Nou Devwar anver lezot

¹ Zapot Pol ti santi li oblize pour pres avek bann dimoun. I ti konnen ki Zeova in fer li posib pour tou sort kalite dimoun ganny sove par mwayen disan presye Son Garson. (1 Tim. 2:3-6) Pour sa rezon, Pol ti dir: “Mon konsider li mon devwar pour vizit bann Grek konman bann etranze, bann savan, konman bann inyoran.” I ti annan en gran dezir pour prese e i ti fer bokou zefor pour ranpli son devwar anver son prosen par partaz sa bon nouvel avek zot.—Rom. 1:14, 15.

² Parey Pol, bann Kretyen ozordi i partaz sa bon nouvel avek zot prosen dan tou lokazyon. Vi ki ‘gran ladetres’ pe aprose byen vit, nou travay pour rod bann dimoun ki annan leker senser i irzan. Fotespere sa lanmour senser ki nou annan pour dimoun i pous nou pour donn tou dan sa travay ki sov lavi.—Mat. 24:21; Ezek. 33:8.

³ Ranpli nou Devwar: Fason prensipal ki nou kapab trouv bann dimoun i ler nou pres port-an-port. Dan bann teritwar ki bokou dimoun pa kot zot lakour, nou kapab pran bann not egzakt e retourn en ler diferan. Si nou fer sa nou pou kapab zwenn plis dimoun. (1 Kor. 10:33) Nou kapab osi zwenn dimoun par pres dan teritwar biznes, lo semen, dan bann park, dan bann landrwa parking, e lo telefonn. Nou kapab demann nou lekor, ‘Eski mon pe fer mon mye pour servi tou fason pour kapab partaz sa mesaz lavi?’—Mat. 10:11.

⁴ En pionye ti santi ki i annan en gran responsabilite pour koz avek tou dimoun dan son teritwar. Dan son teritwar ti annan en lakaz ki son rido ti toultan fermen, e zanmen ti annan dimoun kot sa lakaz. Me en zour ler sa pionye pa ti dan predikasyon, i ti remark en loto devan sa lakaz ki zanmen in vwar dimoun. Vi ki i pa ti oule mank sa loportinite, i ti sonn laklos sa lakaz. En zonm ti sorti, e apre sa premye konversasyon, sa ser ek son msye ti fer plizyer retourn vizit kot sa zonm. Alafen, sa zonm ti aksepte en letid Labib, e aprezan i en frer batize. I vreman kontan ki sa ser ti santi ki i annan en responsabilite pour pres avek lezot.

⁵ Vi ki lafen pe aprose byen vit, la i letan pour ranpli nou devwar anver nou prosen par fer bokou zefor dan travay predikasyon.—2 Kor. 6:1, 2.

Onzyenm Parti—Kondwir bann Letid Labib ki progrese

Ed bann Etidyan pour fer Retourn Vizit

¹ Ler en etidyan Labib i konmans prese, i pou zwenn bann dimoun ki montre lentere dan sa bon nouvel. Ki mannyer nou kapab ed li pour fer bann bon retourn vizit e devlop lentere bann ki enterese?

² Preparasyon pour fer en retourn vizit i konmans avek premye vizit. Ankouraz sa etidyan pour annan en lentere senser dan bann dimoun ki i koz avek. (Fili. 2:4) Ptit-a-pti form sa nouvo proklanmater pour ankouraz bann dimoun pour eksprim sa ki zot panse, pour ekout zot komanter, e pour pran not lo bann keksoz ki sa bann dimoun i enterese avek. Ler en dimoun i montre lentere, fer sa nouvo proklanmater ekrir lenformasyon enportan konsernan sa vizit. Servi sa lenformasyon pour ed li plàn lezot diskisyon plitar.

³ Preparasyon pour retournen: Reviz sa premye vizit, e montre sa etidyan konman pour swazir en laspe sa mesaz Rwayonm ki pou atir sa dimoun. (1 Kor. 9:19-23) Ansanm avek li, prepar en prezantasyon bref ki enkli en verse Labib ek en paragraf dan en liv letid. Prepar osi en kestyon ki i kapab demande alafen sa diskisyon ki pou poz fondasyon pour prosenn vizit. Montre sa nouvo proklanmater konman pour ogmant konnesans sa dimoun lo Parol Bondye apre sak vizit.

⁴ I osi itil pour montre sa etidyan en lentrodiksyon senp ki i kapab servi ler i pe fer en retourn vizit. Apre ki i’n dir bonzour sa dimoun, i kapab dir: “Mon ti byen kontan nou premye konversasyon, e mon’n retournen pour partaz avek ou sa ki Labib i dir lo [mansyonn sa topik].” Ou kapab osi montre sa nouvo proklanmater konman pour reazir si en lot dimoun i ouver laport.

⁵ Swiv Lentere avek bokou Latansyon: Ankouraz sa etidyan pour montre en bon legzanp pour retournen san tarde kot tou dimoun ki montre lentere. Pour trouv bann dimoun kot zot petet nou bezwen persiste pour retourn ankor. Ansenny sa etidyan konman pour fer bann laranzman pour retournen, e ed li konpran sa nesesite pour retournen parey i’n promet. (Mat. 5:37) Form sa nouvo proklanmater pour montre li zantiy, annan konprenezon, ek respe ler i pe rod bann ki parey mouton e devlop zot lentere.—Tit 3:2.