Kestyon lekter

Ki Labib i dir konsernan fer serman?

En serman i en “keksoz vreman serye. I en deklarasyon formel oubyen en promes pour fer en keksoz. Souvandfwa, ler en dimoun i fer en serman i dir ki i pe fer sa serman devan Bondye.” En serman i kapab ganny fer oralman oubyen an ekri.

Serten dimoun i panse ki i mal pour fer en serman akoz Zezi ti dir: “Pa bezwen fer en serman ditou . . . Zis fer sir ki ou ‘Wi’ i wi e ou ‘Non’ i non, parski sa ki ou dir an plis i sorti kot sa enn move.” (Mat. 5:33-37) Byensir, Zezi ti konnen ki dapre Lalwa Moiz, ou kapab fer serten serman e ki serten serviter fidel Bondye ti fer serman. (Zen. 14:22, 23; Egz. 22:10, 11) I ti osi konnen ki Zeova osi in deza fer serman. (Ebr. 6:13-17) Alor, Zezi pa ti pe dir ki nou pa devret fer serman. O kontrer, i ti pe averti nou pour pa fer serman konsernan bann keksoz ki pa enportan oubyen ki pa fer sans. Nou devret fer sa ki nou’n promet pour fer akoz Zeova i anvi nou fer sa.

Alor, ki nou devret fer si nou ganny demande pour fer en serman? Premyerman, fer sir ki ou kapab fer sa ki ou promet. Si ou pa asire, i pou pli bon pour ou pa fer sa serman. Parol Bondye i averti nou: “Pli vomye pa fer en ve ki fer en ve e pa gard son promes.” (Ekle. 5:5) Apre, etidye bann prensip Labib ki annan pour fer avek sa serman e azir dapre ou konsyans ki’n ganny gide par Labib. Ki serten sa bann prensip Labib?

Serten serman i annakor avek lavolonte Bondye. Par egzanp, Temwen Zeova i fer bann ve ler zot marye. Sa bann ve i en kalite serman. Zour zot maryaz, sa nouvo marye ek nouvel marye i promet devan Bondye ek bann temwen, pour kontan kanmarad, pour pran swen avek kanmarad e respekte kanmarad “osi lontan ki [zot] vivan.” (I annan serten koup ki pa servi sa bann menm mo me kantmenm sa, zot pe fer en ve devan Bondye.) Apre sa, zot vin msye ek madanm e zot maryaz i devret dire tou dilon zot lavi. (Zen. 2:24; 1 Kor. 7:39) Sa ve maryaz i apropriye e i an armoni avek lavolonte Bondye.

Serten serman i kont lavolonte Bondye. Par egzanp, en vre Kretyen pa pou fer serman pour servi zarm pour defann en pei oubyen pour dir ki i nepli annan lafwa dan Bondye. Si i fer sa, i pa pe obei bann komannman Bondye. Bann Kretyen “pa form parti sa lemonn,” alor nou pa devret partisip dan bann deba ek lager.​—Zan 15:19; Iza. 2:4; Zak 1:27.

Serten serman i annan pour fer avek nou konsyans. Parfwa avan nou deside si nou pou fer en serman, nou bezwen reflesir byen lo konsey ki Zezi ti donnen pour “rann sa ki pour Sezar avek Sezar, me sa ki pour Bondye avek Bondye.”​—Lik 20:25.

Par egzanp, meton en Kretyen i fer laplikasyon pour ganny sitwayennte en pei ouswa pour ganny paspor sa pei e i aprann ki i bezwen fer en serman pour reste fidel avek sa pei. Si sa serman i vedir ki sa Kretyen pou bezwen fer en keksoz ki kont Lalwa Bondye, son konsyans ki’n ganny gide par Labib, pou anpes li fer sa serman. Me gouvernman i kapab les li sanz serten mo dan sa serman pour ki son konsyans i permet li pour fer sa serman.

En Kretyen ki fer sa pou pe swiv sa prensip ki dan Romen 13:1, ki dir: “Tou dimoun i devret soumet avek bann lotorite.” Alor sa Kretyen i kapab deside ki i napa nanryen mal pour promet pour fer en keksoz ki Bondye i ekspekte ki tou Kretyen i fer.

I vreman enportan pour ekout nou konsyans sirtou si nou ganny demande pour servi en lobze ouswa fer en aksyon ler nou pe fer en serman. Bann Romen ek bann Sit dan letan lontan ti fer serman par zot lepe, sa ti montre ki zot ti annan konfyans dan zot bondye lager. Bann Grek ti lev en lanmen ver lesyel ler zot ti fer en serman. Sa i montre ki zot ti rekonnet ki i ti annan en lafors pwisan ki ti pran kont sa ki zot ti dir, sa ki zot ti fer e ki zot ti bezwen rann kont avek.

Byensir, bann serviter Zeova pa pou fer serman lo en lanblenm nasyonal ki annan pour fer avek fo ladorasyon. Me ki ou pou fer si ankour ou ganny demande pour met ou lanmen lo en Labib e fer serman pour donn en temwannyaz ki onnet? Dan sa ka, ou kapab deside pour fer sa ki ou’n ganny demande pour fer parski Labib i koz konsernan bann serviter fidel ki ti fer en serman avek en aksyon. (Zen. 24:2, 3, 9; 47:29-31) I enportan pour rapel ki ler ou pe fer en serman koumsa, ou pe promet devan Bondye pour koz laverite. Ou bezwen pare pour reponn nenport kestyon dan en fason onnet.

Vi ki nou apresye nou lanmitye avek Zeova, nou devret priye e reflesir byen lo nenport serman ki nou ganny demande pour fer, pour ki nou pa al kont nou konsyans ouswa bann prensip Labib. Si ou deside pour fer en serman, ou bezwen fer sir ki ou fer sa ki ou’n promet.​—1 Pyer 2:12.