Ki mannyer lapriyer i kapab ed ou?
Pamela ti ganny kanser e i ti bezwen rod led medikal. Par kont, i ti osi priy Bondye pour donn li lafors pour andir sa sityasyon difisil. Eski lapriyer ti ed li?
Pamela i dir: “Souvan mon ti per ler mon ti pe swiv tretman pour sa kanser. Me ler mon ti priy Zeova, mon ti santi mwan kalm e mon ti kapab fer fas avek sa sityasyon san lafreyer. Mon ankor pe soufer en kantite, me lapriyer i ed mwan pour reste pozitif. Ler dimoun i demann mwan ki mannyer mon santi, mon dir: ‘Mon pa byen, me mon ere!’”
Byensir, nou pa pou esper ler nou ganny en maladi grav oubyen en problenm vreman serye pour nou priye. Nou tou nou fer fas avek serten difikilte e souvan nou santi ki nou bezwen led. Eski lapriyer i kapab ed nou?
Labib i dir: “Larg ou fardo lo Zeova e i pou soutenir ou. Zanmen i pou les sa enn ki drwat tonbe.” (Psonm 55:22, NWT) Pa sa i rekonfortan! Alor, ki mannyer lapriyer i kapab ed ou? Ler ou priy Bondye dan sa fason apropriye, i pou donn ou sa ki ou bezwen pour fer fas avek ou difikilte.—Vwar sa bwat “Sa ki lapriyer i kapab fer pour ou.”