Lezot lenformasyon
1. Lekel Gran Babilonn?
Ki mannyer nou konnen ki “Gran Babilonn” i reprezant tou bann fo larelizyon? (Revelasyon 17:5) Reflesir lo sa bann pwen:
I aktif partou dan lemonn. Labib i dir ki Gran Babilonn i asiz lo bann “lafoul [ek] nasyon.” I “domin bann lerwa lo later.”—Revelasyon 17:15, 18.
I pa en lorganizasyon politik oubyen komersyal. “Bann lerwa lo later” ek “bann marsan” pa pou ganny detrir ansanm avek li.—Revelasyon 18:9, 15.
I mal reprezant Bondye. I ganny apele en prostitye parski i fer lalyans avek bann gouvernman pour ganny larzan ek lezot faver. (Revelasyon 17:1, 2) I anbet dimoun sorti dan tou nasyon. I osi responsab pour lanmor en kantite dimoun.—Revelasyon 18:23, 24.
2. Kan Mesi ti pou vini?
Labib ti predir ki Mesi ti pou vini a lafen en peryod letan 69 semenn.—Lir Danyel 9:25.
Kan ki sa 69 semenn ti konmanse? Lannen 455 avan Kris. Sa letan, Gouverner Neemya ti al Zerizalenm pour “retabli e rebatir” sa lavil.—Danyel 9:25; Neemya 2:1, 5-8.
Ki kantite letan sa 69 semenn ti dire? Dan serten profesi Labib, en zour i reprezant en lannen. (Nonm 14:34; Ezekyel 4:6) Alor, sak semenn i reprezant set lannen. Dan sa profesi, 69 semenn i ariv 483 lannen (69 semenn fwa 7 zour).
Kan ki sa 69 semenn ti fini? Si nou kont 483 lannen depi 455 avan Kris, nou ariv lannen 29.a Sa i sa menm lannen ki Zezi ti batize e vin Mesi!—Lik 3:1, 2, 21, 22.
3. Prosedir medikal ki enplik disan
I annan serten prosedir medikal ki enplik servi disan sa pasyan. Serten sa bann prosedir i enplik donn nou prop disan oubyen anmas nou prop disan avan loperasyon. Me en Kretyen pa kapab fer sa.—Deterononm 15:23.
Par kont, i annan lezot prosedir medikal ki en Kretyen i kapab aksepte. Par egzanp tes disan, dyaliz, hemodilution, cell salvage oubyen servi en heart-lung bypass machine. Sak Kretyen i bezwen deside ki mannyer son disan pou ganny servi pandan en loperasyon, en tes medikal oubyen dan serten tretman medikal. Sak dokter i fer sa bann prosedir dan diferan fason. Alor, avan aksepte pour fer okenn loperasyon, tes medikal oubyen lezot tretman, en Kretyen i bezwen konn egzakteman ki mannyer son prop disan pou ganny servi. Reflesir lo sa bann kestyon:
Si mon disan i ganny tire e i nepli sirkile dan mon lekor, eski mon konsyans pou permet mwan pour remet sa disan dan mon lekor e mon pa bezwen “vid li ater”?—Deterononm 12:23, 24.
Si pandan en prosedir medikal, bann dokter i tir en pe mon disan, fer serten prosedir avek sa disan e remet li dan oubyen lo mon lekor, eski sa pou fatig mon konsyans oubyen eski mon pou aksepte?
4. Separasyon dan maryaz
Dapre Labib, i pa akseptab pour en koup separe e i fer li byen kler ki si en koup i separe, zot napa drwa remarye. (1 Korentyen 7:10, 11) Par kont, i annan serten sityasyon kot bann Kretyen in deside pour separe.
En konzwen i volonterman pa pran swen avek son fanmir: En msye i volonterman refize pour pran swen avek son fanmir lo plan materyel. Sityasyon i sitan grav, ki sa fanmir napa ni larzan ni manze.—1 Timote 5:8.
Labi fizik grav: Labi fizik ki sitan grav ki en dimoun i santi ki son lasante oubyen son lavi i an danze.—Galat 5:19-21.
Sa konzwen i vreman anpes sa Kretyen servi Zeova: En msye oubyen madanm i fer li enposib pour son konzwen servi Zeova.—Akt 5:29.
5. Bann lafet ek selebrasyon
Bann Kretyen pa partisip dan bann lafet ki pa fer plezir Zeova. Me sak Kretyen i bezwen deside ki i pou fer dan serten sityasyon konsernan sa bann lafet. Annou vwar serten legzanp.
Si en dimoun i swet ou bonn fet. Ou kapab zis reponn, “Mersi.” Si sa dimoun i anvi konn plis, ou kapab eksplik li akoz ou pa selebre sa lafet.
Si ou konzwen ki pa en Temwen Zeova i envit ou pour al manze ansanm avek son fanmir zour en lafet. Si ou konsyans i permet ou pour ale, ou kapab eksplik ou konzwen byen davans ki si i annan okenn koutim ki pa annakor avek Labib, ou pa pou pran par ladan.
Si ou anplwayer i donn ou en bonous pandan bann lafet lafen lannen. Eski ou devret refize? Pa neseserman. Eski ou anplwayer in donn ou sa bonous konman en kado akoz en lafet oubyen eski i’n donn ou sa bonous pour montre son lapresyasyon pour ou bon travay?
Si en dimoun i donn ou en kado zour en lafet. Sa dimoun i kapab dir: “Mon konnen ou pa selebre sa lafet, me mon ti pou kontan donn ou sa.” Petet sa dimoun i zis anvi donn ou en kado. De lot kote, eski i posib ki i pe esey teste ou lafwa oubyen i anvi ou partisip dan sa lafet? Apre ki ou’n reflesir lo la, i pou depan lo ou si ou pou aksepte oubyen refiz sa kado. Dan tou sa ki nou fer, nou anvi annan en konsyans kler e reste fidel avek Zeova.—Akt 23:1.
6. Bann maladi kontazye
Vi ki nou kontan lezot, nou fer byen atansyon pour pa fer lezot malad. Nou fer sa, ki swa nou annan en maladi kontazye ouswa nou krwar ki nou kapab transmet en maladi. Nou fer sa akoz Labib i dir: “Ou devret kontan ou prosen parey ou kontan ou prop lekor.”—Romen 13:8-10.
Ki mannyer nou kapab montre ki nou pe obei sa lord? En dimoun ki annan en maladi kontazye pa devret anmay oubyen anbras lezot. I pa devret santi li mal si serten pa envit li kot zot pour protez zot fanmir. Si i pe al batize, i devret enform kordinater konsey ansyen davans konsernan son maladi pour ki laranzman i kapab ganny fer pour protez lezot ki pe osi ganny batize. Avan i konmans pwente, en dimoun ki kapab annan en maladi kontazye, i devret volonterman fer en tes disan. Ler ou fer sa, ou montre ki ou enterese avek lezot parski ou ‘pa rod zis ou prop lentere, me lentere lezot osi.’—Filipyen 2:4.
7. Biznes ek zafer legal
Nou kapab evit en kantite problenm si nou met an ekri tou bann lagreman oubyen kontra, menm si sa lot dimoun i en Kretyen. (Zeremi 32:9-12) Kantmenm sa, i kapab annan serten pti dezakor ant bann Kretyen konsernan larzan oubyen lezot keksoz. Si sa i arive, zot devret kapab rezourd sa bann problenm vitman, an prive e dan lape.
Me ki mannyer nou kapab rezourd bann problenm grav, parey kalonmni ek frod? (Lir Matye 18:15-17.) Zezi ti koz lo trwa keksoz ki nou devret fer:
Esey rezourd sa problenm avek sa lot dimoun.—Vwar verse 15.
Si sa pa marse, demann enn oubyen de dimoun matir dan kongregasyon pour ed zot.—Vwar verse 16.
Si sa pa marse menm, zot kapab rod led avek bann ansyen.—Vwar verse 17.
Dan laplipar ka, nou pa devret anmenn nou bann frer ek ser ankour parski sa pou anmenn repros lo non Zeova ek kongregasyon. (1 Korentyen 6:1-8) Par kont, i annan serten ka kot i neseser pour al an kour: divors, deside avek lekel zanfan pou reste, pey alimoni, konpansasyon lasirans, ler en lakonpannyen i faid e pour konfirm en testaman. Si en Kretyen i servi sa mwayen legal pour rezourd en sityasyon dan en fason amikal, i pa pe dezobei sa konsey ki dan Labib.
Si en Kretyen i komet en lofans vreman grav kont en lot, parey vyol, vyolans, vole oubyen mert, en Kretyen ki raport li avek lotorite pa pe dezobei konsey zapot Pol.
a Lannen 455 avan Kris ziska lannen 1 avan Kris, i fer 454 lannen. Depi lannen 1 avan Kris ziska lannen 1 nou lepok, i fer en lannen (napa lannen zero). Lannen 1 ziska lannen 29 i fer 28 lannen. An tou i ariv 483 lannen.