Zozef ti avan dernyen parmi bann garson Zakob. Son bann gran frer ti remarke ki zot papa ti pli kontan li. Ki mannyer ou krwar zot ti santi? Zot ti zalou Zozef e zot ti ay li. Ler Zozef ti ganny bann rev en pe drol, i ti rakont son bann frer sa bann rev. Zot ti krwar ki sa bann rev ti montre ki en zour, zot ti pou tonm azenou devan Zozef. Alor, zot ti ay li plis ankor!

En zour, bann frer Zozef ti pe vey bann mouton o bor lavil Sekenm. Zakob ti anvoy Zozef pour gete ki mannyer zot ete. Zot ti vwar Zozef pe vini dan lwen, alor zot ti dir antre zot: ‘La sa enn ki zis reve i vini. Annou touy li.’ Zot ti tyonbo li e zet li dan en gran trou. Me Zida, enn son frer ti dir: ‘Pa bezwen touy li! Annou plito vann li konman en lesklav.’ Alor, zot ti vann Zozef avek bann marsan Madyannit pour 20 pyes larzan. Sa bann marsan ti pe al Lezip.

Apre sa, bann frer Zozef ti pran son lenz e tranp li dan disan en kabri. Apre, zot ti al montre zot papa sa lenz e dir li: ‘Sa pa lenz ou garson?’ Zakob ti krwar ki en bebet feros ti’n touy Zozef. I ti sitan tris ki personn pa ti kapab konsol li.

Laba Lezip, Zozef ti ganny vann konman en lesklav avek en zofisye enportan ki apel Potifar. Me Zeova ti avek Zozef. Potifar ti remarke ki Zozef ti travay byen e i ti kapab annan konfyans dan li. Alor, i ti met Zozef ansarz tou sa ki i ti annan.

Madanm Potifar ti remarke ki Zozef ti en zoli garson byen kosto. Alor, toulezour i ti demann Zozef pour dormi avek li. Ki Zozef ti fer? I ti refiz e dir: ‘Non! Sa i mal. Mon met i annan konfyans dan mwan e ou son madanm. Si mon dormi avek ou, mon pou fer pese kont Bondye!’

En zour, madanm Potifar ti esey fors Zozef pour dormi avek li. I ti graponn son lenz, me Zozef ti taye. Ler Potifar ti retourn kot lakour, madanm Potifar ti koz manti e dir ki Zozef ti’n esey fors li pour dormi avek li. Potifar ti vreman ankoler e i ti met Zozef dan prizon. Me Zeova pa ti oubliy Zozef.

Ler Zozef ti dan prizon, Faraon, lerwa Lezip ti ganny bann rev ki personn pa ti kapab eksplike. Enn son serviter ti dir Faraon ki Zozef ti pou kapab eksplik son bann rev. Deswit Faraon ti demann zot pour anmenn Zozef kot li.

Faraon ti demann li: ‘Eski ou kapab eksplik mon bann rev?’ Zozef ti dir Faraon: ‘Lezip pou ganny en kantite manze pour set an, apre sa, i pou napa manze pour set an. Swazir en dimoun ki malen e fer li anmas manze pour ki bann dimoun pa mor lafen.’ Faraon ti dir: ‘Mon swazir ou! Ou pou vin sa dezyenm dimoun pli enportan Lezip.’ Ki mannyer Zozef ti kapab eksplik Faraon son bann rev? Zeova ki ti ed Zozef.

Alor pandan set an, Zozef ti anmas en kantite manze dan bann stor. Apre sa, i ti annan en lafanmin pour set an partou lo later, zis parey Zozef ti’n dir. Dimoun ti sorti partou kote pour vin aste manze avek Zozef. Son papa, Zakob, ti tande ki i ti annan manze Lezip, alor i ti anvoy dis son garson pour al aste en pe.

Bann garson Zakob ti al kot Zozef. Deswit Zozef ti rekonnet son bann frer, me zot, zot pa ti rekonnet Zozef. Zot ti tonm azenou devan li, zis parey i ti’n reve ler i ti pli zenn. Zozef ti anvi konnen si son bann frer ti ankor pa bon. Alor i ti dir zot: ‘Zot bann espyon. Zot in vin gete ki mannyer pour atak nou pei.’ Zot ti dir: ‘Non, nou pa bann espyon! Nou tou nou frer, nou sorti Kanaan. I ti annan douz nou. Enn nou frer in mor e sa enn pli zenn i avek son papa.’ Apre Zozef ti dir: ‘Anmenn zot pti frer kot mwan koumsa mon pou krwar sa ki zot pe dir.’ Alor zot ti retourn kot zot papa.

Ler zot stok manze ti fini, Zakob ti anvoy son bann garson Lezip ankor. Safwasi, zot ti al avek zot pti frer, Benzamen. Pour teste son bann frer, Zozef ti kasyet son lakoup dan sak manze Benzamen e apre i ti dir ki son bann frer ti’n vol son lakoup. Ler bann serviter Zozef ti trouv lakoup dan sak Benzamen, son bann frer pa ti oule krwar. Zot ti sipliy Zozef pour pini zot dan plas Benzamen.

Zozef ti vwar ki son bann frer ti’n sanze. Zozef ti nepli kapab tenir. I ti konmans plere e dir: ‘Mwan menm zot frer Zozef. Eski mon papa i ankor vivan?’ Son bann frer ti vreman sirprann. I ti dir zot: ‘Pa bezwen per akoz sa ki zot in fer mwan. Bondye ti anvoy mwan isi pour sov zot lavi. Aprezan depese e anmenn mon papa isi.’

Zot ti retourn kot zot papa e rakont li sa bon nouvel. Alor, zot ti anmenn Zakob Lezip. Apre tou sa letan, Zozef ek son papa ti finalman rezwenn.