Kestyon lekter

Ki zapot Pol ti pe esey dir ler i ti dir: “Se parski mon’n aksepte lalwa ki mon’n mor an sa ki konsern lalwa”?​—Gal. 2:19, not.

Zapot Pol ti ekri: “Se parski mon’n aksepte lalwa ki mon’n mor an sa ki konsern lalwa, pour ki mon kapab vin vivan pour Bondye.”​—Gal. 2:19, not.

Sa ki zapot Pol ti ekri ti annan pour fer avek sa pwen enportan ki i ti pe esey fer bann kongregasyon dan distrik Galasi konpran. Serten Kretyen ti pe ganny enfliyanse par bann fo ansenyan ki ti pe ansennyen ki pour en dimoun ganny sove, i bezwen obei Lalwa Moiz, espesyalman lalwa konsernan sirkonsizyon. Me Pol ti konnen ki Bondye ti nepli ekspekte ki son bann serviter i ganny sirkonsi. Pol ti rezonn avek zot e i ti prouve ki sa bann lansennyman ti fo. Sa ti ed bann frer ek ser pour annan plis lafwa dan ranson Zezi Kri.​—Gal. 2:4; 5:2.

Labib i dir ki ler en dimoun i mor i pa konn nanryen e nanryen pa afekte li. (Ekle. 9:5) Ler Pol ti dir “Mon’n mor an sa ki konsern lalwa,” i ti pe dir ki i ti nepli anba Lalwa Moiz. O kontrer, i ti asire ki gras a son lafwa dan ranson, i ti “kapab vin vivan pour Bondye.”

Sa ti posib parski Pol ti’n “aksepte lalwa.” Ki mannyer sa? Pol ti’n fek eksplike ki “en zonm i ganny aprouve konman drwat, pa akoz i swiv lalwa, me akoz son lafwa dan Zezi Kri.” (Gal. 2:16) I vre ki Lalwa ti annan en rol vreman enportan. Pol ti eksplik bann Kretyen Galasi: “I ti ganny donnen pour montre bann move keksoz ki dimoun ti pe fer ziska ki sa desandans i arive. Sa promes ti’n ganny fer avek sa desandans.” (Gal. 3:19) Lalwa ti ganny donnen pour montre ki bann imen enparfe pa ti pou kapab obei Lalwa parfetman e ki zot ti pou bezwen en sakrifis parfe. Alor Lalwa ti ed bann dimoun rekonnet ki Zezi ti “sa desandans.” En dimoun ki demontre lafwa dan Zezi Kri ti kapab ganny aprouve konman drwat par Bondye. (Gal. 3:24) Pol ti ganny aprouve konman drwat parski atraver Lalwa i ti’n aksepte e met lafwa dan Zezi. Alor, Pol ti “mor an sa ki konsern lalwa,” e “vin vivan pour Bondye.” I ti nepli anba Lalwa Moiz me i ti obei Bondye.

Pol ti dir bann Kretyen Ronm en keksoz en pe parey. I ti dir: “Mon bann frer, zot osi zot in mor an rapor avek Lalwa gras a sakrifis Kris. . . . Nou’n ganny libere avek Lalwa parski nou’n mor an sa ki konsern Lalwa ki ti gard nou prizonnyen.” (Rom. 7:4, 6) Dan sa verse e dan Galat 2:19, Pol pa ti pe koz lo lanmor en imen enparfe anba Lalwa. O kontrer i ti pe koz lo liberasyon. Pol ek bann parey li, ti nepli anba Lalwa me gras a zot lafwa dan ranson Kris, zot ti’n ganny libere.