BIOGRAFI
Senk deseni dan servis a plen tan o bor Arctic Circle
Rakonte par Aili ek Annikki Mattila
Nou ti dir avek enn nou zanmi ki ti dan servis a plen tan, “I fasil pour ou fer pionye. Tou le de ou paran i dan laverite, zot kapab siport ou.” I ti reponn, “Gete! Nou tou nou annan menm Papa.” I ti annan en leson enportan dan larepons ki i ti donnen: Nou Papa ki dan lesyel i pran swen e donn lafors tou son bann serviter. Anfet, nou leksperyans in konfirmen ki sa i vre.
NOU ti ne dan en fanmir dis zanfan lo en laferm dan nor Ostrobothnia, Finlenn. Nou lanfans ti ganny afekte avek Dezyenm Lager Mondyal. Menm si nou ti viv plizyer santenn kilomet avek fron batay, bann kriyote sa lager in kit en gran mark lo nou. Kan Oulu ek Kalajoki, de lavil o bor nou, ti ganny bonbarde, nou ti vwar en gro lalimyer rouz dan lesyel sa zour swar. Kan nou ti vwar bann avyon lager pe pase anler, nou paran ti dir nou al kasyet deswit. Me, kan Tauno, nou pli gran frer ti koz avek nou konsernan en paradi lo later kot pou napa lenzistis, sa ti tous nou leker.
Tauno ti’n aprann laverite dan Labib a laz 14 an atraver piblikasyon bann Etidyan Labib. Kan Dezyenm Lager Mondyal ti deklare, i ti ganny met dan prizon lefet ki i ti refize partisip dan lager akoz son konsyans baze lo Labib. Laba i ti ganny mal trete. Sa ti zis ranforsi son lafwa dan Zeova e apre ki i ti ganny large i ti vin pli devoue dan predikasyon. Legzanp nou frer ti motiv nou pour asiste renyon ki bann Temwen ti pe fer dan en vilaz o bor nou. Nou ti osi asiste bann lasanble, menm si nou ti bezwen fer sakrifis pour met en pti larzan dekote pour fer sa vwayaz. Nou ti koud lenz pour nou vwazen, plant zonnyon e anmas berries. Vi ki nou ti annan en ta travay pour fer lo laferm, nou pa ti kapab asiste lasanble ansanm alors nou ti al sakenn son tour.
Sa laverite ki nou ti’n aprann lo Zeova ek son plan ti ogmant nou lanmour pour li e nou ti deside dedye nou lavi avek li. An 1947, nou tou le de nou ti senboliz nou dedikasyon par batenm, Annikki ti annan 15 an e Aili 17 an. Nou ser Saimi ti batiz menm lannen. Nou ti osi etidye Labib avek nou ser Linnea ki ti’n fini marye. Li avek son fanmir ti osi vin Temwen. Apre nou batenm, nou ti fikse lobzektif pour fer pionye e nou ti fer pionye asistan tanzantan.
SERVIS A PLEN TAN
An 1955, nou ti al Kemi, en lavil ki pli dan nor. Kantmenm nou ti pe travay, nou ti anvi vin pionye, me nou ti per pangar nou pa ti a kapab siport nou lekor. Nou ti panse ki nou ti bezwen met en pe larzan dekote avan. I ti a sa moman ki nou ti fer sa konversasyon avek sa ser pionye ki nou’n mansyonnen o konmansman. Sa in ed nou vwar ki servis a plen tan pa depan zis lo nou prop resours oubyen sipor nou fanmir. Sa ki pli enportan se ki nou depan lo nou Papa dan lesyel.
Sa letan nou ti annan ase larzan dekote pour siport nou lekor pour de mwan. Alor, an Me 1957 nou ti fer laplikasyon pour fer pionye pour de mwan Pello, en lavil Lapland, par lao Arctic Circle. Apre de mwan, sa larzan ki nou ti’n met dekote ti ankor la, alor nou ti fer laplikasyon pour fer pionye pour ankor de mwan. De mwan pli tar, tou sa larzan ti ankor lanmenm e sa ti asir nou ki Zeova ti pou pran swen avek nou. Apre 50 an servis pionye, nou larzan i touzour la. Kan nou reflesir lo lepase, nou santi ki Zeova in tyonbo nou lanmen e dir nou: “Pa bezwen per. Mwan mon pou ed ou.”—Iza. 41:13.
An 1958, sirveyan rezyonal ti ankouraz nou pour fer pionye spesyal Sodankylä Lapland. Pandan sa letan, i ti annan zis en ser ki ti Temwen laba. I ti’n aprann laverite dan en fason enteresan. Son garson ti pe al vizit Helsinki, kapital Finlenn avek son laklas. Anmezir ki sa group ti pe marse dan sa lavil, en ser aze ti donn en Latour Veyer avek sa garson ki ti dernyen dan laliny e demann li pour donn son manman. Sanmenm ki sa garson ti fer e deswit son manman ti realize ki sa ti laverite.
Nou ti lwe en lasanm ki ti zis par lao en lizin ki koup dibwa. Nou ti fer renyon lanmenm. O konmansman, i ti annan zis mwan, mon ser, sa ser lokal ek son fiy ki ti asiste. Nou ti zis lir bann lenformasyon ki ti ganny dezinyen pour renyon sak semenn. Pli tar, en zonm ki ti’n etidye Labib avek Temwen Zeova ti vin travay kot sa lizin. Li avek son fanmir ti konmans asosye avek nou group. Avek letan, li ek son madanm ti batize. Alor, sa frer ki ti kondwir bann renyon. Plitar, lezot msye ki ti pe travay dan sa lizin ti konmans asiste bann renyon e aksepte laverite. De-z-an pli tar, nou group ti agrandi ziska ki en kongregasyon ti ganny formen.
BANN DEFI
I ti en defi pour mars bann gran zistans dan predikasyon. Pandan lete, nou ti marse, pedal bisiklet e menm pagaye pour zwenn dimoun dan nou teritwar. Nou bisiklet ti vreman en gran led pour nou. Nou ti osi servi zot pour al bann lasanble e vizit nou paran ki ti reste plizyer santenn kilomet avek nou. Pandan liver, nou ti pran bis byen granmaten pour al dan en vilaz dan sa rezyon e apre mars kaz an kaz. Apre ki nou ti’n fini vizit tou dimoun dan en vilaz, nou ti al dan lot. Defwa i ti annan en kantite lanez dan semen akoz i pa ti’n ganny tire. Me i ti pli fasil pour marse ler dimoun ti’n servi sa semen avan nou. Parfwa lanez ti rekouver latras bann vwayazer, e dan letan prentan, kan lanez ti pe fonn, i ti difisil pour marse akoz nou ti anfons ladan.
Nou ti bezwen annan labitid met lenz lafreser vi ki i ti fer fre e lanez ti tonbe. Nou ti met leba lalenn, de ou trwa per soset ek bann gran bouts. Kantmenm sa, lanez ti antre dan nou bouts. Kan nou ti ariv kot peron en lakaz, nou ti bezwen tir nou bouts pour retir lanez. Deplis, roule nou manto ti ganny mouye ler nou ti pe marse dan lanez, e kan tanperatir ti desann pli ba i ti vin dir parey metal. En madanm kot en lakour ti dir: “Zot lafwa i bezwen for pour zot volonterman vin isi dan sa kalite letan.” Nou ti’n mars plis ki 11 kilomet pour ariv kot sa lakaz.
Lefet ki teritwar kot nou ti al prese ti lwen, souvandfwa nou ti pas lannwit kot bann dimoun ki nou ti vizite. Lo tar apre midi, nou ti konmans demann en landrwa dormi. Zot lakaz ti senp, me dimoun ti zantiy e ospitalye, zot pa ti zis ofer nou en landrwa dormi me osi en pti keksoz pour manze. Plizyer fwa nou ti dormi lo lapo zannimo me par ler nou ti ganny en lili konfortab. Par egzanp, en madanm ki ti annan en gran lakaz ti ofer nou en zoli lasanm kot i ti annan en lili kouver avek bann zoli tapi blan. Plizyer fwa nou ti koz lo Labib avek bann fanmir ziska tar aswar. Dan en landrwa, nou ti dormi dan en kote lasanm tandis ki sa koup ti dormi dan lot kote. Sa msye ek son madanm ti kontinyen demann kestyon sakenn son tour. Nou ti diskit lo Labib avek zot tou lannwit ziska granmaten.
EN SERVIS BYEN REISI
Lapland i en zoli pei dezerte e son labote i varye depandan lo sezon. Me, pour nou, bann dimoun ki ti ekoute ti pli zoli ankor. Parmi sa bann dimoun senser, i ti annan bann syer ki ti’n vin Lapland pour travay. Parler nou, de pti ser, ti kapab rankontre en douzenn zonm kosto dan en pti lakaz. Sa bann zonm kosto ti aksepte mesaz Labib ek nou bann piblikasyon avek gran ker.
Nou ti ganny bann leksperyans vreman eksitan. En zour, nou ti mank bis akoz revey lo stenn ti senk minit annavans. Alor nou ti deside pran en lot bis pour al dan en lot vilaz. Nou pa ti’n deza pres dan sa teritwar avan. Kot premye lakour nou ti zwenn en zenn madanm ki ti dir, “La zot la, lontan mon ti pe esper zot.” Nou ti deza pe etidye son ser. Sa zenn madanm ti’n dir son ser dir nou vin vizit li sa menm zour, me nou pa ti’n ganny sa mesaz. Sa menm zour, nou ti konmans etidye li ek son fanmir ki ti pe reste o bor li. Pa tro lontan apre, nou ti etidye zot tou ansanm e sa ti en group douz dimoun. Depi sa letan, plizyer manm sa fanmir in vin Temwen Zeova.
An 1965, nou ti ganny anvoye Kuusamo zis anba Arctic Circle, kongregasyon kot nou ete konmela. Sa letan, kongregasyon ti annan zis detrwa proklanmater. O konmansman, nou nouvo teritwar ti paret difisil. Bann dimoun ti vreman relizye e zot ti annan en move pwennvi lo nou. Kantmenm sa, vi ki bokou dimoun ti annan respe pour Labib, nou ti kapab fer en bon konversasyon avek zot. Alor ptitapti, nou ti esey fer konnesans avek bann dimoun e apepre de-z-an pli tar, i ti vin pli fasil pour konmans bann letid Labib.
ANKOR AKTIF DAN SERVIS
Ozordi, nou napa sa lafors parey avan pour partisip dan predikasyon lazournen antye, me toudmenm nou al prese preski tou le zour. Propaz sa bon nouvel avek bann dimoun dan nou gran teritwar ti vin pli fasil kan Aili ti ganny son laysenns an 1987 a laz 56 an apre ki i ti’n ganny ankouraze par nou neve. Nou ti ganny plis led kan en nouvo Lasal Rwayonm ti ganny konstri e nou ti ganny en pti apartman kot Lasal.
Sa progre dan nou teritwar i donn nou bokou lazwa. Kan nou ti konmans servis a plen tan dan nor Finlenn, i ti annan zis enn de proklanmater eparpiye dan sa gran teritwar. Aprezan i annan plizyer kongregasyon dan nou rezyon. Souvandfwa, dan bann lasanble en dimoun i entrodwir son lekor e dir: ‘Eski ou rapel mwan?’ Dan serten ka, nou ti pe kondwir en letid Labib kot li kan i ti ankor en manrmay. Bann lagrenn ki ti’n ganny senmen en bann lannen oubyen plizyer deseni dan lepase in aprezan prodwir bokou fri!—1 Kor. 3:6.
An 2008, i ti’n fer 50 an depi ki nou pionye spesyal. Nou remersi Zeova ki nou’n kapab ankouraz kanmarad pour andire dan son travay tre enportan. Nou ti annan en lavi senp me nou pa ti zanmen mank nanryen. (Ps. 23:1) Aprezan nou konnen ki nou pa ti’n devret enkyet kan nou ti pe konmans fer pionye. Erezman, pandan tou sa bann lannen, Zeova in fortifye nou zis parey in promet dan Izai 41:10: “Mon pou fortifye ou. Mon pou vreman ed ou. Mon pou vreman tyonbo ou byen for avek mon lanmen drwat ladrwatir.”
[Portre lo paz 17]
Annikki ek Aili dan zot servis konmela
[Portre lo paz 17]
[Map lo paz 17]
(For fully formatted text, see publication)
FINLENN
HELSINKI
Sodankylä
Pello
Arctic Circle
Kuusamo
Kemi
Oulu
Kalajoki
[Portre lo paz 18]
Konmansman agos: Matti (papa), Tauno, Saimi, Maria Emilia (manman), Väinö (pti baba), Aili, ek Annikki, 1935
[Portre lo paz 18]
Konmansman agos: Eeva Kallio, Saimi Mattila-Syrjälä, Aili, Annikki, ek Saara Noponen, 1949
[Portre lo paz 19]
Pe al Kuopio pour lasanble distrik, 1952. Konmansman agos: Annikki, Aili, Eeva Kallio
[Portre lo paz 19]
Kaisu Reikko ek Aili pe prese
[Ekstre lo paz 19]
Apre 50 an servis pionye larzan ki nou ti’n anmase i ankor la!
[Portre lo paz 20]
Ansanm pe prese en zour liver
[Portre lo paz 20]
Serten ki nou’n etidye avek
[Portre lo paz 21]
Nou kontan predikasyon menm kan lapli i tonbe