Bondye li menm ti eksplik son serviter fidel Moiz ki son non i vedir. Kan Moiz ti demann Bondye konsernan Son non, i ti reponn: “Mon pou vin sa ki mon oule vini.” (Egzod 3:14) Tradiksyon Rotherham i lir koumsa: “Mon pou vin nenport kwa ki mon oule vini.” Alors Zeova i kapab vin tou sa ki neseser pour akonpli son plan.

Konmela ou ti kapab vin tou sa ki ou oule vini. Ki ou ti pou fer pour ou bann zanmi? Si enn ant zot i gravman malad, ou ti pou kapab vin en dokter profesyonnel e sonny li. Si en lot i dan en gro problenm larzan, ou ti pou kapab vin ris e ed li rezourd son problenm. Me malerezman, ou pa kapab vin tou sa ki ou oule vini. Nou tou parey. Anmezir ou etidye Labib, ou pou sirprann pour vwar ki mannyer Zeova i vin nenport kwa ki neseser pour li akonpli son bann promes. Pour li, i en plezir pour servi son pouvwar an faver bann ki kontan li. (2 Kronik 16:9) Me bann ki pa konn non Zeova i perdi sa zoli laspe dan son personnalite.

I kler ki non Zeova ti merit dan Labib. Konnen ki sa non i vedir e servi li san ezite dan nou ladorasyon i vreman kapab ed nou apros pli pre avek nou Papa dan lesyel, Zeova.a

PROFET DANYEL ti viv plis ki 500 zan avan nesans Zezi. Pourtan, Zeova ti devwal lenformasyon avek Danyel ki ti pou fer nou konnen kan Zezi ti pou ganny apwente konman Mesi oubyen Kris. Sa parol ti ganny dir avek Danyel: “Ou devret konnen e konpran ki depi ki lord i sorti pour reetablir e rebatir Zerizalenm ziska Mesi sa lider, pou annan set semenn, e osi swasannde semenn.”—Danyel 9:25.

Pour konnen egzakteman kan Mesi ti arive, nou bezwen premyerman konnen kan sa peryod letan ki anmenn ver Mesi ti konmanse. Dapre sa profesi, i ti konmans “depi ki lord i sorti pour reetablir e rebatir Zerizalenm.” Kan sa ‘lord ti sorti’? Dapre en ekriven Labib ki ti apel Neemya, sa lord pour rebatir miray otour Zerizalenm ti sorti “dan ventyenm lannen ki Artazekzes ti lerwa.” (Neemya 2:1, 5-8) Bann istoryen i konfirmen ki premye lannen konplet Artazekzes konman dirizan ti an 474 A.N.L. Alors, 20 tyenm lannen son renny ti an 455 A.N.L. Aprezan nou konnen kan profesi Danyel lo Mesi ti konmans akonpli. Sa ti an 455 A.N.L.

Danyel i endike konbyen letan sa peryod letan ziska Mesi i arive pou dire. Sa profesi i mansyonn “set semenn, e osi swasannde semenn,” ki fer en total 69 semenn. Ki kantite letan sa? Plizyer tradiksyon Labib i fer remarke ki sa pa bann semenn set zour, me i bann semenn lannen. Savedir sak semenn i reprezant set lannen. Bann Zwif ti familye avek sa konsep semenn lannen oubyen en porsyon set lannen. Par egzanp, zot ti obzerv en lannen Saba tou le set an. (Egzod 23:10, 11) Alors, sa 69 semenn profetik i 69 semenn 7 lannen, ki fer en total 483 lannen.

Aprezan nou bezwen zis konte. Si nou kont 483 lannen depi 455 A.N.L., sa pou fer nou ariv lannen 29 N.L. Sa ti egzakteman sa lannen ki Zezi ti batize e vin Mesi!a (Lik 3:1, 2, 21, 22) Pa i remarkab ki mannyer sa profesi in ganny akonpli?

POUR ed nou rekonnet Mesi, Zeova ti enspir bokou profet dan Labib pour fourni detay konsernan nesans, minister, ek lanmor sa enn ki I ti’n promet pour sov limanite. Tou sa bann profesi Labib ti akonpli lo Zezi Kri. I enkrwayab ki mannyer sa bann profesi i egzakt e detaye. Annou get ennde legzanp sa bann profesi ki ti predir serten levennman an rapor avek nesans ek lanfans Mesi.

Profet Izai ti dir ki Mesi ti pou en desandan Lerwa David. (Izai 9:7) Zezi ti vreman sorti dan desandans David.—Matye 1:1, 6-17.

En lot profet Bondye, Mika, ti dir ki sa zanfan ti pou vin en dirizan e i ti pou ne “Betleenm Efrata.” (Mika 5:2) Ler Zezi ti ne, ti annan de lavil Izrael ki ti apel Betleenm. Enn ti pros avek Nazaret dan rezyon nor sa pei, e lot ti pros avek Zerizalenm an Zida. Sa Betleenm ki ti pros avek Zerizalenm ti apel Efrata avan sa. Zezi ti ne dan sa lavil menm, egzakteman parey sa profesi ti predir!—Matye 2:1.

En lot profesi ti dir ki Garson Bondye ti pou “sorti Lezip.” Ler Zezi ti ankor pti, i ti ganny anmennen Lezip. I ti reste laba ziska lanmor Erod, e apre i ti retournen. Sa ti akonpli sa profesi.—Osea 11:1; Matye 2:15.

Dan sa bwat “Profesi konsernan Mesi,” i annan bann pasaz Labib anba sa tit “Profesi” ki donn serten detay lo Mesi. Silvouple, konpar zot avek bann pasaz Labib anba tit “Lakonplisman.” Sa pou fer ou annan plis lafwa ankor dan Parol Bondye.

Anmezir ou egzamin sa bann pasaz Labib, gard antet ki sa bann profesi ti ganny ekrir plizyer santenn lannen avan nesans Zezi. Zezi ti dir: “Tou keksoz ki ti’n ekri lo mon size dan Lalwa Moiz, dan liv bann profet e dan Psonm i bezwen ganny akonpli.” (Lik 24:44) Parey ou kapab vwar dan ou prop Labib, sa bann profesi ti vreman akonpli e dan tou pti detay!

BANN dimoun ki krwar dan Trinite i dir Bondye i an trwa personn, konpoze avek Papa, Garson, ek Lespri Sen. Tou le twa i egal avek kanmarad, zot tou pwisan, e zot napa konmansman. Alors dapre doktrin Trinite, Papa i Bondye, Garson i Bondye, e Lespri Sen i Bondye. Pourtan i annan zis en sel Bondye.