SAPIT 1
Ou Kapab Konn en Lavenir Ere!
1, 2. Ki ou Kreater i anvi pour ou?
LER en dimoun ki ou kontan i may ou tandreman dan son lebra. Ou pe riye avek tou ou leker pandan en bon repa avek bann zanmi pros. Kan ou pe get, avek plezir, ou zanfan ki pe zwe dan lazwa. Sa i bann moman ere dan ou lavi. Pourtan, pour bokou dimoun, lavi i zis anmenn en problenm apre en lot. Si sa i ou ka, pran kouraz.
2 I lavolonte Bondye ki ou rezwir en boner dirab dan bann kondisyon ekselan e en lanvironnman merveye. Sa i pa en rev, akoz Bondye i ofer ou lakle pour sa lavenir ere. Sa lakle se en konnesans.
3. Ki kalite konnesans ki lakle boner, e akoz nou asire ki Bondye i kapab donn nou sa konnesans?
3 Nou pe koz lo en kalite konnesans tre partikilye, enn ki bokou pli siperyer ki sazes imen. Sa i “konnesans Bondye.” (Proverb 2:5) Anviron 2,000 an pase, en ekriven Labib ti dir: “Tou lakaz i bezwen annan en dimoun ki’n konstri li, me konstrikter tou keksoz se Bondye.” (Ebre 3:4) Mazin sa konnesans ki Kreater tou keksoz i bezwen posede! Labib i dir ki Bondye i kont e nonm tou bann zetwal. Sa i enpresyonan, akoz zis dan nou galaksi i annan plizyer santenn bilyon zetwal, e bann astrononm i dir ki i annan ankor en santenn bilyon lezot galaksi! (Psonm 147:4) Deplis, Bondye i konn tou keksoz lo nou. Alors, lekel apar-d-li ki ti a kapab fourni bann larepons satisfezan pour nou bann kestyon enportan konsernan lavi?—Matye 10:30.
4. Akoz i normal ki Bondye i fourni nou avek bann lenstriksyon, e ki liv ki fer sa?
4 Imazin de zonm ki pe esey repar zot loto. Byen dekouraze, enn ant zot i abandonn son travay reparasyon. Sa lot i fikse sa problenm byen trankilman, i start masin e i sourir ler i vwar son masin i start e roule san okenn problenm. Ou pa pou vwar li difisil pour devinen lekel ant le de ki ti annan en liv lenstriksyon, sorti kot fabrikan sa loto. Eski i pa normal ki Bondye i fourni nou avek bann lenstriksyon pour gid nou dan lavi? Petet, konman ou deza konnen, se egzakteman sa ki Labib i dir i ete—en liv lenstriksyon ek gidans sorti kot nou Kreater, ki’n ganny prepare pour propaz konnesans Bondye.—2 Timote 3:16.
5. Ki valer konnesans Bondye i annan?
5 Si sa ki Labib pe dir i vre, zis mazinen ki trezor sa liv i kontyen! Dan Proverb 2:1-5, i ankouraz nou pour rod sazes, pour fouye konmsi ou pe rod en trezor kasyet—pa dan bann panse imen, me dan parol Bondye li menm. Si nou serse dan Labib, nou pou trouv “konnesans Bondye.” Vi ki i konpran nou limit ek nou bezwen, Bondye i donn nou bann lenstriksyon ki pou ed nou viv anpe e ere. (Psonm 103:14; Izai 48:17) Deplis, sa konnesans Bondye i ofer nou bann nouvel tre eksitan.
LAVI ETERNEL!
6. Ki lasirans Zezi Kri ti donnen konsernan konnesans Bondye?
6 Zezi Kri, personnaz byen koni dan listwar, ti dekrir tre klerman sa laspe konnesans Bondye, ler i ti dir: “[Lavi Eternel, NW] savedir ki zot konn ou konman sel vre Bondye, ek Zezi-Kri ki ou’n anvoye.” (Zan 17:3) Zis mazinen—konnesans ki anmenn ver lavi eternel!
7. Ki laprev nou annan ki i pa ti dan plan Bondye ki nou mor?
7 Pa bezwen repous lide lavi eternel konmsi i zis en rev. Plito, reflesir lo fason ki lekor imen in ganny fer. I’n ganny byen konsevwar pour kapab goute, antann, santi, vwar e touse. I annan en kantite keksoz lo later ki nou bann sans i apresye—bann bon manze, bann zoli sanson zwazo, bann fler parfimen, bann zoli peizaz, bann konpanni agreab! Deplis, nou servo merveye i bokou pli pwisan ki en konpiter pli sofistike, akoz i permet nou pour apresye tou sa bann keksoz. Eski ou panse ki nou Kreater i anvi ki nou mor e perdi tousala? Eski i pa normal pour konklir ki i anvi nou viv ere, e pour leternite? Wi, se sa ki sa konnesans Bondye i kapab sinifye pour ou.
LAVI DAN PARADI
8. Ki Labib i dir konsernan lavenir limanite?
8 Tou sa ki Labib i dir konsernan lavenir later ek limanite i kapab ganny rezimen dan en sel mo—Paradi! Zezi Kri ti koz lo la, ler i ti dir en zonm ki ti pe mor: “Ou pou avek mwan dan Paradi.” (Lik 23:43) Sa mo Paradi ti sirman fer sa zonm mazin lo kondisyon ere ki nou premye paran, Adan ek Ev, ti ladan. Kan Bondye ti kree zot, zot ti parfe e zot ti viv dan en zoli zarden ki zot Kreater ti’n prepare e amenaze. Son non zarden Edenn ti tre apropriye, akoz sa mo Edenn i vedir plezir.
9. Konman lavi ti ete okonmansman dan Paradi?
9 Vreman sa zarden ti agreab! I ti en vre paradi. Parmi tou sa bann zoli pye dibwa, ti annan ki ti prodwi bann fri delisye. Tandis ki zot ti eksplor zot lanvironnman, bwar son delo pir e kas fri dan son bann pye dibwa, Adan ek Ev ti napa nanryen pour trakase oubyen per. Menm bann zannimo pa ti en menas pour zot, akoz Bondye ti’n aranze ki sa zonm ek son fanm ti pou egzers en dominasyon emab lo zot tou. Deplis, sa premye koup imen ti annan lasante ekselan. Tan ki zot ti reste obeisan anver Bondye, en lavenir ere ti ganny ofer pour zot. Zot ti’n resevwar en travay tre agreab—pour okip zot demer merveye. Bondye ti osi donn Adan ek Ev sa misyon pour “ranpli later e soumet li.” Ansanm avek zot desandans, zot ti pou agrandi sa Paradi ziska ki plannet later antye ti pou’n vin en zoli landrwa agreab pour viv.—Zenez 1:28.
10. Ki Zezi ti pe panse ler i ti koz lo Paradi?
10 Toutfwa, ler Zezi ti mansyonn Paradi, i pa ti pe demann sa zonm ki ti pe mor pour mazin lo en ansyen lepok. Non, Zezi ti pe koz lo lavenir! I ti konnen ki nou later antye pou vin en paradi. Bondye ti pou alor akonpli son plan orizinal pour limanite e pour later. (Izai 55:10, 11) Wi, Paradi pou ganny reetablir! Konman i pou ete? Annou les Parol Bondye, Labib, reponn.
LAVI DAN PARADI REETABLIR
11. Dan sa Paradi reetablir, ki pou arive avek maladi, lavyeyes ek lanmor?
11 Maladi, lavyeyes ek lanmor pou nepli egziste. “Sa letan lizye bann aveg pou ganny ouver, e zorey bann sourd pou ganny debouse. Sa letan sa enn ki bwate pou grenpe parey en serf, e lalang sa enn ki koz-pa pou pous bann kri lazwa.” (Izai 35:5, 6) “[Bondye] pou reste avek [bann imen]. Zot pou vin son pep, e i pou vin zot Bondye. I pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.”—Rev. 21:3, 4.
12. Akoz nou kapab asire ki pou napa ni krim, ni vyolans, e ni mesanste dan sa fitir Paradi?
12 Kriminalite, vyolans ek mesanste pou disparet pour touzour. “Bann malfeter pou ganny retranse . . . En pti pe letan ankor, e sa enn mesan pou nepli la . . . I pa pou egziste. Me bann ki annan limilite pou posed later.” (Psonm 37:9-11) “An se ki konsern bann mesan, zot pou ganny retranse lo later; e sa bann ki tret, pou ganny arase lo la.”—Proverb 2:22.
13. Konman Bondye pou anmenn lape?
13 Lape pou rennyen partou lo later. “I [Bondye] pe fer arete bann lager ziska ekstremite later. Lark i kase e i koup an morso lans.” (Psonm 46:9) “Sa enn ki zis pou zermen, e labondans lape ziska ki lalin i nepli.”—Psonm 72:7.
14, 15. Ki Labib i dir konsernan lozman, travay ek manze dan Paradi?
14 Lozman pou asire e travay pou agreab. “Wi, zot pou konstri bann lakaz e zot pou reste ladan . . . Zot pa pou konstri pour en lot reste, e zot pa pou plante pour en lot manze. Akoz parey bann zour en pye dibwa, bann zour mon pep pou ete; e sa bann ki mon’n swazir pou profit plennman bann travay zot lanmen. Zot pa pou rente pour nanryen, e zot pa pou ganny zanfan pour donn problenm.”—Izai 65:21-23.
15 Bon manze pou an abondans. “I pou annan legren an abondans lo later; anler lo bout montanny pou annan en provizyon.” (Psonm 72:16) “Later pou sirman donn son prodwi; Bondye, nou Bondye pou beni nou.”—Psonm 67:6.
16. Akoz lavi pou agreab dan Paradi?
16 Lavi eternel dan paradi lo later pou agreab. “Bann zis pou posed later, e zot pou reste lo la pour touzour.” (Psonm 37:29) “Landrwa dezer ek rezyon ki napa delo pou rezwir, e laplenn dezerte pou dan lazwa e i pou fleri parey safran.”—Izai 35:1.
SA KONNESANS E OU LAVENIR
17. (a) Ki ou bezwen fer si ou ti a kontan viv dan Paradi? (b) Konman nou konnen ki Bondye pou anmenn bann gran sanzman lo later?
17 Si ou vreman anvi viv dan sa Paradi, pa les nanryen anpes ou ganny sa konnesans Bondye. I kontan bann imen e i pou fer bann sanzman neseser pour fer later vin en paradi. Apre tou, si ou ti annan pouvwar pour met en lafen avek soufrans ek lenzistis ki telman komen dan sa monn, eski ou pa ti pou fer li? Eski nou kapab ekspekte mwens de la par Bondye? Annefe, Labib i koz avek realism lo sa letan ki Bondye pou retir sa sistenm mondyal vyolan e i pou ranplas li avek en dominasyon parfe e zis. (Danyel 2:44) Me Labib pa zis anons nou tou sa bann levennman. I osi montre konman nou pou kapab rantre dan sa nouvo monn ki Bondye in promet.—2 Pyer 3:13; 1 Zan 2:17.
18. Ki benefis sa konnesans Bondye i kapab anmennen pour ou konmela menm?
18 Sa konnesans Bondye i osi kapab aport ou bokou byenfe depi konmela menm. Labib i fourni larepons pour bann kestyon pli profon e troublan lo lavi. Si ou aksepte son gidans, ou pou kapab devlop en lanmitye avek Bondye. Vreman, sa i en gran privilez! Ou pou alors konn sa lape ki zis Bondye ki kapab donnen. (Romen 15:13, 33) Ler ou konmans pran sa konnesans esansyel, ou pe angaz ou dan sa zefor pli enportan e pli benefisyer dan ou lavi. Zanmen ou pou regrete ki ou’n ganny sa konnesans Bondye ki anmenn ver lavi eternel.
19. Ki bann kestyon ki nou pou egzaminen dan sapit swivan?
19 Nou’n koz lo Labib konman sa liv ki kontyen konnesans Bondye. Toutfwa, konman nou konnen ki i pa en liv sazes imen, me i en keksoz bokou pli siperyer? Nou pou egzamin sa kestyon dan sapit swivan.
TESTE OU KONNESANS
Akoz konnesans Bondye i kapab anmenn ou ver boner eternel?
Konman lavi pou ete dan fitir Paradi?
Akoz ki i byen ki konmela menm ou ganny konnesans Bondye?