Pandan Zour Zizman, plizyer bilyon dimoun pou ganny loportinite pour aprann konsernan lavolonte Bondye pour premye fwa e pour fer li. Savedir en travay edikasyonnel pou ganny fer lo en gran lesel. Wi, “se ladrwatir ki bann zabitan later pou vreman aprann.” (Izai 26:9) Me pa tou dimoun ki pou anvi fer lavolonte Bondye. Izai 26:10 i dir: “Menm si en dimoun mesan i a ganny faver, i pa pou zanmen aprann ladrwatir. Dan pei ladrwatir i pa pou fer sa ki drwat e i pa pou vwar konman Zeova i gran.” Sa bann move dimoun pou ganny detri pandan Zour Zizman.—Izai 65:20.

Alafen Zour Zizman, bann dimoun ki pou reste vivan pou viv sa kalite lavi ki bann imen parfe i sipoze viv. (Revelasyon 20:5) Alor pandan Zour Zizman, imen pou retourn dan son leta parfe parey ti ete okonmansman. (1 Korentyen 15:24-28) Apre pou annan en dernyen test. Satan pou ganny large e i pou sey trenn bann dimoun avek li pour en dernyen fwa. (Revelasyon 20:3, 7-10) Bann ki reziste li pou vwar sa promes Labib ganny akonpli konpletman: “Bann dimoun drwat pou posed later, e zot pou reste lo la pour touzour.” (Psonm 37:29) Wi, Zour Zizman pou vin en benediksyon pour tou sa ki reste fidel!

BANN etidyan Labib ti anonse ki pou annan bann levennman remarkab ki pou arive an 1914 depi karant an avan. Ki ti pou arive vreman, e ki laprev zot annan pour montre ki 1914 ti en lannen enportan?

Dan Lik 21:24, Zezi ti dir: “Zerizalenm pou ganny kraz anba lipye bann nasyon etranze, ziska ki letan bann nasyon etranze [“letan bann non-Zwif,” King James Version] i ava’n fini.” Zerizalenm ti lavil prensipal nasyon Zwif. I ti sant kot bann lerwa desandans Lerwa David ti baze. (Psonm 48:1, 2) Me sa bann lerwa pa ti parey bann dirizan ordiner parey pour lezot nasyon. Zot ti asiz lo “tronn Zeova” konman son bann reprezantan. (1 Kronik 29:23) Alor Zerizalenm ti en senbol dominasyon Zeova.

Me ki mannyer e kan dominasyon Bondye ti konmans ganny “kraz anba lipye bann nasyon etranze”? Sa ti arive an 607 A.N.L. kan Babilonn ti defet Zerizalenm. Apartir sa moman, personn pa ti asiz lo “tronn Zeova” e sa laliny lerwa sorti dan desandans David ti ganny enteronpe. (2 Lerwa 25:1-26) Me eski dominasyon Bondye ti pou ganny “kraz anba lipye” pour touzour? Non, akoz profesi Ezekyel ti dir sa konsernan dernyen lerwa Zerizalenm, Sidkya: “Tir sa tirban ek sa kouronn. . . . Sa osi pa pou vin pour personn ziska sa enn ki annan drwa legal i vini, e mon a donn avek li.” (Ezekyel 21:26, 27) Zezi Kri i sa enn ki annan “drwa legal” pour ganny kouronn David. (Lik 1:32, 33) Alor dominasyon Bondye ti pou aret ganny “kraz anba lipye” ler Zezi ti pou vin Lerwa.

Kan ki sa gran levennman ti pou arive? Zezi ti montre ki bann nasyon ti pou diriz pour en serten kantite letan. Liv Danyel sapit 4 i endike ki longer sa peryod letan ti pou ete. I rakont en rev profetik ki Lerwa Babilonn, Neboukadnetsar, ti gannyen. I ti vwar en manman pye dibwa ki ti ganny koupe apre. Son siko pa ti kapab repouse akoz i ti’n ganny sere avek en serk feray e kwiv. En lanz ti dir: “Les li koumsa pour set letan.”—Danyel 4:10-16.

Parfwa dan Labib, bann pye dibwa i ganny servi pour reprezant dominasyon. (Ezekyel 17:22-24; 31:2-5) Ler sa pye dibwa senbolik ti ganny koupe, i ti pe reprezant ler dominasyon Bondye, reprezante par bann lerwa Zerizalenm, ti ganny enteronpe. Me sa vizyon ti fer kler ki ‘Zerizalenm ti pou ganny kraz anba lipye’ pour en serten letan, ki dir pour “set letan.” Ki kantite letan sa?

Revelasyon 12:6, 14 i endike ki trwa letan edmi i menm kantite avek “1260 zour.” Alor “set letan” i fer de fwa 1260 zour, ki fer 2,520 zour. Me bann nasyon pa ti aret “kraz” dominasyon Bondye zis 2,520 zour apre defet Zerizalenm. I kler ki sa profesi ti kouver en pli gran peryod letan. Nonm 14:34 ek Ezekyel 4:6 i koz lo “en zour pour en lannen.” Baze lo sa, “set letan” i fer 2,520 lannen.

Sa 2,520 lannen ti konmans an Oktob 607 A.N.L., kan bann Babilonnyen ti defet Zerizalenm e sa lerwa desandans David ti ganny tire lo son tronn. Sa peryod letan ti terminen an Oktob 1914.a La “letan bann nasyon etranze” ti terminen, e Zezi Kri ti vin Lerwa dan lesyel.—Psonm 2:1-6; Danyel 7:13, 14.

Zis parey Zezi ti dir, son prezans konman Lerwa dan lesyel in ganny marke par bann levennman remarkab partou dan lemonn. Par egzanp, lager, lafamin, tranbleman-de-ter, ek maladi. (Matye 24:3-8; Lik 21:11) Sa bann devlopman i donn levidans konvenkan ki an 1914 Rwayonm Bondye ti vreman ganny etabli dan lesyel e sa lemonn ti konmans antre dan son “bann dernyen zour.”—2 Timote 3:1-5.

LABIB pa mansyonn souvan sa lespri ki apel Misel. Me kan i mansyonn li, i dekrir li pe fer aksyon. Dan liv Danyel, Misel pe konbat avek bann move lanz; dan let Zid, i dan en diskisyon avek Satan; e dan Revelasyon, i pe lager avek Dyab ek son bann demon. Sa non Misel i vedir, “Lekel ki parey Bondye?” Misel i viv an akor avek son non par defann dominasyon Zeova e lager avek Son bann lennmi. Me lekel li Misel?

I annan dimoun ki lezot i konn zot par de non. Par egzanp, Zakob ti osi apel Izrael, e zapot Pyer ti osi apel Simon. (Zenez 49:1, 2; Matye 10:2) Labib i endike ki Misel i en lot non pour Zezi Kri, avan i ti vin lo later e apre ki i ti mont dan lesyel. Annou vwar bann rezon dan Labib ki fer nou tonm lo sa konklizyon.

Sef Lanz. Parol Bondye i dir Misel i “sef lanz.” (Zid 9) Sa mo ‘sef lanz’ oubyen ‘arkanz’ i toultan aparet an sengilye dan Labib, i pa zanmen an pliryel. Savedir i annan zis enn sa kalite lanz. Deplis, Zezi i ganny asosye avek pozisyon en sef lanz. Dan 1 Tesalonisyen 4:16, i dir sa konsernan Zezi Kri apre ki i ti’n resisite: “Avek lavwa en arkanz, e avek son