Pres lo Rwayonm i en Privilez presye

¹ Toulezour, plizyer bilyon dimoun lo sa later i benefisye avek bann provizyon ki Zeova i donnen avek zenerozite. (Mat. 5:45) Me en pti gin dimoun ki annan sa privilez spesyal pour montre lapresyasyon pour zot Kreater par pres sa bon nouvel lo Rwayonm Bondye. (Mat. 24:14) Ki kantite ou apresye sa zoli privilez?

² Pres lo Rwayonm i onor Bondye e i anmenn lespwar ek lape pour bann dimoun ki trouble par sa letan difisil ki nou pe viv ladan. (Ebr. 13:15) Pour bann ki byen reazir anver sa mesaz, zot ganny lespwar lavi eternel. (Zan 17:3) Eski i annan en travay dan sa lemonn ki ofer bann tel byenfe? Zapot Pol ti montre lapresyasyon pour son minister par lafason ki i ti akonpli li. I ti vwar li konman en trezor.—Akt 20:20, 21, 24; 2 Kor. 4:1, 7.

³ Lapresyasyon pour nou Privilez presye: En fason ki nou montre lapresyasyon pour sa privilez pour prese, se ler nou port latansyon lo kalite nou servis. Eski nou pran letan pour prepar en prezantasyon ki pou tous leker bann ki ekout nou? Eski nou kapab amelyor nou abilite pour servi bann verse Labib e pour rezonn avek dimoun? Eski nou travay oprofon dan teritwar ki nou’n ganny dezinyen? Eski nou kapab konmans e kondwir en letid Labib? Parey bann Kretyen fidel dan lepase e konmela, en bon pwennvi lo sa aktivite i motiv nou pour al prese, e nou apresye nou privilez.—Mat. 25:14-23.

⁴ Ler nou pe fer fas avek lavyeyes, move lasante, oubyen lezot sitiasyon difisil, i rekonfortan pour konnen ki nou bann zefor pour partisip dan predikasyon avek devouman i vreman ganny apresye. Parol Bondye i asir nou ki Zeova i apresye bann zefor ki nou fer pour servi li, menm bann zefor ki pa paret en gran keksoz pour lezot.—Lik 21:1-4.

⁵ Pres lo Rwayonm i donn bokou satisfaksyon. En ser 92 an ti dir: “I vreman en privilez pour get sa plis ki 80 lannen ki’n mon’n dedye dan servis Bondye, e pa santi okenn regre! Si mon ti pou reviv mon lavi ankor, mon ti pou viv sa menm lavi, akoz vreman, ‘labonte leker Bondye i pli meyer ki lavi li menm.’” (Ps. 63:3) Nou osi, annou apresye sa travay pour pres lo Rwayonm ki en privilez presye sorti kot Bondye.

Douzyenm Parti—Kondwir bann Letid Labib ki progrese

Ed Etidyan konmans e kondwir Letid Labib

¹ Ler nou bann etidyan Labib i konmans partisip dan predikasyon, zot kapab en pe per pour zot konmans e kondwir zot prop letid Labib. Ki mannyer nou kapab ed zot devlop en latitid pozitif anver sa laspe enportan dan nou predikasyon?—Mat. 24:14; 28:19, 20.

² Dek ki en etidyan Labib in kalifye konman en proklanmater, petet i deza pe partisip dan Lekol Minister Teokratik. Formasyon ki i gannyen ler i prepar e prezant bann ekspoze pou ed li devlop bann abilite pour ansennyen, ki neseser pour “en zouvriye ki napa nanryen pour onte me ki anons byen mesaz laverite.”—2 Tim. 2:15.

³ Ansenny par ou Legzanp: Zezi ti form son bann disip par donn zot bon lenstriksyon e demontre en bon legzanp. I ti dir: “Sak zelev ki’n byen aprann i a vin parey son profeser.” (Lik 6:40) I tre enportan ki ou imit Zezi par demontre en bon legzanp dan ou predikasyon. Ler ou etidyan i obzerv ou legzanp dan predikasyon, i pou konpran ki lobzektif retourn vizit se pour konmans bann letid Labib.

⁴ Eksplik ou etidyan ki ler nou ofer en dimoun en letid, normalman i pa neseser pour dekrir laranzman letid an detay. Laplipar-di-tan i pli byen pour demontre konman fer letid par servi enn oubyen petet de paragraf dan en piblikasyon ki ganny servi pour fer letid. Bann sizesyon itil pour ed nou fer sa i kapab ganny trouve lo paz 8 e lo paz 6 dan Nou Minister Rwayonm Zanvye 2002.

⁵ Kan i apropriye, envit sa etidyan pour akonpanny ou oubyen en lot proklanmater kalifye lo lezot letid Labib. I kapab donn en komanter lo en paragraf oubyen lo en verse enportan. Alor, par obzerve, sa etidyan pou aprann bokou lo konman pour kondwir bann letid Labib ki progrese. (Prov. 27:17; 2 Tim. 2:2) Felisit li, e diskite konman i kapab amelyore.

⁶ Form bann nouvo proklanmater pour vin bann ansennyan Parol Bondye pou ekip zot pour fer en bon travay, setadir, pour konmans e kondwir zot prop letid. (2 Tim. 3:17) I vreman gou pour travay ansanm avek zot pour ofer sa zoli lenvitasyon: ‘Sa ki anvi, pran delo lavi gratwitman’!—Rev. 22:17.