Ki mannyer ou kapab vin pli pros avek Bondye?

1. Eski Bondye i ekout tou lapriyer?

Bondye i envit dimoun sorti dan tou nasyon pour vin pli pros avek li atraver lapriyer. (Psonm 65:2) Pourtan, i pa ekout oubyen reponn tou lapriyer. Par egzanp, Bondye i kapab pa ekout lapriyer en zonm ki maltret son madanm. (1 Pyer 3:7) Bondye pa ti ekout lapriyer bann Izraelit akoz zot ti kontinyelman fer sa ki mal. I kler ki lapriyer i en privilez. Par kont, Bondye pou ekout lapriyer menm bann ki fer bann pese grav si zot repantir.​—Lir Izai 1:15; 55:7.

Get sa video Eski Bondye i ekout tou lapriyer?

2. Ki mannyer nou devret priye?

Lapriyer i form parti nou ladorasyon. Pour sa rezon, nou devret priy zis avek Zeova nou Kreater. (Matye 4:10; 6:9) Deplis, vi ki nou enparfe nou devret priy Bondye o non Zezi akoz i ti mor pour nou bann pese. (Zan 14:6) Zeova pa oule ki nou repet bann lapriyer ki nou’n aprann parker ouswa ki’n ganny ekrir lo papye. I anvi ki nou dir li bann keksoz ki sorti dan nou leker.​—Lir Matye 6:7; Filipyen 4:6, 7.

Nou Kreater i menm kapab ekout bann lapriyer ki nou fer an silans. (1 Samyel 1:12, 13) I envit nou pour priy li nenport ki ler, ki swa o konmansman ouswa a lafen en lazournen, kan nou manze ouswa kan nou fer fas avek problenm.​—Lir Psonm 55:22; Matye 15:36.

3. Akoz bann Kretyen i zwenn ansanm?

I pa fasil pour vin pros avek Bondye akoz nou pe viv parmi bann dimoun ki napa lafwa dan Bondye e ki pa krwar dan promes Bondye pour anmenn lape lo later. (2 Timote 3:1, 4; 2 Pyer 3:3, 13) Se pour sa ki nou bezwen lankourazman lezot ki annan menm krwayans ki nou e zot osi zot bezwen nou.​—Lir Ebre 10:24, 25.

Ler nou asosye avek bann dimoun ki kontan Bondye, sa i ed nou pour vin pros avek Li. Bann renyon ki Temwen Zeova i organize i en bon loportinite kot nou kapab batir lafwa kanmarad.​—Lir Romen 1:11, 12.

4. Ki mannyer ou kapab vin pros avek Bondye?

Ou kapab vin pros avek Zeova kan ou reflesir o profon lo sa ki ou’n aprann dan son Parol. Pran letan pour reflesir lo bann aksyon, konsey ek promes Bondye. Meditasyon ek lapriyer i fer nou annan plis lapresyasyon pour lanmour ek lasazes Bondye.​—Lir Zozye 1:8; Psonm 1:1-3.

Ou pou vin pros avek Bondye si ou annan konfyans ek lafwa dan li. Me lafwa i parey en keksoz vivan ki toultan bezwen ganny nouri. Ou devret kontinyelman nouri ou lafwa par reflesir lo bann rezon akoz ou krwar dan en serten keksoz.​—Lir Matye 4:4; Ebre 11:1, 6.

5. Ki byenfe ou pou gannyen si ou vin pli pros avek Bondye?

Zeova i pran swen avek bann ki kontan li. I kapab protez zot kont okenn keksoz ki ti kapab met an danze zot lafwa ek lespwar pour viv pour touzour. (Psonm 91:1, 2, 7-10) I averti nou konsernan bann keksoz ki ti kapab menas nou lasante ek boner. Zeova i ansenny nou sa pli bon fason viv.​—Lir Psonm 73:27, 28; Zak 4:4, 8.