Aprann avek Parol Bondye

Ki mannyer ou kapab vin pros avek Bondye?

Sa lartik i soulev bann kestyon ki petet ou’n deza demande e i montre kote ou kapab trouv larepons sa bann kestyon dan ou Labib. I pou en plezir pour Temwen Zeova ed ou pour trouv larepons sa bann kestyon.

1. Eski Bondye i ekout tou lapriyer?

Zeova i envit dimoun dan tou nasyon pour vin pros avek li atraver lapriyer. (Psonm 65:2) Me i pa ekout tou lapriyer. Par egzanp, kan bann Izraelit ti kontinyen fer sa ki mal, Bondye ti refize ekout zot lapriyer. (Izai 1:15) Oubyen menm, Bondye pa pou aksepte lapriyer en zonm ki pa tret son madanm byen. (1 Pyer 3:7) Pourtan, Bondye pou ekout lapriyer bann dimoun ki’n fer bann pese grav, si zot repantir.​—Lir 2 Kronik 33:9-13.

2. Ki mannyer nou devret priye?

Lapriyer i en privilez e i form parti nou ladorasyon, alor nou devret priy zis avek Zeova. (Matye 4:10; 6:9) Vi ki nou enparfe, nou devret priy o non Zezi akoz se li ki Bondye in swazir konman sa “semen” pour nou apros li. (Zan 14:6) Zeova pa anvi ki nou resit bann lapriyer ki nou’n aprann parker ouswa bann lapriyer lo papye, plito i anvi ki nou dir li sa ki dan nou leker.​—Lir Matye 6:7; Filipyen 4:6, 7.

Nou Kreater i menm kapab tann bann lapriyer ki ganny fer an silans. (1 Samyel 1:12, 13) I envit nou pour priye dan tou moman, tel ki o konmansman en lazournen, a lafen lazournen, ler nou manze e kan nou fer fas avek problenm.​—Lir Psonm 55:22; Matye 15:36.

3. Akoz bann Kretyen i zwenn ansanm?

I pa fasil pour apros Bondye akoz nou pe viv parmi bann dimoun ki pa tro krwar dan Bondye e sa promes ki i pou annan lape lo later en zour i en fars pour zot. (2 Timote 3:1, 4; 2 Pyer 3:3, 13) Alor, nou bezwen ankouraz kanmarad atraver nou lasosyasyon avek lezot frer ek ser Kretyen.​—Lir Ebre 10:24, 25.

Ou kapab vin pros avek Bondye si ou fer zanmi avek bann ki kontan Bondye. Renyon Temwen Zeova i donn nou loportinite pour batir lafwa kanmarad.​—Lir Romen 1:11, 12.

4. Ki mannyer ou kapab apros avek Bondye?

Ou kapab apros avek Zeova si ou medit lo sa ki ou’n aprann dan son Parol. Reflesir lo aksyon, gidans ek promes Bondye. Meditasyon ek lapriyer pou ed nou devlop lapresyasyon dan nou leker pour lanmour ek lasazes Bondye.​—Lir Zozye 1:8; Psonm 1:1-3.

Ou kapab vin pros avek Bondye selman si ou annan konfyans dan li e si ou annan lafwa dan li. Me lafwa i parey en keksoz vivan ki bezwen ganny nouri. Ou devret kontinyen batir ou lafwa pour revwar lo kwa ou krwayans i baze.​—Lir 1 Tesalonisyen 5:21; Ebre 11:1, 6.

5. Ki byenfe ou pou gannyen si ou apros avek Bondye?

Zeova i pran swen avek bann ki kontan li. I protez zot avek okenn keksoz ki kapab met an danze zot lafwa ek zot lespwar pour ganny lavi eternel. (Psonm 91:1, 2, 7-10) I averti nou konsernan bann fason viv ki kapab en menas pour nou lasante ek boner. Zeova i ansenny nou sa pli meyer fason viv.​—Lir Psonm 73:27, 28; Zak 4:4, 8.

Pour plis lenformasyon, vwar sapit 17 dan liv Ki Labib i vreman dir? pibliye par Temwen Zeova.