Ki mannyer pour demontre lafeksyon

Pli lannen i pase, pli serten koup marye i demontre mwens lafeksyon anver kanmarad. Si sa pe arive dan ou maryaz, eski ou devret enkyet?

• Ki ou devret konnen?

• Ki ou kapab fer?

Ki ou devret konnen?

I bezwen annan lafeksyon dan en maryaz pour sa maryaz reste for. Zis parey nou regilyerman bezwen manze ek delo pour gard nou lekor for e an bonn sante, ler lafeksyon i kontinyen ganny demontre dan en maryaz, sa i ranforsi e batir en maryaz. Menm apre plizyer dizenn lannen maryaz, msye ek madanm i bezwen regilyerman asir kanmarad ki zot vreman enterese e kontan kanmarad.

Vre lanmour pa egois. I rod boner sa lot dimoun. Alor, olye demontre lafeksyon zis ler sa lanvi i vini, en dimoun pou rekonnet ki son konzwen i bezwen lafeksyon e i pou fer tou pour konble sa bezwen.

An zeneral bann madanm i bezwen ganny demontre plis lafeksyon ki zot msye. En msye i kapab kontan son madanm en kantite. Me si i demontre sa lanmour zis lo konmansman ek finisyon lazournen ouswa avan annan relasyon seksyel, son madanm i kapab pa asire ki son msye i vreman enterese avek li. I bokou pli bon pour souvan demontre lafeksyon pandan lazournen.

Ki ou kapab fer

Demontre lafeksyon atraver ou parol. Bann senp lekspresyon parey “mon kontan ou” ouswa “ou vreman presye pour mwan” i kapab fer ou konzwen santi ki ou kontan li.

Prensip Labib: “Labous i koz sa ki deborde dan leker.”​—Matye 12:34.

Nide: Pa zis demontre ou lafeksyon atraver ou parol. Ekri zot dan bann not, imel ouswa mesaz lo telefonn.

Demontre lafeksyon atraver ou aksyon. Anmaye, anbrase ouswa zis atrap lanmen i kapab montre ki ou vreman senser ler ou dir “mon kontan ou.” En lentere senser i kapab ganny demontre avek en pti touse, en pti regar dous ouswa en pti kado tanzantan. Ou osi kapab fer bann pti keksoz pour ed ou madanm, petet pour anmenn son sak, ouver laport, lav zafer sal, lav lenz ouswa kwi en repa. Tou sa bann keksoz i pa zis bann led pratik me zot bann fason ki ou demontre ou lafeksyon atraver ou aksyon!

Prensip Labib: “Nou devret kontan lezot pa zis an parol ouswa avek labous, me montre ki nou lanmour i senser par nou aksyon.”​—1 Zan 3:18.

Nide: Tret ou konzwen dan menm fason ki ou ti tret li ler zot ti pe pwente.

Fer letan pour kanmarad. Pas letan tousel avek ou konzwen i ranforsi ou maryaz e i reasir ou konzwen ki ou kontan ler zot ansanm. Byensir, i kapab difisil pour pas letan ansanm si ou annan zanfan ouswa si i annan en kantite keksoz enportan pour diskit lo la sak zour. Petet ou kapab plàn pour fer en keksoz senp parey al fer en pti marse zis zot de tousel.

Prensip Labib: “Verifye sa ki pli enportan.”​—Filipyen 1:10.

Nide: Serten koup ki okipe i fer letan regilyerman pour pran en repa aswar ouswa pas en wikenn ansanm zis zot tou le de.

Konn ou konzwen. Sak dimoun i annan son prop bezwen pour lafeksyon. Koz avek kanmarad lo lafason ki ou konzwen i prefere ganny lafeksyon e si i ti a kontan ganny plis lafeksyon. Apre, aksepte pour konble bezwen ou konzwen. Rapel ki lafeksyon i enportan pour en maryaz solid.

Prensip Labib: “Lanmour . . . pa rod son prop lentere.”​—1 Korentyen 13:4, 5.

Nide: Olye demann lafeksyon, demann ou lekor, ‘Ki mon kapab fer pour fer mon konzwen demontre plis lafeksyon pour mwan?’