Mon ti met Zeova premye dan tou mon bann desizyon

Mon ti ne le 19 Me 1940 dan distrik Amioûn, Liban. Detrwa lannen pli tar, nou fanmir ti al reste dan lavil Tripoli, Liban. Mon ti grandi dan en bon fanmir ki konn e kontan Zeova. Nou ti kontan kanmarad e nou ti ere. Mon ti annan trwa ser ek en frer e mon ti pli zenn parmi zot. Pour mon paran, travay pa ti sa keksoz pli enportan. Sa ki ti pli enportan pour nou fanmir, ti letid Labib, bann renyon e pour ed lezot aprann konn Bondye.

I ti annan plizyer Kretyen swazir dan nou kongregasyon. Enn ti apel Michel Aboud, ki ti kondwir letid liv. I ti aprann laverite New York e i ti konmans sa travay predikasyon Liban an 1921. Mon rapel lafason ki i ti demontre respe e ed de zenn ser ki ti’n fek sorti Lekol Gilead. Sa de ser ti apel Anne ek Gwen Beavor. Anne ek Gwen ti vin nou bann bon zanmi. Bokou lannen pli tar, mon ti kontan pour zwenn Anne, Leta-z-ini. En pe letan pli tar, mon ti zwenn Gwen ki ti’n marye avek Wilfred Gooch e zot ti pe servi dan Betel Lonn.

NOU TRAVAY PREDIKASYON LIBAN

Ler mon ti ankor zenn, i ti napa bokou Temwen Zeova Liban. Me avek devouman, nou ti ansenny lezot konsernan Labib. Nou ti fer sa, menm si serten sef relizye ti opoz nou. Mon rapel byen serten keksoz ki ti arive avek nou.

En zour, mwan ek mon ser Sana ti pe anons sa bon nouvel dan en batiman ki annan apartman. Ler nou ti pe koz avek en met lakour, en pret ti vin kot nou ti ete. I paret ki en dimoun ti’n telefonn li. Sa pret ti konmans ensilte mon ser. I ti vin vyolan e i ti pous Sana dan peron. Sana ti ganny dimal. En dimoun ti telefonn gard e ler zot ti vini, zot ti fer sir ki en dimoun ti ed Sana. Zot ti anmenn sa pret kordgard e zot ti dekouver ki i ti annan en fizi. Sa sef gard ti demann li: “Eski ou ansenny dimoun konsernan Bondye oubyen ou ansenny zot pour fer vyolans?”

En lot moman ki mon rapel byen ti ler nou kongregasyon ti lwe en bis pour nou al anons sa bon nouvel dan en distrik ki lwen avek lavil. Nou ti pe pas en bon moman ziska ler ki pret dan sa landrwa ti tande ki nou pe fer e i ti rasanble en group dimoun pour atak nou. Zot ti kriy avek nou, menm anvoy ros avek nou e mon papa ti ganny blese. Mon rapel ki i ti annan disan partou dan son figir. I ti retourn kot bis avek mon manman e nou tou nou ti swiv zot, byen enkyet. Me mon pa pou zanmen oubliy sa ki mon manman ti dir ler i ti pe netway figir mon papa. I ti dir: “Zeova, pardonn zot silvouple. Zot pa konnen ki zot pe fer.”

En lot moman ki mon mazinen, i ler nou ti al vizit nou fanmir Amioûn. Laba, nou ti vwar en levek kot lakour mon granpapa. Sa levek ti konnen ki mon paran i Temwen Zeova. Menm si mon ti annan zis si-z-an, i ti esey fer mwan kanmi e i ti dir: “Akoz ou pa’n batize ou?” Mon ti dir li ki mon ankor en zanfan e ki pour mwan batize, mon ti pou bezwen konn plis lo Labib e annan en lafwa for. I pa ti kontan sa ki mon ti’n dir e i ti dir mon granpapa ki mon malelve.

Me i ti napa bokou sa bann move leksperyans parski normalman bann dimoun Liban i amikal e zot kontan demontre lospitalite. Alor, nou ti kapab koz avek en kantite dimoun lo Labib e fer letid Labib avek en kantite parmi zot.

NOU FANMIR TI DESIDE AL RESTE DAN EN LOT PEI

Ler mon ti ankor lekol, en zenn frer sorti Venezwela ti vin vizit Liban. I ti asiste renyon dan nou kongregasyon e i ti konmans pwente avek mon ser Wafa. Pli tar, zot ti marye e zot ti al reste Venezwela. Dan bann let ki Wafa ti ekri, i ti esey konvenk mon papa pour nou tou al reste Venezwela. I ti fer sa akoz i ti mank nou en kantite. Ptitapti i ti reisi konvenk nou e nou ti al reste Venezwela.

An 1953, nou ti ariv Venezwela e nou ti al reste Caracas, o bor kot prezidan i reste. Mon ti ankor zenn e mon ti kontan ler mon ti vwar prezidan pase dan son gro loto. Me i pa ti fasil pour mon paran adapte avek sa nouvo pei, langaz, kiltir, manze ek klima. Anfet, zot ti pe konmans adapte ler en maler ti arive.

MALER I ARIVE

Mon papa ti konmans malad. Sa ti drol pour nou parski i ti en dimoun for e an bonn sante. Nou pa rapel ki i ti’n deza malad oparavan. Apre sa, i ti aprann ki i ti annan kanser pankreas e i ti fer loperasyon. Malerezman, en semenn pli tar i ti mor.

I difisil pour dekri ki kantite nou ti sagren. Mon ti annan zis 13 an. Nou pa ti ekspekte ki mon papa ti pou mor e nou ti santi ki nou pa pou zanmen ere ankor. Pour en serten letan, i ti difisil pour mon manman aksepte ki son msye ti’n mor. Me nou ti realize ki lavi i bezwen kontinyen e avek led Zeova, nou ti andire. Mon ti lekol Caracas. Ler mon ti annan 16 an, mon ti fini lekol e mon ti anvi ed mon fanmir.

Antretan, mon ser Sana ti’n marye avek Rubén Araujo ki ti sorti Lekol Gilead e ki ti’n retourn Venezwela. Zot ti al reste New York. Mon fanmir ti deside ki mon devret al etidye liniversite. Alor mon ti al reste avek mon ser ek son msye New York anmezir mon ti pe etidye. Letan mon ti pe reste avek zot, zot ti ed mwan vin pli pros avek Zeova. An plis, i ti annan en kantite frer eksperyanse dan nou kongregasyon Espanyol, Brooklyn. Mon ti kontan pour aprann konn Milton Henschel ek Frederick Franz ki tou le de ti pe servi kot Betel Brooklyn.

Ler mon ti pros pour fini mon premye lannen liniversite, mon ti konmans mazinen ki mon pou fer avek mon lavi. Mon ti’n lir e reflesir byen lo bann lartik dan Latour Veyer konsernan bann Kretyen ki ti annan bann lobzektif dan servis Zeova. Mon ti vwar ki mannyer bann pionye ek bann Betelit dan nou kongregasyon ti zwaye e mon ti anvi vin parey zot. Me mon pa ti ankor batize. Mon pa ti tarde pour realize ki i enportan pour dedye mon lavi avek Zeova. Alor mon ti dedye mon lavi avek Zeova e mon ti batize le 30 Mars 1957.

BANN DESIZYON ENPORTAN

Apre ki mon ti’n batize, mon ti konmans reflesir lo fer pionye. Mon ti vreman anvi fer pionye me mon ti vwar ki i ti pou difisil. Mon ti demann mon lekor: ‘Ki mannyer mon kapab pran servis pionye e an menm tan etidye liniversite?’ Mwan ek mon fanmir, nou ti ekri en kantite let kanmarad konsernan mon desizyon pour aret etidye liniversite, pour retourn Venezwela e pour vin en pionye.

Mon ti retourn Caracas Zen 1957. Me mon ti vwar ki sityasyon mon fanmir pa ti tro bon e zot ti bezwen en lot dimoun pour ed zot finansyerman. Ki mannyer mon ti pou kapab ede? Mon ti ganny en travay dan en labank me mon ti vreman anvi fer pionye. Apre tou, i pour sa rezon ki mon ti’n retourn Venezwela. Mon ti determinen pour fer tou le de. Pour plizyer lannen, mon ti travay a plen tan dan en labank e mon ti fer pionye an menm tan. Mon ti vreman bizi me mon ti vreman ere!

Mon ti pli ere ankor, ler mon ti zwenn e marye avek Sylvia, en zoli ser Alman ki vreman kontan Zeova. I ti’n vin reste Venezwela avek son paran. Pli tar, nou ti ganny de zanfan, en fiy ek en garson. Nou garson i apel Michael e nou fiy i apel Samira. Mon ti osi konmans pran swen avek mon manman e i ti vin reste avek nou. Menm si mon ti bezwen aret fer pionye pour pran swen avek mon fanmir, mon ti reste devoue dan sa travay predikasyon. Nou de Sylvia, nou ti fer pionye asistan dan vakans ler nou ti kapab.

EN LOT DESIZYON ENPORTAN

Nou zanfan ti ankor pe lekol ler mon ti pe reflesir lo mon lavi parey in ganny mansyonnen lo konmansman sa lartik. Mon ti annan en lavi vreman konfortab e dimoun ki ti travay dan bann labank ti annan respe pour mwan. Me mwan, mon ti anvi ki lezot i vwar mwan prensipalman konman en Temwen Zeova. Mon ti kontinyen mazin lo sa ki mon ti kapab fer pour ki dimoun i vwar mwan dan sa fason. Alor, mwan ek mon madanm, nou ti diskit lo nou sityasyon finansyel. Si mon ti aret travay, mon ti pou ganny mon larzan tandservis. Vi ki nou ti napa okenn det, nou ti mazinen ki si nou senplifye nou lavi, nou pou annan ase larzan pour en kantite letan.

I pa ti fasil pour fer sa sanzman. Me mon madanm ek mon manman ti siport sa desizyon. Alor ankor enn fwa, mon ti pe al fer pionye. Mon ti vreman kontan. Mon ti’n pare pour fer pionye me nou ti ganny en nouvel ki nou pa ti pe ekspekte.

EN SIRPRIZ!

En zour dokter ti dir nou ki Sylvia i ansent. Nou tou le de nou ti sirprann! Nou ti vreman kontan me mon ti osi mazin lo mon desizyon pour fer pionye. Eski mon ti pou kapab fer pionye? Nou pa ti tarde pour aksepte sa sityasyon e nou ti enpasyan pour annan ankor en lot manm dan nou fanmir. Me mon ti ankor pe mazinen si mon ti pou kapab fer pionye.

Apre ki nou ti’n diskit lo nou bann lobzektif, nou ti deside ki mon pou fer pionye. Nou garson Gabriel ti ne an Avril 1985. Kantmenm sa, mon ti aret travay labank e an Zen 1985, mon ti rekonmans fer pionye. Pli tar, mon ti vin en manm Komite Biro Brans. Me Biro Brans pa ti Caracas, ki vedir mon ti bezwen vwayaz apepre 80 kilomet, de oubyen trwa fwa par semenn pour al kot Biro Brans.

NOU TI AL RESTE EN LOT LANDRWA

Biro Brans ti dan lavil La Victoria, alor nou ti deside pour al reste La Victoria, ki ti pli pros avek Betel. Sa ti en gran sanzman pour nou, parski i ti annan en kantite keksoz nou ti bezwen fer pour nou kit Caracas e al reste La Victoria. Mon vreman apresye mon fanmir parski zot in donn mwan bokou sipor. Mon ser Baha, ti pare pour pran swen avek nou manman. Mike ti’n marye me Samira ek Gabriel ti ankor pe reste avek nou e zot ti bezwen kit zot bann zanmi deryer ler nou ti al reste La Victoria. Sylvia ti bezwen abitye viv dan en pti lavil olye en gran lavil. Nou tou, nou ti bezwen abitye viv dan en pli pti lakaz.

Par kont, keksoz ti sanz ankor. Gabriel ti marye e Samira ti al reste en lot landrwa. An 2007, nou de Sylvia ti ganny envite pour al Betel e nou ankor pe servi Betel ziska ozordi. Mike, nou pli gran garson, i en ansyen e i fer pionye ansanm avek son madanm Monica. Gabriel i osi en ansyen e i servi Itali avek son madanm, Ambra. Samira i fer pionye e i osi ede kot Betel.

MON TI POU FER MENM DESIZYON ANKOR

Mon ti bezwen fer en kantite desizyon enportan dan mon lavi. Kantmenm sa, mon napa okenn regre. Mon ti pou fer menm desizyon ankor. Mon vreman apresye tou bann keksoz ki mon’n kapab fer pour Zeova. Pandan bann lannen ki’n pase, mon’n vwar ki i vreman enportan pour kontinyen annan en bon lanmitye avek Zeova. Menm si nou bezwen fer bann pti desizyon ouswa bann gro desizyon. Zeova i kapab donn nou “lape Bondye ki depas tou sa ki nou kapab konpran.” (Fili. 4:6, 7) Nou de Sylvia, nou kontan pour servi dan Betel e nou santi ki Zeova in beni nou bann desizyon parski nou’n toultan met li premye dan nou lavi.