Bann referans pour Kaye renyon Nou minister ek lavi Kretyen

1-7 ZILYET

BANN TREZOR DAN PAROL BONDYE | KOLOSYEN 1-4

Rod bann perl spirityel

it-2-E 169 ¶3-5

Rwayonm Bondye

“Rwayonm son Garson ki i kontan.” Zour Lapannkot lannen 33, dis zour apre ki Zezi ti’n mont dan lesyel, son bann disip ti ganny laprev ki Zezi ti “dan kote drwat Bondye” ler i ti vers lespri sen lo zot. (Akt 1:8, 9; 2:1-4, 29-33) Alor, sa “nouvo lalyans” ti konmans pran lefe lo zot e zot ti vin sa premye pti group pour form parti sa “nasyon sen,” Izrael spirityel.​—Ebr 12:22-24; 1Pyr 2:9, 10; Ga 6:16.

Aprezan, Kris ti pe asize dan kote drwat son Papa e i ti vin Sef sa kongregasyon. (Efe 5:23; Ebre 1:3; Fil 2:9-11) Labib i montre ki apartir Lapannkot lannen 33, en rwayonm spirityel ti ganny etablir pour diriz lo son bann disip. Ler zapot Pol ti pe ekri bann Kretyen Kolos dan premye syek, i ti pe deza dir ki Zezi Kri i annan en rwayonm: “[Bondye in] tir nou dan fernwanr e transfer nou dan rwayonm son Garson ki i kontan.”​—Kol 1:13; konpar Akt 17:6, 7.

Apartir Lapannkot lannen 33, sa rwayonm Kris ti en rwayonm spirityel ki ti pe diriz lo Izrael spirityel setadir lo bann Kretyen ki’n ganny swazir par lespri sen Bondye pour vin bann zanfan spirityel Bondye. (Zan 3:3, 5, 6) Ler sa bann Kretyen ki’n ganny swazir par lespri sen i ganny zot rekonpans dan lesyel, zot pou nepli bann sitwayen lo later ki anba rwayonm Zezi me zot pou vin bann lerwa ansanm avek Kris dan lesyel.​—Re 5:9, 10.

8-14 ZILYET

BANN TREZOR DAN PAROL BONDYE | 1 TESALONISYEN 1-5

Rod bann perl spirityel

it-1-E 863-864

Imoralite seksyel

Imoralite seksyel i en lofans ki kapab fer en dimoun ganny ekskli dan kongregasyon Kretyen. (1Ko 5:9-13; Ebr 12:15, 16) Zapot Pol ti pe eksplike ki en Kretyen ki’n komet imoralite seksyel i fer pese kont son prop lekor par servi son lorgann seksyel pour fer bann aksyon ki pa apropriye. Sa i annan en move lefe lo son spirityalite, i sali kongregasyon Bondye e i annan risk ki i ganny bann maladi ki transmet par sèks. (1Ko 6:18, 19) I pa respekte drwa ki son bann frer Kretyen i annan (1Te 4:3-7) par (1) sali e gat repitasyon kongregasyon (Ebr 12:15, 16), (2) anpes sa dimoun ki’n komet imoralite seksyel avek reste pir moralman e si sa dimoun i selibater i pran son drwa pour marye konman en vyerz, (3) priv son fanmir pour annan en bon repitasyon moralman e i osi (4) bles paran, msye ouswa fiyanse sa dimoun ki’n komet imoralite seksyel avek. I pa zis rezet bann lalwa zonm ki petet i kondann imoralite seksyel me i rezet Bondye ki pou pini li pour son pese.​—1Te 4:8.

15-21 ZILYET

BANN TREZOR DAN PAROL BONDYE | 2 TESALONISYEN 1-3

“Sa enn ki pe kas lalwa pou ganny revele”

it-1-E 972-973

Devosyon pour Bondye

I annan en lot mister, ki opoz konpletman “sen sekre” Zeova. Sa i “sa zonm ki pe kas lalwa.” Sa ti en mister pour bann vre Kretyen parski dan letan zapot Pol, lidantite “sa enn ki pe kas lalwa” pa ti ankor byen ganny revele e idantifye. Menm apre ki sa “enn” ti pou konmans ganny remarke, son lidantite ti pou kontinyen reste en mister pour laplipar dimoun parski i ti pou kasyet son bann move aksyon deryer en laparans ki montre li konmsi i annan devosyon pour Bondye. Anfet, sa ti pou vedir en rebelyon kont vre devosyon pour Bondye. Pol ti dir ki “sa zonm ki pe kas lalwa” ti deza aktif dan son letan, parski dan kongregasyon sa letan, “sa zonm” ti deza konmans en move lenfliyans ki pli tar ti pou vin lapostazi. Finalman, Zezi Kri pou met en lafen avek sa zonm pandan son prezans. Sa “zonm” rebel ki ganny kontrole par Satan pou met son lekor par “lao tou bann swadizan bondye oubyen sa ki dimoun i adore” (Gr., seʹba·sma). Alor, vi ki sa “zonm” rebel i ganny kontrole par Satan, i pou fer tou pour anbet lezot e i pou fer tou bann ki swiv son bann move pratik ganny detrir. Bann move aksyon “sa enn ki pe kas lalwa” i ganny fer sitan byen ki dimoun pa pou remarke ki i pe fer krwar i annan devosyon pour Bondye.​—2Te 2:3-12; konpar Mt 7:15, 21-23.

it-2-E 245 ¶7

Mansonz

Zeova i permet dimoun ki prefer mansonz “anbet zot prop lekor pour ki zot in arive krwar dan sa mansonz” olye dan sa bon nouvel konsernan Zezi Kri. (2Te 2:9-12) Sanmenm sa ki ti arive avek Lerwa Aab plizyer syek pase. Bann profet ki ti koz mansonz ti dir Aab ki i ti pou ranport laviktwar dan lager kont Ramot-Gilead tandis ki Mika, profet Zeova, ti profetize ki Zeova ti pou anvoy maler lo li. Dan en vizyon ki Mika ti gannyen, Zeova ti permet “en lespri” tronper fer bann profet Aab koz manti. Andotmo, sa lespri ti servi son pouvwar lo sa bann profet pour ki zot pa dir laverite me plito ki zot dir sa ki zot menm zot anvi dir, setadir sa ki Aab ti anvi tande. Menm si Aab ti’n ganny averti, i ti prefere les li ganny anbete avek zot bann mansonz e i ti finalman perdi son lavi.​—1Rw 22:1-38; 2Kr 18.

Rod bann perl spirityel

it-1-E 834 ¶5

Dife

Pyer ti ekri ki “lesyel ek later ki egziste konmela in ganny anmase ziska zour zizman, pour ganny detrir par dife.” Dapre sa konteks e avek led lezot verse, nou konpran ki sa pa en dife literal me i vedir destriksyon eternel. Zis parey Deliz ki ti arive dan letan Noe pa ti detri lesyel ek later me zis bann dimoun ki pa ti ador Bondye, alor Zezi Kris avek son bann lanz pwisan, dan en laflanm dife pou detri bann ki pa ador Bondye e ki form parti sa move lemonn.​—2Pyr 3:5-7, 10-13; 2Te 1:6-10; konpar Iza 66:15, 16, 22, 24.

it-1-E 1206 ¶4

Lenspirasyon

“Parol enspire”​—Sa ki vre ek sa ki fo. Sa mo Grek pneuʹma (lespri) i ganny servi dan en konteks spesifik dan serten liv ki bann zapot in ekri. Par egzanp, dan 2 Tesalonisyen 2:2, zapot Pol ti ankouraz son bann frer Tesalonik pour pa eksite oubyen pa les personn konfiz zot e “fer zot per avek swa en parol enspire [literalman lespri], swa en mesaz ki dimoun i dir zot ouswa avek en let ki paret i sorti kot nou konmkwa zour Zeova i la.” I kler ki Pol ti servi sa mo pneuʹma (lespri) pour refer avek diferan fason kominike tel parey “mesaz ki dimoun i dir” oubyen “let.” Pour sa rezon, Lange’s Commentary on the Holy Scriptures (p. 126) i dir sa lo sa verse: “Sa zapot pe koz lo en swadizan konsey oubyen prediksyon ouswa sa ki aparaman en profet in dir.” (Translated and edited by P. Schaff, 1957) Vincent’s Word Studies in the New Testament i dir: “Bann profet dan kongregasyon Kretyen ti pe dir ki zot bann prediksyon oubyen revelasyon i sorti kot en lespri.” (Vol. IV, p. 63) Se pour sa rezon ki menm si serten tradiksyon Labib i tradwi sa mo pneuʹma konman “lespri,” serten lezot tradiksyon Labib i tradwir li konman “mesaz sorti kot Lespri sen,” “prediksyon,” “lenspirasyon” oubyen “parol enspire.”

22-28 ZILYET

BANN TREZOR DAN PAROL BONDYE | 1 TIMOTE 1-3

“Fer zefor pour kalifye pour fer en bon travay”

km 9/78 4 ¶7

Bann ki “annan en bon repitasyon”

⁷ I fasil konpran akoz Pol ti dir ki sa bann zonm ti “annan en bon repitasyon.” Sa pa en promosyon ki en dimoun i gannyen dan legliz parey serten i dir. O kontrer en serviter kongregasyon ki “annan en bon repitasyon” i kapab asire ki zot pou ganny benediksyon Zeova ek Zezi e zot annan sipor ek respe dan kongregasyon. Zot kapab “koz avek bokou lardyes lo lafwa dan Kris Zezi.” Zot fidel dan zot servis, zot ganny apresye pour sa ki zot pe fer, zot annan en lafwa for e zot pa kanmi pour defann zot lafwa ni per sa ki lezot dimoun pou dir.

Rod bann perl spirityel

it-1-E 914-915

Zenealozi

I pa ti fer sans pour etidye e diskit lo bann zanset sirtou sa letan ler Pol ti ekri Timote. I ti nepli enportan pour fer resers dan bann dokiman lo bann zanset pour konn ou zanset vi ki Bondye ti nepli fer okenn diferans ant Zwif ek dimoun sorti dan lezot nasyon dan kongregasyon Kretyen. (Ga 3:28) Sa bann dokiman lo bann zanset ti’n fini montre ki Kris ti sorti dan desandans David. Zis apre ki Pol ti ekri sa lavertisman, Zerizalenm ti pou ganny detri ek tou sa bann dokiman ki ti donn lalis sa bann zanset. Bondye pa ti prezerv sa bann dokiman. Pol ti enkyet ki Timote ek bann frer ek ser dan kongregasyon ti pou ganny distrer par pas en ta letan pour fer resers lo bann zanset ki pa ti neseser pour lafwa bann Kretyen. Sa ki Labib i dir lo bann zanset Zezi i ase pour prouve ki Zezi i Mesi e sa i sa keksoz pli enportan pour bann Kretyen. Lezot lalis zanset ki annan dan Labib i prouve ki Labib i egzakt e ki sa bann diferan resi dan Labib i vre.

29 ZILYET–4 OUT

BANN TREZOR DAN PAROL BONDYE | 1 TIMOTE 4-6

“Devosyon pour Bondye oubyen larises”

w03-E 1/6 9 ¶1-2

Aprann kontant nou avek sa ki nou annan

En keksoz vreman enportan ki ti fer Pol ere e satisfe i parski i ti kontant li avek sa ki i ti annan. Me, ki savedir kontant nou avek sa ki nou annan? I senpleman vedir satisfe avek sa ki nou annan. Pol ti koz avek son konpanyon Timote lo la dan son minister ler i ti dir: “Anfet, devosyon pour Bondye i annan bokou lavantaz si nou kontant nou avek sa ki nou annan. Parski nou pa’n vin avek nanryen dan sa lemonn e nou pa kapab al avek nanryen osi. Alor, si nou annan manze ek lenz, nou pou kontant nou avek sa bann keksoz.”​—1 Timote 6:6-8.

Remarke ki Pol ti asosye sa lekspresyon kontant nou avek sa ki nou annan avek devosyon pour Bondye. I ti rekonnet ki vre lazwa i vin ler nou annan devosyon pour Bondye setadir met keksoz spirityel premye me non pa keksoz materyel. Otan ki Pol ti “annan manze ek lenz” sa ti ase pour li kontinyen annan devosyon pour Bondye. Alor, pour Pol kapab kontant li avek sa ki i ti annan, i ti bezwen depan lo Zeova dan nenport sityasyon.

g-E 6/07 6 ¶2

Ki danze i annan ler ou anvi vin ris?

I vre ki laplipar dimoun pa mor akoz zot tay deryer larises. Me zot telman okipe pe rod larzan ki zot pa pran kont zot lavi personnel. Zot lavi i kapab vin difisil akoz stres, problenm ekonomik ki kapab fer ganny panic attacks, pa dormi, latet fermal oubyen ilser (setadir boubou dan lestoman e lo ou lekor). Tou sa bann problenm lasante i anpes ou viv lontan. Menm si en dimoun i esey aret tay deryer larises i kapab tro tar. Son konzwen i kapab nepli anvi met konfyans dan li, son lasante i kapab ganny afekte e son zanfan i kapab fristre emosyonnelman. Petet serten domaz i kapab ganny repare me i demann bokou travay. Sa bann dimoun in “sibir en kantite douler.”​—1 Timote 6:10.

g-E 11/08 6 ¶4-6

Sis keksoz ki pou fer en dimoun reisi dan lavi

Bann dimoun ki tay deryer keksoz materyel pour ki zot reisi dan lavi i dan en rev. An plis ki ganny dezapwentman, zot osi ganny bokou problenm. Par egzanp, ler dimoun i tay deryer larzan, souvan zot sakrifye zot relasyon ki zot annan avek zot fanmir ek zanmi. Lezot pa dormi akoz travay oubyen lenkyetid. “Sonmey en labourer i profon, menm si i ganny zis en pti pe manze oubyen bokou pour manze; me en zonm ris pa dormi akoz i posed tro bokou.”​—Eklezyast 5:12.

Larzan pa zis en met ki kriyel me i osi en anbeter. Zezi ti koz lo ‘pouvwar larises ki anbet’ dimoun. (Mark 4:19) Andotmo larises i promet en lavi ere, me i pa vreman leka. I zis fer ou anvi plis larzan. Eklezyast 5:10 i dir: “Sa enn ki kontan larises pa zanmen satisfe avek sa ki i annan.”

Dan en fason senp, lanmour larzan i kapab detri ou e fer ou dezapwente, fristre e menm fer krim. (Proverb 28:20) Sa ki fer en dimoun ere e reisi i ler i pir moralman, annan en bon spirityalite, pare pour partaze, pardonnen e annan lanmour.

Rod bann perl spirityel

it-2-E 714 ¶1-2

Lir an piblik

Dan kongregasyon Kretyen. Dan premye syek, pa bokou dimoun ki ti annan kopi bann roulo Labib, sanmenm sa ti annan bann lektir Labib an piblik. Zapot Pol ti ankouraz zot pour lir son let an piblik dan bann renyon e i ti fer laranzman pour ki sa bann let i ganny lir dan lezot kongregasyon. (Kol 4:16; 1Te 5:27) Pol ti konsey Timote ki ti en zenn sirveyan sa letan pour “lir an piblik, donn konsey e ansennyen.”​—1Ti 4:13.

En dimoun ki lir an piblik i devret lir byen. (Ab 2:2) Vi ki lektir Labib an piblik i ganny fer pour edik lezot, en dimoun ki pe fer sa lektir i bezwen konpran byen sa ki i pe lir e konpran byen nide ki sa ekriven pe donnen. I bezwen veye ki ler i pe lir i pa donn en move lenpresyon oubyen donn en lot nide. Dapre Revelasyon 1:3, bann ki lir sa profesi aotvwa ek bann ki tann sa bann parol e obei, zot pou ere.