Bann referans pour Kaye renyon Nou minister ek lavi Kretyen
3-9 ZEN
BANN TREZOR DAN PAROL BONDYE | GALAT 4-6
“‘En sinifikasyon senbolik’ ki konsern nou”
it-1-E 1018 ¶2
Agar
Dapre en sinifikasyon senbolik, Agar ti reprezant nasyon Izrael ki ti vreman pros avek Zeova atraver lalyans Lalwa ki ti ganny fer lo Montanny Sinai. Gras a sa lalyans Lalwa, “bann zanfan lesklavaz” ti vin an egzistans. Vi ki sa bann dimoun ti enparfe, sa nasyon pa ti kapab gard sa lalyans. Anba sa lalyans, bann Izraelit pa ti vin en pep lib me zot ti ganny kondannen konman bann peser ki merit lanmor, alor zot ti bann lesklav pese. (Zan 8:34; Ro 8:1-3) Dan letan zapot Pol, Zerizalenm ti parey Agar parski sa kapital ki ti reprezant nasyon Izrael ti dan lesklavaz avek son bann zanfan. Par kont, bann Kretyen swazir i bann zanfan “Zerizalenm anler,” setadir madanm senbolik Bondye. Zerizalenm anler i parey Sara, sa madanm lib, parski i pa’n zanmen dan lesklavaz. Me zis parey Izaak ti ganny persekite avek Ismael, alor bann zanfan “Zerizalenm anler,” ki’n ganny libere par sa Garson, ti ganny persekite avek bann zanfan lesklavaz. Par kont, Agar ek son garson ti ganny pouse e sa ti reprezant ler Zeova ti rezet nasyon Izrael konman en pep.—Ga 4:21-31; vwar osi Zan 8:31-40.
Rod bann perl spirityel
w09-E 1/4 13
Eski ou ti konnen?
Akoz ler Zezi ti priye, i ti adres Zeova par dir “Aba, Papa”?
Sa mo Arameen ʼab·baʼʹ i kapab vedir “sa papa” oubyen “O Papa.” Tou le trwa fwa ki sa lekspresyon i ganny servi dan Labib i dan en lapriyer e i ganny servi pour refer avek Zeova, ki nou Papa dan lesyel. Ki sa mo i vedir?
The International Standard Bible Encyclopedia i dir: “Dan letan Zezi, bann zanfan ti servi sa mo ʼabbāʼ konman en pti non gate e i ti en fason pour demontre respe pour zot papa.” I ti osi en fason pour demontre lafeksyon anver en dimoun e i ti parmi bann premye mo ki en zanfan ti aprann. Zezi ti servi sa mo ler i ti pe fer en lapriyer avek tou son leker avek son Papa. Dan zarden Zetsemane, zis detrwa erdtan avan Zezi i mor, dan son lapriyer i ti adres Zeova “Aba, Papa.”—Mark 14:36.
Sa Encyclopedia i osi dir: “Dan letan bann Grek ek Romen, bann Zwif pa ti abitye servi sa mo ʼAbbāʼ pour refer avek Bondye dan zot bann liv. Pour zot i ti en mank respe pour servi sa mo pour refer avek Bondye. Par kont, Zezi . . . ti servi sa mo dan son lapriyer pour prouve ki I vreman pros avek Bondye.” Sa de lezot fwa ki “Abba” i ganny servi par zapot Pol i montre ki dan premye syek bann Kretyen osi ti servi sa mo dan zot lapriyer.—Romen 8:15; Galat 4:6.
w10-E 1/11 15
Eski ou ti konnen?
Ki zapot Pol ti pe koz lo la ler i ti dir ki lo son lekor i annan “bann mark en lesklav Zezi”?—Galat 6:17.
▪ Sa ki Pol ti dir ti kapab vedir diferan keksoz pour bann dimoun dan premye syek. Par egzanp, en bout feray so ti ganny servi dan lepase pour met en mark lo bann prizonnyen lager, voler dan tanp ek bann lesklav. I ti en laont pour bann ki ti annan sa mark lo zot.
Par kont, pa toultan ki bann mark ti ganny vwar konman en move keksoz. Dan lepase, bann dimoun ti mark zot lekor pour fer konnen ki tribi oubyen larelizyon zot ladan. Par egzanp, Theological Dictionary of the New Testament i dir: “Ler bann Asiryen ti dedye zot lekor avek bondye Hadad ek Atargatis, zot ti fer bann mark lo zot ponnyen oubyen likou . . . En dimoun ki ti annan mark en fey ivy lo li, ti’n dedye son lavi avek bondye Dionysus.”
Bokou dimoun ozordi i dir ki Pol ti pe koz lo bann sikatris ki i ti gannyen ler i ti ganny bate dan son bann vwayaz misyonner konman en Kretyen. (2 Korentyen 11:23-27) Petet Pol ti pe esey dir ki son fason viv ki ti idantifye li konman en Kretyen me non pa bann mark fizik ki i ti annan lo son lekor.
10-16 ZEN
BANN TREZOR DAN PAROL BONDYE | EFEZYEN 1-3
“Administrasyon Zeova ek son bi”
it-2-E 837 ¶4
Sen sekre
Rwayonm dirize par Kris. Sa ki Pol ti ekri i ed nou konpran byen sa sen sekre Kris. Dan Efezyen 1:9-11 i dir ki Bondye pe fer konnen “sen sekre” son lavolonte. I dir: “Dapre sa ki fer li plezir, i’n deside pour etabli en administrasyon ler letan fikse i arive, pour rasanble tou keksoz ansanm dan Kris, bann keksoz dan lesyel e bann keksoz lo later. Wi, dan Kris tou keksoz pou ganny rasanble. Nou ini avek li e nou’n ganny swazir par Bondye pour vin bann zeritye. Sa in ganny deside davans pour nou, dapre lavolonte sa enn ki akonpli tou keksoz dapre sa ki i’n deside.” Sa “sen sekre” i enkli en gouvernman, setadir Rwayonm Bondye dirize par Kris. “Bann keksoz dan lesyel,” ki Pol ti pe koz lo la i bann ki pou vin zeritye dan Rwayonm Bondye ansanm avek Kris. “Bann keksoz lo later” i bann ki annan lespwar pour viv lo later. Zezi ti montre son bann disip ki sa sen sekre ti konsern Rwayonm ler i ti dir zot: “Sekre Rwayonm Bondye in ganny revele avek zot.”—Mr 4:11.
17-23 ZEN
BANN TREZOR DAN PAROL BONDYE | EFEZYEN 4-6
Rod bann perl spirityel
it-1-E 1128 ¶3
Sen
Lespri sen. Sa i lafors aktif oubyen lespri sen Zeova, i anba kontrol Zeova e i toultan akonpli son plan. I prop, pir, sakre e i ganny met apar pour fer bann bon travay Bondye. Alor, i ganny apele “lespri sen” ek “lespri ki sen.” (Ps 51:11; Li 11:13; Ro 1:4; Efe 1:13) Lespri sen i sa menm lafors ki azir dan en dimoun e i la pour fer sa ki sen e prop. Okenn pratik enpir ouswa move ki en dimoun i fer, i pe reziste oubyen “sagrin” lespri sen. (Efe 4:30) Menm si lespri sen pa en personnaz, ler i azir i pe reflekte personnalite Bondye ki sen, alor i kapab ganny ‘sagrinen.’ Okenn move pratik ki dimoun i fer, i tant pour “anpes lespri sen travay dan zot.” (1Te 5:19) Si en dimoun i kontinyen sa move pratik, sa i “fer soufer” lespri sen Bondye e i kapab fer ki Bondye i vin lennmi sa enn ki’n rebel. (Iza 63:10) En dimoun ki sagrin lespri sen i kapab menm koz kont lespri sen e sa i en pese ki Zezi i dir pa pou ganny pardonnen, ni konmela ni a lavenir.—Mt 12:31, 32; Mr 3:28-30; vwar SPIRIT.
it-1-E 1006 ¶2
Vorasite
I ganny demontre dan bann aksyon. Vorasite i ganny demontre dan aksyon ki en dimoun i fer kot i demontre en move dezir pour ganny plis ki neseser. Zak, en ekriven Labib, i dir nou ki ler en move dezir i vin pli for, i fer en dimoun fer pese. (Zak 1:14, 15) Alor nou kapab konn en dimoun voras par son aksyon. Zapot Pol i dir ki en dimoun voras i parey en dimoun ki ador zidol. (Efe 5:5) Sa dimoun i telman voras ki i fer sa keksoz ki i vreman anvi vin son bondye e i met li avan son servis ek ladorasyon pour Bondye.—Ro 1:24, 25.
24-30 ZEN
BANN TREZOR DAN PAROL BONDYE | FILIPYEN 1-4
Rod bann perl spirityel
it-2-E 528 ¶5
Lofrann
Lofrann diven. Lofrann diven ti ganny ofer ansanm avek laplipar lezot lofrann, espesyalman apre ki bann Izraelit ti’n etablir zot dan Later Promiz. (No 15:2, 5, 8-10) Sa lofrann diven ti ganny vide lo lotel. (No 28:7, 14; konpar Eg 30:9; No 15:10.) Zapot Pol ti ekri bann Kretyen Filip: “Mon zwaye ansanm avek zot tou, menm si mon parey en lofrann diven ki pe ganny vide lo sa sakrifis ek servis sen ki zot pe ofer akoz zot lafwa.” La i’n servi legzanp en lofrann diven pour eksprim son dezir pour fer plis pour son bann frer ek ser. (Fil 2:17) Pa bokou letan avan son lanmor Pol ti ekri Timote: “Mon deza pe ganny ofer konman en lofrann diven e mon pros pour ale.”—2Ti 4:6.