“Fodre ou for e kouraze”

“Fodre ou for e kouraze. . . .  Zeova ou Bondye i avek ou.” ​—ZOZ. 1:7-9.

KI OU POU REPONN?

Dan ki fason Enok ek Noe ti demontre kouraz?

Dan ki fason serten madanm dan letan lontan ti en legzanp lafwa ek kouraz?

Lekel zenn ki ou pli kontan son legzanp?

1, 2. (a) Kwa ki neseser parler pour ki nou kapab viv en lavi drwat? (b) Ki nou pou egzaminen?

EN DIMOUN ki kouraze i pa per, timid ouswa en kapon. Nou kapab mazinen ki en dimoun kouraze i for, brav e menm ardyese. Me parler, nou bezwen annan en bon pe kouraz zis pour kapab viv en lavi drwat.

² Serten dimoun ki Labib i koz lo la pa ti per menm dan bann sityasyon vreman difisil. Lezot ti kouraze dan bann sityasyon ki bokou serviter Zeova i kapab rankontre. Ki nou kapab aprann avek legzanp bann dimoun kouraze dan Labib? Ki mannyer nou kapab kouraze?

KOURAZ DAN EN MOVE LEMONN

3. Ki Enok ti dir pou arive avek bann move dimoun?

³ I ti demann kouraz pour en serviter Zeova kapab viv dan sa move lemonn ki ti egziste avan sa Deliz ki ti arive dan letan Noe. Pourtan, Enok “setyenm desandan Adan” ti anons en mesaz profetik avek lardyes. I ti dir: “La Senyer pe vini avek plizyer dizenn milye lanz sen, pour ziz tou dimoun, e pour kondann tou peser, pour zot move laksyon ki zot in fer dan zot revolt kont Bondye, e pour tou zot parol lensilt ki zot in dir kont li.” (Zid 14, 15) Enok ti dir sa parol avek bokou lasirans akoz i ti konnen ki sa parol ti pou ganny realize. Sanmenm ki ti arive, sa bann move dimoun ti mor dan Deliz.

4. Ki mannyer lemonn ti ete dan letan Noe?

⁴ Deliz ti arive lannen 2370 A.N.L., plis ki 650 lannen apre ki Enok ti’n anons sa profesi. Pandan sa bann letan, Noe ti ne, annan en fanmir e konstri en lars ansanm avek son bann garson. Bann move lanz ti’n vin lo later e fer zanfan avek bann zoli madanm e sa bann zanfan ti bann Nefilim. Deplis, lemal ti partou e dimoun ti vin deplizanpli vyolan. (Zen. 6:1-5, 9, 11) Malgre tou sa la, “Noe ti mars avek sa vre Bondye” e i ti donn temwannyaz avek lardyes konman “en predikater lazistis.” (Lir 2 Pyer 2:4, 5.) Nou osi nou bezwen sa kalite kouraz dan sa bann dernyen zour.

ZOT TI DEMONTRE LAFWA EK KOURAZ

5. Ki mannyer Moiz ti demontre lafwa ek kouraz?

⁵ Moiz ti annan en lafwa ek kouraz egzanpler. (Ebr. 11:24-27) Depi 1513-1473 A.N.L., Bondye ti servi li pour tir bann Izraelit Lezip e gid zot dan dezer. Moiz pa ti santi li sitan kalifye pour sa responsabilite, me i ti aksepte pour fer li. (Egz. 6:12) Zot de son frer Aaron zot ti kontinyelman al devan sa Faraon dominer ki ti diriz Lezip. Avek kouraz, zot ti anons sa Dis Fleo ki Zeova ti anvoye pour imilye bann bondye Lezip e delivre son pep. (Egz., sapit 7-12) Moiz ti demontre lafwa ek kouraz akoz i ti toultan annan sipor Bondye, nou osi parey.​—Det. 33:27.

6. Si nou ganny kestyonnen avek bann zofisye gouvernman, ki mannyer nou pou rann temwannyaz avek kouraz?

⁶ Nou bezwen kouraz parey Moiz akoz Zezi ti dir: “Zot pou ganny anmennen devan bann gouverner ek bann lerwa, pour anons zot ek bann non-Zwif Bonn Nouvel. Kan zot ganny anmennen devan lakour, pa bezwen trakase ki zot pou dir e ki mannyer zot pou dir li, sa ki zot devre dir, zot pou ganny li dan sa moman menm. Parski se pa zot ki pou koze, me Lespri zot Papa ki pou koz atraver zot.” (Mat. 10:18-20) Si nou ganny kestyonnen avek zofisye gouvernman, lespri sen Zeova pou permet nou annan lafwa ek kouraz pour rann temwannyaz avek respe.​—Lir Lik 12:11, 12.

7. Akoz Zozye ti kouraze e reisi dan sa ki i ti fer?

⁷ En letid regilye lo Lalwa Bondye ti batir lafwa ek kouraz Zozye, sikseser Moiz. Lannen 1473 A.N.L., bann Izraelit ti pare pour antre dan Later Promiz. Bondye ti dir: “Fodre ou for e kouraze.” Si i ti obeir Lalwa, Zozye ti pou kapab azir dan en fason saz e i ti pou reisi. Bondye ti dir: “Pa bezwen soke oubyen tranble avek lafreyer, akoz Zeova ou Bondye i avek ou partou kot ou ale.” (Zoz. 1:7-9) Sa bann parol ti vreman rekonfortan, pa i vre? Bondye ti definitivman avek li akoz i ti pran li zis si-z-an pour konkerir Later Promiz, lannen 1467 A.N.L.

BANN MADANM KI TI ADOR BONDYE AVEK KOURAZ

8. Ki legzanp lafwa ek kouraz Raab ti demontre?

⁸ Diran bann syek ki’n pase, en kantite madanm in demontre kouraz dan zot servis pour Zeova. Par egzanp, Raab en prostitye dan lavil Zeriko ti demontre lafwa dan Bondye. Avek kouraz, i ti kasyet de espyon ki Zozye ti’n anvoye e gid bann gerye lerwa dan en lot direksyon. Ansanm avek son fanmir, zot ti ganny proteze kan bann Izraelit ti konkerir Zeriko. Raab ti aret son move lavi, i ti ador Zeova fidelman e vin en zanset Mesi. (Zoz. 2:1-6; 6:22, 23; Mat. 1:1, 5) I ti ganny beni en kantite pour son lafwa ek kouraz.

9. Ki mannyer Debora, Barak ek Yael ti demontre kouraz?

⁹ Apre lanmor Zozye apepre lannen 1450 A.N.L., Bondye ti servi bann ziz pour regle bann sityasyon an Izrael. Yabin, lerwa bann Kananeen ti’n oprim bann Izraelit pour 20-t-an kan Bondye ti anvoy Debora, en madanm profet pour motiv Barak pour pran aksyon. Barak ti rasanble 10,000 zonm lo Montanny Tabor e i ti pare pour al lager avek Sisera, sef larme Yabin ki ti dan vale toransyel Kidronn avek son larme ek 900 saret lager. Ler bann Izraelit ti pe marse dan sa vale, Bondye ti fer en lavalas ravaz sa landrwa ki ti fer bann saret Kananeen pri dan labou. Bann zonm Barak ti ranport laviktwar e “kan antye Sisera ti ganny touye par lepe.” Sisera li i ti taye e kasyet anba latant Yael, me Yael ti touy li ler i ti pe dormi. Parey Debora ti’n profetize avek Barak, laglwar pour laviktwar ti al pour Yael. Vi ki Debora, Barak ek Yael ti azir avek kouraz, bann Izraelit ti viv anpe pour karant an. (Ziz 4:1-9, 14-22; 5:20, 21, 31) Bokou zonm ek fanm fidel in demontre sa menm lafwa ek kouraz.

NOU PAROL I KAPAB DONN LEZOT KOURAZ

10. Akoz nou kapab dir ki nou parol i kapab donn kouraz lezot?

¹⁰ Nou parol i kapab donn kouraz lezot serviter Zeova. Dan onzyenm syek A.N.L., Lerwa David ti dir son garson Salomon: “Fodre ou for e kouraze e fodre ou azir. Pa per oubyen ganny lafreyer akoz Zeova mon Bondye i avek ou. I pa pou abandonn ou oubyen kit ou ziska ki tou sa travay dan servis lakaz Zeova in fini.” (1 Kron. 28:20) Salomon ti azir dan en fason kouraze e i ti konstri en tanp merveye pour Zeova Zerizalenm.

11. Ki lefe sa ki en pti fiy Izraelit ti dir avek kouraz ti annan lo lavi en zonm?

¹¹ Dan dizyenm syek A.N.L., parol ki en pti fiy Izraelit ti dir avek kouraz ti anmenn benediksyon pour Naamann, en msye ki ti annan lalep. I ti’n ganny anmennen dan en lot pei par bann voler e i ti vin servant Naamann ki ti sef larme bann Asiryen. I ti konnen ki Elisa ti fer bann mirak gras a lafors Zeova. I ti dir madanm Naamann ki si son msye ti al Izrael, profet Bondye ti pou geri li. Finalman, Naamann ti al Izrael pour ganny geri e i ti vin en serviter Bondye. (2 Rwa. 5:1-3, 10-17) Si ou en zenn ki kontan Bondye parey sa pti fiy, avek kouraz ou kapab donn temwannyaz avek ou ansenyan, kanmarad lekol ek lezot ankor.

12. Ki lefe parol Lerwa Izkiya ti annan lo son bann sitwayen?

¹² Ler nou byen swazir nou parol i kapab donn kouraz lezot, sirtou ler zot pe fer fas avek difikilte. Ler bann Asiryen ti pe al atak Zerizalenm dan wityenm syek A.N.L., Lerwa Izkiya ti dir son bann sitwayen: “Fodre kouraze e for. Pa bezwen per ouswa annan lafreyer akoz lerwa Lasiri ek sa gran lafoul ki avek li; parski i annan plis avek nou ki avek li. Avek li i annan en lebra imen, me nou, Zeova nou Bondye i avek nou pour ed nou e pour lager pour nou.” Ki lefe sa bann parol ti annan? “Ler zot ti tann parol Izkiya, lepep ti pran kouraz”! (2 Kron. 32:7, 8) Bann parol koumsa i kapab donn nou osi kouraz ensi ki lezot Kretyen si nou pe ganny persekite.

13. Ki legzanp kouraz nou trouve an rapor avek Obadya serviter Lerwa Aab?

¹³ Parler nou menm kapab demontre kouraz par sa ki nou pa dir. Diran dizyenm syek A.N.L., Obadya, serviter Lerwa Aab ti kasyet san profet Zeova par de “group senkant” pour ki zot pa ganny touye akoz sa lord ki Zezabel, sa move larenn ti’n donnen. (1 Rwa. 18:4) Parey Obadya, bokou serviter fidel Zeova dan nou letan in protez zot bann frer ek ser avek kouraz kan zot pa’n donn lenformasyon lo zot avek bann ki pe persekit zot.

ESTER, EN LARENN KOURAZE

14, 15. Ki mannyer Larenn Ester ti demontre lafwa ek kouraz e ki mannyer tou sa la ti fini?

¹⁴ Larenn Ester ti demontre kouraz ek en lafwa for dan senkyenm syek A.N.L., kan Amann ti fer en konplo pour touy bann Zwif dan Lanpir Pers. I pa drol ki zot ti dan sagrinasyon, pe zennen e priye avek tou zot leker. (Ester 4:1-3) Larenn Ester ti vreman dezespere. Son kouzen Mordekay ti anvoy en kopi sa lalwa ki ti dir ki bann Zwif ti devret ganny touye e Mordekay ti demann li pour al devan lerwa e sipliy li pour ed son pep. Me, nenport ki ki ti al devan lerwa san ki i ganny apele ti pou ganny touye. ​—Ester 4:4-11.

¹⁵ Kantmenm sa, Mordekay ti dir Ester: ‘Si ou reste trankil, nou delivrans pou sorti en lot bor. Me sa ki dir ou pa’n ganny sa pozisyon rwayal pour en letan parey?’ Ester ti demann Mordekay pour rasanble bann Zwif Siz e pour zennen pour li. Ester ti dir: “Mwan osi mon pou zennen e apre mon pou al devan lerwa, en keksoz ki pa dapre lalwa, e si fodre mor, mon ava mor.” (Ester 4:12-17) Ester ti azir avek kouraz e sa liv ki port son non i montre ki Bondye ti delivre son pep. Dan nou letan, bann Kretyen swazir ek zot bann konpanyon i demontre menm kouraz ler zot dan leprev e sa Enn “ki ekout lapriyer” i toultan dan zot kote. ​—Lir Psonm 65:2; 118:6.a

“PRAN KOURAZ”

16. Ki leson bann zenn i aprann avek Zezi?

¹⁶ En fwa, dan premye syek N.L., Zezi ki ti annan zis 12 an ti dan tanp, i ti “pe asize parmi bann profeser, i ti pe ekout zot e kestyonn zot.” An plis ki sa, “tou dimoun ki ti tann li, ti etonnen par son lentelizans ek son repons.” (Lik 2:41-50) Menm si i ti zenn, Zezi ti annan sa lafwa ek kouraz neseser pour kestyonn sa bann ansenyan pli aze ki li kot tanp. Si bann zenn dan kongregasyon i gard antet legzanp Zezi, zot pou profit tou sans ki zot gannyen pour “touzour pare pour donn en repons bann ki demann zot leksplikasyon konsernan lesperans ki dan zot.” ​—1 Pyer 3:15.

17. Akoz Zezi ti demann son bann disip pour “pran kouraz” e akoz nou osi nou devret kouraze?

¹⁷ Zezi ti ankouraz lezot pour “pran kouraz.” (Mat. 9:2, 22) I ti dir son bann disip: “Ler pe arive; annefe ler i’n deza arive, kan zot tou zot pou fannen, sakenn pou al se li, e zot pou abandonn mwan. E pourtan non, mon pa pou tousel, akoz mon Papa i avek mwan. Mon’n dir zot tousala pour ki dan linyon avek mwan zot ava annan lape. Dan lemonn zot bezwen soufer. Me pran kouraz, mon’n ranport laviktwar lo lemonn.” (Zan 16:32, 33) Parey bann premye disip Zezi, lemonn i ay nou, me annou pa vin parey lemonn. Si nou reflesir lo lavi Garson Bondye, nou pou ganny kouraz pour pa sali nou avek sa move lemonn. I ti ranport laviktwar lo lemonn, nou osi nou kapab. ​—Zan 17:16; Zak 1:27.

18, 19. Kwa ki montre ki zapot Pol ti annan lafwa ek kouraz?

¹⁸ Zapot Pol ti ganny teste dan en kantite fason. En fwa, bann Zwif Zerizalenm ti pou’n touy li si bann solda Romen pa ti’n delivre li. Diran lannwit, “Senyer ti aparet avek Pol e dir li, ‘Pran kouraz! Parey ki ou’n rann temwannyaz lo mwan isi dan Zerizalenm, i neseser ki ou fer parey Ronm osi.’” (Akt 23:11) Sanmenm ki Pol ti fer.

¹⁹ Pol pa ti per pour reprimann bann “zapot ki [ti] pas zot pour siperyer” ki ti anvi sali kongregasyon Korent. (2 Kor. 11:5; 12:11) Kontrerman avek zot, i ti demontre ki i ti en vre zapot akoz i ti ganny anprizonnen, bate, fer bann vwayaz difisil e i ti pas dan lezot sityasyon danzere, i ti mor lafen, laswaf e mank sonmey e i ti menm konsernen pour son bann frer ek ser. (Lir 2 Korentyen 11:23-28.) Eski pa sa leksperyans i prouve ki i ti annan lafwa ek kouraz sorti kot Bondye?

20, 21. (a) Donn en legzanp pour montre ki nou bezwen kontinyen pran kouraz. (b) Dan ki kalite sirkonstans nou bezwen annan kouraz e ki nou kapab asire?

²⁰ Pa tou Kretyen ki pou eksperyans bann gran persekisyon. Me, nou tou nou devret pran kouraz pour ki nou kapab fer fas avek bann difikilte ki nou rankontre. Pour donn en legzanp: En zenn Brezil ti dan en geng. Apre ki i ti’n etidye Labib, i ti remarke ki i ti pou bezwen fer serten sanzman, me labitid, nenport ki ki ti kit en geng ti ganny touye. I ti priye e servi Labib pour montre lider sa geng akoz i pa ti pou reste dan sa geng. Lider sa geng ti les sa zenn onm ale san fer li nanryen e sa zenn onm ti vin en proklanmater.

²¹ I demann kouraz pour kapab pres sa bon nouvel. Bann zenn Kretyen i bezwen sa kouraz pour gard zot lentegrite kot lekol. Fodre annan kouraz pour kapab demann konze kot travay pour kapab asiste tou sesyon lasanble distrik. Sa lalis i long, me nenport ki difikilte nou rankontre, Zeova pou ekout nou “lapriyer avek lafwa.” (Zak 5:15) Sirman, i kapab donn nou son lespri sen pour ki nou kapab “for e kouraze,” pa i vre?

[Not anba lo paz]

[Portre lo paz 19]

Enok ti pres avek kouraz dan en move lemonn

[Portre lo paz 20]

Yael ti kouraze e for