Eski i en bon nide pour fer plizyer keksoz an menm tan?

• Eski ou annan abilite pour fer plizyer keksoz an menm tan?

• Fo konsep lo fer plizyer keksoz an menm tan

• En pli bon metod

• Ki lezot zenn i dir?

Eski ou annan abilite pour fer plizyer keksoz an menm tan?

Eski ou konnen ki mannyer pou fer plizyer keksoz an menm tan? Bokou dimoun i krwar ki bann ki pe grandi dan lemonn teknolozi i pli byen kapab fer plizyer keksoz an menm tan konpare avek bann ki pli aze e ki bezwen adapte avek teknolozi. Me eski sa i vre?

VRE ou FO?

• Ler ou fer plizyer keksoz an menm tan ou kapab fini pli vitman.

• Si ou kontinyen practice, ou pou kapab amelyor ou abilite pou fer plizyer keksoz an menm tan.

• Bann zenn i pli byen kapab fer plizyer keksoz an menm tan ki bann aze.

Si ou larepons i “vre” pour okenn sa bann pwen, i posib ki ou’n ganny anbete avek sa fo konsep ki ou kapab fer plizyer keksoz an menm tan.

Fo konsep lo fer plizyer keksoz an menm tan

Eski ou krwar ou kapab fer de keksoz an menm tan? Petet ou kapab fer de keksoz an menm tan si zot pa demann bokou konsantrasyon. Par egzanp, si ou ekout lanmizik anmezir ou netway ou lasanm, i tre probab ki ou lasanm pou prop.

Me ler ou esey fer de keksoz ki demann konsantrasyon, i tre probab ki ou pa pou arive fer zot byen. Petet, i pour sa rezon ki en zenn madanm ki apel Kathrine i dir: “Ler ou fer plizyer keksoz an menm tan i konmsi ou pe esey fer plizyer keksoz mal an menm tan.”

“Mon ti pe koz avek en dimoun ler mon ti ganny en mesaz lo mon telefonn. Mon ti bezwen reponn sa mesaz alor mon ti esey tèks anmezir ki mon pe koze. Mon ti preski pa tann nanryen ki sa dimoun ti pe dir mwan e preski tou mo dan sa tèks ti mal.”​—Caleb.

Sherry Turkle, en eksper dan teknolozi, i ekri: “Nou kapab krwar nou pe fer plizyer keksoz an menm tan me an realite nou donn mwens latansyon sak nouvo keksoz ki nou azoute. Ler nou fer plizyer keksoz an menm tan, sa i donn nou plis lenerzi. Alor nou krwar ki nou pe fer plis kan an realite nou pe fer pli mal.”a

“Parfwa mon krwar mon kapab tèks en dimoun anmezir ki mon pe koz avek en lot dimoun ziska ler mon realize ki mon’n tèks sa ki mon ti pour dir e mon’n dir sa ki mon ti pour tèks!”​—Tamara.

Dimoun ki esey fer plizyer keksoz an menm tan, i fer keksoz pli difisil pour zot. Par egzanp, i pran zot plis letan pour fini fer zot homework. Oubyen zot bezwen pran ankor plis letan pour fer en travay ki zot ti krwar zot in fini fer. Dan tou le de ka, sa bann dimoun i perdi letan ki zot ti kapab servi pour fer keksoz ki zot kontan!

I pour bon rezon ki Thomas Kersting, en psychotherapist e counselor kot lekol i dir: “Si ou konpar laservel avek bann kabinet ki met bann fayl dan en fason organize, laservel bann dimoun ki kontan fer plizyer keksoz an menm tan i an dezord.”b

“Ler ou esey fer plizyer keksoz an menm tan, ou mank bann detay enportan. Sa i fer ki ou pour travay plis e pran plis letan. Ou ti krwar ou ti pou fini pli vit me ou’n perdi letan.”​—Teresa.

En pli bon metod

• Antrenn ou lekor pour konsantre lo zis en keksoz. I kapab difisil pour fer sa, si ou annan labitid fer plizyer keksoz an menm tan, par egzanp si ou tèks ou zanmi ler ou pe fer homework. Me Labib i dir nou “verifye sa ki pli enportan.” (Filipyen 1:10) Pa tou keksoz ki nou fer ki annan menm lenportans. Alor deside sa ki pli enportan e konsantre lo la ziska ki ou fini.

  “Zis parey parfwa, nou bezwen dir en pti zanfan non, menm si i paret pli fasil pour donn li sa ki i oule, nou bezwen fer parey avek en lespri ki pa kapab konsantre.”​—Maria.

• Retir okenn keksoz ki kapab distrer ou. Eski ou annan labitid get lo ou telefonn ler ou pe etidye? Met li dan en lot landrwa. Tenny televizyon e pa ni menm mazin rezo sosyal. Labib i dir: “Servi byen zot letan.”​—Kolosyen 4:5.

  “Mon’n remarke ki mon fer pli byen ler mon konsantre lo zis en keksoz a la fwa. Mon santi mwan zwaye ler mon tir sa keksoz lo mon lalis e mon kapab travay lo en lot. Mon vreman satisfe.”​—Onya.

• Donn lezot tou ou latansyon ler ou koz avek zot. Si ou pe get ou telefonn ler ou pe koz avek en dimoun, ou pe mank sa dimoun respe e sa i kapab annan en move lefe lo zot konversasyon. Labib i dir nou tret lezot parey nou anvi lezot i tret nou.​—Matye 7:12.

  “Parfwa ler mon pe koz avek mon ser, i pe tèks en lot dimoun ouswa i pe fer en lot keksoz lo son telefonn. Sa i fer mwan vreman ankoler! Me pour dir laverite, i annan de fwa, mon fer menm parey!”​—David.