Nou bezwen ou Led

¹ “Mersi pour tou sa ki zot in fer pour nou. Zot travay i vreman benefisye nou.” Sa remark i byen eksprim rekonesans ki nou santi pour nou bann ansyen ek asistan ministeryel. Anmezir ki lorganizasyon Bondye i kontinyen agrandir, i toultan annan en bezwen pour bann zonm matir servi dan sa apepre 100,000 kongregasyon atraver lemonn. Si ou en frer batize, nou bezwen ou led.

² Montre ki ou anvi servi: Ki mannyer ou kapab montre ki ou anvi servi plis ankor? (1 Tim. 3:1) Prensipalman, par donn en bon legzanp dan tou laspe ou lavi. (1 Tim. 4:12; Tit 2:6-8; 1 Pyer 5:3) Partisip plennman dan travay predikasyon, e ed lezot pour fer parey. (2 Tim. 4:5) Annan en lentere senser dan byennet bann konpanyon Kretyen. (Rom. 12:13) Vin en bon etidyan Parol Bondye, e devlop abilite pour ansennyen. (Tit 1:9; 1 Tim. 4:13) Fer byen bann travay ki bann ansyen i donn ou. (1 Tim. 3:10) Si ou en sef fanmiy, ‘diriz byen ou lakour.’—1 Tim. 3:4, 5, 12.

³ Servi konman en asistan ministeryel ouswa en ansyen i enplik bokou travay e i demann en lespri sakrifis. (1 Tim. 5:17) Alor ler ou pe fer zefor pour montre ki ou anvi servi, konsantre lo servi lezot avek limilite. (Mat. 20:25-28; Zan 13:3-5, 12-17) Reflesir lo latitid ki Timote ti annan e esey imit li. (Fili. 2:20-22) Parey li, les ou bon kondwit fer ou ganny rekomande. (Akt 16:1, 2) Ler ou devlop bann kalite spirityel ki neseser pour akonpli plis responsabilite e aplik nenport konsey ki ou gannyen pour amelyore, ‘tou dimoun pou war ou progre.’—1 Tim. 4:15.

⁴ Paran, form ou Zanfan pour ede: Bann zanfan i kapab konmans aprann pour ede depi tre zenn. Form zot pour ekoute dan renyon, pour prese, e pour annan bon kondwit kot Lasal Rwayonm e osi kot lekol. Montre zot partisipe e trouv plezir dan servi lezot, fer bann keksoz tel parey pour ede dan netwayaz Lasal Rwayonm, ed bann aze, ensidswit. Ed zot trouv lazwa ki vin atraver donnen. (Akt 20:35) En tel formasyon i kapab ed zot pour vin bann pionye, asistan ministeryel ek ansyen dan lavenir.

Katriyenm Parti:—Kondwir bann Letid Labib ki progrese

Montre Etidyan konman pour prepare

¹ En etidyan ki lir son lenformasyon ki i pou etidye davans, souliny larepons, e mazinen konman pour reponn dan son prop mo i normalman fer progre spirityel vitman. Alors, enn fwa ki en letid Labib regilye in ganny etablir, prepar en leson ansanm avek ou etidyan pour montre li konman pour prepare. Avek laplipar etidyan, i pou itil pour prepar en sapit ouswa en leson antye ansanm.

² Souliny Larepons e fer bann Not: Eksplik sa etidyan konman pour trouv larepons dan paragraf pour bann kestyon. Montre li ou liv ouswa brosir kot ou’n souliny zis bann mo ek fraz enportan. Anmezir ki ou egzamin sa lenformasyon, i kapab anvi swiv ou legzanp, par souliny zis sa ki neseser dan son prop piblikasyon pour ed li rapel larepons. (Lik 6:40) Apre demann li pour donn larepons dan son prop mo. Sa pou permet ou vwar ki kantite i konpran sa lenformasyon.

³ En laspe enportan dan preparasyon letid sa etidyan se pour egzamin byen bann verse Labib ki i annan zis son referans. (Akt 17:11) Ed li pour vwar ki sak teks ki’n ganny mansyonnen i siport en pwen dan paragraf. Montre li konman pour fer bann not dan lespas vid dan son liv oubyen brosir. Fer li vwar ki Labib i baz sa ki i pe aprann. Ankouraz li pour byen servi bann verse Labib ki’n deza ganny mete dan paragraf dan son komanter pandan letid.

⁴ En Apersi ek Revizyon: Avan ki sa etidyan i konmans prepar oprofon sa lenformasyon ki pou ganny etidye, i pou itil pour li ganny en apersi lo sa size. Fer resorti ki i kapab ganny en apersi lo sa lenformasyon par egzamin an bref tit sa sapit, bann soutit, ek bann portre. Eksplik li ki avan i fini son preparasyon, i ti pou byen si i pran letan pour reviz bann pwen enportan sa leson, petet par servi bwat revizyon si i annan. En tel revizyon pou ed li rapel sa lenformasyon.

⁵ Par montre en etidyan konman pour prepar byen son letid pou ed li fer bann bon komanter dan renyon. I pou osi ed li devlop bann labitid letid ki pou benefisye li plitar apre ki i’n fini etidye.