) Anfet, en ekriven ti ekri: “Si i ti annan en lot zonm parey ‘Zezi’ parmi nou ozordi ki dir bann keksoz parey Zezi ti dir . . . , eski nou ti pou rezet sa zonm parey dimoun ti rezet Zezi de mil an pase? . . . Larepons i wi, nou ti pou rezet li.”

² Ler Zezi ti lo later, en kantite dimoun ti tann li pe ansennyen e zot ti vwar li pe fer mirak. Me zot ti refize krwar dan li. Akoz? Dan sa lartik avan, nou ti vwar kat rezon akoz dimoun pa ti aksepte sa ki Zezi ti dir e fer. Dan sa lartik, nou pou vwar ankor kat rezon. Nou pou osi vwar akoz dimoun ozordi pa aksepte bann disip Zezi e ki mannyer nou kapab fer sir ki nanryen pa fer nou aret servi Zeova.

(1) ZEZI PA TI FER LAPREFERANS

3. Ki Zezi ti fer ki ti fer serten dimoun pa aksepte li?

³ Ler Zezi ti lo later, i ti pas letan avek tou sort kalite dimoun. I ti manz avek bann dimoun ris e bann ki ti annan o pozisyon. Me i ti osi pas bokou letan avek bann dimoun pov e bann ki pa ti ganny trete byen. An plis, i ti demontre konpasyon anver bann dimoun ki ti ganny vwar konman “bann ki annan en move lavi.” Sa ti fer serten dimoun orgeye pa aksepte Zezi. Zot ti demann son bann disip: “Akoz zot manze e bwar avek bann kolekter taks ek bann ki annan en move lavi?” Me Zezi ti reponn zot: “Dimoun an bonn sante pa bezwen dokter, me bann ki malad ki bezwen dokter. Mon pa’n vin pour dimoun drwat me mon’n vin pour ki bann ki annan en move lavi i repantir.”​—Lik 5:29-32.

4. Dapre profet Izai, ki bann Zwif ti’n devret ekspekte konsernan Mesi?

⁴ Ki Labib i dir? Bokou letan avan ki Mesi i vin lo later, profet Izai ti’n predir ki dimoun pa ti pou aksepte li. Sa profesi i dir: “I ti ganny meprize e dimoun ti evit li . . . I ti konmsi son figir ti’n ganny kasyet avek nou. I ti ganny meprize e nou ti konsider li konman en nanryen ditou.” (Iza. 53:3, NWT) Dapre sa profesi, dimoun ti pou “evit” Mesi, alor bann Zwif dan premye syek ti’n devret ekspekte ki dimoun pa aksepte Zezi.

5. Ki mannyer bokou dimoun ozordi i vwar bann disip Zezi?

⁵ Eski i annan sa menm problenm ozordi? Wi. En kantite sef relizye i kontan bann dimoun ki ris, ki enportan e ki sa lemonn i konsider konman saz. Zot pare pour aksepte sa bann dimoun dan zot legliz menm si sa bann dimoun pa fer sa ki Bondye i kontan. Sa bann sef relizye pa kontan bann serviter Zeova ki prop moralman parski zot pa ganny konsidere konman bann dimoun enportan dapre standar sa lemonn. Parey Pol ti dir, Bondye i swazir bann ki ganny “meprize.” (1 Kor. 1:26-29) Me pour Zeova tou son bann serviter fidel i presye.

6. Ki Zezi ti dir dan Matye 11:25, 26 e ki mannyer nou kapab swiv son legzanp?

⁶ Ki nou devret fer pour fer sir ki nou pa zanmen aret servi Zeova? (Lir Matye 11:25, 26.) Nou pa devret les nou ganny enfliyanse avek lafason ki lemonn i vwar pep Bondye. O kontrer nou devret rekonnet ki Zeova i servi bann dimoun ki annan limilite pour fer son lavolonte. (Ps. 138:6, NWT) Nou devret osi reflesir lo ki kantite keksoz Zeova in akonpli atraver bann ki lemonn pa konsider konman saz oubyen entelizan.

(2) ZEZI TI REVEL BANN FO LANSENNYMAN

7. Akoz Zezi ti apel bann Farizyen ipokrit e ki mannyer zot ti reakte?

⁷ Avek kouraz, Zezi ti revel lipokrizi bann sef relizye dan son letan parski zot pa ti ansenny dimoun pour ador Zeova dan sa bon fason. Par egzanp, i ti revel lipokrizi bann Farizyen akoz zot ti pli enterese avek lafason ki zot ti lav zot lanmen olye avek lafason ki zot ti pran swen avek zot paran. (Mat. 15:1-11) I kapab ki bann disip Zezi ti sirprann avek sa ki Zezi ti dir. Alor zot ti demann li: “Eski ou konnen ki bann Farizyen pa’n kontan sa ki ou’n dir?” I ti reponn zot: “Tou plant ki mon Papa ki dan lesyel pa’n plante pou ganny derasinen. Les zot, zot bann gid aveg. Alor, si en aveg i gid en lot aveg, tou le de pou tonm dan trou.” (Mat. 15:12-14) Menm si bann sef relizye ti ankoler avek Zezi akoz i ti dir sa bann parol, Zezi ti toultan dir laverite.

8. Ki mannyer Zezi ti montre ki Bondye pa aksepte tou krwayans relizye?

⁸ Zezi ti osi montre ki serten lansennyman relizye ti fo. I pa ti dir ki Bondye i aksepte tou krwayans relizye. O kontrer i ti dir ki en kantite dimoun ti pou lo sa semen ki fasil e ki anmenn ver destriksyon tandis ki en ptigin dimoun ti pou lo sa semen ki difisil e ki anmenn ver lavi. (Mat. 7:13, 14) I ti dir ki serten dimoun ti pou dir ki zot pe servi Bondye me an realite zot pa ti pou pe servi li. I ti averti son bann disip: “Vey byen sa bann fo profet ki vin kot zot e fer krwar zot bann mouton, me ki an realite zot bann lelou voras. Zot pou rekonnet sa bann dimoun par zot fri.”​—Mat. 7:15-20.

9. Ki serten fo lansennyman relizye ki Zezi ti revele?

⁹ Ki Labib i dir? Labib ti predir ki Mesi ti pou devoue pour lakaz Zeova. (Ps. 69:9; Zan 2:14-17) Sa devouman ti pous Zezi pour revel bann fo lansennyman ek pratik relizye. Par egzanp, bann Farizyen ti krwar ki nanm i imortel me Zezi ti ansennyen ki bann mor pe dormi. (Zan 11:11) Bann Sadiseen ti dir ki napa rezireksyon me Zezi ti resisit son zanmi Lazar. (Zan 11:43, 44; Akt 23:8) Bann Farizyen ti ansenny dimoun ki keksoz i ariv akoz desten oubyen akoz Bondye me Zezi ti ansennyen ki imen i kapab swazir pour ador Bondye ouswa non.​—Mat. 11:28.

10. Akoz sa ki nou ansennyen i fer en kantite dimoun pa kontan nou?

¹⁰ Eski i annan sa menm problenm ozordi? Wi. En kantite dimoun ozordi pa aksepte nou parski nou servi Labib pour montre dimoun ki serten lansennyman relizye i fo. Bann sef relizye i ansenny dimoun ki Bondye i pini bann move dimoun dan lanfer. Zot servi sa fo lansennyman pour enfliyans dimoun. De lot kote, bann serviter Zeova ki ador en Bondye lanmour i ed dimoun konpran ki sa lansennyman i fo. Bann sef relizye i osi dir ki nanm i imortel. Nou, nou montre dimoun ki sa lansennyman pa sorti dan Labib parski si sa lansennyman ti vre, personn pa ti pou ganny resisite. Menm si, en kantite larelizyon i ansennyen ki keksoz i ariv akoz desten oubyen akoz Bondye. Nou, nou ansennyen ki dimoun i annan sa liberte pour swazir e zot kapab swazir pour servi Bondye. Me ki bann sef relizye i fer ler nou revel zot bann fo lansennyman? Souvandfwa zot ankoler.

11. Dapre sa ki Zezi ti dir dan Zan 8:45-47, ki Bondye i ekspekte son pep i fer?

¹¹ Ki nou devret fer pour fer sir ki nou pa zanmen aret servi Zeova? Si nou kontan laverite, nou bezwen krwar e obei Parol Bondye. (Lir Zan 8:45-47.) Nou pa pou zanmen kit laverite parey Satan. Nou pa pou zanmen fer nanryen ki pa annakor avek nou krwayans. (Zan 8:44) Bondye i ekspekte ki son pep i “deteste sa ki mal e reste atase avek sa ki byen,” zis parey Zezi ti fer.​—Rom. 12:9; Ebr. 1:9.

(3) ZEZI TI GANNY PERSEKITE

12. Akoz lafason ki Zezi ti mor ti fer en kantite Zwif pa aksepte Zezi?

¹² Ki en lot rezon bann Zwif pa ti aksepte Zezi? Pol ti dir: “Nou anonse ki Kris in ganny met amor lo en poto. Pour bann Zwif, sa i en lobstak.” (1 Kor. 1:23) Akoz lafason ki Zezi ti mor ti fer en kantite Zwif pa aksepte Zezi? Pour bann Zwif, lefet ki Zezi ti’n mor lo en poto, sa ti fer li paret konman en kriminel e en dimoun ki annan en move lavi. Alor zot ti refize krwar ki i Mesi.​—Det. 21:22, 23.

13. Ki serten Zwif pa ti rekonnet konsernan Zezi?

¹³ Bann Zwif ki pa ti aksepte Zezi, pa ti rekonnet ki Zezi i inosan, ki bann lakizasyon kont li ti fo e ki i ti’n ganny trete dan en fason enzis. Bann Zwif ki ti ziz Zezi pa ti enterese avek lazistis. Lakour Siprenm bann Zwif ti deswit zwenn ansanm pour ziz Zezi e zot pa ti swiv lalwa konsernan lafason ki en dimoun i devret ganny zize. (Lik 22:54; Zan 18:24) Bann ziz pa ti demontre lazistis ler zot ti ekout bann lakizasyon ek levidans ki ti annan kont Zezi. Zot ti osi esey rod bann “fo temwannyaz kont Zezi pour met li amor.” Ler zot pa ti kapab fer sa, sef pret ti esey fer Zezi dir en keksoz pour zot kapab dir ki i ti koupab. Me sa ti kont lalwa. (Mat. 26:59; Mark 14:55-64) Apre ki Zezi ti’n resisite, bann ziz ti pey bann solda Romen ki ti vey latonm Zezi “en kantite pyes larzan” pour fann bann fo rimer lo akoz latonm ti vid.​—Mat. 28:11-15.

14. Ki Labib ti predir konsernan lanmor Mesi?

¹⁴ Ki Labib i dir? Menm si bokou Zwif dan letan Zezi pa ti ekspekte ki Mesi ti pou bezwen mor, remark sa ki en profesi dan Labib ti dir: “I’n donn son lavi ziska lanmor e i’n ganny konte parmi bann ki komet lofans e li menm in anmenn pese bokou dimoun e i’n konmans entervenir pour bann ki komet lofans.” (Iza. 53:12, NWT) Alor bann Zwif ti napa rezon pour pa aksepte Zezi ler i ti ganny met amor parey en kriminel.

15. Ki lakizasyon kont Temwen Zeova ki’n fer serten pa aksepte nou?

¹⁵ Eski i annan sa menm problenm ozordi? Definitivman! Zezi ti ganny kondannen dan en fason enzis e Temwen Zeova ozordi i ganny trete dan sa menm fason. Par egzanp, ant bann lannen 1930 ek 1950, i ti annan bokou ka ankour konsernan nou liberte pour ador Bondye, Leta-z-ini. Serten ziz ti montre ki zot pa kontan nou. An Quebec, Kanada, Legliz ti travay ansanm avek gouvernman pour aret nou travay predikasyon. Bokou bann proklanmater ti ganny met dan prizon zis akoz zot ti koz avek zot vwazen konsernan Rwayonm Bondye. Ler bann Nazi ti o pouvwar Lalmanny, en kantite nou bann zenn frer ti ganny touye. Pandan sa bann dernyen lannen, bokou nou bann frer Larisi in ganny kondannen e ganny met dan prizon akoz zot in koz lo sa ki Labib i dir, ki en keksoz ki gouvernman i dir i en “aktivite ekstremis.” Menm Labib Tradiksyon Nouvo Lemonn dan langaz Larisi in ganny enterdi e in ganny apele “lenformasyon ekstremis” zis akoz i annan non Zeova ladan.

16. Dapre 1 Zan 4:1, akoz nou pa devret les nou ganny anbete avek bann mansonz ki ganny dir konsernan pep Zeova?

¹⁶ Ki nou devret fer pour fer sir ki nou pa zanmen aret servi Zeova? Rod bann lenformasyon ki egzakt. Pandan Sermon lo Montanny, Zezi ti averti bann ki ti pe ekoute ki i annan serten dimoun ki pou “koz manti e dir tou sort move keksoz lo zot.” (Mat. 5:11) Sa bann mansonz i sorti kot Satan. I enfliyans serten dimoun pour koz manti lo bann ki kontan laverite. (Rev. 12:9, 10) Nou pa devret aksepte sa bann mansonz. Nou pa devret les sa bann mansonz fer nou per pour servi Bondye ouswa afebli nou lafwa.​—Lir 1 Zan 4:1.

(4) ZEZI TI GANNY TRAI E ABANDONNEN

17. Dan ki fason sa ki ti arive avan Zezi i mor, ti’n kapab fer serten dimoun pa aksepte Zezi?

¹⁷ Zis avan Zezi ti mor, enn parmi son 12 zapot ti trai li. Sa zour swar avan i mor, enn son bann zapot ti dir trwa fwa ki i pa konn li e tou son bann zapot ti abandonn li. (Mat. 26:14-16, 47, 56, 75) Zezi pa ti sirprann. I ti’n predir ki sa ti pou arive. (Zan 6:64; 13:21, 26, 38; 16:32) Ler serten dimoun ti vwar sa ki ti’n arive, i kapab ki sa ti fer zot pa anvi vin son disip. I kapab ki zot ti dir, ‘Si i koumsa ki bann zapot Zezi i fer, mon pa anvi vin enn zot!’

18. Ki profesi ki ti ganny akonplir zis avan Zezi i mor?

¹⁸ Ki Labib i dir? Plizyer santenn lannen avan ki Zezi i vin lo later, Zeova ti’n fer ekri dan Labib ki Mesi ti pou ganny trai pour 30 pyes larzan. (Zek. 11:12, 13, NWT) Sa enn ki ti pou trai Mesi ti pou enn parmi son bann zanmi pros. (Ps. 41:9, NWT) Profet Zekarya ti ekri: “Touy berze e bann ki dan troupo pou ganny disperse.” (Zek. 13:7, NWT) Ler bann dimoun senser ti pou vwar sa bann keksoz arive, zot pa ti pou rezet Zezi. O kontrer zot lafwa ti pou vin pli for ler zot vwar bann profesi pe ganny akonplir konsernan Zezi.

19. Ki bann dimoun senser i konnen?

¹⁹ Eski i annan sa menm problenm ozordi? Wi. Dan nou letan, serten Temwen Zeova byen koni in aret servi Zeova. Zot in vin aposta e zot in esey fer lezot aret servi Zeova. Zot in koz an mal e koz mansonz lo Temwen Zeova. Zot in rakont bann zistwar lo Temwen Zeova pour anbet dimoun. Zot in fer sa dan bann zournal, lo radyo, lo televizyon e lo Enternet. Me bann ki senser pa les zot ganny anbete. O kontrer zot konnen ki Labib ti predir ki sa bann keksoz ti pou arive.​—Mat. 24:24; 2 Pyer 2:18-22.

20. Ki mannyer nou kapab anpes nou ganny anbete avek bann ki’n kit laverite? (2 Timote 4:4, 5)

²⁰ Ki nou devret fer pour fer sir ki nou pa zanmen aret servi Zeova? Nou bezwen gard nou lafwa for par kontinyen etidye Labib, kontinyen priye e kontinyen reste okipe dan sa travay ki Zeova in donn nou. (Lir 2 Timote 4:4, 5.) Si nou annan lafwa, nou pa pou panik ler nou tann bann fo zistwar lo Temwen Zeova. (Iza. 28:16, NWT) Nou lanmour pour Zeova, son Parol ek bann frer ek ser pou anpes nou ganny anbete avek bann ki’n kit laverite.

21. Menm si lamazorite dimoun ozordi pa aksepte nou mesaz, ki nou kapab asire?

²¹ Dan letan Zezi, en kantite dimoun pa ti aksepte Zezi. Kantmenm sa, en kantite lezot ti aksepte li. Sa ti enkli, omwen en manm Sannedren e en kantite “pret.” (Akt 6:7; Mat. 27:57-60; Mark 15:43) Pareyman ozordi, en kantite dimoun in vin bann disip Zezi. Akoz? Parski zot konn bann laverite ki dan Labib e zot kontan sa bann laverite. Parol Bondye i dir: “Bann ki kontan ou lalwa i annan labondans lape e i napa okenn lobstak ki kapab fer zot tonbe.”​—Ps. 119:165, NWT.