Kestyon lekter

Ler Satan ti dir Ev ki i pa pou mor si i manz sa fri ki sorti lo pye ki donn konnesans lebyen ek lemal, eski i ti a sa moman ki Satan ti konmans sa nide ki bokou dimoun i krwar ladan ozordi, setadir ki nou annan en nanm ki kontinyen viv apre ki nou mor?

Aparaman non. Dyab pa ti dir Ev ki si i manz sa fri ki Bondye in defann zot manze, lekor Ev ti pou mor me ki en keksoz envizib dan li (sa ki serten ozordi i apel nanm imortel) ti pou sorti e al viv kekpar. Satan ti servi en serpan pour koz avek Ev e i ti dir Ev ki si i manz fri ki sorti lo sa pye, ‘sirman, i pa pou mor.’ Satan ti pe esey dir Ev, ki i ti pou kontinyen viv e ki son lavi lo later ti pou pli meyer akoz i pa ti pou bezwen depan lo Bondye.​—Zen. 2:17; 3:3-5.

Alor, si sa fo lansennyman konsernan nanm imortel ki pe ganny ansennyen konmela pa ti konmans dan zarden Edenn, kan ki i ti konmanse? Nou pa kapab dir kan egzakteman. Nou konnen ki tou fo ladorasyon ti ganny detrir dan Deliz pandan letan Noe. Noe ek son fanmir ti bann vre adorater Bondye e zis zot ki ti sirviv sa Deliz. Alor, i ti napa personn ki ti pou ansenny bann fo krwayans apre Deliz.

Alor, sa lansennyman konsernan nanm imortel in bezwen konmans apre Deliz. San dout sa nide ki nanm i imortel ti ganny propaze ler Bondye ti konfiz langaz dan lavil Babel e dimoun ti disperse “partou lo later.” (Zen. 11:8, 9) Nenport ki fason ki sa fo lansennyman ti ganny entrodwir, nou kapab asire ki Dyab ki osi ganny apele “papa mansonz,” i par deryer sa nide e i vreman kontan ki bokou dimoun i krwar ladan.​—Zan 8:44.