Pa dekouraz “sa bann dimoun ki parey en zanfan”

1. Ki Zeova in fer pour sakenn parmi nou?

ZIS mazin sa: Zeova in atir sakenn parmi nou ver li. (Zan 6:44) Anmezir ki Zeova ti egzamin tou sa plizyer bilyon dimoun lo later, i ti vwar en keksoz presye dan ou. I ti vwar en leker senser ki kapab kontan li. (1 Kron. 28:9, NWT) Zeova i konn ou, i konpran ou e i kontan ou. Pa sa i rekonfortan!

2. Ki mannyer Zezi ti ed nou konpran ki kantite Zeova i kontan sakenn parmi nou?

² Zeova i vreman kontan ou e i osi kontan tou ou bann frer ek ser. Pour ed nou konpran sa, Zezi ti konpar Zeova avek en berze. Si en berze i annan 100 mouton e i perdi enn parmi, ki sa berze pou fer? I pou “kit sa 99 lezot mouton lo montanny e al rod sa enn ki’n perdi.” Ler i vwar sa mouton ki’n perdi, i pa pou ankoler. O kontrer i pou kontan. Sa legzanp i montre nou ki tou mouton i enportan pour Zeova. Zezi ti dir: “Mon Papa dan lesyel pa anvi ki ni enn sa bann dimoun ki parey en zanfan i perdi.”​—Mat. 18:12-14.

3. Ki nou pou vwar dan sa lartik?

³ Ou pa ti pou zanmen anvi vin sa rezon ki ou bann frer ek ser i dekouraze. Dan sa lartik, nou pou reponn sa bann kestyon swivan: Ki mannyer nou kapab evite fer lezot dekouraze? Ki nou kapab fer si en dimoun i ofans nou? Me premyerman nou pou vwar lekel “sa bann dimoun ki parey en zanfan” ki Zezi ti koz lo la dan Matye sapit 18.

LEKEL “SA BANN DIMOUN KI PAREY EN ZANFAN”?

4. Lekel “sa bann dimoun ki parey en zanfan”?

⁴ Ler Zezi i koz lo “sa bann dimoun ki parey en zanfan” i pe refer avek tou son bann disip nenport ki laz zot ete. Zot “parey bann zanfan” parski zot pare pour les Zezi ansenny zot. (Mat. 18:3) Menm si zot sorti dan diferan landrwa, kiltir e zot annan diferan pwennvi ek personnalite, zot tou zot annan lafwa dan Kris e Kris i kontan zot en kantite.​—Mat. 18:6; Zan 1:12.

5. Ki mannyer Zeova i santi ler en dimoun i dekouraz oubyen bles santiman enn son serviter?

⁵ Tou “sa bann dimoun ki parey en zanfan” i presye pour Zeova. Pour nou konpran ki mannyer Zeova i santi, mazin lafason ki nou santi anver bann zanfan. Zot presye pour nou. Nou anvi protez zot parski zot pa for, eksperyanse ouswa saz parey bann adilt. Nou pa kontan ler en dimoun i fer en lot soufer me nou pli ankoler ler en dimoun i fer en zanfan soufer. Pareyman, Zeova i anvi protez nou e i ankoler ler en dimoun i dekouraz oubyen bles santiman enn son serviter.​—Iza. 63:9, NWT; Mark 9:42.

6. Dapre 1 Korentyen 1:26-29, ki mannyer dimoun dan lemonn i konsider bann disip Zezi?

⁶ Ki lot fason bann disip Zezi i parey bann zanfan? Lekel ki dimoun dan sa lemonn i konsider konman enportan? Dimoun ki ris, popiler e bann ki annan lotorite. Me laplipar disip Zezi pa konmsa. (Lir 1 Korentyen 1:26-29.) Alor, dimoun dan lemonn i mazinen ki zot pa enportan me Zeova pa vwar zot dan sa fason.

7. Ki mannyer Zeova i anvi nou santi konsernan nou bann frer ek ser?

⁷ Zeova i kontan tou son bann serviter, ki swa zot i’n servi li pour plizyer lannen ouswa zot nouvo dan laverite. Tou nou bann frer ek ser i enportan pour Zeova, alor zot devret enportan pour nou osi. Nou anvi “annan lanmour pour lasosyasyon tou bann frer,” pa zis serten parmi zot. (1 Pyer 2:17) Nou bezwen pare pour fer sa ki nou kapab pour protez e pran swen avek zot. Si nou konnen ki nou’n bles oubyen ofans en dimoun, nou pa devret zis fer konmsi nanryen pa’n arive e mazinen ki sa dimoun i devret pardonn nou e oubliy sa ki’n arive. Akoz serten i kapab ofanse? Petet akoz lafason ki zot in grandi, serten i krwar ki zot pli enferyer ki lezot. Lezot i nouvo dan laverite e i kapab ki zot pa ankor aprann ki zot bezwen pardonn lezot ler zot fer fot. Menm si nou santiman ouswa santiman lezot ki’n ganny blese, nou bezwen fer lape. An plis, en dimoun ki souvan ofanse par sa ki lezot i dir e fer, i bezwen rekonnet ki i annan en tre dan son personnalite ki i bezwen travay lo la. Apre sa, i pou annan lazwa e en bon lanmitye ek son bann frer ek ser.

KONSIDER LEZOT PLI SIPERYER KI OU

8. Ki move pwennvi bann Zwif ti annan ki ti annan en lenfliyans lo bann disip Zezi?

⁸ Akoz Zezi ti koz lo “sa bann dimoun ki parey en zanfan”? Bann disip Zezi ti demann li: “Lekel ki pli gran dan Rwayonm lesyel?” (Mat. 18:1) En kantite Zwif ti anvi ki lezot i vwar zot enportan. En spesyalis Labib i dir: “Sa keksoz ki ti pli enportan dan zot lavi ti pou ganny loner e vin popiler.”

9. Ki bann disip Zezi ti bezwen fer?

⁹ Zezi ti konnen ki en kantite Zwif ti krwar ki i enportan pour zot pli siperyer ki lezot, alor son bann disip ti bezwen fer bokou zefor pour sanz zot fason panse. Zezi ti dir zot: “Sa enn pli gran parmi zot i devret vin parey sa enn pli zenn e sa enn ki pe dirize parey en serviter pour lezot.” (Lik 22:26) Nou vin “parey sa enn pli zenn” ler nou “konsider lezot pli siperyer” ki nou. (Fili. 2:3) Ler nou fer sa, i tre probab ki nou pa pou dekouraz lezot.

10. Ki konsey zapot Pol ti donnen, ki nou devret gard antet?

¹⁰ Dan en fason ou en lot, tou nou bann frer ek ser i pli siperyer ki nou. I fasil pour vwar sa, ler nou konsantre lo zot bann bon kalite. Nou devret gard antet sa konsey ki zapot Pol ti donn bann Korentyen, ki dir: “Lekel ki fer ou diferan avek ou kanmarad? Anfet, ki ou annan ki ou pa’n gannyen? Si ou’n ganny li, akoz ou bezwen fer vantar dan zar konmsi ou pa’n gannyen?” (1 Kor. 4:7) Alor, nou pa devret zanmen anvi ki lezot i admir nou ouswa vwar nou pli siperyer ki lezot. Par egzanp, si en frer i kapab fer bann bon diskour oubyen en ser i kapab konmans en kantite letid Labib, sa frer oubyen sa ser i devret toultan donn laglwar Zeova pour sa ki i kapab fer.

PARDONN LEZOT “AVEK TOU ZOT LEKER”

11. Ki nou aprann avek legzanp sa lerwa ek son lesklav?

¹¹ Apre ki Zezi ti’n averti son bann disip pour pa dekouraz lezot, i ti donn en legzanp konsernan en lerwa ek son lesklav. Sa lerwa ti kennsel en gro det ki sa lesklav pa ti kapab peye. Pli tar, sa menm lesklav ti refize kennsel det en lot lesklav ki ti dwa li pli ptigin ki li i ti dwa lerwa. Ler lerwa ti tann sa i ti fer met sa move lesklav dan prizon. Ki leson nou aprann? Zezi ti dir: “Se koumsanmenm ki mon Papa dan lesyel pou fer avek zot si zot pa pardonn zot frer avek tou zot leker.”​—Mat. 18:21-35.

12. Ki mannyer nou fer soufer lezot, ler nou refize pour pardonn zot?

¹² Sa lesklav ti fer soufer son lekor ek lezot osi. Premyerman, i pa ti pran pitye pour en lot lesklav. I ti fer li “ganny met dan prizon ziska ki i pey sa ki i ti dwa.” Dezyenmman, i ti fer soufer sa bann ki ti pe gete. Ler “lezot lesklav ti vwar sa ki ti’n arive, sa ti fatig zot en kantite.” Pareyman, sa ki nou fer i annan en lefe lo lezot. Ki i kapab arive si en dimoun pa tret nou byen e nou refize pardonn li? Premyerman, nou bles son santiman akoz nou refize pardonn li e petet nou inyor li e nou pa demontre lanmour anver li. Dezyenmman, nou fer lezot dan kongregasyon enkonfortab ler zot vwar ki i annan problenm ant nou ek sa dimoun.

13. Ki nou aprann avek leksperyans en pionye?

¹³ Ler nou pardonn nou bann frer ek ser, nou santi nou pli byen e nou ed zot osi pour santi zot pli byen. Sanmenm sa ki en pionye ki apel Crystalb ti fer. En ser dan kongregasyon ti ofans li. Crystal i dir: “Parfwa son bann parol ti bles mwan parey en kouto. Mon pa ti ni menm anvi al predikasyon avek li. Mon ti konmans perdi mon devouman ek mon lazwa.” Crystal ti santi ki i ti annan bon rezon pour li ankoler me i pa ti reste ankoler avek sa ser oubyen konsantre lo li menm ek son prop santiman. Avek limilite i ti aplik sa konsey Labib ki trouve dan sa lartik ki annan pour tit “Forgive From Your Heart” ki dan Latour Veyer le 15 Oktob 1999 an Angle. I ti pardonn sa ser. Crystal i dir: “Aprezan mon konpran ki nou tou nou pe fer zefor pour sanz nou personnalite e ki Zeova i pare pour pardonn nou toulezour. Mon santi mwan vreman soulaze e mon’n reganny mon lazwa.”

14. Dapre Matye 18:21, 22, ki problenm i kapab zapot Pyer ti annan e ki nou aprann avek sa ki Zezi ti dir?

¹⁴ Nou konnen ki nou bezwen pardonn lezot e sa i sa pli bon keksoz pour fer. Me i kapab difisil pour nou fer sa. Petet zapot Pyer ti santi koumsa parfwa. (Lir Matye 18:21, 22.) Kwa ki kapab ede? Premyerman, reflesir lo ki kantite Zeova in pardonn ou. (Mat. 18:32, 33) Nou pa merite ki i pardonn nou, me i fer li volonterman. (Ps. 103:8-10, NWT) An menm tan, nou osi “nou oblize kontan kanmarad.” Alor, pardonn lezot i pa en keksoz ki nou kapab deside si nou pou fer oubyen non. Nou oblize pardonn nou bann frer ek ser. (1 Zan 4:11) Dezyenmman, reflesir lo ki arive ler nou pardonn lezot. Nou kapab ed en dimoun ki’n fer nou ditor, anmenn linite dan kongregasyon, protez nou lanmitye avek Zeova e santi nou soulaze. (2 Kor. 2:7; Kol. 3:14) Finalman, fer lapriyer avek sa Enn ki demann nou pour pardonn lezot. Pa les Satan gat nou bon lanmitye avek nou bann frer ek ser. (Efe. 4:26, 27) Nou bezwen led Zeova pour annan lape dan kongregasyon.

PA LES OU DEKOURAZE

15. Dapre Kolosyen 3:13, ki ou devret fer si en frer oubyen en ser in fer en keksoz ki’n ofans ou?

¹⁵ Ki ou devret fer si en frer oubyen en ser in fer en keksoz ki’n ofans ou? Fer tou sa ki ou kapab pour gard lape. Dir Zeova ki mannyer ou santi dan lapriyer. Demann li pour ed sa dimoun ki’n ofans ou e pour ed ou vwar bann bon kalite ki sa dimoun i annan, setadir bann kalite ki Zeova i kontan avek sa dimoun. (Lik 6:28) Si ou pa kapab oubliy sa ki ou frer oubyen ser in fer, mazin sa pli bon fason pour koz avek li. I toultan byen pour mazinen ki i pa ti lentansyon ou frer ouswa ou ser pour bles ou santiman. (Mat. 5:23, 24; 1 Kor. 13:7) Ler ou koz avek li, gard antet ki i ti annan bon lentansyon. Me si i pa anvi fer lape, “kontinyen siport” li e kontinyen demontre pasyans anver li. (Lir Kolosyen 3:13.) Pli enportan ankor, pa zanmen gard rankin akoz sa i kapab gat ou lanmitye avek Zeova. Pa les nanryen dekouraz ou. Ler ou fer sa, ou pou montre ki ou kontan Zeova plis ki lezot keksoz.​—Ps. 119:165.

16. Ki responsabilite nou tou nou annan?

¹⁶ Nou rekonesan ki nou kapab servi Zeova ansanm avek nou bann frer ek ser konman “en sel troupo” ki annan “en sel berze.” (Zan 10:16) Sa liv Organized to Do Jehovah’s Will, paz 165 i dir: “Vi ki ou’n ganny bann byenfe avek sa linite, ou bezwen fer ou par pour gard sa linite.” Alor, nou bezwen aprann “pour vwar nou bann frer ek ser parey Zeova i vwar zot.” Pour Zeova, nou tou nou presye. Eski koumsa ki ou vwar ou bann frer ek ser? Zeova i vwar e apresye tou sa ki ou fer pour ed zot e pran swen avek zot.​—Mat. 10:42.

17. Ki nou determinen pour fer?

¹⁷ Nou kontan nou bann frer ek ser, alor nou “determinen pour pa fer nanryen ki kapab fer en frer tonbe oubyen vin en lobstak pour li.” (Rom. 14:13) Nou konsider nou bann frer ek ser konman pli siperyer ki nou e nou anvi pardonn zot avek tou nou leker. Nou pa anvi les nou ganny dekouraze. O kontrer, annou swazir pour “rod bann keksoz ki promot lape e bann keksoz ki batir kanmarad.”​—Rom. 14:19.