Letid Labib endividyel e an fanmir i vreman enportan!

1. Ki lentere spesyal Konsey Direkter i annan pour nou e akoz?

¹ Parey dan premye syek, Konsey Direkter i annan en lentere senser pour byennet pep Zeova. (Akt 15:6, 28) Anmezir ki gran ladetres i aprose, i vreman enportan ki nou konman proklanmater Rwayonm nou annan en bon relasyon avek Zeova. Ki mannyer ou pou servi sa letan ki avan sa ti pe ganny servi pour Letid Liv Kongregasyon? Nou tou nou ganny ankouraze pour servi sa letan pour etidye e ador Zeova an fanmir. Si nou servi sa letan dan en fason ki saz, sa pou permet nou pour etidye pli oprofon Parol enspire Bondye e tir byenfe dan sa ki i ansennyen.—Ps. 1:1-3; Rom. 11:33, 34.

2. Ki mannyer nou kapab fer laranzman pour fer letid Labib an fanmir?

² Letid an fanmir: Bann sef fanmir i ganny ankouraze pour desarz zot responsabilite devan Zeova pour fer sir ki en letid Labib oprofon e regilye i ganny fer an fanmir. (Det. 6:6, 7) Bann frer oubyen ser selibater ki napa responsabilite familyal pou kapab servi sa letan pour fer resers ek letid Labib endividyel. I enportan ki nou tou nou ‘servi byen nou letan’ pour medite e etidye pour nou gard en bon relasyon avek Zeova malgre sa bann “move” zour.—Efe. 5:15, 16.

3, 4. Ki bann sizesyon ki’n ganny donnen konsernan bann piblikasyon ki nou kapab servi e ki nou devret gard antet?

³ Ki pour etidye: Sa Watch Tower Publications Index oubyen Watchtower Library lo CD-ROM i kapab ed ou trouv lenformasyon ki pou fer ou letid Labib an fanmir pli agreab. I annan bann lartik dan Latour Veyer (Angle/Franse) ki bann fanmir i kapab egzaminen tel parey bann laspe ki ganny pibliye regilyerman: “Keys to Family Happiness,” “Teach Your Children” ek “For Our Young People.” Dan Awake! i osi annan bann seri “Young People Ask” ek bann lartik vreman enteresan ki koz lo bann keksoz merveye lo kreasyon.

⁴ Si nou pran letan pour lir Labib an fanmir, sa i kapab ed tou manm fanmir pour tir byenfe par rapel e aplik sa bann prensip dan zot lavi. (Ebr. 4:12) Ou kapab get oubyen diskit enn parmi bann video ki’n ganny prodwir par lorganizasyon pandan lezot lokazyon. Ou kapab vin kreatif kan ou pe swazir ki ou pou etidye e konman ou pou etidye. Akoz ou pa demann ou fanmir ki zot ti a kontan etidye?

5. Akoz letid Labib endividyel e an fanmir i vreman enportan dan nou lavi la konmela?

⁵ Akoz i enportan la konmela: Si nou fortifye nou relasyon avek Zeova, sa pou prepar nou pour “tenir ferm e vwar delivrans Zeova.” (Egz. 14:13) Paran i bezwen gidans sorti dan Labib pour elve zot zanfan “dan sa zenerasyon koronpi e visye.” (Fili. 2:15) Zanfan i bezwen led pour fer fas avek sa nivo moral ki pe degrade ozordi dan lekol. (Prov. 22:3, 6) Bann koup osi i bezwen ranforsi sa “lakord ki’n tres an trwa” avek Zeova. (Ekle. 4:12) Alor, annou servi byen sa letan ki reste pour nou vin pli for dan nou “lafwa ki tre sen”!—Zid 20.

Ki pour dir lo bann magazin

Watchtower 1 Okt.

“Dan sa bann moman difisil, bokou dimoun i enkyet pour lavenir. Kwa ki ed ou pour gard en pwennvi pozitif lo lavenir? [Les sa dimoun reponn.] Remark sa promes dan Labib. [Lir Izai 65:17.] Sa magazin i ofer bann rezon valab pour nou annan en pwennvi pozitif lo lavenir.”

Awake! Okt.

“Internet i en zouti byen itil, me i kapab prezant en danze pour bann zanfan. Ki mannyer ou panse nou kapab protez zot? [Les sa dimoun reponn.] Remark sa panse dan Labib silvouple. [Lir e aplik Proverb 18:1.] Sa i selman enn parmi sa sis prensip Labib ki sa lartik i fer resorti pour ed bann paran protez zot zanfan.” Montre lartik lo paz 8.

Watchtower 1 Okt.

“Eksper in rekonnet lenportans rol ki en papa i annan dan fanmir. Kwa ki ou panse i kapab fer en msye en bon papa? [Les sa dimoun reponn.] Zezi ti fer resorti konman ki legzanp son Papa in ed li. [Lir Zan 5:19.] Sa lartik i fer resorti sis laspe enportan rol bann papa.” Montre sa lartik ki konmans lo paz 18.

Awake! Okt.

“Dimoun sorti dan plizyer larelizyon i annan diferan pwennvi konsernan vre natir Bondye. Me, ki mannyer Garson Bondye ti dekrir Li. Remark parol Zezi dan Zan 4:24. [Lir.] Lo zis de paz, sa lartik i prezant pwennvi Labib lo sa kestyon: ‘Ki kalite natir Bondye i annan?’” Montre sa lartik lo paz 24 ek 25.