Perseverans i ganny rekonpanse

¹ “Par zot perseverans zot a sov zot lavi.” (Lik 21:19) Sa parol, ki form parti profesi Zezi konsernan ‘lafen sa sistenm,’ i fer kler ki pour nou gard nou fidelite, nou devret pare pour fer fas avek bokou leprev. Me avek lafors Zeova, nou tou nou kapab “reste fidel ziska lafen” e “ganny sove.”—Mat. 24:3, 13; Fili. 4:13.

² Persekisyon, problenm lasante, larzan, ek depresyon i kapab fer sak zour tre difisil. Me nou pa devret zanmen bliye ki Satan pe sey kas nou fidelite avek Zeova. Sak zour ki nou reste fidel avek nou Papa, nou pe kontribye pour donn en larepons sa enn ki pe kestyonn nou fidelite. Pa i ankourazan pour konnen ki nou “larm” ki nou verse ler nou pe rankontre leprev pa ganny oubliye! Zot presye pour Zeova, e nou fidelite i fer leker Zeova kontan!—Ps. 56:8; Prov. 27:11.

³ Rafinen par Leprev: Bann sitiasyon difisil i kapab montre ki nou lafwa i feb oubyen i annan en defo dan nou personnalite, tel parey lorgey ouswa enpasyans. Olye sey evit ouswa met en lafen avek leprev par servi bann mwayen ki pa baze lo Labib, nou devret pran aker sa konsey dan Parol Bondye pour les ‘perseverans devlop konpletman.’ Akoz? Parski perseverans avek fidelite dan leprev i ed nou pour vin “parfe e konplet.” (Zak 1:2-4) Perseverans i kapab ed nou devlop bann bon kalite. Par egzanp, i ed nou pour vin rezonnab, konpran santiman lezot, e annan pitye.—Rom. 12:15.

⁴ I teste Kalite nou Lafwa: Ler nou persevere dan leprev, nou ganny en lafwa ki’n ganny teste ki annan gran valer dan lizye Bondye. (1 Pyer 1:6, 7) En tel lafwa i fer li posib pour nou reste ferm pandan lezot leprev dan lavenir. Deplis, nou kapab santi laprouvasyon Bondye, e sa i ranforsi nou lesperans, par fer li vin pli reel pour nou.—Rom. 5:3-5.

⁵ Pli bon rekonpans pour perseverans i ganny trouve dan Zak 1:12, ki dir: “Byennere, sa dimoun ki reste ferm dan leprev, parski apre son leprev i pou resevwar kouronn lavi.” Alor, annou reste ferm dan nou latasman avek Zeova, asire ki i pou vreman rekonpans “bann ki [kontinyen, NW] kontan li.”

Dezyenm Parti—Kondwir bann Letid Labib ki progrese

Prepare pour kondwir Letid

¹ Ansenny avek lefikasite dan en letid Labib i enplik plis ki zis diskit lo lenformasyon e get bann verse ki’n ganny mansyonnen. Nou bezwen prezant sa lenformasyon dan en fason ki tous leker sa etidyan. Sa i demann en preparasyon oprofon avek sa etidyan antet.—Prov. 15:28.

² Konman pour prepare: Konmans par priy Zeova konsernan sa etidyan ek son bezwen. Demann Zeova pour ed ou tous leker sa etidyan. (Kol. 1:9, 10) Pour byen konpran sa tenm klerman, pran en moman pour egzamin tit sa sapit ouswa sa leson, bann soutit, ek okenn led vizyel. Demann ou lekor: ‘Ki lobzektif prensipal sa lenformasyon?’ Sa pou ed ou konsantre lo bann pwen enportan pandan ki ou pe kondwir letid.

³ Repas lo sa lenformasyon paragraf par paragraf avek bokou latansyon. Idantifye larepons pour sak kestyon ki ganny demande, mark zis bann mo ek fraz kle. Egzaminen konman bann verse Labib ki’n ganny mansyonnen i relye avek pwen enportan dan paragraf, e deside lekel sa bann verse ki pou ganny lir pandan letid. Ou pou kapab vwar li itil pour fer bann not bref dan bann lespas akote paz. Sa etidyan i devret vwar klerman ki sa ki i pe aprann i sorti dan Parol Bondye.—1 Tesa. 2:13.

⁴ Adapte sa Leson avek bezwen sa Etidyan: Apre, egzamin sa leson avek bezwen sa etidyan antet. Esey mazin bann kestyon ki i kapab demande ek bann pwen ki i kapab trouv difisil pour konpran ouswa pour aksepte. Demann ou lekor, ‘Ki i bezwen konpran ouswa amelyore pour li progrese spirityelman? Ki mannyer mon kapab tous son leker?’ Apre adapte ou lansennyman dapre son sitiasyon. Parfwa, ou kapab vwar li itil pour prepar en legzanp, en leksplikasyon, oubyen en seri kestyon pour ed sa etidyan konpran sinifikasyon en serten pwen oubyen verse Labib. (Nee. 8:8) Me evite azout lenformasyon siplemanter ki relye avek tenm, ki pa neseser pour fer kler sa pwen ki pe ganny diskite. En revizyon bref alafen letid pou ed li rapel bann pwen enportan.

⁵ Pa nou kontan ler bann nouvo i devlop bann bon kalite pour donn laglwar Zeova! (Fili. 1:11) Pour ed zot atenn sa lobzektif, prepar byen sak fwa ou kondwir en letid Labib.