LESON 01
Ki mannyer Labib i kapab ed ou?
Preski nou tou nou annan kestyon konsernan lavi, soufrans, lanmor ek lavenir. Nou osi annan nou bann traka toulezour parey konman pour ganny nou dipen e konman pour annan en lavi fanmir ere. Bokou dimoun i vwar ki Labib pa zis reponn bann kestyon enportan dan lavi me i osi donn zot bann konsey dan lavi toulezour. Ou krwar Labib i kapab itil pour nou tou?
1. Ki serten kestyon Labib i reponn?
Labib i reponn sa bann kestyon enportan: Ki mannyer lavi ti konmanse? Akoz nou la? Akoz bann dimoun inosan i soufer? Akoz en dimoun i mor? Si tou dimoun i kontan lape akoz i annan sitan bokou lager? Ki pou arive avek sa later dan lefitir? Labib i ankouraz nou pour rod larepons sa bann kestyon e bokou dimoun in trouv bann bon larepons.
2. Ki mannyer Labib i kapab ed nou profit byen nou lavi?
Labib i donn nou bann bon konsey. Par egzanp, i ansenny bann fanmir konman pour trouv vre lazwa. I donn bann konsey lo konman pour fer fas avek presyon e osi konman nou kapab kontan nou travay. Ou pou konnen ki Labib i dir lo sa bann size e lezot size ankor anmezir ki nou diskit lo sa bann lenformasyon ansanm. Ou pou realize ki “tou Lekritir [tou sa ki dan Labib] i . . . itil.”—2 Timote 3:16.
Sa piblikasyon pa ranplas Labib. Plito, i ankouraz ou pour egzamin Labib pour ou menm. Alor nou ankouraz ou pour lir bann verse Labib ki’n ganny site dan sak leson e konpar zot avek sa ki ou pe aprann.
AL PLI O PROFON
Dekouver ou menm ki mannyer Labib in ed dimoun, ki mannyer ou kapab trouv plezir pour lir li e akoz i byen pour rod led pour konpran li.
3. Labib i kapab gid nou
Labib i parey en lalimyer. I montre nou konman pour fer bann bon desizyon e i osi dir nou ki pou arive dan lavenir.
Lir Psonm 119:105 e apre reponn sa bann kestyon:
Ki mannyer sa enn ki ti ekri sa Psonm ti vwar Labib?
Ki mannyer ou, ou vwar Labib?
4. Labib i kapab reponn nou bann kestyon
En madanm ti dekouver ki Labib i kapab reponn bann kestyon ki ti’n trouble li pour bokou bokou lannen. Zwe sa VIDEO e apre reponn sa bann kestyon.
Dan sa video, ki serten kestyon sa madanm ti annan?
Ki mannyer etidye Labib ti ed li?
Labib i ankouraz nou pour demann kestyon. Lir Matye 7:7 e apre reponn sa kestyon:
Ki kestyon ki ou annan ki Labib i kapab reponn?
5. Ou kapab trouv plezir pour lir Labib
Bokou dimoun i kontan lir Labib e sa i anmenn bokou byenfe pour zot. Zwe sa VIDEO e apre reponn sa bann kestyon.
Dan sa video, ki mannyer sa bann zenn ti santi konsernan lir an zeneral?
Akoz aprezan zot santi en lot fason konsernan lir Labib?
Bann lansennyman dan Labib i kapab rekonfort nou e osi donn nou en lespwar. Lir Romen 15:4 e apre reponn sa kestyon:
Eski sa rekonfor ek lespwar ki Labib i ofer i enteres ou?
6. Lezot i kapab ed ou konpran Labib
Apard ki zis lir Labib lo zot menm, bokou dimoun in vwar ki koz lo Labib avek lezot i vreman itil. Lir Akt 8:26-31 e apre reponn sa kestyon:
Ki mannyer nou kapab konpran Labib?—Vwar verse 30 ek 31.
Sa zonm Etyopyen ti bezwen led pour konpran Lekritir. Bokou dimoun ozordi i vwar li itil pour koz lo Labib avek lezot
SERTEN DIMOUN I DIR: “Etidye Labib i en gaspiyaz letan.”
Ki ou dir ou? Akoz?
REZIMEN
Labib i donn konsey pour lavi toulezour, i reponn bann kestyon enportan e i donn dimoun rekonfor ek lespwar.
Revizyon
Ki kalite konsey nou kapab trouve dan Labib?
Ki serten kestyon Labib i reponn?
Ki ou ti a kontan aprann dan Labib?
FER PLIS RESERS
Dekouver ki mannyer bann konsey Labib i pratik dan nou letan.
Vwar ki mannyer Labib in ed en zonm lalit avek son bann santiman depi son lanfans.
Egzamin konsey ki Labib i donnen pour en bon lavi fanmir.
Labib i koriz sa fo konsep ki bokou dimoun i annan konsernan lekel ki diriz sa lemonn.