Leson 4

Ki sennla Dyab?

Kote Satan oubyen Dyab i sorti? (1, 2)

Konman Satan i tronp bann dimoun? (3-7)

Akoz nou bezwen reziste Dyab? (7)

1. Sa mo “dyab” i vedir kelken ki koz mansonz lo en lot dimoun pour fer li ditor. “Satan” i vedir en lennmi oubyen en opozan. Sa i bann term ki ganny donnen pour pli gran lennmi Bondye. Avan sa, i ti en lanz parfe ki ti viv dan lesyel avek Bondye. Me apre, i ti vin fyer e i ti oule ganny ladorasyon ki selman pour Bondye.—Matye 4:8-10.

2. Sa lanz, Satan, ti servi en serpan pour koz avek Ev. I ti koz mansonz avek li pour fer li dezobei Bondye. Koumsa Satan in kestyonn drwa Bondye pour dirize, ouswa son pozisyon konman Bondye Tre O. Satan ti pretann ki Bondye pa gouvern byen e ki i priv son bann kreatir bann bon keksoz. Satan ti osi pretann ki okenn imen pa pou reste fidel avek Bondye. Ler i ti fer sa, Satan ti vin lennmi Bondye. Se pour sa ki i ti ganny apele Satan ek Dyab.—Zenez 3:1-5; Zob 1:8-11; Revelasyon 12:9.

3. Satan i servi riz pour fer bann dimoun ador li. (2 Korentyen 11:3, 14) En fason ki i tronp bann dimoun i atraver bann fo larelizyon. Si en larelizyon i ansenny bann mansonz lo Bondye, finalman i pe fer lavolonte Satan. (Zan 8:44) Bann dimoun ki swiv en fo larelizyon zot kapab senserman krwar ki zot pe ador vre Bondye, me an realite zot pe servi Satan. Se li ki ‘bondye sa syek.’—2 Korentyen 4:4.

4. Satan i servi osi grigri ek bonnonm dibwa pour met dimoun anba son pouvwar. Serten i envok bann move lespri pour ganny proteksyon, pour fer malis lezot, pour konn lavenir oubyen pour fer bann mirak. Se Satan ki lafors mesan deryer tou sa bann keksoz. Pour fer Bondye plezir, fodre pa ki nou fer okenn keksoz ki annan rapor avek grigri.—Deterononm 18:10-12; Akt 19:18, 19.

5. Satan i osi tronp bann dimoun ler i ensit zot pour vin fyer akoz zot ras oubyen pour ador bann lorganizasyon politik. Serten i krwar ki zot pei oubyen zot ras i pli meyer ki lezot. Me sa pa vre ditou. (Akt 10:34, 35) Lezot dimoun i depan lo bann lorganizasyon politik pour anmenn solisyon pour problenm limanite. Ler zot fer sa, zot rezet Rwayonm Bondye ki sel solisyon pour nou bann problenm.—Danyel 2:44.

6. Satan i osi tronp bann dimoun ler zot ganny tante avek move dezir. Zeova i konnen ki sa bann move pratik i pou fer nou ditor alor i dir nou rezet zot. (Galat 6:7, 8) I kapab arive ki bann dimoun i demann ou pour fer sa ki mal avek zot. Selman, mazinen ki se Satan ki oule ou fer sa bann keksoz.—1 Korentyen 6:9, 10; 15:33.

7. Satan i kapab servi persekisyon oubyen lopozisyon pour fer ou abandonn Zeova. Serten dimoun ki ou kontan pou kapab ankoler akoz ou pe etidye Labib. Lezot pou menm kapab sikann ou. Me lekel ki ou oule fer plezir? Ki sennla ki’n donn ou lavi? Satan i oule fer ou per pour fer ou aret aprann konn Zeova. Pa les Satan gannyen! (Matye 10:34-39; 1 Pyer 5:8, 9) Si ou reziste Dyab, ou pou fer Zeova plezir e ou pou montre ki ou aksepte ki i annan drwa pour dirize.—Proverb 27:11.

[Portre lo paz 9]

Fo larelizyon, grigri, ek patriyotism pe tronp bann dimoun

[Portre lo paz 9]

Reziste Satan e kontinyen aprann konn Zeova