LO KOUVERTIR | AKOZ ZEZI TI SOUFER E MOR?
Eski sa ti vreman arive?
Pandan prentan lannen 33 Nou Letan, Zezi sorti Nazaret ti ganny egzekite. I ti ganny akize lo fo sarz konmkwa i ti revolte. I ti ganny bate demi mor e kloute lo en poto. I ti mor dan bokou douler. Me Bondye ti resisit li e 40 zour pli tar, Zezi ti mont dan lesyel.
Nou konn sa resi ekstraordiner atraver sa kat Levanzil dan Lekritir Grek ki apel Nouvo Testaman. Eski sa bann keksoz ti vreman arive? Sa i en kestyon apropriye e serye. Si i pa ti leka, lafwa bann Kretyen ti pou napa valer e lespwar lavi eternel dan Paradi ti pou zis en rev. (1 Korentyen 15:14) De lot kote, si sa bann levennman in vreman arive, alor i annan en lavenir merveye pour limanite, enn ki ou kapab benefisye avek. Alor, eski sa bann resi dan Levanzil i vre oubyen zis bann zistwar envante?
KI BANN FE I MONTRE
Kontreman avek bann lezann, in annan bokou zefor ki’n ganny fer pour ekrir bann Levanzil, zot egzakt e byen detaye. Par egzanp, i annan bokou non bann vre landrwa ki kapab ganny vizite ozordi. Zot koz konsernan bann vre dimoun ki zot legzistans in ganny konfirmen par bann istoryen.—Lik 3:1, 2, 23.
Zezi li menm i ganny mansyonnen par bann ekriven dan premye e dezyenm syek.a Lafason bann Levanzil in dekrir lanmor Zezi, i koresponn avek sa metod ki bann Romen ti servi pour egzekit bann dimoun sa letan. Deplis, bann levennman in ganny rakonte dan en fason ki vre, onnet e menm koz lo fot bann disip Zezi. (Matye 26:56; Lik 22:24-26; Zan 18:10, 11) Tou sa bann fakter i montre klerman ki sa bann ekriven Levanzil ti onnet e tou sa ki zot in ekri lo Zezi ti vre.
KI NOU POUR DIR LO REZIREKSYON ZEZI?
An zeneral, laplipar dimoun i aksepte ki Zezi ti viv e mor, tandis ki serten i kestyonn son rezireksyon. Menm son bann zapot pa ti oule krwar ki i ti’n resisite. (Lik 24:11) Bann disip ek lezot dimoun ti nepli annan dout ler zot ti vwar Zezi vivan dan diferan lokazyon. Annefe, en fwa i ti annan plis ki 500 temwen ki ti vwar li.—1 Korentyen 15:6.
Kantmenm bann disip ti konnen ki zot ti riske ganny arete e touye, avek kouraz zot ti pres konsernan rezireksyon Zezi avek tou dimoun, menm avek bann ki ti’n touy li. (Akt 4:1-3, 10, 19, 20; 5:27-32). Eski bann disip ti pou koz lo Zezi avek lardyes si zot pa ti vreman asire ki i ti’n resisite? Lefet ki Zezi ti vreman resisite, sa in fer ki larelizyon Kretyen in annan en lenpak lo lemonn sa letan e la konmela.
I annan bann levidans istorik ki egzakt ki montre ki bann resi Labib lo lanmor ek rezireksyon Zezi i vre. Ler ou lir sa bann levennman atantivman, ou pou asire ki zot ti vreman arive. Ou konviksyon i kapab ganny ranforsi ler ou konpran akoz ki sa bann keksoz in arive. Sa lot lartik pou eksplike.
a Tacitus ki ti ne apepre lannen 55 NouLepok., ti ekri ki “Kris, dan ki sa mo Kretyen i sorti, ti sibir en santans terib pandan renny Tiber dan lanmen en gouverner, apele Pons Pilat.” Suetonius (dan premye syek), Istoryen Zwif, Josephus (premye syek) e zenn Pliny ki ti gouverner Bitini (konmansman dezyenm syek) ti osi koz lo Zezi.