Annan lafwa solid ki Rwayonm Bondye pou akonpli son plan
“Lafwa i lasirans dan keksoz ki ou pe espere.”—EBR. 11:1.
1, 2. Kwa ki pou ranforsi nou konviksyon ki atraver son Rwayonm, Bondye pou akonpli son plan pour bann imen e akoz? (Vwar portre anler.)
KONMAN Temwen Zeova, souvandfwa nou dir ki Rwayonm Bondye i sa sel solisyon pour tou nou problenm e nou fer en kantite zefor pour ed dimoun aprann sa par servi Labib. Nou osi ganny konsole avek lespwar ki Rwayonm Bondye i donn nou. Selman, eski nou vreman konvenki ki Rwayonm Bondye i egziste e ki i pou atenn son bi? Akoz nou kapab annan lafwa solid dan Rwayonm Bondye?—Ebr. 11:1.
2 Sa Rwayonm Bondye dirize par Kris i en laranzman ki Bondye in met an plas pour akonpli son plan konsernan son kreasyon. Sa Rwayonm i baze lo en fondasyon solid, setadir drwa Zeova pour dirize. Bann laspe enportan sa Rwayonm, setadir son lerwa, bann ki pou renny avek li e bann ki pou anba zot lotorite, tousala in ganny met an plas legalman atraver bann lalyans. Sa bann lalyans i bann kontra oubyen lagreman legal ki’n ganny fer par Bondye oubyen son Garson Zezi Kri. Kan nou reflesir lo sa bann lalyans, sa pou ed nou pli byen konpran ki mannyer plan Bondye pou sirman ganny akonpli e pou ed nou vwar ki sa laranzman i stab.—Lir Efezyen 2:12.
3. Ki nou pou egzaminen dan sa lartik e dan sa enn swivan?
3 Labib i koz lo sis lalyans prensipal ki relye avek Rwayonm Bondye dirize par Kris: (1) lalyans avek Abraam, (2) lalyans Lalwa, (3) lalyans avek David, (4) lalyans pour vin en pret parey Melkisedek, (5) nouvo lalyans ek (6) lalyans pour en Rwayonm. Annou vwar ki mannyer sak lalyans i relye avek Rwayonm pour ki plan Bondye pour later ek limanite i ganny akonplir.—Vwar sa latab “Lafason ki Bondye pou akonplir son plan.”
EN PROMES I MONTRE KI MANNYER PLAN BONDYE POU GANNY AKONPLIR
4. Parey nou lir dan Zenez, ki lalwa Zeova ti met an plas konsernan bann imen?
4 Apre ki Zeova ti’n prepar nou zoli later pour bann imen kapab viv lo la, i ti fer pase trwa lalwa konsernan bann imen: Nou Bondye ti pou kree imen dan son resanblans, zot ti pou annan sa responsabilite pour agrandi Paradi partou e ranpli later avek bann bon dimoun e zot pa ti ganny drwa manz fri dan sa pye konnesans bon e move. (Zen. 1:26, 28; 2:16, 17) I pa ti neseser pour annan plis ki sa. Apre ki sa premye zonm ti ganny kree, i ti reste de lalwa ki zot ti bezwen swiv pour ki plan Bondye i ganny akonplir. Alor, akoz i ti vin neseser pour annan bann lalyans?
5, 6. (a) Ki mannyer Satan ti esey kas plan Bondye? (b) Ki mannyer Zeova ti reazir anver lakizasyon Satan dan zarden Edenn?
5 Satan ki ti annan en move motivasyon ti konmans en rebelyon kont Bondye pour esey kas son plan. I ti fer sa par fikse son latansyon lo sa lalwa ki i ti pli kapab zwe lo la, sa enn ki ti depan lo lobeisans bann imen. I ti tant sa premye madanm Ev pour dezobei sa lalwa konsernan pye konnesans bon e move. (Zen. 3:1-5; Rev. 12:9) Par fer sa, Satan ti kestyonn drwa Bondye pour diriz Son kreasyon. Pli tar, Satan ti osi akiz bann imen konmkwa zot servi Bondye zis pour zot prop byenfe.—Zob 1:9-11; 2:4, 5.
6 Ki mannyer Zeova ti pou reazir anver sa lakizasyon ki Satan ti fer dan zarden Edenn? Byensir, si i ti’n detri sa bann rebel sa rebelyon ti pou’n fini. Me i ti pou osi vedir ki plan Bondye pour later ganny ranpli avek bann desandans Adan ek Ev ki obeisan pa ti pou’n ganny akonplir. Olye touy sa bann rebel deswit, nou Kreater ki saz ti donn en profesi, sa se promes ki ti ganny fer dan zarden Edenn pour fer sir ki sak detay son parol ti pou vin vre.—Lir Zenez 3:15.a
7. Ki lasirans sa promes ki ti ganny fer dan zarden Edenn i donn nou konsernan sa serpan ek son desandans?
7 Atraver sa promes ki ti ganny fer dan zarden Edenn, Zeova ti pas zizman lo sa serpan ek son desandans ki reprezant Satan e tou bann ki ti pou pran kote Satan e kont drwa Bondye pour dirize. Bondye ti donn desandans son madanm senbolik dan lesyel lotorite pour detri Satan. Alor sa promes ki ti ganny fer dan zarden Edenn pa ti zis met lanfaz ki Satan ti pou ganny detri e ki tou move lefe ki son rebelyon in anmennen ti pou disparet, me i osi montre nou ki mannyer sa ti pou arive.
8. Ki nou kapab dir konsernan lidantite sa madanm ek son desandans?
8 Lekel ki ti pou desandans sa madanm? Sa desandans ti pou bezwen en lespri. Akoz? Parski sa desandans pou kraz latet sa serpan, setadir “detri” Satan ki en lespri. (Ebr. 2:14) Alor, sa madanm ki donn nesans sa desandans ti pou osi bezwen envizib. Desandans sa serpan ti ogmant vitman, tandis ki lidantite sa desandans ek sa madanm ti reste en sekre pour preski 4,000 an apre ki Zeova ti donn sa promes ki ti ganny fer dan zarden Edenn. Antretan, Zeova ti fer detrwa lalyans ki idantifye sa desandans e asir Son bann serviter ki sa desandans ti pou sa mwayen ki Bondye ti pou servi pour repar tou domaz ki Satan ti’n anmennen lo lafanmir imen.
EN LALYANS I IDANTIFYE SA DESANDANS
9. Kisisa lalyans avek Abraam e kan ki i ti pran lefe?
9 Apepre de mil an apre ki Zeova ti’n pas zizman lo Satan, i ti demann Abraam pour kit son lavil Our ki dan rezyon Mezopotami pour al Kanaan. (Akt 7:2, 3) Zeova ti dir li: “Kit ou pei, ou fanmir e lakaz ou papa e al dan sa pei ki mon pou montre ou. Mon pou fer ou vin en gran nasyon, mon pou beni ou, mon pou fer ou non gran e ou pou vin en benediksyon. Mon pou beni sa bann ki beni ou, mon pou modi sa enn ki swet ou maler e par ou tou pep lo later pou sirman ganny beni.” (Zen. 12:1-3) Sa i sa premye resi an ekri konsernan sa lalyans avek Abraam. Nou pa konnen kan egzakteman sa premye fwa ki Zeova ti fer sa lalyans avek Abraam. Par kont, sa lalyans ti pran lefe an 1943 A.N.L. ler Abraam a laz 75 an ti kit Arann e travers Larivyer Efrat.
10. (a) Ki mannyer Abraam ti demontre lafwa solid dan bann promes Bondye? (b) Ki detay Zeova ti donnen ptitapti konsernan desandans sa madanm?
10 Zeova ti repet son promes avek Abraam plizyer fwa e sak fwa i ti donn li plis detay. (Zen. 13:15-17; 17:1-8, 16) Ler Abraam ti demontre son lafwa solid dan promes Bondye par montre ki i ti pare pour ofer son sel garson konman sakrifis, Zeova ti fortifye sa lalyans avek en promes san kondisyon. (Lir Zenez 22:15-18;b Ebre 11:17, 18.) Apre ki lalyans avek Abraam ti pran lefe, ptitapti Zeova ti donn plis detay enportan konsernan desandans sa madanm. Sa desandans ti pou sorti dan lafanmir Abraam. Dan sa desandans, i ti pou annan en kantite dimoun, zot ti pou annan fonksyon konman lerwa, zot ti pou detri tou lennmi e zot ti pou en benediksyon pour bokou imen.
11, 12. Ki mannyer Labib i montre ki sa lalyans avek Abraam i annan en pli gran lakonplisman e ki sa i vedir pour nou?
11 Sa lalyans avek Abraam ti ganny akonplir dan en fason literal ler desandans Abraam ti erit Later Promiz, me Labib i montre ki sa lalyans ti pou osi annan en lakonplisman spirityel. (Gal. 4:22-25) Zapot Pol ti ganny enspire pour eksplike ki dan sa pli gran lakonplisman premye parti sa desandans Abraam i Kris e sa dezyenm parti i sa 144,000 Kretyen swazir. (Gal. 3:16, 29; Rev. 5:9, 10; 14:1, 4) Sa madanm ki donn nesans sa desandans i pa lot ki “Zerizalenm dan lesyel,” setadir sa parti lorganizasyon Bondye dan lesyel ki annan bann lanz fidel. (Gal. 4:26, 31) Parey sa lalyans avek Abraam ti promet, desandans sa madanm ti pou anmenn benediksyon pour limanite.
12 Sa lalyans avek Abraam i garanti ki sa Rwayonm dan lesyel pou vin en realite e fer li posib pour sa Lerwa ek bann ki diriz ansanm avek li erit sa Rwayonm. (Ebr. 6:13-18) Ki kantite letan sa lalyans ti pou egziste? Dapre Zenez 17:7 i “en lalyans ki pou dir pour touzour.” I pou egziste ziska ki sa Rwayonm Bondye dirize par Kris i detri bann lennmi Bondye e tou fanmir imen lo later in ganny beni. (1 Kor. 15:23-26) Anfet, tou bann ki pou viv lo later pou ganny bann byenfe eternel. Lalyans ki Zeova ti fer avek Abraam i montre ki i ti determinen pour akonpli son plan pour ki bann imen drwat i “ranpli later”!—Zen. 1:28.
EN LALYANS I GARANTI KI SA RWAYONM POU DIRE POUR TOUZOUR
13, 14. Ki sa lalyans avek David i garanti konsernan renny Mesi?
13 Sa promes ki ti ganny fer dan zarden Edenn e sa lalyans avek Abraam i ansenny nou ki renny Zeova i touzour baze lo son bann standar ki drwat. Alor sa Rwayonm Bondye dirize par Kris ki i’n etabli i osi baze lo sa bann standar ki drwat. (Ps. 89:14) Eski i kapab arive ki sa gouvernman dirize par Kris i vin koronpi e bezwen ganny detri? En lot lalyans legal i garanti ki sa pa pou zanmen arive.
14 Annou vwar ansanm sa ki Zeova ti promet atraver lalyans avek David ki ti lerwa Izrael. (Lir 2 Samyel 7:12, 16.c) Zeova ti fer sa lalyans avek David ler i ti pe renny Zerizalenm e i ti promet li ki Mesi ti pou enn son desandans. (Lik 1:30-33) Alor, Zeova ti donn plis lenformasyon konsernan ki fanmir sa desandans ti pou sorti ladan e i ti dir ki en zeritye David ti pou “annan drwa legal” pour rennyen dan sa Rwayonm. (Ezek. 21:25-27) Atraver Zezi, rwayote David “pou solidman ganny etabli pour touzour.” Byensir, desandans David “pou dire pour touzour, son tronn pou dire parey soley.” (Ps. 89:34-37) Wi, renny Mesi pa pou zanmen vin koronpi e sa ki i akonpli pou dire pour touzour!
EN LALYANS POUR VIN EN PRET
15-17. Dapre sa lalyans pour vin en pret parey Melkisedek, dan ki lezot fason sa desandans pour servi e akoz?
15 Menm si lalyans avek Abraam ek lalyans avek David i garanti ki desandans sa madanm ti pou vin lerwa, sa rol konman lerwa pa ti pou ase pour ki tou nasyon i ganny beni. Pour zot kapab vreman ganny beni zot ti pou bezwen ganny libere avek zot lenperfeksyon e arive form parti lafanmir iniversel Zeova. Pour sa arive, i neseser ki sa desandans i osi servi konman pret. Nou Kreater ki saz ti fer sa atraver en lot lagreman legal, sa i sa lalyans pour vin en pret parey Melkisedek.
16 Atraver Lerwa David, Zeova ti revele ki I ti pou fer en lalyans spesyal avek Zezi ki annan de bi: pour li ‘asiz lo kote drwat’ Bondye ziska ki i domin son bann lennmi e pour li vin “en pret pour touzour dan menm fason ki Melkisedek.” (Lir Psonm 110:1, 2, 4.d) Akoz “dan menm fason ki Melkisedek”? Parski en bann letan avan okenn desandans Abraam ti erit Later Promiz, Melkisedek ki ti lerwa Salenm ti servi konman “pret Bondye tre-o.” (Ebre 7:1-3) Zeova li menm ki ti apwent li konman pret. I sa sel dimoun ki ganny mansyonnen dan Lekritir Ebre ki ti servi konman tou le de lerwa ek pret. Deplis, akoz napa okenn par ki’n ganny ekrir ki en lot dimoun ti annan sa pozisyon avan li oubyen apre li alor i kapab ganny apele “pret pour touzour.”
17 Atraver sa lalyans spesyal ki Zeova in fer avek Zezi, Zezi i ganny apwente pour vin en pret e i pou reste “en pret pour touzour selon lord Melkisedek.” (Ebr. 5:4-6) Sa i montre nou klerman ki Zeova i garanti ki i pou servi sa Rwayonm Bondye dirize par Kris pour akonpli plan ki i ti annan depi o konmansman konsernan bann imen lo later.
BANN LALYANS I FORM EN BAZ LEGAL POUR SA RWAYONM
18, 19. (a) Ki sa bann lalyans ki nou’n diskite ziska aprezan i montre nou konsernan sa Rwayonm? (b) Ki kestyon nou pou vwar dan lezot lartik?
18 Ler nou get sa bann lalyans ki nou’n diskite ansanm, nou kapab vwar ki mannyer zot relye avek sa Rwayonm Bondye dirize par Kris e ki mannyer laranzman sa Rwayonm i solidman baze lo bann kontra legal. Sa promes ki ti ganny fer dan zarden Edenn i en garanti ki Zeova pou akonpli son bi konsernan later ek limanite atraver desandans sa madanm. Lekel ki ti pou sa desandans e dan ki fason i ti pou servi? Lalyans avek Abraam i donn nou sa bann detay.
19 Sa lalyans avek David i donn nou plis detay ankor konsernan premye parti sa desandans e donn li drwa pour diriz later pour ki sa ki sa Rwayonm i akonpli i reste pour touzour. Sa lalyans pour vin en pret parey Melkisedek i vin sa baz pour sa desandans servi konman pret. Par kont, Zezi pa pou tousel pour fer limanite vin parfe. Lezot osi i ganny swazir pour servi konman lerwa ek pret. Kote zot ti pou sorti? Nou pou diskit lo la dan sa lartik swivan.
a Zenez 3:15: “Mon pou met en laenn ant ou ek sa madanm, ant ou desandans ek son desandans. I pou kraz ou latet e ou pou kraz son talon.”
b Zenez 22:15-18: “15 Lanz Zeova dan lesyel ti kriy Abraam pour en dezyenm fwa 16 e dir: ‘Zeova i dir, ‘par mwan menm mon promet, vi ki ou’n fer sa e ou pa’n ezite donn ou garson, ou sel garson, 17 sirman mon pou beni ou e sirman mon pou fer ou annan en kantite desandans parey zetwal dan lesyel e parey gren disab o bor lanmer e ou desandans pou pran lavil son bann lennmi. 18 Atraver ou desandans tou nasyon lo later pou ganny beni, parski ou’n ekout mwan.’’”
c 2 Samyel 7:12, 16: “12 Ler lafen ou lavi i arive e ou al repoze ansanm avek ou bann zanset, apre mon pou etabli ou desandans apre ou, ou prop garson e mon pou solidman etablir son rwayonm.” “16 Ou lakaz ek ou rwayonm pou an sekirite pour touzour devan ou e ou tronn pou ganny solidman etabli pour touzour.”
d Psonm 110:1, 2, 4: “1 Zeova ti dir mon Senyer: ‘Asiz lo mon kote drwat ziska ki mon met ou bann lennmi anba ou lipye.’ 2 Zeova pou anvoy ou avek ou baton pwisan sorti Siyon e dir: ‘Al domin parmi ou bann lennmi.’” “4 Zeova in fer en serman e i pa pou sanz son nide: ‘Ou en pret pour touzour dan menm fason ki Melkisedek!’”