SAPIT 18

Fer Li Ou Lobzektif pour Servi Bondye pour Touzour

1, 2. Kwa ki neseser an plis ki posed konnesans Bondye?

IMAZINEN ki ou pe debout devan en laport fermen ki donn akse avek en lasanm ki kontyen en gran trezor. Meton en dimoun ki annan drwa, in donn ou lakle e in dir ou servi sa bann keksoz presye. Sa lakle pa pou itil pour ou amwen ki ou servi li. Pareyman, ou bezwen servi lakonnesans si i pou benefisye ou.

² Spesyalman, sa i vre an se ki konsern konnesans Bondye. An realite, konnesans egzakt lo Bondye ek Zezi Kri i sinifye lavi eternel. (Zan 17:3) Me sa perspektiv pa kapab ganny realize par senpleman posed lakonnesans. Parey ou ti a servi en lakle ki annan valer, ou bezwen aplik konnesans Bondye dan ou lavi. Zezi ti dir ki bann ki fer lavolonte Bondye ki pou “antre dan Rwayonm.” Sa bann dimoun pou annan sa privilez pour servi Bondye pour touzour!—Matye 7:21; 1 Zan 2:17.

3. Ki lavolonte Bondye pour nou?

³ Apre ki nou’n aprann kisisa lavolonte Bondye, i esansyel ki nou fer li. Ki ou panse lavolonte Bondye i ete pour ou? I kapab ganny byen rezimen dan sa de mo: Imit Zezi. Premye Pyer 2:21 i dir nou: “Se pour sanmenm, annefe, ki Bondye in apel zot, parski Kris limenm in soufer pour zot, an lesan pour zot en legzanp pour zot swiv.” Pour fer lavolonte Bondye, alor, ou bezwen swiv legzanp Zezi pli pre posib. Se koumsa ki ou servi konnesans Bondye.

KONMAN ZEZI TI SERVI LAKLE KONNESANS BONDYE

4. Akoz Zezi ti konn sitan en kantite keksoz lo Zeova e ki mannyer i ti servi sa konnesans?

⁴ Zezi Kri ti annan en konnesans pli entim ki lezot lo Bondye. Avan ki i ti vin lo later, i ti abit e travay avek Zeova dan lesyel pandan bokou bokou letan. (Kolosyen 1:15, 16) Ki Zezi in fer avek tou sa konnesans? I pa ti kontant li pour senpleman posed sa konnesans. I ti viv an akor avek li. Se pour sa rezon ki i ti telman bon, pasyan, e emab dan fason ki i ti tret bann imen. Zezi ti pe alor, imit son Papa seles e azir an armoni avek konnesans ki i ti annan lo son mannyer ek son personnalite.—Zan 8:23, 28, 29, 38; 1 Zan 4:8.

5. Akoz Zezi ti batize, e ki mannyer i ti viv an konformite avek sinifikasyon son batenm?

⁵ Lakonnesans ki Zezi ti annan, ti osi motiv li pour fer en pa esansyel. I ti sorti an Galile pour al Larivyer Zourden, kot Zan ti batiz li. (Matye 3:13-15) Ki batenm Zezi ti senbolize? Etan en zwif, i ti ne dan en nasyon ki ti’n ganny dedye avek Bondye. Alors, Zezi ti’n ganny dedye depi nesans. (Egzod 19:5, 6) Par son batenm, i ti pe prezant son lekor avek Zeova pour fer son lavolonte divin, pandan ki i ti lo later. (Ebre 10:5, 7) E Zezi ti viv an konformite avek sinifikasyon son batenm. I ti depans en kantite son lenerzi dan servis Zeova, pour partaz konnesans Bondye avek bann dimoun, sak loportinite ki i ti gannyen. Zezi ti pran plezir pour fer lavolonte Bondye, i ti menm dir ki sa i parey nouritir pour li.—Zan 4:34.

6. Dan ki fason Zezi ti renye son lekor?

⁶ Zezi ti konn tre byen ki fer lavolonte Zeova ti pou kout li bokou—ki i ti pou menm kout li son lavi. Kanmenm sa, Zezi ti renye son lekor e fer son bann bezwen personnel pas pour dezyenm plas. Fer lavolonte Bondye ti touzour vin premye. Ki mannyer nou kapab swiv legzanp Zezi, dan sa domenn?

BANN PA KI ANMENN VER LAVI ETERNEL

7. Ki bann pa en dimoun i bezwen pran pour kalifye pour batenm?

⁷ Kontrerman avek Zezi, nou enparfe e nou kapab ariv sa letap pour batize, selman apre ki nou’n pran lezot pa esansyel. Sa i konmans par pran konnesans egzakt lo Zeova Bondye ek Zezi Kri aker. An fezan sa, nou egzers lafwa e annan en lanmour profon pour Bondye. (Matye 22:37-40; Romen 10:17; Ebre 11:6) Lobeisans pour lalwa, prensip ek standar Bondye, i devret ensit nou pour repantir, eksprim sagren pour bann pese ki nou’n komet dan lepase. Sa i swiv par en transformasyon, setadir, nou sanz direksyon e abandonn nenport ki move kondwit ki nou ti pe swiv kan nou ti napa konnesans Bondye. (Akt 3:19) Natirelman, si nou pe kontinyen pratik pese dan kasyet olye fer sa ki zis, nou pa’n vreman sanze e nou pa ni pe anbet Bondye. Zeova i detekte tou lipokrizi.—Lik 12:2, 3.

8. Ki ou devret fer si ou anvi partisip dan aktivite predikasyon Rwayonm?

⁸ Aprezan ki ou’n pran konnesans lo Bondye, ou pa krwar ki i apropriye pour konsider bann keksoz spirityel dan en fason personnel? San dout, ou enpasyan pour rakont ou bann fanmiy, zanmi ek lezot sa ki ou pe aprann. Petet ou’n deza konmans fer sa, parey Zezi ti partaz sa bon nouvel avek lezot dan nenport ki sitiasyon. (Lik 10:38, 39; Zan 4:6-15) Aprezan petet ou anvi fer plis. Bann ansyen pou kontan koz avek ou, pour determinen si ou kalifye e kapab pran par dan aktivite predikasyon Rwayonm bann Temwen Zeova. Si ou kalifye, bann ansyen pou fer laranzman pour ou akonpanny en Temwen dan minister. Pour akonpli zot minister dan en serten lord, bann disip Zezi ti swiv son bann lenstriksyon. (Mark 6:7, 30; Lik 10:1) Ou pou benefisye avek led parey, ofiramezir ki ou pran par dan difizyon mesaz Rwayonm port an port ek lezot laspe predikasyon.—Akt 20:20, 21.

9. Ki mannyer en dimoun i dedye son lavi avek Bondye e konman sa dedikasyon i afekte li?

⁹ Pres sa bon nouvel avek tou sort kalite dimoun dan teritwar kongregasyon, i en fason pour trouv bann ki korekteman dispoze e i enn parmi bann bon travay ki prouve ou annan lafwa. (Akt 10:34, 35; Zak 2:17, 18, 26) Asiste renyon Kretyen regilyerman e annan en bon partisipasyon dan travay predikasyon, i bann fason ki demontre ki ou’n repantir e sanz direksyon, e ki ou aprezan determinen pour viv an akor avek konnesans Bondye. Lekel sa lot pa ki lozik? Se pour fer en dedikasyon avek Zeova Bondye. Sa i vedir ki dan en lapriyer senser, ou dir Bondye ki ou pe volonterman e antyerman ofer ou lavi avek li, pour fer son lavolonte. Sa i fason ki ou dedye ou lavi avek Zeova e aksepte zoug dou Zezi Kri.—Matye 11:29, 30.

BATENM—KI I SINIFYE POUR OU

10. Akoz ou devret batize apre ki ou’n dedye ou lavi avek Bondye?

¹⁰ Dapre Zezi, tou bann ki vin son disip i bezwen batize. (Matye 28:19, 20) Akoz sa i neseser apre ki ou’n fer en dedikasyon avek Bondye? Vi ki ou’n dedye ou lavi avek Zeova, i konnen ki ou kontan li. Me san dout ou pou anvi al pli lwen ki sa, pour fer lezot konnen ki ou annan lanmour pour Bondye. Batenm i ofer ou en loportinite pour montre piblikman ki ou’n dedye ou lavi avek Zeova Bondye.—Romen 10:9, 10.

11. Ki sinifikasyon batenm i annan?

¹¹ Batenm i annan en sinifikasyon senbolik profon. Kan ou ganny sibmerze, oubyen “antere,” anba delo, i konmsi ou’n mor dan ou lavi lepase. Ler ou resorti dan delo, konmsi ou pe aparet pour konmans en nouvo lavi, enn ki gouvernen par lavolonte Bondye, non pa ou prop lavolonte. Byensir sa pa vedir ki ou pou nepli fer fot, parski nou tou nou enparfe e alor nou fer pese sak zour. Toutfwa, konman en serviter Zeova ki’n dedye e batize, ou pou’n antre dan relasyon spesyal avek li. Akoz ou repantans ek ou soumisyon pour batize avek limilite, Zeova i pare pour pardonn ou bann pese lo baz sakrifis ranson Zezi. Batenm i alors kondwir ver en konsyans ki pir devan Bondye.—1 Pyer 3:21.

12. Ki i sinifye pour batiz (a) “o non di-Per”? (b) ‘o non di-Fis’? (c) ‘o non di-Sent-espri’?

¹² Zezi ti komann son bann disip pour batiz bann nouvo “o non di-Per e di-Fis e di-Sent-espri.” (Matye 28:19) Ki Zezi ti oule dir par sa? Batiz “o non di-Per,” i endike ki sa dimoun i aksepte Zeova avek tou son leker, konman Kreater e Souvren lezitim liniver. (Psonm 36:9; 83:18; Eklezyast 12:1) Ganny batize ‘o non di-Fis’ i vedir ki sa endividi i rekonnet Zezi Kri—e partikilyerman Son sakrifis ranson—konman sa sel mwayen delivrans ki Bondye in fourni. (Akt 4:12) Pour batiz ‘o non di-Sent-espri,’ i endike ki sa kandida batenm i rekonnet lespri sen Zeova, oubyen son lafors aktif, konman lenstriman ki Bondye i servi pour realiz Son bann plan e pour donn Son bann serviter lafors pour fer Son lavolonte zis, an kolaborasyon avek Son lorganizasyon ki i dirize par son lespri.—Zenez 1:2; Psonm 104:30; Zan 14:26; 2 Pyer 1:21.

ESKI OU PARE POUR BATENM?

13, 14. Akoz nou pa bezwen per pour fer sa swa pour servi Zeova Bondye?

¹³ Vi ki batenm i ranpli avek sinifikasyon, e i letap pli enportan dan lavi en dimoun, eski i en pa ki ou devret per pour pran? Pa ditou! Byen ki desizyon pour batize, pa devret ganny pran alalezer, i san dout desizyon pli saz ki ou ti a kapab fer.

¹⁴ Batenm i donn levidans ou swa pour servi Zeova Bondye. Mazin en pe bann dimoun ki ou konnen. Dan en fason ou en lot, pa sakenn pe servi en met? Serten i esklav pour larises. (Matye 6:24) Lezot i pourswiv zot karyer avek zel oubyen serten i servi zot lekor an nourisan zot prop dezir ki premye dan zot lavi. Lezot ankor i servi bann fo bondye. Me ou, ou’n swazir pour servi vre Bondye, Zeova. Napa personn ankor ki montre otan bonte, konpasyon ek lanmour. Bondye i onor bann imen avek en travay itil ki diriz zot ver delivrans. I rekonpans son bann serviter avek lavi eternel. Sertennman, swiv legzanp Zezi e ofer Zeova ou lavi, i pa en letap ki devret enkyet ou. Anfet, i sa sel semen ki fer plezir Bondye e ki parfetman fer sans.—1 Lerwa 18:21.

15. Nonm serten lobstak ki bokou i rankontre pour batize.

¹⁵ Sepandan, batenm pa en pa ki ou devret pran akoz presyon lezot. I en zafer personnel ant ou ek Zeova. (Galat 6:4) Ofiramezir ki ou’n progrese spirityelman, ou’n kapab demann ou lekor: ‘Kwa ki anpes mwan batize?’ (Akt 8:35, 36) Ou kapab poz serten kestyon, ‘Eski lopozisyon fanmiy pe anpes mwan progrese? Eski mon ankor pe enplike dan serten sitiasyon ki kont Lekritir oubyen dan serten move pratik? Sa lanpesman, eski i ti a kapab akoz mon per pour perdi faver dan kominote?’ Sa i serten fakter pour konsidere me evalye zot avek realis.

16. Ki mannyer ou pou benefisye kan ou servi Zeova?

¹⁶ I pa pou realistik pour evalye bann fakter negatif, san konsider bann byenfe ki nou gannyen an servan Zeova. Par egzanp, konsider kestyon lopozisyon fanmiy. Zezi ti promet ki menm si son bann disip ti pou perdi zot fanmiy ler zot swiv li, zot ti pou ganny en pli gran fanmiy spirityel. (Mark 10:29, 30) Sa bann konpanyon Kretyen pou montre ou lanmour fraternel, ed ou pour andir bann persekisyon, e soutenir ou lo semen lavi. (1 Pyer 5:9) Spesyalman bann ansyen i kapab ed ou pour fer fas avek bann problenm e pour sirmont bann lezot sitiasyon difisil, avek sikse. (Zak 5:14-16) Konsernan perdi faver dan sa monn, ou kapab demann ou lekor, ‘Kwa ki konparab avek ganny laprouvasyon Kreater liniver, e fer li rezwir avek sa semen ki mon’n swazir?’—Proverb 27:11.

VIV AN KONFORMITE AVEK OU DEDIKASYON EK BATENM

17. Akoz ou devret vwar batenm konman en konmansman plito ki en finisyon?

¹⁷ I enportan pour rapel ki batenm i pa lafen ou progre spirityel. I mark konmansman en servis lavi dirab, ki nou donn Bondye konman en minister ordonnen e en Temwen Zeova. Kanmenm batenm i ekstrememan enportan, i pa en garanti pour delivrans. Zezi pa ti dir: ‘Tou sa ki batize pou ganny sove.’ I ti plito dir: “Me sa ki reste fidel ziska lafen pou ganny sove.” (Matye 24:13) Alor, i esansyel ki ou sers Rwayonm Bondye dabor e fer li vin preokipasyon prensipal dan ou lavi.—Matye 6:25-34.

18. Nonm serten lobzektif ki ou kapab pourswiv apre batenm.

¹⁸ Pour andire dan ou servis pour Zeova, i byen ki ou etablir bann lobzektif spirityel pour ou menm. En bon lobzektif se pour ogmant ou konnesans lo Bondye atraver letid regilye lo son Parol. Plàn pour lir Labib toulezour. (Psonm 1:1, 2) Asiste bann renyon Kretyen regilyerman, parski sa lasosyasyon ki ou gannyen laba, pou ede pour fortifye ou spirityelman. Akoz ou pa fer li en lobzektif lo ou par, pour donn bann komanter dan bann renyon kongregasyon, ki ava fer ou loue Zeova e batir lezot? (Romen 1:11, 12) En lot lobzektif se pour amelyor kalite ou lapriyer.—Lik 11:2-4.

19. Ki bann kalite ki lespri sen i kapab ed ou pour manifeste?

¹⁹ Si ou anvi viv an konformite avek sinifikasyon ou batenm, ou bezwen konstaman port atansyon lo sa ki ou fer e les lespri sen Bondye prodwir bann kalite dan ou tel ki lanmour, lazwa, lape, pasyans, byenveyans, labonte, lafwa, douser, ek kontrol lo ou lekor. (Galat 5:22, 23; 2 Pyer 3:11) Mazinen ki Zeova i donn son lespri sen tou bann ki demann li atraver lapriyer, e ki obeir li etan bann serviter fidel. (Lik 11:13; Akt 5:32) Alors, priy Bondye pour son lespri e demann li led pour manifeste sa bann kalite ki fer li plezir. Ofiramezir ki ou les lespri sen travay dan ou, sa bann kalite pou vin pli evidan dan ou parol ek dan ou kondwit. Byensir, sak endividi dan kongregasyon Kretyen pe lite pour devlop sa “nouvo personnalite” afen ki zot a vin pli parey avek Kris. (Kolosyen 3:9-14, NW) An fezan sa, sakenn i afront diferan leprev parske sakenn i dan diferan staz progre spirityel. Vi ki ou enparfe, ou bezwen travay dir pour annan en personnalite parey pour Kris. Me pa dezespere dan sa domenn akoz avek led Bondye, i posib.

20. Dan ki fason ou kapab imit Zezi dan minister?

²⁰ Parmi lezot lobzektif spirityel, ou devret imit tou pre, legzanp Zezi an se ki konsern lazwa. (Ebre 12:1-3) I ti kontan prese. Si ou annan sa privilez pour pran par dan aktivite predikasyon Rwayonm, alor pa les li vin en senp routin. Esey trouv satisfaksyon kan ou ansenny lezot lo Rwayonm Bondye parey Zezi ti fer. Servi byen lenstriksyon ki kongregasyon i fourni pour ed ou amelyore konman en ansennyan. E annan konfyans ki Zeova i kapab donn ou lafors pour akonpli ou minister.—1 Korentyen 9:19-23.

21. (a) Ki mannyer nou konnen ki Zeova i serir bann endividi batize e fidel? (b) Kwa ki montre ki batenm i enportan pour sirviv legzekisyon zizman Bondye lo sa monn mesan?

²¹ En dimoun dedye e batize, ki pe fer tou son posib pour swiv Zezi fidelman, i spesyal dan lizye Bondye. Zeova i egzamin tou sa bilyon leker imen e i konnen konman ki en tel endividi i rar. I konsider zot konman bann trezor, “bann keksoz dezirab.” (Agai 2:7) Bann profesi Labib i montre ki Bondye i konsider sa bann dimoun konman bann ki’n ganny marke pour sirviv legzekisyon son zizman, ki pou byento vin lo sa sistenm mesan. (Ezekyel 9:1-6; Malaki 3:16, 18) Eski ‘ou’n swazir pou ganny lavi eternel’? (Akt 13:48) Eski i ou dezir senser pour ganny marke konman enn ki servi Bondye? Dedikasyon ek batenm i form parti sa mark, e zot esansyel pour sirviv.

22. Ki lespwar sa “gran lafoul” pe atann enpasyaman?

²² Apre Deliz, Noe avek son fanmiy ti sorti dan lars pour viv lo en later pirifye. Pareyman ozordi, “en gran lafoul” ki aplik konnesans Bondye dan zot lavi e ganny laprouvasyon Zeova, i annan lespwar pour sirviv lafen sa monn mesan, e rezwir lavi eternel lo en later definitivman pirifye. (Revelasyon 7:9, 14) Ki mannyer lavi pou ete?

TESTE OU KONNESANS

Konman Zeova i anvi ou servi konnesans ki ou annan lo li?

Nonm bann pa ki kondwir nou ver batenm.

Akoz batenm pa en finisyon me plito en konmansman?

Ki mannyer nou kapab viv an konformite avek nou dedikasyon ek batenm?

[Portre lo paz 172]

Eski ou’n dedye ou lavi avek Bondye dan lapriyer?

[Portre lo paz 174]

Kwa ki anpes ou batize?