oubyen vole e apre sa, esey persyad nou pour “swiv lafoul,” andotmo zwenn ansanm avek zot pour fer sa ki mal, oubyen si non kasyet sa ki zot pe fer. (Egz. 23:2) Me, en dimoun ki konnen konman pour fer bann desizyon ki onor Bondye pa pou les lafreyer ouswa sa dezir pour lezot aksepte li fer li azir dan en fason ki pa annakor avek son konsyans ki’n ganny antrennen par Labib.​—Rom. 13:5.

4. Akoz lezot i kapab anvi fer desizyon dan nou plas?

⁴ Pa tou sa ki anvi fer desizyon dan nou plas ki oule fer nou ditor. Bann zanmi ki annan bon lentansyon i kapab ensiste ki nou swiv zot konsey. Si nou pa pe reste avek nou fanmir, i kapab ki zot enkyet pe mazinen si nou byen e zot tant pour anvi kontinyen fer bann desizyon enportan dan nou plas, par egzanp, dan domenn tretman medikal. Labib i definitivman defann servi disan. (Akt 15:28, 29) Me konsernan lezot keksoz ki annan pour fer avek lasante, Labib pa donn tou detay lo la e i pou neseser ki sakenn ant nou i fer son prop desizyon konsernan tretman ki i pou aksepte ouswa refize.a Bann ki kontan nou i kapab deza annan zot prop lopinyon lo bann size koumsa. Par kont, sak Kretyen batize ki pe fer desizyon lo bann size parey, i bezwen pran son prop responsabilite. (Gal. 6:4, 5) Sa ki pli enportan pour nou, se ki nou annan en konsyans kler devan Bondye, pa devan zonm.​—1 Tim. 1:5.

5. Ki mannyer nou kapab evite perdi lafwa?

⁵ Si nou pa tro asire konsernan desizyon ki nou pou fer, i kapab danzere pour nou. Disip Zak ti ekrir ki en dimoun ki pa konnen ki desizyon i pou pran i “enserten dan sa ki i fer.” (Zak 1:8) Parey en dimoun dan en bato ki napa gouvernay dan movetan, i pou balote akoz i pa konnen ki swa i pou fer. I fasil pour en dimoun koumsa fer en nofraz, setadir, perdi son lafwa e apre sa, blanm lezot pour son move desizyon! (1 Tim. 1:19) Ki mannyer nou kapab evit sa kalite sityasyon? Nou devret “ferm dan lafwa.” (Lir Kolosyen 2:6, 7.) Pour arive ferm oubyen stab dan lafwa, nou bezwen aprann fer bann desizyon ki demontre nou lafwa dan Parol enspire Bondye. (2 Tim. 3:14-17) Me kwa ki kapab anpes nou fer bann bon desizyon?

Akoz i kapab difisil pour fer desizyon?

6. Dan ki fason lafreyer i kapab annan lefe lo nou?

⁶ Lafreyer i kapab paraliz nou. Nou kapab per ki nou pou fer en move desizyon, ki nou pa pou reisi ouswa ki nou pou paret konman en lenbesil devan lezot. I toutafe normal pour nou santi koumsa. Personn pa anvi fer en desizyon ki pou fer li tonm dan problenm ouswa menm anbaras li. Kantmenm sa, lanmour pour Bondye ek son Parol i kapab ed nou pour kontrol nou lafreyer. Dan ki fason? Lanmour pour Bondye pou motiv nou pour touzour egzamin son Parol ek bann piblikasyon baze lo Labib avan fer bann desizyon enportan. Dan sa fason, nou pou diminyen lakantite fot ki nou fer. Akoz? Parski Labib i kapab “fer bann ki napa leksperyans pridan, e donn en zenn onm konnesans ek abilite pour reflesir.”​—Prov. 1:4.

7. Ki legzanp Lerwa David i ansenny nou?

⁷ Eski nou pou touzour fer sa bon desizyon? Non. Nou tou nou fer fot. (Rom. 3:23) Par egzanp, Lerwa David ti en zonm fidel e saz. Pourtan, parfwa i ti fer bann desizyon bet ki ti fer li e lezot soufer. (2 Sam. 12:9-12) Me kantmenm sa, David pa ti les son bann fot anpes li servi son abilite pour fer bann bon desizyon ki ti fer li ganny faver Bondye. (1 Rwa. 15:4, 5) Parey David, nou kapab konnen konman pour fer bann bon desizyon, menm si dan lepase nou ti fer bann move desizyon, si nou touzour rapel ki Zeova pou les pase nou fot e pardonn nou nou pese. I pou kontinyen siport sa bann ki kontan e obeir li.​—Ps. 51:1-4, 7-10.

8. Ki nou aprann avek komanter zapot Pol lo maryaz?

⁸ Nou pa pou sitan enkyet konsernan fer en desizyon si nou rekonnet en keksoz. Kwa sa? Si nou rekonnet ki parler i annan diferan bon opsyon. Egzamin lafason ki zapot Pol ti rezonnen o size maryaz. Anba lenspirasyon, i ti ekrir: “Si en dimoun i panse ki i pa apropriye pour li reste vyerz, si i’n pas letan [ladolesans], e i devret koumsa, les li fer sa ki i oule, i pa pe fer en pese. Les zot marye. Me si en dimoun i determinen dan son leker, i pa santi sa nesesite me i annan lotorite lo sa ki i oule fer e i’n fer sa desizyon dan son prop leker pour reste vyerz, i pou fer byen.” (1 Kor. 7:36-38, NW) Pol ti konsey bann Kretyen pour reste selibater akoz i pli bon, me sa pa sa sel bon opsyon.

9. Eski nou devret konsernen avek lafason ki lezot i vwar nou bann desizyon? Eksplike.

⁹ Eski nou devret konsernen avek lafason ki lezot i vwar bann desizyon ki nou fer? Ziska en serten degre nou kapab dir ki wi. Parski, remark sa ki Pol ti dir konsernan manz bann manze ki petet ti’n kapab ganny sakrifye avek bann zidol. I ti rekonnet ki en serten desizyon i kapab pa mal, me parfwa sa desizyon i kapab annan en move lefe lo en dimoun ki son konsyans i pli feb. Ki Pol ti deside fer? I ti ekrir: “Si sa ki mon manze i fer mon frer tonm dan pese, mon pa pou manz lavyann, pour ki mon pa fer mon frer tonbe.” (1 Kor. 8:4-13) Nou osi nou devret egzamin lefe ki nou desizyon i kapab annan lo konsyans lezot. Byensir, sa ki pli enportan pour nou i sa lefe ki nou bann swa pou annan lo nou lanmitye avek Zeova. (Lir Romen 14:1-4.) Ki prensip Labib ki pou ed nou fer bann desizyon ki onor Bondye?

Sis keksoz pour fer bon desizyon

10, 11. (a) Ki mannyer nou ti kapab demontre en serten larogans dan fanmir? (b) Ki bann ansyen i devret gard antet kan zot pe fer en desizyon ki pou annan lefe lo kongregasyon?

¹⁰ Pa bezwen vin arogan. Avan nou fer en desizyon, nou merit demann nou lekor: ‘Eski mwan ki devret fer sa desizyon?’ Lerwa Salomon ti ekrir: “Eski ou’n vin en dimoun arogan? Alor ou pou ganny dezonore; me lasazes i avek bann ki modes.”​—Prov. 11:2.

¹¹ Paran i kapab donn zot zanfan sa loportinite pour fer serten desizyon, me zanfan pa devret neseserman krwar ki zot annan sa lotorite pour fer desizyon lo zot menm. (Kol. 3:20) Bann madanm marye ek manman i annan en serten degre lotorite dan fanmir, me zot devret rekonnet lotorite zot msye konman zot sef. (Prov. 1:8; 31:10-18; Efe. 5:23) Pareyman, bann msye marye i devret rekonnet ki zot lotorite i annan en limit e ki zot devret soumet avek Kris. (1 Kor. 11:3) Bann desizyon ki bann ansyen i fer i annan lefe lo kongregasyon. Par kont, zot fer sir ki zot “pa al pli lwen ki sa ki’n ekri” dan Parol Bondye. (1 Kor. 4:6) Zot osi swiv tou gidans ki zot gannyen avek lesklav fidel. (Mat. 24:45-47) Lezot dimoun pa pou sagrinen oubyen enkyet, si nou fer bann desizyon dan en fason modes selman ler nou’n ganny demande pour fer li.

12. (a) Akoz nou devret fer resers? (b) Eksplike ki mannyer en dimoun i kapab fer sa kalite resers.

¹² Fer resers. Salomon ti ekrir: “Bann plan sa enn ki devoue i sirman annan en lavantaz, me dimoun ki azir tro vit i sirman tonm dan lapovrete.” (Prov. 21:5) Par egzanp, eski ou pe mazin lo en propozisyon pour fer en biznes? Pa les ou lemosyon kontrol ou. Rod bann lenformasyon egzakt lo sa biznes, demann led avek bann ki konn byen keksoz dan sa domenn e rod bann prensip Labib ki aplikab. (Prov. 20:18) Prepar de lalis pour ou kapab organiz ou resers, enn ki pou donn detay lo bann lavantaz e lot lo bann dezavantaz. Avan ou fer en desizyon, “estimen konbyen i pou koute.” (Lik 14:28) Mazin konsekans ki ou desizyon i kapab annan lo ou finansyerman e spirityelman. I demann bokou letan ek zefor pour fer resers. Me si ou fer li, ou pa pou fer bann desizyon tro vit ki pou anmenn bokou traka pli tar.

13. (a) Ki lasirans nou kapab trouve dan Zak 1:5? (b) Ki led nou kapab gannyen si nou priye pour ganny lasazes?

¹³ Priye pour ganny lasazes. Si nou demann Bondye led pour fer desizyon, nou bann desizyon pou onor li. Disip Zak ti ekrir: “Si i annan parmi zot ki mank lasazes, ki i demann Bondye e Bondye a donn li parski i donn tou dimoun zenerezman san fer okenn repros.” (Zak 1:5) Napa nanryen mal pour admet ki nou bezwen lasazes Bondye pour ed nou fer bann desizyon. (Prov. 3:5, 6) Apre tou, si nou depan zis lo nou prop lentelizans, nou kapab fasilman anbet nou lekor. Kan nou priye pour ganny lasazes e fer resers lo bann prensip dan Parol Bondye, nou pe les lespri sen ed nou konpran nou vre motivasyon pour fer en serten keksoz.​—Ebr. 4:12; lir Zak 1:22-25.

14. Akoz nou pa devret toultan anvoy en desizyon pour pli tar?

¹⁴ Fer sa desizyon. Pa bezwen taye pour fer desizyon avan ki ou’n fer resers e priye pour ganny lasazes. En dimoun saz i pran letan pour “egzamin son lepa.” (Prov. 14:15) De lot kote, pa bezwen toultan anvoy pour pli tar. Serten dimoun i kapab rod bann lekskiz ki pa valab pour zot pa fer desizyon. (Prov. 22:13) Me kantmenm sa, i pe fer en desizyon, akoz an realite i pe deside les lezot kontrol son lavi.

15, 16. Ki i enplike pour fer sa ki ou’n deside?

¹⁵ Fer sa ki ou’n deside. Zefor ki nou fer pour fer en bon desizyon i kapab pa vo lapenn si nou pa determinen pour azir e fer sa ki nou’n deside. Salomon ti ekrir: “Tou sa ki ou lanmen i trouve pour fer, fer li avek ou lafors.” (Ekle. 9:10) Pour reisi, nou devret pare pour fer tou sa ki neseser pour fer sa ki nou’n deside. Par egzanp, en proklanmater dan kongregasyon i kapab deside pour fer pionye. Eski i pou reisi? Tre probab, i pou reisi si i pa pas tro bokou letan dan louvraz ouswa detant ki pou finalman fer li napa ase lafors ek letan pour akonplir son minister.

¹⁶ Normalman, sa pli bon desizyon i pa sa enn ki pli fasil pour enplimante. Akoz? Parski “lemonn antye i dan pouvwar dyab.” (1 Zan 5:19) Nou bezwen lalit avek “bann pouvwar move lespri dan ler, bann lotorite, ek pouvwar dan lemonn teneb.” (Efe. 6:12) Zapot Pol ek disip Zid ti endike ki sa bann ki deside onor Bondye i annan en konba pour zot fer.​—1 Tim. 6:12; Zid 3.

17. Konsernan bann desizyon ki nou fer, ki Zeova i ekspekte avek nou?

¹⁷ Revwar sa desizyon e fer bann azisteman si i neseser. Pa tou desizyon ki pou mars egzakteman parey ou’n plàn. “Letan ek levennman san ekspekte” i ariv avek nou tou. (Ekle. 9:11) Kantmenm sa, Zeova i ekspekte ki nou kontinyen viv dapre serten desizyon ki nou’n fer, menm si nou fer fas avek leprev. En dimoun ki’n dedye son lavi avek Zeova ouswa fer en ve maryaz pa pou kapab sanz son desizyon. Bondye i ekspekte ki nou viv an armoni avek en desizyon koumsa. (Lir Psonm 15:1, 2, 4.) Me, pa tou desizyon ki sitan enportan. En dimoun ki saz pou tanzantan revwar bann desizyon ki i’n fer. I pa pou les lorgey ouswa lantetman anpes li aziste oubyen menm sanz son desizyon. (Prov. 16:18) Sa ki pli enportan pour li se ki son fason viv i kontinyen onor Bondye.

Form lezot pour fer desizyon ki onor Bondye

18. Ki mannyer bann paran i kapab form zot zanfan pour fer bann bon desizyon?

¹⁸ Paran i kapab fer bokou pour ed zot zanfan aprann konman pour fer bann desizyon ki onor Bondye. Montre legzanp i sa pli bon fason ansennyen. (Lik 6:40) Kan i apropriye, paran i kapab eksplik zot zanfan diferan keksoz ki zot ti fer pour ariv lo en serten desizyon. Zot osi kapab anvi les zot zanfan fer serten desizyon zot menm e apre sa, felisit zot kan zot fer en bon desizyon. Me, si en zanfan i fer en move desizyon? Premye tandans ki en paran pou annan se ki i pou esey protez sa zanfan pour li pa sibir son konsekans, me si i fer sa i pa pou touzour dan pli bon lentere sa zanfan. Par egzanp, en paran i kapab les son zanfan rod en laysenns pour dray transpor. Me, fer krwar sa zanfan i kas lalwa trafik e i ganny en kontrovansyon. Sa paran i kapab pey sa kontrovansyon. Par kont, si zot demann sa zanfan pour travay pour pey sa kontrovansyon, i pou en bon fason pour li aprann pran responsabilite pour son aksyon.​—Rom. 13:4.

19. Ki nou devret ansenny nou bann etidyan Labib e ki mannyer nou devret fer li?

¹⁹ Zezi ti demann son bann disip pour ansenny lezot. (Mat. 28:20) Enn parmi bann leson enportan nou kapab ansenny bann etidyan Labib i konman pour fer bon desizyon. Pour fer li avek lefikasite, nou devret reziste sa tandans pour dir lezot sa ki zot devret fer. I pli bon ki nou ansenny zot pour rezonn lo bann prensip Labib pour ki zot kapab desid pour zot menm ki zot pou fer. Apre tou, “sakenn antre nou pou bezwen rann kont devan Bondye pour son prop lekor.” (Rom. 14:12) Alor, nou tou nou annan bon rezon pour fer bann bon desizyon ki onor Bondye.

“Fri Lespri” i glorifye Bondye

“Mon Papa i ganny glorifye ler zot raport bokou fri.”​—ZAN 15:8.

1, 2. (a) Ki loportinite nou annan pour ankouraz lezot? (b) Ki kado sorti kot Zeova ki pou ed nou amelyor nou abilite pour servi li?

ANNOU egzamin sa de sityasyon: En ser Kretyen i remarke ki en zenn ser i paret pe trakase konsernan en keksoz. I fer laranzman pour travay avek li dan predikasyon. Anmezir ki zot koz koze apre ki zot in fini fer en lakaz, sa zenn ser i konmans rakonte kwa ki pe fatig li. Pli tar sa zour, sa zenn ser i remersye Zeova dan lapriyer pour lanmour senser ki sa ser matir in demontre anver li, vi ki sanmenm sa ki i ti bezwen. Dan en lot landrwa, en koup fek retourn kot zot apre ki zot ti’n al prese dan en lot pei. Pandan ki zot rakont zot leksperyans avek lantouzyasm, dan en pti rankont ki’n ganny organize, en zenn frer i ekout zot atantivman. Detrwa lannen pli tar, pandan ki li menm sa zenn frer pe prepare pour al dan sa pei kot i’n ganny demande pour servi, i rapel sa koup ek sa konversasyon ki ti donn li lanvi pour vin en misyonner.

² Petet sa de sityasyon i fer ou rapel en dimoun ki’n ed ou pour fer en bon swa dan ou lavi oubyen ou prop legzanp in annan en bon lefe lo en lot dimoun. Byensir, i rar ki en dimoun i fer en sanzman dan son lavi zis apre en senp konversasyon ki i’n gannyen avek en lot. Me sak zour, nou annan sa loportinite pour ankouraz e fortifye lezot. Zis mazinen, pa i ti pou vreman gou si ou ti kapab fer en keksoz pour devlop ou bann abilite ek kalite ki ti pou permet ou ed ou bann frer ek ser pli byen e vin pli itil dan servis Bondye? An realite, Zeova i donn nou en kado e sa i son lespri sen. (Lik 11:13) Anmezir ki nou les lespri sen diriz nou, nou pou devlop bann zoli kalite ki pou ed nou amelyor tou laspe nou servis pour Bondye. Pa lespri sen i en kado merveye!​—Lir Galat 5:22, 23.a

3. (a) Akoz ler nou devlop “fri Lespri” sa pou anmenn laglwar pour Bondye? (b) Ki kestyon nou pou egzaminen?

³ Bann kalite ki lespri sen i ed nou devlope i reflekte personnalite Zeova, sa enn ki Sours lespri sen. (Kol. 3:9, 10) Zezi ti montre sa rezon prensipal akoz bann Kretyen i devret fer bokou zefor pour imit Bondye ler i ti dir avek son bann zapot: “Mon Papa i ganny glorifye ler zot raport bokou fri.”b (Zan 15:8) Anmezir nou devlop “fri Lespri,” i pou evidan dan lafason ki nou koze e azir, an retour sa pou anmenn laglwar pour Bondye. (Mat. 5:16) Dan ki fason fri lespri i diferan avek bann tre sa lemonn Satan? Ki mannyer nou kapab devlop fri lespri? Akoz nou kapab vwar li difisil pour devlop fri lespri? Nou pou egzamin sa bann kestyon anmezir ki nou diskit sa trwa premye laspe fri lespri, setadir lanmour, lazwa ek lape.

Lanmour ki baze lo en prensip siperyer

4. Ki kalite lanmour Zezi ti ansenny son bann disip pour demontre?

⁴ Sa lanmour ki lespri sen i fer nou devlope i vreman diferan avek sa kalite lanmour ki komen dan lemonn. Ki mannyer sa? I baze lo en prensip siperyer. Zezi ti met lanfaz lo sa diferans dan son Sermon lo Montanny. (Lir Matye 5:43-48.) I ti fer remarke ki menm bann peser pou annan sa tandans pour tret lezot