Leson 6

Kisisa Rwayonm Bondye?

Kote Rwayonm Bondye i ete? (1)

Lekel ki Lerwa? (2)

Eski pou annan lezot dimoun ki pou dirize avek sa Lerwa? Si wi, konbyen? (3)

Kisisa ki montre ki nou pe viv dan bann dernyen zour? (4)

Dan lavenir, ki Rwayonm Bondye pou fer pour limanite? (5-7)

1. Kan i ti lo later, Zezi ti ansenny son bann disip pour priy pour Rwayonm Bondye. En rwayonm i en gouvernman ki ganny dirize par en lerwa. Rwayonm Bondye i en gouvernman spesyal. I dan lesyel e i pou domin later. I pou sangtifye, setadir rann sen, non Bondye. I pou fer sir ki lavolonte Bondye i ganny fer lo later parey i ganny fer dan lesyel.—Matye 6:9, 10.

2. Bondye in promet ki Zezi pou vin Lerwa dan Son Rwayonm. (Lik 1:30-33) Kan Zezi ti lo later, i ti demontre ki i pou en bon sef, zis e parfe. Kan i ti retourn dan lesyel, i pa ti vin Lerwa toudswit. (Ebre 10:12, 13) An 1914, Zeova ti donn Zezi pouvwar ki i ti’n promet li. Depi sa, Zezi pe dirize dan lesyel konman Lerwa etabli par Zeova.—Danyel 7:13, 14.

3. Zeova in osi swazir bann zonm ek fanm fidel lo later pour zot al dan lesyel. Ansanm avek Zezi, zot pou dirize konman lerwa, ziz, ek pret lo limanite. (Lik 22:28-30; Revelasyon 5:9, 10) Zezi ti apel sa bann ki pou gouvern avek li dan son Rwayonm konman en “pti troupo.” I annan 144,000 zot.—Lik 12:32; Revelasyon 14:1-3.

4. Deswit apre ki Zezi ti’n vin Lerwa, i ti pous Satan ek son bann lanz mesan an deor lesyel, dan zalantour later. Se pour sa ki bann keksoz in vin sitan move lo later depi 1914. (Revelasyon 12:9, 12) Lager, lafanmin, lepidemi, dimoun nepli annan respe pour lalwa, tou sa bann keksoz i form par en “siny” ki Zezi pe rennyen e ki sa lemonn in antre dan son bann dernyen zour.—Matye 24:3, 7, 8, 12; Lik 21:10, 11; 2 Timote 3:1-5.

5. Byento, Zezi pou ziz bann dimoun, i pou separ zot parey en berze i separ mouton ek kabri. Bann “mouton” se bann ki pou’n reste fidel avek Zezi. Zot pou resevwar lavi eternel lo later. Bann “kabri” se bann ki pou’n rezet Rwayonm Bondye. (Matye 25:31-34, 46) Tre byento, Zezi pou detri tou bann ki ganny konsidere konman kabri. (2 Tesalonisyen 1:6-9) Si ou oule vin enn bann “mouton” Zezi, ou bezwen ekout mesaz Rwayonm e pratik sa ki ou pe aprann.—Matye 24:14.

6. Ozordi, later i divize an bokou pei. Sakenn i annan son prop gouvernman. Souvan, bann pei i fer lager antre zot. Me Rwayonm Bondye pou ranplas tou bann gouvernman imen. I pou sel gouvernman ki pou domin later antye. (Danyel 2:44) Alor, pou nepli annan lager, ni krim, ni vyolans. Tou dimoun pou viv ansanm dan lape ek linite.—Mika 4:3, 4.

7. Pandan sa 1,000 an ki Zezi pou dirize, bann imen fidel pou vin parfe, e later antye pou ganny transformen dan en paradi. Alafen sa 1,000 an, Zezi pou’n akonpli tou sa ki Bondye in demann li pour fer. Alor, i pou rann Rwayonm avek son Papa. (1 Korentyen 15:24) Akoz ou pa eksplik ou fanmiy oubyen ou bann zanmi sa ki Rwayonm Bondye pou fer?

[Portre lo paz 13]

Anba dominasyon Zezi pou nepli annan laenn oubyen lapreferans