Leson 8

En Lavi Fanmiy ki fer Bondye kontan

Dan en fanmiy, ki plas en mari i annan? (1)

Konman en mari i devret tret son madanm? (2)

Ki responsabilite en papa i annan? (3)

Ki plas en madanm i annan dan en fanmiy? (4)

Ki Bondye i demann bann paran ek bann zanfan pour fer? (5)

Ki pwennvi Labib lo separasyon ek divors? (6, 7)

1. Labib i dir ki en mari i sef fanmiy. (1 Korentyen 11:3) En mari i devret annan zis en madanm. Zot bezwen marye biro.—1 Timote 3:2; Tit 3:1.

2. En mari i bezwen kontan son madanm parey i kontan son prop lekor. I devret tret li parey Zezi ti tret son bann disip. (Efezyen 5:25, 28, 29) I pa devret zanmen bat son madanm ni maltret li dan okenn fason. Okontrer, i bezwen onor li e respekte li.—Kolosyen 3:19; 1 Pyer 3:7.

3. En papa i bezwen travay dir pour sonny son fanmiy. I devret donn manze, lenz ek lakaz pour son madanm ek son bann zanfan. En papa i devret osi okip bezwen spirityel son fanmiy. (1 Timote 5:8) I premye dimoun ki responsab pour ed son fanmiy pour konn Bondye ek son lavolonte.—Deterononm 6:4-9; Efezyen 6:4.

4. En madanm i devret en bon led pour son mari. (Zenez 2:18) I bezwen ed son mari pour ansenny e edik bann zanfan. (Proverb 1:8) Zeova i oule ki en madanm i pran swen e annan lanmour pour son fanmiy. (Proverb 31:10, 15, 26, 27; Tit 2:4, 5) I devret annan en respe profon pour son mari.—Efezyen 5:22, 23, 33.

5. Bondye i demann bann zanfan pour obeir zot paran. (Efezyen 6:1-3) I kont lo bann paran pour ansenny e koriz zot zanfan. Fodre ki paran i pas letan avek zot zanfan, etidye Labib avek zot e pran swen avek zot bezwen spirityel e emosyonnel. (Deterononm 11:18, 19; Proverb 22:6, 15) Bann paran pa devret zanmen disiplin zot zanfan dan en fason dir e kriyel.—Kolosyen 3:21.

6. Kan bann dimoun marye i ganny difikilte antre zot, zot devret esey aplik bann konsey Labib. Labib i ankouraz nou pour annan lanmour e pardonnen. (Kolosyen 3:12-14) Parol Bondye pa ankouraz separasyon konman en fason pour rezourd bann pti problenm. Me en madanm i kapab deside kit son mari si (1) son mari i kontinyelman refize sonny son fanmiy, (2) son mari i telman vyolan ki i met lasante ek lavi son madanm an danze, (3) lopozisyon son mari i anpes li servi Zeova.—1 Korentyen 7:12, 13.

7. Bann dimoun marye i bezwen fidel avek kanmarad. Adilter i en pese kont Bondye e kont sa lot dimoun marye. (Ebre 13:4) Relasyon seksyel an deor maryaz i sel rezon ki en Kretyen i kapab divorse e lib pour remarye. (Matye 19:6-9; Romen 7:2, 3) Zeova i deteste ler dimoun i divorse san okenn rezon biblik pour marye avek en lot dimoun.—Malaki 2:14-16.

[Portre lo paz 16, 17]

En bon papa i pran swen avek son fanmiy lo plan materyel e spirityel

[Portre lo paz 17]

Bondye i kont lo bann paran pour ansenny e koriz zot zanfan