Zis akoz en sourir!

Helen pe debout o bor prezantwar e i pe sourir. De madanm i pas o bor li.

DE FIY ti pe marse dan Baguio City, Filipin. Zot ti vwar en prezantwar me zot pa ti arete pour gete. Sa ser ki ti pe debout o bor sa prezantwar ti apel Helen, i ti fer en gran sourir. Sa de fiy ti kontinyen zot semen me zot pa ti oubliy sa sourir ki Helen ti’n fer.

Pli tar, ler sa de fiy ti dan bis pour al kot zot, zot ti vwar en gro lansenny jw.org kot en Lasal Rwayonm. Zot rapel ki zot ti’n vwar sa bann menm let lo prezantwar pli boner. Zot ti debarke e zot ti al kot sa Lasal Rwayonm. Laba, zot ti vwar progranm bann renyon ki ganny fer kot sa Lasal Rwayonm.

Sa de madanm i sourir ler zot vwar Helen kot Lasal Rwayonm.

Sa de fiy ti asiste enn sa bann renyon. Zot ti sirprann pour vwar Helen ler zot ti antre dan sa Lasal Rwayonm. Deswit zot ti rekonnet Helen, sa dimoun ki ti’n fer sa sourir avek zot. Helen i dir: “Mon ti en pti pe enkyet, parski mon pa ti konnen akoz zot ti pe vin kot mwan.” Me sa de fiy ti dir Helen ki zot ti’n deza vwar li kot prezantwar.

Sa de fiy ti kontan sa renyon e zot ti santi zot konfortab parmi bann frer ek ser. Ler zot ti vwar lezot pe netway lasal apre renyon, zot ti demande si zot kapab ede. Enn parmi sa de fiy, nepli reste Filipin me sa lot ti konmans asiste renyon e konmans etidye Labib. Zis akoz en sourir!