En sitwayen responsab e en dimoun relizye Ki mannyer nou kapab vin tou le de?

KI DE laspe ki ti evidan dan minister Zezi? Premyerman, Zezi ti esey sanz leker bann dimoun, pa gouvernman. Par egzanp, remark sa ki Zezi ti met lanfaz lo la dan son Sermon lo Montanny. Zis avan i ti koz lo nesesite pour vin parey disel ek lalimyer, i ti dir avek son lodyans ki se bann ki “pov an-espri” andotmo bann ki konsyan zot bezwen spirityel ki pou ere. I ti azoute: “Byennere bann ki dous, . . . ki annan leker pir, . . . ki fer lape.” (Matye 5:1-11) Zezi ti ed son bann disip pour vwar lenportans pour sanz zot santiman ek fason panse. I ti anvi ki zot devlop menm standar ki Bondye konsernan sa ki byen ek sa ki mal e vwar lenportans pour servi Bondye avek tou zot leker.

Dezyenmman, kan Zezi ti vwar bann imen parey avek li pe soufer, konpasyon ti pous li pour soulaz zot soufrans. Par kont, i pa ti son lobzektif pour retir tou soufrans ki imen ti pe pas atraver. (Matye 20:30-34) I ti geri bann dimoun malad, me i pa’n fer maladi disparet. (Lik 6:17-19) I ti soulaz bann ki ti pe ganny abize, me dimoun i kontinyen soufer akoz lenzistis. I ti donn manze bann ki ti lafen, me lafanmin i kontinyen ravaz limanite.​—Mark 6:41-44.

Sanz leker e soulaz bann ki ti dan soufrans

Akoz i ti pli enportan pour Zezi sanz leker e soulaz bann ki ti dan soufrans dan plas sanz gouvernman oubyen elimin soufrans? Zezi ti konnen ki Bondye ti’n plàn pour servi Son Rwayonm pour met en lafen avek bann gouvernman imen e elimin lakoz tou soufrans pli tar dan lavenir. (Lik 4:43; 8:1) Sa i evidan dan larepons ki Zezi ti donn son bann disip kan zot ti demann li pour pran plis letan pour geri bann malad. I ti dir zot: “Annou al dan bann vilaz dan zalantour pour ki mon a kapab pres Levanzil laba osi; se pour sa rezon ki mon’n vini.” (Mark 1:32-38) Zezi ti soulaz bokou dan zot soufrans, me son priyorite ti plito pour prese e ansenny parol Bondye.

Temwen Zeova i esey fer bokou zefor pour imit Zezi kan zot prese. Zot konpasyon i pous zot pour soulaz bann dimoun ki pe soufer par ed zot dan bann fason pratik. Me bann Temwen pa pe esey elimin bann lenzistis ki annan dan sa lemonn. Zot krwar ki Rwayonm Bondye pou efas tou lakoz soufrans. (Matye 6:10) Zis parey Zezi, zot lobzektif se pour sanz leker pa gouvernman. Sa fason fer i sa pli meyer fason parski se pa politik ki pli gro problenm imen, o kontrer se valer moral.

Bann sitwayen responsab

Temwen Zeova i osi vwar li zot responsabilite konman Kretyen pour vin bann bon sitwayen. I pour sa rezon ki zot onor e respekte bann lotorite dan gouvernman. Atraver zot bann piblikasyon ek zot travay predikasyon, zot ankouraz zot vwazen pour obeir lalwa gouvernman. Par kont, kan sa ki gouvernman pe demande pour fer i al kont lalwa Bondye, Temwen Zeova pa obeir. Zot “obei Bondye plito ki zonm.”​—Akt 5:29; Romen 13:1-7.

Temwen Zeova i vizit tou dimoun dan zot kominote e ofer zot pour aprann sa ki Labib i ansennyen pour nanryen. Sa form ledikasyon in ed plizyer milyon dimoun sanz zot leker. Atraver sa led, plizyer mil dimoun sak lannen in ganny led pour aret fimen, aret abiz bann move sibstans parey drog ek lalkol, aret zwe bann zwe larzan e aret annan relasyon seksyel avek plizyer dimoun. Zot in devlop en bon moralite e vin bann sitwayen responsab akoz zot in aprann ki mannyer pour aplik bann prensip Labib dan zot lavi.​—Vwar sa lartik “Labib i sanz lavi” dan Latour Veyer le 1 Me 2012 paz 18 an Angle.

Deplis, ledikasyon lo Labib in ed sak manm fanmir pour annan plis respe pour kanmarad e pour amelyor kominikasyon antre zot. Sa i enplik ant sa koup, paran ek zanfan e ant bann zanfan zot menm. Se sa bann fakter ki fer en fanmir solid e kan bann fanmir i solid sa i fer ki lakominote osi i vin pli solid.

Apre ki nou’n egzamin sa bann diferan pwen dan sa bann lartik, ki ou panse: Eski Labib i ankouraz larelizyon ek politik pour zwenn ansanm? Larepons i kler, Labib pa ankouraz sa. Me eski bann vre Kretyen i devret vin bann sitwayen responsab? Wi, zot devret. Ki mannyer zot demontre ki zot bann sitwayen responsab? Par swiv komannman Zezi pour vin parey disel ek lalimyer lemonn.

Bann ki fer bokou zefor pour aplik sa bann gidans pratik ki Kris in donn nou, pa zis zot ek zot fanmir ki pou tir benefis, me osi lakominote kot zot reste. Temwen Zeova kot ou reste ti pou byen kontan pour partaz avek ou plis lenformasyon konsernan sa progranm ledikasyon lo Labib ki pe ganny fer aktyelman dan ou kominote.a

[Not anba lo paz]

[Ekstre lo paz 7]

Lobzektif Zezi sete pour sanz leker, pa gouvernman

[Ekstre lo paz 8]

I enportan pour Temwen Zeova ki zot vin bann bon sitwayen ki responsab