En bi dan lavi

IMEN I DIFERAN AVEK ZANNIMO. NOU KAPAB EKRI, PENN, ENVANTE E REFLESIR LO BANN KESTYON PLI ENPORTAN DAN LAVI tel parey: Akoz liniver i egziste? Akoz nou lo later? Ki bi lavi? Ki pou arive dan lavenir?

Serten dimoun pa demann sa bann kestyon akoz zot krwar i tro difisil pour konn larepons. Lezot i dir ki i pa vo lapenn konn larepons akoz lavi in vin par evolisyon. William Provine, en profeser listwar ek biolozi ti dir: “Napa okenn bondye e lavi napa okenn bi. . . . I pa fer sans pour annan bann valer moral e lavi napa en sans.”

Serten dimoun i vwar sa nide pa akseptab. Zot vwar en liniver byen organize ki ganny kontrole avek bann lalwa spesifik dan lanatir. Zot enpresyonnen avek ki mannyer lanatir i ete. Imen in menm kopye serten keksoz dan lanatir pour envant lezot keksoz ki nou servi. Bann keksoz ki nou eksperyanse toulezour ki sitan konplike i montre ki i bezwen annan en Kreater entelizan.

Sa rezonnman in fer serten ki krwar dan evolisyon analiz zot pwennvi lo sa size. Annou vwar de legzanp:

DOKTER ALEXEI MARNOV KI EN NEUROSURGEON. Sa dokter ti dir: “Bann lekol kot mon ti etidye ti ansenny evolisyon e ki Bondye pa egziste. Tou dimoun ki ti krwar dan Bondye ti ganny dir ki zot bet.” An 1990, i ti konmans sanz son nide.

I ti dir: “Mon’n touzour anvi konpran ki mannyer keksoz i fonksyonnen enkli laservel imen. Serten dimoun i dir ki laservel imen i lorgann pli konplike dan liniver. Me eski nou laservel in ganny kree zis pour ganny konnesans ek abilite e apre mor? Sa i pa rezonnab e i pa fer sans. Alor, mon ti konmans demann mon lekor: ‘Akoz nou lo later? Ki bi lavi?’ Apre en bon refleksyon, mon ti realize ki i bezwen annan en Kreater.”

Sa lanvi pour konnen ki bi lavi ti fer Alexei etidye Labib. Pli tar, son madanm ki li osi i en dokter e ki pa ti krwar dan Bondye, ti konmans etidye Labib zis pour montre son msye ki napa en Bondye. Aprezan, tou le de i asire ki Bondye i egziste e zot konpran son plan pour limanite parey i montre dan Labib.

DOKTER HUABI YIN KI EN SYANTIS KI’N ETIDYE PLASMA. Dokter Huabi Yin ti etidye physics e pour plizyer lannen i ti fer resers lo soley (plasma).

Huabi i dir: “Konman bann syantis, ler nou etidye bann keksoz dan lanatir, nou touzour vwar en bon lord e sa i fer ki i annan bann lalwa ki egzakt. Mon ti demann mon lekor: ‘Kote sa bann lalwa i sorti? Si en senp dife ki nou servi pour kwi manze i bezwen byen ganny kontrole alor lekel ki responsab pour sa bann lalwa ki kontrol soley?’ Avek letan, mon ti vwar ki sa premye verse dan Labib i sa pli bon larepons: ‘O konmansman, Bondye ti kree lesyel ek later.’”​—Zenez 1:1.

I vre ki lasyans in donn bokou leklersisman lo bann kestyon parey: Ki mannyer bann selil dan laservel imen i fonksyonnen? Ki mannyer soley i prodwir lasaler ek lalimyer? Me parey Alexei ek Huabi in dekouver, Labib i reponn bann kestyon enportan parey: Akoz liniver i egziste? Akoz i bezwen ganny kontrole avek en kantite lalwa? Akoz nou lo later?

Labib i dir sa konsernan later: “[Bondye] pa’n kree li pour reste vid; me, i’n form li pour ki i ganny abite.” (Izai 45:18) Bondye i annan en plan pour later e parey sa lot lartik pou montre, plan Bondye pour later i relye avek nou lespwar pour lavenir.